ប្រធានព្រឹទ្ធសភាលោក ហ៊ុន សែន ដែលធ្លាប់តែថ្លែងតាមវេទិកាសាធារណៈប្រើពាក្យសម្ដីអសុរស ជេរប្រមាថ និងគំរាមកំហែងពលរដ្ឋដាក់ក្បាលមេក្រូនោះបានបញ្ជាឱ្យតុលាការចាត់វិធានការលើស្ត្រីទាំងឡាយណាដែលជេរប្រមាថ និងហែកហួរគ្នាតាមបណ្ដាញសង្គម។ លោក ហ៊ុន សែនថា ពាក្យសម្ដីអសុរសរបស់ស្ត្រីមួយចំនួននៅតាមបណ្ដាញសង្គមគឺមិនអាចទទួលយកបានឡើយ និងបានធ្វើឱ្យសីលធម៌សង្គមធ្លាក់ចុះយ៉ាងធ្ងន់ធ្ងរ។ ចំណែកឯ អ្នកឃ្លាំមើល បដិសេធគាំទ្រការបញ្ចេញមតិបែបអសុរស និងជេរប្រមាថ ឬការគំរាមកំហែងក្នុងគ្រប់ទម្រង់ ប៉ុន្តែពួកគាត់ថា អ្នកដែលបានផ្ដល់គំរូអាក្រក់ និងសាបព្រោះការជេរប្រមាថបណ្ដាលឱ្យសីលធម៌សង្គមធ្លាក់ចុះកាន់តែខ្លាំងនោះ គឺលោក ហ៊ុន សែន ខ្លួនឯង។
ប្រធានព្រឹទ្ធសភាលោក ហ៊ុន សែន បានបញ្ជាដល់តុលាការត្រូវចាត់វិធានការម៉ឺងម៉ាត់ចំពោះស្ត្រីទាំងឡាយណាដែលជេរប្រមាថ និងហែកហួរផ្សព្វផ្សាយនៅតាមបណ្ដាញសង្គម។ លោកក៏បានដាក់បញ្ជាឱ្យក្រសួងកិច្ចការនារីជាអ្នកទទួលខុសត្រូវធ្វើដើមបណ្ដឹងលើស្ត្រីដែលប្រើពាក្យសម្ដីអសុរោះនៅតាមបណ្ដាញសង្គម និងណែនាំឱ្យក្រសួងស្ថាប័នពាក់ព័ន្ធផ្សេងចូលរួមតាមដាន។
លោក ហ៊ុន សែន ថ្លែងថា ពាក្យសម្ដីជេរប្រមាថរបស់ស្ត្រីមួយចំនួននៅតាមបណ្ដាញសង្គមគឺបានប៉ះពាល់ធ្ងន់ធ្ងរដល់តម្លៃស្ត្រី និងការធ្លាក់ចុះនៃសីលធម៌សង្គម។ លោកថ្លែងបែបនេះនៅក្នុងកិច្ចប្រជុំជាមួយប្រតិភូក្រុមប្រឹក្សាជាតិកម្ពុជាដើម្បីស្ត្រី នៅថ្ងៃទី១៤ ខែសីហា។
លោក ហ៊ុន សែន៖ «សីលធម៌សង្គមវាធ្លាក់ដល់ប៉ុណ្ណា? ដល់ថ្នាក់ជេរបញ្ចោរគេ ជេរបញ្ចោររហូតដល់ជេរដល់រដ្ឋលេខាធិការក្រសួងកិច្ចការនារីទៀត ជេរអ្នកនេះ ជេរអ្នកនោះ ជេរតាមចិត្ត បើជេរតែរបៀបអ៊ីចឹង ហើយជេរដាក់តាម (Facebook) រួចហើយបង្ហោះតាម (TikTok) តាមស្អីគ្រប់សព្វទាំងអស់ រួចគេយកទៅចែករំលែក អ៊ីចឹងយើងទទួលបានទេអាហ្នឹង? យើងនិយាយពីប្រឹងចង់ងាប់ លើកកម្ពស់ស្ត្រី សីលធម៌សង្គម ប៉ុន្តែបែរជាមានស្ត្រីម្នាក់ពីរនាក់យកមកធ្វើអ៊ីចឹង»។
ចំណាត់ការរបស់លោក ហ៊ុន សែន នាពេលនេះគឺបន្ទាប់ពីស្ត្រីម្ចាស់ហាងលក់ទូរស័ព្ទដៃម្នាក់ឈ្មោះ ចិន្តា សុវណ្ណារី មានជម្លោះជាមួយកងទ័ពជួរមុខ និងត្រូវបានបែកធ្លាយវីដេអូជេរប្រមាថហែកហួរគ្នាតាមបណ្ដាញសង្គម។ សមត្ថកិច្ចរាជធានីភ្នំពេញបានឃាត់ខ្លួនស្ត្រីរូបនេះកាលពីថ្ងៃទី១៣ ខែសីហា ដោយចោទប្រកាន់ពីបទ ធ្វើឱ្យខូចទឹកចិត្តកងទ័ព និងបានបញ្ជូនសំណុំរឿងបន្តទៅតុលាការ។
ទោះជាយ៉ាងណា ការកំណត់គោលដៅរបស់លោក ហ៊ុន សែន លើស្ត្រីដែលប្រើពាក្យជេរប្រមាថតាមបណ្ដាញសង្គមឱ្យប្រឈមមុខនឹងច្បាប់នេះ រងការរិះគន់ថា ជាការអនុវត្តច្បាប់ស្តង់ដារពីរ និងមិនអាចជួយស្ដារសីលធម៌សង្គមបានឡើយ។ ទន្ទឹមនឹងស្ត្រីមួយចំនួនត្រូវបានគំរាមចាត់វិធានការតាមផ្លូវច្បាប់ អ្នកគាំទ្រគណបក្សប្រជាជនកម្ពុជាឯណោះវិញនៅតែបន្តប្រើបណ្ដាញសង្គមជេរប្រមាថ និងគំរាមកំហែងពលរដ្ឋ ឬអ្នកដែលមាននិន្នាការនយោបាយផ្ទុយ ដោយគ្មានអាជ្ញាធរណាចាត់វិធានការនៅឡើយ។ ផ្ទុយទៅវិញ ក្រុមឃោសនិកដែលប្រើពាក្យសម្ដីអសុរោះទាំងនោះថែមទាំងទទួលបានការគាំទ្រ និងការពារពីក្រុមអ្នកមានអំណាចទៅវិញ។
ជាមួយគ្នានេះ លោក ហ៊ុន សែន ក៏រងការរិះគន់ថា គឺជាមេដឹកនាំសាបព្រោះអំពើហិង្សាក្នុងសង្គម និងជាអ្នកផ្ដល់គំរូអាក្រក់រឿងជេរប្រមាថនៅតាមបណ្ដាញសង្គម ដែលបណ្ដាលឱ្យសីលធម៌សង្គមកាន់តែធ្លាក់ចុះ។ កន្លងមក ជារឿយៗ លោក ហ៊ុន សែន តែងតែប្រើវេទិកាសាធារណៈ ហើយពេលខ្លះទៀតថែមទាំងថ្លែងដាក់មេក្រូនៅចំពោះមុខនិស្សិតរាប់ពាន់នាក់ ដោយប្រើពាក្យសម្ដីជេរប្រមាថ និងគំរាមកំហែងលើពលរដ្ឋណាដែលមានមតិផ្ទុយពីរដ្ឋាភិបាលដោយមិនអៀនខ្មាសឡើយ។
លោក ហ៊ុន សែន៖ «មានអាឡប់រត់ចោលស្រុកឯណា ខ្ញុំមិនស្ដាប់និយាយទេ ប៉ុន្តែប្រពន្ធខ្ញុំថា មានគេថា រឿងមកពីចែកលុយគ្នាមិនស្មើ *** ម៉ែអាគេបាញ់ និយាយឱ្យវាអ៊ីចេះតែម្ដងទៅ អាហ្នឹងអ៊ីចឹង បានវារត់ចោលស្រុកនោះ អញជេរត្រង់ៗអ៊ីចឹងតែម្ដងទៅ។ អូ! ធ្វើនាយករដ្ឋមន្ត្រីហាមជេរ? ទេ ធ្វើនាយករដ្ឋមន្ត្រីជេរបានតើ មនុស្សត!»។
ជុំវិញរឿងនេះ ឃ្លាំមើលបញ្ហាសង្គមចង់ឃើញប្រជាពលរដ្ឋបញ្ចេញមតិរិះគន់បែបស្ថាបនាប្រកបដោយក្រមសីលធម៌ខ្ពស់ និងមិនគាំទ្រការបញ្ចេញមតិទាំងឡាយណាបែបភាសាអសុរោះ ជេរប្រមាថ និងគំរាមកំហែងក្នុងរូបភាពណាមួយឡើយ។ ពួកគាត់ក៏ស្នើឱ្យពលរដ្ឋមួយចំនួនបញ្ឈប់នូវទម្លាប់ទាស់ទែងពេលមានជម្លោះជេរប្រមាថគ្នាតាមបណ្ដាញសង្គម និងត្រូវស្វែងយល់ពីតម្លៃនៃវប្បធម៌ សីលធម៌ គុណធម៌ ដើម្បីរួមចំណែកកាត់បន្ថយជម្លោះ និងលើកកម្ពស់សុជីវធម៌ក្នុងសង្គម។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា លើកឡើងថា ការធ្លាក់ចុះនៃសីលធម៌សង្គម និងការផ្ទុះជម្លោះទាស់ទែងរបស់ពលរដ្ឋ រហូតឈានដល់ការជេរប្រមាថគ្នាតាមបណ្ដាញសង្គមជាបន្តបន្ទាប់ គឺជាគ្រាប់ពូជដែលមេដឹកនាំកំពូល និងមន្ត្រីគ្រាក់ៗមួយចំនួនជាអ្នកសាបព្រោះឡើង។ ជាមួយគ្នានេះ លោកថា បញ្ហាវិស័យអប់រំ និងកត្តាបុគ្គលខ្លួនឯង គឺជាឫសគល់ដែលធ្វើឱ្យបញ្ហាអសីលធម៌ក្នុងសង្គមនៅតែបន្តកើតមានឡើង។ ទោះជាយ៉ាងណា លោកក៏ទាមទារឱ្យអាជ្ញាធរចាត់វិធានការតាមផ្លូវច្បាប់ឱ្យបានម៉ឺងម៉ាត់ដូចគ្នា ទៅលើឃោសនិកគណបក្សកាន់អំណាចដែលប្រើពាក្យសម្ដីជេរប្រមាថលើបណ្ដាញសង្គម។
លោក ស៊ឹង សែនករុណា៖ «ការមានវិធានការមួយផ្នែកនេះ មិនអាចធ្វើឡើងអន្តរាគមន៍មានភាពល្អប្រសើរទេ បើសិនជាមេដឹកនាំដែលប្រើនូវឥរិយាបថច្រងេងច្រងាង នូវពាក្យសម្ដីជេរប្រមាថហិង្សាហ្នឹង នៅតែបន្តកើតមាន ហើយនៅតែបណ្ដែតបណ្ដោយឱ្យបុរសដែលជាអ្នកសាបព្រោះនូវសម្ដីអសុរោះជេរប្រមាថទៅលើអ្នកនយោបាយផ្សេងៗហ្នឹង នៅតែបន្តមាន ហើយអ្នកគាំទ្រគណបក្សកាន់អំណាចក៏អ៊ីចឹងដែរ ក៏ប្រើប្រាស់ការជេរប្រមាថទៅលើសកម្មជនផ្សេងៗនៅតាមបណ្ដាញសង្គមជាហូរហែ ទាំងគេស្គាល់ឈ្មោះ ស្គាល់គណនី (Facebook) ច្បាស់លាស់ ប៉ុន្តែសមត្ថកិច្ចមិនបានអើពើទេ។ ក្រុមគាំទ្រខ្លួនហ្នឹងតែងតែរួចផុតពីសំណាញ់ច្បាប់ តែបើអ្នកទាំងអស់ហ្នឹងគឺជាសកម្មជនបក្សប្រឆាំង ក៏មិនបាន ២៤ ម៉ោងទាន់ទេ នឹងមានវិធានការ ចាត់វិធានការ ចោទប្រកាន់អញ្ចេះ ចោទប្រកាន់អញ្ចុះ វាជាការអនុវត្តច្បាប់អត់ស្មើភាពគ្នាទេ»។
លោក ស៊ឹង សែនករុណា លើកឡើងទៀតថា ការសាបព្រោះអំពើហិង្សា និងបញ្ហាអសីលធម៌ក្នុងសង្គមកំពុងចាក់ឫសយ៉ាងជ្រៅក្នុងសង្គមកម្ពុជា។ មិនតែប៉ុណ្ណោះ លោកថា ការអនុវត្តច្បាប់ដោយមានស្តង់ដារពីរ និងការបន្តប្រើពាក្យសម្ដីជេរប្រមាថរបស់មេដឹកនាំដាក់ក្បាលមេក្រូ នឹងផ្ដល់ជាគំរូអាក្រក់ដល់ពលរដ្ឋមួយចំនួនយកតម្រាប់តាមដែលធ្វើឱ្យបញ្ហាអសីលធម៌ពលរដ្ឋ និងជម្លោះក្នុងសង្គមកាន់តែធ្ងន់ធ្ងរបន្ថែមទៀត៕
