អាជ្ញាធរខេត្តកំពង់ចាមចាប់ខ្លួនសមាជិកគណបក្សកម្លាំងជាតិមួយរូបទៀតដោយគ្មានដីកា

អាជ្ញាធរខេត្តកំពង់ចាម ចាប់ខ្លួនសមាជិកគណបក្សកម្លាំងជាតិមួយរូបទៀតបញ្ជូនទៅ​ស្នងការដ្ឋាន​នគរបាលខេត្តដោយគ្មានដីកាចាប់ខ្លួន។ មន្ត្រីសិទ្ធិមនុស្សយល់ថា ការចាប់ខ្លួន​សមាជិកគណបក្សនយោបាយ មុនការបោះឆ្នោតខិតជិតមកដល់បែបនេះ​ជាការគំរាមកំហែង​ធ្ងន់ធ្ងរផ្នែកនយោបាយ។

សមាជិកគណបក្សកម្លាំងជាតិខេត្តកំពង់ចាម វ័យ ៥៦ឆ្នាំ លោក ប៉ាវ ប៉ោហេង ត្រូវអាជ្ញាធរចាប់ និងឃុំខ្លួននៅស្នងការដ្ឋាននគរបាលខេត្ត រយៈពេល២ថ្ងៃមកហើយ ដោយមិនមានដីកា ឬការ​បញ្ជាក់ប្រាប់ពីទោសកំហុសរបស់លោកឲ្យក្រុមគ្រួសារបានដឹងឡើយ។ លោក ប៉ាវ ប៉ោហេង ក៏ជាភ្នាក់ងារសង្កេតការណ៍ពិនិត្យបញ្ជីឈ្មោះបោះឆ្នោត និងបញ្ជីចុះឈ្មោះបោះឆ្នោតឆ្នាំ២០២៦ មួយរូប ឲ្យគណបក្សកម្លាំងជាតិនៅក្នុងឃុំជើងព្រៃ ស្រុកបាធាយ ខេត្តកំពង់ចាម។

អាជ្ញាធរបានចាប់ខ្លួនសមាជិកគណបក្សរូបនេះ កាលពីយប់ថ្ងៃទី១៣ តុលា នៅប៉ុស្តិ៍ប៉ូលីស ឃុំជើងព្រៃ ស្រុកបាធាយ ដោយមានគេបោកបញ្ឆោតទូរស័ព្ទទៅលោក ប៉ាវ ប៉ោហេង ដែលមានមុខរបរជាអ្នករត់កង់បី ឲ្យទៅដឹក ប៉ូលិស ឈ្មោះ មឿន មានអាការៈខ្យល់គប្រកាច់ ដើម្បីយកទៅសង្គ្រោះនៅមន្ទីពេទ្យ។ លុះពេលលោកទៅដល់ ស្រាប់តែកម្លាំងសមត្ថកិច្ចចាប់ខ្លួន​លោក​បញ្ជូនទៅស្នងការដ្ឋានខេត្តភ្លាមតែម្តង។ នេះបើតាមលិខិតរបស់ប្រធានក្រុមការងារបណ្តោះអាសន្នរបស់គណបក្សកម្លាំងជាតិស្រុកបាធាយ លោក ហ៊ុន ហាង។

បងប្រុសជីដូនមួយលោក ប៉ាវ ប៉ោហេង គឺ លោក ព្រំ ប្រាជ្ញ ប្រាប់ទូរទស្សន៍អាស៊ីសេរីក្នុងពេល​លោក​ទៅ​ឃ្លាំមើល​ករណី​លោក ប៉ាវ ប៉ោហេង នៅមុខសាលាដំបូងខេត្តកំពង់ចាមថា អ្នកដែលបានហៅទូរសព្ទទៅប្អូនប្រុសរបស់លោក គឺជាមន្ត្រីប៉ូលីសនៅស្នងការផ្ទាល់។ លោកថា រហូតមកដល់ពេលនេះ លោក និងក្រុមគ្រួសារទាំងមូល មិនទាន់ដឹងពីមូលហេតុពិតប្រាកដ​នៃ​ការ​ចាប់ខ្លួននេះឡើយ ហើយអាជ្ញាធរមិនអនុញ្ញាតឲ្យសាច់ញាត្តិជួបជជែកជាមួយលោក ប៉ាវ ប៉ោហេង ឡើយ។

ប្អូនប្រុសម្នាក់ទៀតរបស់លោក ប៉ាវ ប៉ោហេង គឺលោក ប៉ាវ រំដោះ លើកឡើងថា នេះជារឿង​អយុត្តិធម៌ជាខ្លាំង និងមិនអាចទទួលយកបានឡើយចំពោះការអនុវត្តច្បាប់របស់អាជ្ញាធរ ចាប់ខ្លួនបងប្រុសរបស់លោក ដោយមិនមានដីកាត្រឹមត្រូវបែបនេះ។ លោកថា អាជ្ញាធរបានបញ្ជូនបងប្រុសរបស់លោក ទៅសាលាដំបូងខេត្តកំពង់ចាមជាច្រើនលើក ប៉ុន្តែ​មិន​អនុញ្ញាតឲ្យសាច់ញាត្តិបានចូលស្តាប់ ឬសួរដេញដោលឡើយ។ លោកបារម្ភពីសុខទុក្ខរបស់​លោក ប៉ាវ ប៉ោហេង ជាខ្លាំង និងនៅតែបន្តឃ្លាំមើលនៅមុខស្នងការដ្ឋាននគរបាលខេត្ត និងតុលាការ។

ទូរទស្សន៍អាស៊ីសេរី មិនអាចទាក់ទងស្នងការនគរបាលខេត្តកំពង់ចាមលោក ហេង វុទ្ធី ដើម្បី​ឆ្លើយ​បំភ្លឺជុំវិញរឿងនេះបានទេ នៅថ្ងៃទី ១៥ តុលា នេះ ដោយលោកលើកឡើងថា ច្រលំលេខ រួចចុចផ្តាច់ទូរស័ព្ទ។

នៅថ្ងៃទី១៥ តុលា គណបក្សកម្លាំងជាតិ ចេញសេចក្តីថ្លែងការណ៍មួយ ព្រួយបារម្ភពីស្ថានភាព​នៃការគោរពសិទ្ធិមនុស្ស សេរីភាពបញ្ចេញមតិ និងសិទ្ធិសេរីភាពក្នុងការធ្វើនយោបាយ ខណៈ​អាជ្ញាធរនៅតែបន្តចាប់ខ្លួនថ្នាក់ដឹកនាំ និងសកម្មជនគណបក្សប្រឆាំងជាបន្តបន្ទាប់ ជាពិសេស​ការចាប់ខ្លួនលោក ប៉ាវ ប៉ោហេង។ គណបក្សកម្លាំងជាតិ យល់ថា អាជ្ញាធរកម្ពុជាមិនគួរធ្វើ​ទុក្ខបុកម្នេញអ្នកមាននិន្នាការនយោបាយផ្ទុយពីគណបក្សកាន់អំណាច ក្នុងកាលៈទេសៈ​ប្រទេសកំពុងរងការឈ្លានពានពីប្រទេសថៃឡើយ។

អ្នកនាំពាក្យគណបក្សកម្លាំងជាតិ លោក សុខ គឹមសេង ថ្លែងថា អាជ្ញាធរមិនបានបំពេញនីតិវិធី​ច្បាប់​ឲ្យបានត្រឹមត្រូវក្នុងការចាប់ ឬឃាត់ខ្លួន​សកម្មជន​នយោបាយឡើយ ដោយធ្វើឡើង​តាមតែ​ការនឹកឃើញប៉ុណ្ណោះ។ លោកទទួចឲ្យរដ្ឋាភិបាល តុលាការ និងអាជ្ញាធរ អនុវត្តគោលការណ៍​ច្បាប់ឲ្យស្មើភាពគ្នា និងត្រូវផ្តល់សិទ្ធិសេរីភាពឲ្យប្រជាពលរដ្ឋឲ្យបានពេញលេញ។

ចំណែក ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មាន​ប្រសាសន៍​ថា អាជ្ញាធរមិនបានអនុវត្តច្បាប់ឲ្យបានត្រឹមត្រូវ ហើយរូបភាពនេះ គឺជាការគំរាមកំហែងលើ​សកម្មជន​នយោបាយ មុនការបោះឆ្នោត និងជះឥទ្ធិពលមិនល្អនោះទេដល់ដំណើរការ​បោះឆ្នោត​នាពេលខាងមុខ។ លោកថា រដ្ឋាភិបាលគួរគិតគូរពីដំណើរការផ្សះផ្សារជាតិ បង្រួបបង្រួមជាតិ ដើម្បីឲ្យដំណើរការបោះឆ្នោតនាពេលខាងមុខទទួលបានការសាទរ និងចាប់អារម្មណ៍ពីអន្តរជាតិ។

រហូតមកដល់ពេលនេះ អ្នកនយោបាយ អ្នកការពារសិទ្ធិមនុស្ស សកម្មជនដីធ្លី សហជីព អ្នក​សារព័ត៌មាន និងអ្នកប្រើប្រាស់បណ្តាញសង្គម ជាង១០០នាក់ហើយ កំពុងជាប់ឃុំ​នៅពន្ធនាគារ​យ៉ាងអយុត្តិធម៌ ដោយសារការប្រើប្រាស់សិទ្ធិរបស់ខ្លួនក្នុងការបញ្ចេញមតិ និងចូលរួមសកម្មភាពសង្គម។

សង្គមស៊ីវិល និងគណបក្សកម្លាំងជាតិ អំពាវនាវឲ្យអាជ្ញាធរមានសមត្ថកិច្ច បញ្ឈប់ការ​ចាប់ខ្លួន​ថ្នាក់ដឹកនាំ សកម្មជន និងយុវជនគណបក្សប្រឆាំង ដោយសារតែមូលហេតុ​ចូលរួមសកម្មភាព​នយោបាយ ហើយទាមទារឱ្យដោះលែង លោក ប៉ាវ ប៉ោហេង ព្រមទាំងអ្នកជាប់ឃុំនយោបាយ​និងមនសិការទាំងអស់ឲ្យមានសេរីភាពឡើងវិញ ដើម្បីធានាដល់បរិយាកាស​នយោបាយល្អ​ប្រសើរ​ឡើងវិញ៕