តុលាការកំពូលកម្ពុជាបានបដិសេធសំណើរបស់លោក រ៉ុង ឈុន អតីតទីប្រឹក្សាគណបក្សកម្លាំងជាតិ ដែលសុំអនុញ្ញាតឱ្យលោកធ្វើដំណើរចេញពីរាជធានីភ្នំពេញរយៈពេល ១៥ថ្ងៃ ដើម្បីចូលរួមពិធីបុណ្យកាន់បិណ្ឌ និងភ្ជុំបិណ្ឌនៅស្រុកកំណើតក្នុងខេត្តកណ្ដាល។ តុលាការកំពូលលើកមូលហេតុថា តុលាការ មិនអាចពិចារណាលើពាក្យស្នើសុំច្បាប់របស់លោកឡើយ ពីព្រោះថា សាលដីការបស់តុលាការកំពូលគឺជាសេចក្តីសម្រេចស្ថាពរ។
អតីតទីប្រឹក្សាគណបក្សកម្លាំងជាតិ និងជាទីប្រឹក្សាសមាគមគ្រូបង្រៀនកម្ពុជាឯករាជ្យ (CITA) លោក រ៉ុង ឈុន បង្ហាញការខកចិត្តដែលតុលាការកំពូល មិនអនុញ្ញាតឲ្យលោកទៅចូលរួមពិធីបុណ្យកាន់បិណ្ឌ និងភ្ជុំបិណ្ឌនៅស្រុកកំណើតតាមការស្នើសុំរបស់លោក។ លោក យល់ថា ការលើកហេតុផលរបស់តុលាការ ដោយបញ្ជាក់ថា ខ្លួនមិនអាចពិនិត្យសំណើសុំច្បាប់របស់លោកបានទេ ដោយសារសាលដីការបស់តុលាការកំពូលចុះថ្ងៃទី១៩ ខែមិថុនា គឺជាសេចក្តីសម្រេចស្ថាពរ និងមានអានុភាពអនុវត្ត។ លោកយល់ថាការសម្រេចនេះជាការរឹតត្បិតបន្ថែមលើសេរីភាពរបស់លោក។
លោក រ៉ុង ឈុន បានឱ្យដឹងថា លិខិតរបស់តុលាការកំពូលបានណែនាំឱ្យលោកដាក់សំណើទៅសាលាដំបូងរាជធានីភ្នំពេញជំនួសវិញ ដូច្នេះ លោកនឹងដាក់សំណើទៅសាលាដំបូងរាជធានីភ្នំពេញ ដើម្បីសុំអនុញ្ញាតឱ្យទៅចូលរួមពិធីបុណ្យនៅស្រុកកំណើតក្នុងសប្តាហ៍ក្រោយ។ លោកថា លោកចង់ទៅធ្វើបុណ្យជាមួយបងប្អូន និងសាច់ញាតិ និងឧទ្ទិសកុសលដល់ឪពុក ម្តាយ និងជីដូនជីតាដែលបានទទួលមរណភាព។
លោក រ៉ុង ឈុន សង្ឃឹមថា សាលាដំបូងរាជធានីភ្នំពេញនឹងអនុញ្ញាតឱ្យលោកធ្វើដំណើរទៅខេត្តកណ្ដាល ដោយលោកបានលើកឡើងថា ការធ្វើបុណ្យក្នុងឱកាសភ្ជុំបិណ្ឌ គឺជាប្រពៃណីសំខាន់មួយរបស់ប្រជាជនកម្ពុជា។
ក្នុងលិខិតចុះថ្ងៃទី២៥ ខែកញ្ញា ប្រធានតុលាការកំពូល លោក ជីវ កេង បានបញ្ជាក់ថា តុលាការកំពូលមិនអាចពិនិត្យសំណើសុំច្បាប់របស់លោក រ៉ុង ឈុន បានទេ ដោយសារសាលដីកាចុះថ្ងៃទី១៩ ខែមិថុនា ឆ្នាំ២០២៦ ជាសេចក្តីសម្រេចស្ថាពរ និងមានអានុភាពអនុវត្ត។ តុលាការកំពូលក៏បានបញ្ជាក់ថា សាលដីកានោះត្រូវបានបញ្ជូនទៅអយ្យការអមសាលាដំបូងរាជធានីភ្នំពេញ ដើម្បីអនុវត្តតាមសមត្ថកិច្ចរួចហើយ ដោយយោងតាមមាត្រា ៤៩៧ នៃក្រមនីតិវិធីព្រហ្មទណ្ឌ។
កាលពីថ្ងៃទី២២ ខែកញ្ញា លោក រ៉ុង ឈុន បានដាក់សំណើសុំច្បាប់ទៅតុលាការកំពូល ដោយសុំអនុញ្ញាតឱ្យលោកចេញពីភ្នំពេញរយៈពេល ១៥ថ្ងៃ ទៅធ្វើបុណ្យជាមួយបងប្អូន និងសាច់ញាតិ និងឧទ្ទិសកុសលដល់ឪពុក ម្តាយ និងជីដូនជីតាដែលបានទទួលមរណភាព។
ការស្នើសុំនេះកើតឡើងបន្ទាប់ពីសាលដីការបស់តុលាការកំពូលបានដាក់លោកក្រោមការត្រួតពិនិត្យរបស់តុលាការ និងហាមលោកមិនឱ្យចាកចេញពីភ្នំពេញ។ លោកក៏ត្រូវបានហាមឃាត់ពីសកម្មភាពនយោបាយ និងការចូលរួមក្នុងការជួបជុំសាធារណៈក្នុងអំឡុងពេលនៃការត្រួតពិនិត្យ។
ជុំវិញបញ្ហានេះ ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅអូស្ត្រាលី លោក ស៊ឹង សែនករុណា បានរិះគន់ការសម្រេចរបស់តុលាការ ដោយ លោកអះអាងថា ប្រព័ន្ធតុលាការកម្ពុជាខ្វះឯករាជ្យភាព និងថាការរឹតត្បិតលើលោក រ៉ុង ឈុន រួមទាំងការមិនអនុញ្ញាតឱ្យលោកធ្វើដំណើរទៅស្រុកកំណើតក្នុងឱកាសបុណ្យភ្ជុំបិណ្ឌ គឺជាការរឹតត្បិតសិទ្ធិសេរីភាពរបស់លោក។
លោក ស៊ឹង សែនករុណា៖ «អីចឹងការសម្រេចបែបនេះ វាជាអំពើអគុណធម៌ ហើយយើងឃើញហើយ បម្រាមមិនឱ្យលោក រ៉ុង ឈុន ទៅមានសេរីភាពធ្វើនយោបាយ ហើយបិទសិទ្ធិសេរីភាពដើរហើ ហើយសូម្បីតែការទៅប្រារព្ធពិធីបុណ្យនៅស្រុកកំណើត ក៏មិនអនុញ្ញាតដែរ វាជាអំពើកាន់បង្ហាញឱ្យច្បាស់អំពី អំណាចនៃនយោបាយ ដែលភ្ជាប់ជាមួយតុលាការ នេះ ជាអំពើអគុណធម៌ និងអមនុស្សធម៌មែនទែន សម្រាប់ក្នុងនាមជាខ្មែរដូចគ្នា»។
លោក សឹង សែនករុណា បន្ថែមទៀតថា ការសម្រេចរបស់តុលាការ គឺមិនបានធ្វើតាមចំណេះ ជំនាញវិជ្ជាជីវៈរបស់ខ្លួនឱ្យបានត្រឹមត្រូវនោះទេ គឺការសម្រេចនេះទៅតាមការគូសវាសរបស់អ្នកដែលមានឥទ្ធិពល អ្នកដែលមានអំណាចនយោបាយបញ្ជា។
កាលពីថ្ងៃទី១៩ ខែមិថុនា តុលាការកំពូលបានរក្សាការផ្តន្ទាទោសលោក រ៉ុង ឈុន ពាក់ព័ន្ធនឹងបទចោទប្រកាន់ពីបទញុះញង់ឱ្យមានភាពវឹកវរធ្ងន់ធ្ងរដល់សន្តិ សុខសង្គម។ លោកត្រូវបានសាលាដំបូងរាជធានីភ្នំពេញផ្តន្ទាទោសឱ្យជាប់ពន្ធនាគារ ៤ឆ្នាំ និងពិន័យជាប្រាក់ ៤លានរៀល។ ប៉ុន្តែតុលាការកំពូលបានព្យួរទោស និងដាក់លោកក្រោមការត្រួតពិនិត្យរបស់តុលាការរយៈពេលបីឆ្នាំ។ តុលាការក៏បានកាត់បន្ថយការហាមឃាត់សិទ្ធិនយោបាយពីមួយជីវិតមកត្រឹមប្រាំឆ្នាំ។ តុលាការកំពូលបានហាម មិនឱ្យដូរទីលំនៅក្រៅពីភ្នំពេញ និង ហាមមិនឱ្យថ្លែងសារនយោបាយនៅតាមទីសាធារណៈ និងហាមមិនឱ្យមានវត្តមានក្នុងចំណោមមហាជន។
អ្នកឃ្លាំមើលសង្គមកម្ពុជា អះអាងថា ការដាក់កម្រិតមិនឱ្យលោក រ៉ុង ឈុន ចាកចេញពីទីក្រុងភ្នំពេញ ជារឿងដ៏ធ្ងន់ធ្ងរសម្រាប់អ្នកនយោបាយប្រឆាំង៕
