អ្នកឃ្លាំមើលសង្គមរិះគន់លោក ហ៊ុន សែន និងលោក ហ៊ុន ម៉ាណែត ថា កំពុងផ្តោតលើរឿងគ្រួសារ ខណៈកម្ពុជាប្រឈមនឹងបញ្ហានយោបាយ សេដ្ឋកិច្ច និងការព្រួយបារម្ភអំពីបូរណភាពទឹកដី។ ការរិះគន់នេះកើតឡើងបន្ទាប់ពីលោក ហ៊ុន សែន ប្រធានព្រឹទ្ធសភា បានផ្ញើសារជូនពរកូនប្រុសរបស់លោក ដែលជានាយករដ្ឋមន្ត្រី ក្នុងឱកាសខួបកំណើតគម្រប់ ៥០ឆ្នាំ ដោយអ្នករិះគន់ចោទសួរថា តើថ្នាក់ដឹកនាំបានផ្តល់អាទិភាពគ្រប់គ្រាន់ដល់ទុក្ខលំបាក និងកង្វល់របស់ប្រជាពលរដ្ឋដែរឬទេ។
អ្នកតាមដានភូមិសាស្ត្រនយោបាយកម្ពុជា លោក សេង វណ្ណលី បានប្រាប់ទូរទស្សន៍អាស៊ីសេរីថា ការផ្ញើសារជូនពរខួបកំណើតរវាងលោក ហ៊ុន សែន និងលោក ហ៊ុន ម៉ាណែត អាចមើលទៅជាទំនាក់ទំនងឪពុកកូនធម្មតា ប៉ុន្តែការយកអំណាចរដ្ឋមកប្រើដើម្បីបង្កើតរូបភាពគ្រួសារកក់ក្តៅជាសាធារណៈ គឺជាការមើលរំលងទុក្ខវេទនារបស់រាស្ត្រ។ លោកថា ក្នុងនាមជាអ្នកដឹកនាំដែលទទួលប្រាក់ខែ និងមានភារកិច្ចបម្រើជាតិ ការយកចិត្តទុកដាក់ចំពោះសុខទុក្ខពលរដ្ឋ ត្រូវតែមានទម្ងន់ធ្ងន់ជាង ឬស្មើនឹងប្រយោជន៍គ្រួសារខ្លួន។
លោក សេង វណ្ណលី បន្ថែមទៀតថា ប្រជាពលរដ្ឋមានសិទ្ធិពេញលេញក្នុងការរិះគន់ និងទាមទារឱ្យអ្នកកាន់អំណាចបង្ហាញការទទួលខុសត្រូវជាសាធារណៈ ជាជាងការធ្វើសម្តែងមនោសញ្ចេតនាផ្ទាល់ខ្លួន។ លោកថា បើអ្នកដឹកនាំទាំងពីរអាចប្រើពាក្យសម្តីកក់ក្តៅបង្ហាញការស្រឡាញ់ និងការបារម្ភពីគ្នាជាសាធារណៈបាន ពួកគេកាន់តែត្រូវតែបង្ហាញការបារម្ភបែបនេះចំពោះរាស្ត្រដែលកំពុងរងទុក្ខ។
លោក សេង វណ្ណលី៖ «ការបារម្ភចំពោះជាតិ មិនមែនធ្វើឡើងតាមរយៈពាក្យសម្តីលើកជើងគ្នានោះទេទៅវិញទៅមកទេ ប៉ុន្តែត្រូវស្តែងចេញតាមរយៈការទទួលស្គាល់ការពិត ការស្តាប់បណ្តឹងតវ៉ា និងការដោះស្រាយវិបត្តិជាក់ស្តែង។ សម្រាប់គ្រួសារពលរដ្ឋដែលកំពុងលិចលង់ក្នុងបំណុល បាត់បង់ចំណូល ឬរស់ក្នុងភាពភ័យខ្លាច ពាក្យផ្អែមល្ហែម និងការសរសើរគ្នារវាងអ្នកមានអំណាច គឺជាការចំអកចំពោះជីវភាពដ៏ជូរចត់របស់ពួកគាត់»។
អ្នករតាមដានភូមិសាស្ត្រនយោបាយកម្ពុជារូបនេះ បន្ថែមទៀតថា បញ្ហាស្នូលនៅពេលនេះ គឺគម្លាតយ៉ាងធំធេងរវាងភាពស្ដុកស្ដម្ភកក់ក្តៅនៃគ្រួសារអ្នកដឹកនាំ និងភាពត្រជាក់ត្រជុំនៃទុក្ខវេទនារបស់រាស្ត្រដែលត្រូវគេបោះបង់ចោល។ លោកថាភាពជាឪពុកល្អ ឬកូនល្អក្នុងគ្រួសារ មិនអាចយកមកលុបលាងកំហុស ឬជំនួសការបរាជ័យក្នុងការដឹកនាំប្រទេសបានឡើយ។ ប្រជាពលរដ្ឋមិនត្រូវការមើលការបង្ហាញភាពស្និទ្ធស្នាលក្នុងគ្រួសារភាគតិចនោះទេ ប៉ុន្តែត្រូវការឃើញអំណាចរដ្ឋត្រូវបានប្រើដើម្បីការពារសិទ្ធិ ជីវិត និងក្រពះរបស់មនុស្សគ្រប់រូបដោយស្មើភាព។
ការអះអាងរបស់អ្នកតាមដានភូមិសាស្ត្រនយោបាយកម្ពុជារូបនេះ បន្ទាប់ពីលោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលជាឪពុកនាយករដ្ឋមន្ត្រី បានបង្ហោះសារនៅលើហ្វេសប៊ុករបស់ខ្លួននៅថ្ងៃនេះថា ក្នុងឱកាសនៃខួបចម្រើនជន្មាយុ គម្រប់៤៩ឆ្នាំ ឈានចូល៥០ឆ្នាំ របស់ លោក ហ៊ុន ម៉ាណែត លោកបួងសួងដល់ វត្ថុស័ក្តិសិទ្ធិទាំងឡាយក្នុងលោក សូមតាមជួយថែរក្សា ការពារ អភិបាល ប្រោះព្រំនូវសព្ទសាធុការពរជ័យ សិរីសួស្តី ជ័យមង្គល វិបុលសុខគ្រប់ប្រការ ជូនចំពោះ លោក ហ៊ុន ម៉ាណែត និងលោកជំទាវបណ្ឌិត ព្រមទាំងបុត្រាបុត្រីជាទីស្រឡាញ់។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា មានប្រសាសន៍ថា ការជូនពរគ្នាក្នុងឱកាសខួបកំណើតគឺជារឿងធម្មតា ប៉ុន្តែលោកយល់ថា ការយកតួនាទីជាប្រធានព្រឹទ្ធសភាមកចូលរួមក្នុងការជូនពរជាសាធារណៈដល់នាយករដ្ឋមន្ត្រី ដែលជាកូនប្រុស គឺមិនសមរម្យនោះទេ។
លោក ស៊ឹង សែនករុណា បន្តថា ក្នុងស្ថានភាពដែលកម្ពុជាកំពុងប្រឈមនឹងបញ្ហាសង្គម និងសេដ្ឋកិច្ចធ្ងន់ធ្ងរ ថ្នាក់ដឹកនាំគួរតែផ្ដោតការយកចិត្តទុកដាក់លើការដោះស្រាយបញ្ហាជាតិ និងទុក្ខលំបាករបស់ប្រជាពលរដ្ឋ ជាជាងចំណាយពេលច្រើនលើការបង្ហាញអារម្មណ៍ផ្ទាល់ខ្លួនជាសាធារណៈ។
លោកមានប្រសាសន៍ថា ស្ថានការណ៍នៅក្នុងប្រទេសកំពុងមានភាពលំបាកជាច្រើន ជាពិសេសបញ្ហាប្រជាពលរដ្ឋជាងពីរម៉ឺននាក់ដែលមិនទាន់អាចវិលត្រឡប់ទៅកាន់លំនៅឋានរបស់ពួកគេវិញ បញ្ហាព្រំដែនដែលនៅតែបន្តមានការរំលោភបំពាន និងបញ្ហាមជ្ឈមណ្ឌលឆបោកតាមអនឡាញ ដែលបានបង្កការព្រួយបារម្ភនៅលើឆាកអន្តរជាតិ។
លោកបន្ថែមថា ប្រជាពលរដ្ឋក៏កំពុងប្រឈមនឹងការធ្លាក់ចុះនៃជីវភាព កង្វះការងារធ្វើ ភាពក្រីក្រ និងបន្ទុកបំណុល ដែលទាមទារឱ្យថ្នាក់ដឹកនាំយកចិត្តទុកដាក់ដោះស្រាយជាបន្ទាន់។ លោកថា ទាំងនេះសុទ្ធតែជាទុក្ខលំបាករបស់ប្រជាពលរដ្ឋ។ ដូច្នេះ ថ្នាក់ដឹកនាំគួរតែគិតគូរ និងយកចិត្តទុកដាក់ឱ្យបានខ្លាំងលើបញ្ហាសង្គម និងបញ្ហាប្រទេសជាតិ នេះទើបជាគំរូល្អ និងជាមធ្យោបាយដែលអាចធ្វើឱ្យប្រជាពលរដ្ឋគោរពស្រឡាញ់។
លោក ហ៊ុន ម៉ាណែត គឺជានាយករដ្ឋមន្ត្រី ដែលបានឡើងកាន់តំណែងជាផ្លូវការនៅថ្ងៃទី២២ ខែសីហា ឆ្នាំ២០២៣ បន្តពីឪពុក គឺលោក ហ៊ុន សែន។ ការដឹកនាំរបស់នាយករដ្ឋមន្ត្រីថ្មីនេះត្រូវគេមើលឃើញថា ស្ថិតក្រោមការបញ្ជាលោក ហ៊ុន សែន ដែលជាឪពុក ទាំងស្រុងដើម្បីការពារអំណាចនៃវង្សត្រកូលរបស់ខ្លួនប៉ុណ្ណោះ។
អ្នកឃ្លាំមើល និងពលរដ្ឋសង្ឃឹមថា បន្ទាប់ពីថ្ងៃធ្វើខួបកំណើត លោក ហ៊ុន ម៉ាណែត នឹងភ្ញាក់រលឹកក្នុងការស្ដារប្រព័ន្ធប្រជាធិបតេយ្យ ការគោរពសិទ្ធិមនុស្ស មានការបង្រួបបង្រួមជាតិ និងរៀបចំឱ្យមានតុលាការឯករាជ្យពិតប្រាកដ។ ពួកគាត់បារម្ភថា ប្រសិនបើ លោក ហ៊ុន ម៉ាណែត ដឹកនាំប្រទេសដូចលំនាំបច្ចុប្បន្ននេះ ប្រទេសជាតិនឹងអន្តរាយ ខណៈប្រទេសជិតខាង គេកាន់តែបន្តមើលងាយ និងឈ្លានពានទឹកដីតាមអំពើចិត្ត៕
