អ្នកឃ្លាំមើលសង្គមអះអាងថា ដំណើរទស្សនកិច្ចផ្លូវរដ្ឋរបស់ប្រធានាធិបតីភូមាលោក មីន អ៊ុងឡាំង (Min Aung Hlaing) មកកម្ពុជានៅដើមខែកញ្ញា អាចជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលយោធាភូមា ដើម្បីស្វែងរកការទទួលស្គាល់ និងភាពស្របច្បាប់កាន់តែខ្លាំងនៅក្នុងតំបន់ ខណៈរបបរបស់លោកនៅតែប្រឈមនឹងការរិះគន់ និងសម្ពាធពីសហគមន៍អន្តរជាតិជុំវិញវិបត្តិនយោបាយ អំពើហិង្សា និងបញ្ហាសិទ្ធិមនុស្ស។ អ្នកឃ្លាំមើលជំរុញឱ្យកម្ពុជាប្រើដំណើរទស្សនកិច្ចនេះ ដើម្បីលើកកម្ពស់កិច្ចខិតខំប្រឹងប្រែងស្វែងរកសន្តិភាព និងជំរុញឱ្យមានដំណោះស្រាយនយោបាយនៅភូមា។
អ្នកតាមដានភូមិសាស្ត្រនយោបាយ លោក សេង វណ្ណលី បានប្រាប់ទូរទស្សន៍អាស៊ីសេរីថា ដំណើរទស្សនកិច្ចរបស់ ប្រធានាធិបតីភូមា លោក មីន អ៊ុងឡាំង មិនគួរត្រូវបានមើលឃើញត្រឹមតែជាកិច្ចការទូតធម្មតានោះទេ។ លោកថា វាអាចជាផ្នែកមួយនៃកិច្ចខិតខំប្រឹងប្រែងរបស់មេដឹកនាំយោធាភូមា ដើម្បីស្វែងរកការទទួលស្គាល់ និងភាពស្របច្បាប់កាន់តែខ្លាំងនៅក្នុងតំបន់។
លោក សេង វណ្ណលី បាននិយាយថា ដំណើរទស្សនកិច្ចនេះក៏អាចមានគោលបំណងបំបែកភាពឯកោផ្នែកការទូតរបស់ភូមា និងបង្ហាញថា រដ្ឋាភិបាលយោធារបស់ខ្លួនកំពុងទទួលបានការទទួលស្គាល់ឡើងវិញពីប្រទេសជិតខាង។ លោក ថា កម្ពុជាអាចប្រឈមនឹងការរិះគន់ ប្រសិនបើទទួលលោក មីន អ៊ុងឡាំង ក្នុងកម្រិតខ្ពស់ ដោយមិនប្រើជំនួបនេះដើម្បីជំរុញឱ្យមានការបញ្ឈប់អំពើហិង្សា ការដោះលែងអ្នកទោសនយោបាយ និងការវិលត្រឡប់ទៅរកដំណើរការនយោបាយដែលមានការចូលរួមពីគ្រប់ភាគី។ លោកថា កម្ពុជាគួរប្រើការទូតដើម្បីជំរុញសន្តិភាព និងគោរពគោលការណ៍របស់អាស៊ាន ជាជាងផ្តល់ឱកាសឱ្យមេដឹកនាំយោធាភូមាកែលម្អរូបភាពរបស់ខ្លួននៅលើឆាកអន្តរជាតិ។
លោក សេង វណ្ណលី បន្ថែមថា អ្វីដែលគួរឱ្យព្រួយបារម្ភ គឺប្រសិនបើលោក ហ៊ុន ម៉ាណែត ទទួលលោក មីន អ៊ុងឡាំង ក្នុងកម្រិតខ្ពស់ដោយមិនភ្ជាប់ជាមួយសារច្បាស់លាស់អំពីការបញ្ឈប់អំពើហិង្សា ការដោះលែងអ្នកទោសនយោបាយ និងការវិលត្រឡប់ទៅរកដំណោះស្រាយនយោបាយដែលមានការចូលរួម នោះកម្ពុជាអាចត្រូវបានមើលឃើញថា កំពុងជួយផ្តល់ភាពស្របច្បាប់ដល់មេដឹកនាំដែលបានឡើងកាន់អំណាចពីរដ្ឋប្រហារ។
លោក សេង វណ្ណលី បន្ថែមថា សំណួរសំខាន់សម្រាប់កម្ពុជាមិនមែនថា តើគួរជួបលោក មីន អ៊ុងឡាំង ឬអត់នោះទេ ប៉ុន្តែថា តើកម្ពុជានឹងប្រើជំនួបនេះដើម្បីទាមទារឱ្យមានជំហានជាក់លាក់ឆ្ពោះទៅរកការបញ្ចប់អំពើហិង្សា និងការអនុវត្តកិច្ចសន្យាសន្តិភាពឬយ៉ាងណា។ ប្រសិនបើកម្ពុជាគ្រាន់តែទទួលស្វាគមន៍លោក មីន អ៊ុងឡាំង និងថតរូបជាមួយគ្នា នោះវាអាចផ្តល់ផលប្រយោជន៍ផ្នែកនយោបាយដល់របបយោធាច្រើនជាងប្រជាពលរដ្ឋភូមា។
ការអះអាងរបស់អ្នកតាមដានភូមិសាស្ត្រនយោបាយរូបនេះ បន្ទាប់ពីព្រឹទ្ធសភាកម្ពុជាបានឱ្យដឹងកាលពីថ្ងៃទី១៧ ខែសីហា ថា ថ្នាក់ដឹកនាំជាន់ខ្ពស់បានចុះពិនិត្យការរៀបចំទីតាំងសម្រាប់ព្រះរាជពិធីសម្ពោធដាក់ឱ្យប្រើប្រាស់ជាផ្លូវការវិមានសាមគ្គីភាព និងដំណើរទស្សនកិច្ចផ្លូវរដ្ឋរបស់ប្រធានាធិបតីភូមា។
អ្នកនាំពាក្យព្រឹទ្ធសភា លោក ជា ធីរិទ្ធ បានប្រាប់សារព័ត៌មានក្នុងស្រុកថា ដំណើរទស្សនកិច្ចផ្លូវរដ្ឋរបស់ប្រធានាធិបតីភូមាលោក មីន អ៊ុងឡាំង នឹងជួបថ្នាក់ដឹកនាំជាន់ខ្ពស់កម្ពុជា រួមមានប្រធានព្រឹទ្ធសភា លោក ហ៊ុន សែន និងនាយករដ្ឋមន្ត្រី លោក ហ៊ុន ម៉ាណែត។
ដំណើរទស្សនកិច្ចនេះធ្វើឡើង ខណៈមេដឹកនាំយោធាភូមាកំពុងព្យាយាមពង្រឹងទំនាក់ទំនងការទូតជាមួយប្រទេសជិតខាង បន្ទាប់ពីរដ្ឋប្រហារឆ្នាំ២០២១ ដែលបានផ្តួលរំលំរដ្ឋាភិបាលជាប់ឆ្នោត។
អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ បានប្រាប់ទូរទស្សន៍អាស៊ីសេរីថា ដំណើរទស្សនកិច្ចរបស់លោក មីន អ៊ុងឡាំង មកកម្ពុជាមានគោលបំណងសំខាន់ពីរ គឺបន្តកិច្ចសហប្រតិបត្តិការរវាងរដ្ឋាភិបាលទាំងពីរ និងពង្រឹងទំនាក់ទំនងរវាងមេដឹកនាំដែលកំពុងប្រឈមនឹងសម្ពាធពីសហគមន៍អន្តរជាតិ។ លោកថា មេដឹកនាំយោធាភូមាចង់ឱ្យកម្ពុជាជួយបញ្ចុះបញ្ចូលអាស៊ានឱ្យទទួលស្គាល់រដ្ឋាភិបាលដែលបានបង្កើតឡើងបន្ទាប់ពីការបោះឆ្នោតនៅភូមា និងអនុញ្ញាតឱ្យរដ្ឋាភិបាលនេះមានតួនាទីកាន់តែច្រើននៅក្នុងកិច្ចប្រជុំ និងកិច្ចពិភាក្សារបស់អាស៊ាន។
លោក គឹម សុខ បន្ថែមទៀតថា ទំនាក់ទំនងរវាងថ្នាក់ដឹកនាំកម្ពុជា និងយោធាភូមាកាន់តែស៊ីជម្រៅ ចាប់តាំងពីរដ្ឋប្រហារឆ្នាំ២០២១ ជាពិសេសលើវិស័យយោធា និងហិរញ្ញវត្ថុ។ លោក ថា ទំនាក់ទំនងនេះកាន់តែជិតស្និទ្ធនៅពេលកម្ពុជាធ្វើជាប្រធានអាស៊ានក្នុងឆ្នាំ២០២២ នៅពេលលោក ហ៊ុន សែន ដែលជានាយករដ្ឋមន្ត្រីកាលនោះ បានធ្វើដំណើរទៅភូមា និងជួបមេដឹកនាំយោធា។ លោក ថា ទំនាក់ទំនងរវាងអាជ្ញាធរកម្ពុជា ភូមា និងបណ្តាញឆបោកតាមអ៊ីនធឺណិតដែលមានជនជាតិចិនពាក់ព័ន្ធ ជាកិច្ចសហប្រតិបត្តិការមិនត្រឹមវិស័យយោធាទេ ប៉ុន្តែពាក់ព័ន្ធនឹងបណ្តាញហិរញ្ញវត្ថុផងដែរ។
លោក គឹម សុខ៖ «សេចក្តីប្រាថ្នាដ៏ធំមួយ របស់មេយោធា មីន អ៊ុងឡាំង គឺចង់ឱ្យរដ្ឋាភិបាលក្រុមគ្រួសារហ៊ុន បញ្ចុះបញ្ចូលអាស៊ាន ឱ្យទទួលស្គាល់រដ្ឋាភិបាលយោធានៅភូមាដែលទើបតែរៀបចំ និងមានមុខនៅក្នុងក្របខ័ណ្ឌនៃការប្រជុំអាស៊ាន ឬចូលរួមពិភាក្សាកិច្ចការនៅក្នុងអាស៊ាន នៅពេលក្រោយ»។
លោក ហ៊ុន សែន និងលោក មីន អុងឡាំង ដែលឡើងកាន់អំណាចពីការធ្វើរដ្ឋប្រហារដូចគ្នា និងកំពុងរងសម្ពាធពីសហគមន៍អន្តរជាតិដូចគ្នារឿងរំលោភសិទ្ធិមនុស្សនោះ ធ្លាប់រាប់អានគ្នាជាបងប្អូនធម៌។ លោក មីន អុងឡាំង ធ្លាប់បានដឹកនាំគណៈប្រតិភូមកបំពេញទស្សនកិច្ចផ្លូវការរយៈពេល ២ថ្ងៃ នៅកម្ពុជាម្តងរួចមកហើយ ក្នុងនាមជាអគ្គមេបញ្ជាការ នៃកងកម្លាំងប្រដាប់អាវុធភូមា កាលពីខែមីនា ឆ្នាំ២០១៧ ។ សម្រាប់ដំណើរទស្សនកិច្ចជាផ្លូវរដ្ឋនៅកម្ពុជានាពេលខាងមុខនេះ គឺជាដំណើរទស្សនកិច្ចលើកទី២របស់លោក បន្ទាប់ពីលោកបានស្បថចូលកាន់តំណែងជាប្រធានាធិបតីស៊ីវិល កាលពីខែមេសា ឆ្នាំ២០២៦ កន្លងទៅ។
មុននឹងឈានជើងមកដល់កម្ពុជា លោក មីន អុងឡាំង បាននិងកំពុងបន្តដំណើរទស្សនកិច្ចទៅកាន់ប្រទេសមួយចំនួនរួចមកហើយ រួមមាន ប្រទេសចិន ប្រទេសឡាវ ប្រទេសថៃ និងប្រទេសរុស្ស៊ី។
អ្នកឃ្លាំមើលសង្គមអះអាងថា ដំណើរទស្សនកិច្ចនេះអាចជាការសាកល្បងមួយចំពោះសមត្ថភាពរបស់កម្ពុជា ក្នុងការរក្សាតុល្យភាពរវាងការចូលរួមការទូត និងកិច្ចខិតខំប្រឹងប្រែងរបស់អាស៊ាន ដើម្បីដោះស្រាយវិបត្តិនយោបាយ និងមនុស្សធម៌ដែលអូសបន្លាយនៅមីយ៉ាន់ម៉ា៕
