គណបក្សកម្លាំងជាតិ ប្រកាសមិនគាំទ្រ និងសោកស្តាយចំពោះការធ្វើវិសោធនកម្មច្បាប់ស្ដីពីការគ្រប់គ្រងរដ្ឋបាលឃុំ សង្កាត់របស់រដ្ឋសភាកាលពីថ្ងៃទី២០ ខែសីហា ឆ្នាំ២០២៦។ គណបក្សកម្លាំងជាតិ លើកឡើងនៅក្នុងសេចក្តីសេចក្តីថ្លែងការណ៍ នៅថ្ងៃទី២១ ខែសីហា ថា សេចក្តីព្រាងវិសោធនកម្មច្បាប់នេះ គឺផ្ទុយពីស្មារតីនៃរដ្ឋធម្មនុញ្ញដែលបានកំណត់អំពីការដឹកនាំប្រទេសតាមបែប«លទ្ធិប្រជាធិបតេយ្យសេរីពហុបក្ស» ចុះថយនៃប្រព័ន្ធត្រួតពិនិត្យ និងតាមដាន ពោលគឺមិនមានតម្លាភាព ធ្វើឲ្យបាត់បង់តំណាងរបស់ប្រជាពលរដ្ឋម្ចាស់ឆ្នោត និងប៉ះពាល់ដល់ដំណើរការវិមជ្ឈការ។
គណបក្សកម្លាំងជាតិ ប្រតិកម្មដូច្នេះគឺបន្ទាប់ពីរដ្ឋសភាជាតិកម្ពុជាបានអនុម័តសេចក្តីព្រាងច្បាប់ស្តីពីវិសោធនកម្មច្បាប់ស្ដីពីការគ្រប់គ្រងរដ្ឋបាលឃុំ សង្កាត់ លើមាត្រាចំនួន ៤ គឺ ត្រង់មាត្រា ៣៣ មាត្រា ៣៤ មាត្រា ៣៥ និង មាត្រា ៣៨ តាមយុទ្ធសាស្ត្រ បញ្ចកោណ-ដំណាក់កាលទី១ និងកម្មវិធីកែទម្រង់របស់រាជរដ្ឋាភិបាល នីតិកាលទី៧ នៃរដ្ឋសភា ក្នុងការបន្តពង្រឹងប្រសិទ្ធភាពនៃរដ្ឋបាលថ្នាក់ក្រោមជាតិ ដោយទទួលបានសំឡេងគាំទ្រចំនួន ១១០ លើ ១១០ សំឡេង នៃចំនួនសមាជិករដ្ឋសភាទាំងមូល។
គណបក្សកម្លាំងជាតិ យល់ថា ច្បាប់ពីការគ្រប់គ្រងរដ្ឋបាលឃុំ សង្កាត់ ដែលមានស្រាប់ កាលខែមីនា ឆ្នាំ២០០១ គឺមានតម្លាភាពជាងច្បាប់ថ្មីតាមរយៈការបែងចែកអំណាចរវាងឃុំ និងជំទប់ ចៅសង្កាត់ ចៅសង្កាត់រង មកពីគណបក្សផ្សេងគ្នា។ ចំណែកច្បាប់ដែលបានធ្វើវិសោធនកម្មថ្មីនេះ មានបំណងប្រមូលផ្តុំតំណែងសំខាន់ៗទៅគណបក្សតែមួយ ធ្វើឱ្យបាត់បង់យន្តការត្រួតពិនិត្យ និងតុល្យភាពអំណាចក្នុងរដ្ឋបាលថ្នាក់ក្រោមជាតិ ដែលងាយប្រឈមនឹងអំពើពុករលួយ និងបក្ខពួកនិយម។ មិនតែប៉ុណ្ណោះ វិសោធនកម្មនេះ ហាក់ប្រែក្លាយឱ្យការគ្រប់គ្រងថ្នាក់ក្រោមជាតិក្លាយជាការពង្រីកអំណាចផ្តាច់មុខជំនួសឱ្យការបម្រើផលប្រយោជន៍រួមរបស់ពលរដ្ឋគ្រប់និន្នាការ។
សេចក្តីថ្លែងការនេះបង្ហាញទៀតថា គណបក្សប្រឆាំង និងគណបក្សតូចៗ កំពុងប្រឈមមុខនឹងសម្ពាធជុំទិស ការកាត់បន្ថយតំណែងជំទប់ និងការកែប្រែរូបមន្តបែងចែកនេះ នឹងធ្វើឱ្យសំឡេងឆ្នោតរបស់ប្រជាពលរដ្ឋរាប់សែននាក់ដែលបានបោះឆ្នោតជូនគណបក្សភាគតិច ត្រូវបាត់បង់តំណាង និងគ្មានឥទ្ធិពលក្នុងការចូលរួមអភិវឌ្ឍន៍ និងការសម្រេចចិត្តនានាក្នុងឃុំ/សង្កាត់របស់ខ្លួន។
គណបក្សកម្លាំងជាតិទទូចឲ្យរាជរដ្ឋាភិបាល និងរដ្ឋសភា ពិចារណាឡើងវិញ និងអំពាវនាវឲ្យព្រឹទ្ធសភា ក្រុមប្រឹក្សារដ្ឋធម្មនុញ្ញ ផ្អាកដំណើរការអនុម័តសេចក្តីព្រាងវិសោធនកម្មច្បាប់នេះ ដើម្បីរក្សាទុកបទប្បញ្ញត្តិនៃច្បាប់ចាស់ ឬបើកឱ្យមានការពិគ្រោះយោបល់សាធារណៈឱ្យបានទូលំទូលាយជាមួយគ្រប់ភាគីនយោបាយ អង្គការសង្គមស៊ីវិល និងអ្នកជំនាញច្បាប់ ដើម្បីធានាឱ្យបាននូវការគោរពឆន្ទៈម្ចាស់ឆ្នោត។ គណបក្សនេះ អំពាវនាវឲ្យប្រជាពលរដ្ឋម្ចាស់ឆ្នោតសហគមន៍ជាតិ និងអន្តរជាតិ បន្តតាមដានយ៉ាងយកចិត្តទុកដាក់លើការប្រែប្រួលនៃប្រព័ន្ធច្បាប់ និងស្ថានភាពប្រជាធិបតេយ្យនៅកម្ពុជា និងប្រកាន់ខ្ជាប់នូវស្មារតីប្រជាធិបតេយ្យ តាមដានដំណើរការកសាងច្បាប់នេះដោយយកចិត្តទុកដាក់ និងសម្ដែងមតិដោយអហិង្សា និងសន្តិវិធី ដើម្បីការពារសិទ្ធិ និងសំឡេងរបស់ខ្លួន៕
