គណបក្សកម្លាំងជាតិ ចាត់ទុកការបន្តឃុំខ្លួន និងផ្ដន្ទាទោសកម្មការិនីរោងចក្រម្នាក់ គឺលោកស្រី ហ៊ុល មុន្នីសាមន ឲ្យជាប់ពន្ធនាគាររយៈពេល២ឆ្នាំ និងពិន័យជាប្រាក់ ៤លានរៀល ពាក់ព័ន្ធនឹងការបញ្ចេញមតិ រឿងជម្លោះព្រំដែនកម្ពុជា-ថៃ គឺជាការរិតត្បិតសិទ្ធិសេរីភាពបញ្ចេញមតិ និងផ្ទុយពីច្បាប់រដ្ឋធម្មនុញ្ញ និងជាការគំរាមកំហែងទៅលើប្រជាពលរដ្ឋដ៏ទៃទៀត ដែលចេះឈឺឆ្អាលបញ្ហាទឹកដី។
គណបក្សកម្លាំងជាតិ សោកស្ដាយ និងចាត់ទុកការបន្តឃុំខ្លួន និងការផ្ដន្ទាទោសកម្មការិនីរោងចក្រ លោកស្រី ហ៊ុល មុន្នីសាមន ឲ្យជាប់ពន្ធនាគាររយៈពេល២ឆ្នាំ និងពិន័យជាប្រាក់ ៤លានរៀល គឺជារឿងអយុត្តិធម៌ ព្រោះគាត់ គ្រាន់តែបង្ហោះសារលើបណ្តាញសង្គមហ្វេសប៊ុក (Facebook) ពាក់ព័ន្ធនឹងជម្លោះព្រំដែនកម្ពុជា-ថៃ។
គណបក្សកម្លាងជាតិ លើកឡើងនៅក្នុងសេចក្តីថ្លែងការណ៍ ដែលផ្សព្វផ្សាយកាលពីថ្ងៃទី២៦ ខែមីនាថា ការសម្រេចផ្ដន្ទាទោសរបស់សាលាដំបូងរាជធានីភ្នំពេញ គឺផ្ទុយពីការលើឡើងរបស់លោកនាយករដ្ឋមន្ត្រី ហ៊ុន ម៉ាណែត ដែលធ្លាប់អះអាងថា ប្រជាពលរដ្ឋខ្មែរមានសិទ្ធិឈឺឆ្អាលជុំវិញបញ្ហាជម្លោះព្រំដែនកម្ពុជា-ថៃ។
បន្ថែមពីនោះ ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់ទូរទស្សន៍អាស៊ីសេរីនៅថ្ងៃទី២៧ ខែមីនាថា ការបន្តឃុំខ្លួនរបស់កម្មការិនីរោងចក្ររូបនេះ ពាក់ព័ន្ធនឹងសិទ្ធិសេរីភាពក្នុងការបញ្ចេញមតិ នឹងនាំឲ្យកម្ពុជាខូចមុខមាត់នៅលើឆាកអន្តរជាតិ ជុំវិញរឿងរំលោភសិទ្ធិមនុស្ស និងរិតត្បិតសិទ្ធិសេរីភាពរបស់ពលរដ្ឋ។ លោកថា រដ្ឋាភិបាលគួរតែបើកសិទ្ធិឲ្យទូលំទូលាយ បញ្ឈប់ការរិតត្បិតសិទ្ធិសេរីភាព និងត្រូវដោះលែងឲ្យគាត់មានសេរីភាពឡើងវិញ។
លោក រ៉ុង ឈុន៖ «ប្រសិនបើយើងនៅតែបន្តបែបនេះ យើងគ្មានមុខមាត់នៅលើឆាកអន្តរជាតិទៀតទេ ជាពិសេសផ្នែកការទំនាក់ទំនងកិច្ចការទូតក្ដី យើងនឹងមានការលំបាក ពីព្រោះកម្ពុជារំលោភសិទ្ធិមនុស្ស មិនបើកលំហសិទ្ធិសេរីភាព ប្រជាពលរដ្ឋនៅតែរឹតត្បិត ដូច្នេះក្នុងនាមគណបក្សកម្លាំងជាតិ សូមឲ្យដោះលែងកម្មការិនីឲ្យមានសេរីភាពឡើងវិញ ដើម្បីបានជួបជុំគ្រួសារ និងកូនរបស់គាត់ឡើងវិញទៅ»។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទង អ្នកនាំពាក្យក្រសួងយុត្តិធម៌ លោក សេង ឌីណា ដើម្បីសុំការបកស្រាយបានទេ នៅថ្ងៃទី២៧ ខែមីនា។
សាលាដំបូងរាជធានីភ្នំពេញកាលពីថ្ងៃទី២៣ ខែមីនា សម្រេចផ្ដន្ទាទោសលោកស្រី ហ៊ុល មុន្នីសាមន ឲ្យជាប់ពន្ធនាគាររយៈពេល២ឆ្នាំ និងពិន័យជា ប្រាក់ចំនួន ៤ លានរៀល ពីបទ «ញុះញង់ឱ្យប្រព្រឹត្តបទ ឧក្រិដ្ឋជាអាទិ៍» និងបទ «ប្រមាថអ្នករាជការសាធារណ:» ជុំវិញការបង្ហោះសារលើហ្វេសប៊ុក ពាក់ព័ន្ធនឹងជម្លោះព្រំដែនកម្ពុជា-ថៃ ។ គិតមកដល់បច្ចុប្បន្នកម្មការិនីរូបនេះ ជាប់ពន្ធនាគារប្រមាណ ៤ខែហើយ បន្ទាប់ពីសមត្ថកិច្ចចាប់ខ្លួនកាលពីថ្ងៃទី១២ ខែវិច្ឆិកា ឆ្នាំ២០២៥ អំឡុងពេលលោកស្រីកំពុងជិះកង់ទៅទិញថ្នាំពេទ្យនៅផ្សារជម្ពូវ័ន ខណ្ឌពោធិ៍សែនជ័យ រាជធានីភ្នំពេញ។
ទាក់ទិននឹងបញ្ហានេះ ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា យល់ឃើញថា នៅក្នុងសង្គមប្រជាធិបតេយ្យសេរីពហុបក្ស ប្រជាពលរដ្ឋគ្រប់រូបមានសិទ្ធិសេរីភាពពេញលេញ ក្នុងការបញ្ចេញមតិរិះគន់រដ្ឋាភិបាល ដើម្បីកែលម្អឲ្យមានការរីកចម្រើន និងបញ្ហាប្រទេសជាតិរបស់ពួកគេ។ លោកថា ប្រសិនបើរដ្ឋាភិបាលនៅតែបន្តចាប់ឃុំខ្លួនពលរដ្ឋ ដែលហ៊ានបញ្ចេញមតិ កែលម្អចំណុចខ្វះខាតរបស់រដ្ឋាភិបាល នោះមានន័យថា មិនមែនជាសង្គមប្រជាធិបតេយ្យនោះទេ ហើយក៏មិនមានផលចំណេញដល់រដ្ឋាភិបាលបច្ចុប្បន្ននេះដែរ។
លោក នី សុខា៖ «រដ្ឋាភិបាលអាចនឹងបាត់បង់នូវព័ត៌មានសំខាន់ៗមួយចំនួន រដ្ឋាភិបាលទទួលបានតែព័ត៌មានបញ្ចើចបញ្ចើ ព័ត៌មានលើកជើងជាដើម ព័ត៌មានដែលមានការរិះគន់ ព័ត៌មានដែលមិនល្អពីរដ្ឋាភិបាល មិនអាចនិយាយបាន នឹងធ្វើឲ្យបាត់បង់ព័ត៌មានមួយដែលរដ្ឋាភិបាលត្រូវការចាំបាច់ នៅក្នុងសង្គមប្រជាធិបតេយ្យ ហើយទីពីរទៀត គឺថា នៅតែបន្តរងការរិះគន់ពីមតិជាតិ និងអន្តរជាតិ គេថាប្រទេសរបស់យើងមិនដើរស្របតាមគោលការណ៍ប្រជាធិបតេយ្យ ហើយសិទ្ធិសេរីភាពនេះកាត់តែរួមតូចទៅៗធ្វើឲ្យប៉ះពាល់ដល់កេរ្តិ៍ឈ្មោះរបស់ប្រទេសកម្ពុជា»។
អង្គការសម្ព័ន្ធខ្មែរជំរឿន និងការពារសិទ្ធិមនុស្សហៅកាត់ថា លីកាដូ (Licadho) បានផ្សព្វផ្សាយនៅលើគេហទំព័ររបស់ខ្លួនថា គិតត្រឹមចុងខែវិច្ឆិកា ឆ្នាំ២០២៥ មានមនុស្សប្រមាណជិត១០០នាក់ហើយ ដែលត្រូវបានអាជ្ញាធរ និងស្ថាប័នអនុវត្តច្បាប់នៅកម្ពុជា ចាប់ដាក់ពន្ធនាគារ។ លោកស្រី ហ៊ុល មុន្នីសាមន គឺជា ពលរដ្ឋម្នាក់ក្នុងចំណោមមនុស្សជិត១០០នាក់ ដែលត្រូវបានអាជ្ញាធរចាប់ខ្លួន ដោយសារតែការប្រើប្រាស់សិទិ្ធសេរីភាពបញ្ចេញមតិរបស់ពួកគេ៕
