អ្នកឃ្លាំមើលសង្គមកម្ពុជា អះអាងថា រដ្ឋាភិបាលលោក ហ៊ុន ម៉ាណែត មិនគួរយកព្រឹត្តិការណ៍សង្គ្រាមកម្ពុជា-ថៃ និងភាពឈឺចាប់របស់ពលរដ្ឋខ្មែរ ទៅឆ្លាក់នៅវិមានឈ្នះ-ឈ្នះ ដើម្បីជាការចងចាំនោះទេ ពីព្រោះរូបភាពទាំងនោះបានបង្ហាញ អំពីការបែកបាក់ផ្ទៃក្នុងរវាងខ្មែរនិងខ្មែរដែលមិនអាចមានការផ្សះផ្សាជាតិ ទើបបណ្តាលឲ្យប្រទេសជិតខាងឈ្លានពានយកទឹកដីកម្ពុជាទៅកាន់កាប់។ ការអះអាងនេះបន្ទាប់ពីនាយករដ្ឋមន្ត្រីកម្ពុជា សម្រេចឱ្យឆ្លាក់រូបភាពអំពីព្រឹត្តិការណ៍សង្គ្រាមកម្ពុជា-ថៃ នៅលើជញ្ជាំងវិមានឈ្នះ-ឈ្នះ ដើម្បីទុកជាកេរដំណែលប្រវត្តិសាស្ត្រ សម្រាប់កូនខ្មែរជំនាន់ក្រោយបានដឹងនិងចងចាំ។
ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានឲ្យដឹងថា រដ្ឋាភិបាលលោក ហ៊ុន ម៉ាណែត មិនគួរយកព្រឹត្តិការណ៍សង្គ្រាមកម្ពុជា-ថៃ ទៅឆ្លាក់នៅវិមានឈ្នះ-ឈ្នះ ដើម្បីជាការចងចាំនោះទេ ពីព្រោះរូបភាពនៃសង្គ្រាមជាមួយថៃនេះ កម្ពុជាគ្មានឈ្នះអ្វីនោះទេ ព្រោះកម្ពុជាបានបាត់បង់ទឹកដី ពលរដ្ឋចាកចោល ផ្ទះសម្បែងដីធ្លី ធ្វើឲ្យគាត់រស់រងទុក្ខដល់បច្ចុប្បន្ន។
លោក ស៊ឹង សែនករុណា បន្ថែមទៀតថា បើនិយាយថា ខ្មែររូបរួមគ្នានៅជំនាន់សង្គ្រាម លោកថាមិនជារឿងទាំងស្រុងទេ បើទោះបីឃើញរូបភាពខ្មែរមកពីគ្រប់និន្នាការ ចូលរួមការសោកស្ដាយចង់រួបរួមគ្នាជួយការពារជាតិ ក៏ប៉ុន្តែគណបក្សកាន់អំណាចនៅតែជាតួអង្គដែលបំបែកបំបាក់ មិនបានបើកចិត្តឲ្យទូលំទូលាយឲ្យមានការផ្សះផ្សាជាតិនៅឡើយ ដោយសារនៅបន្តចាប់ខ្លួនសកម្មជនសង្គម សកម្មជននយោបាយ សកម្មជនបរិស្ថាន។
លោក ស៊ឹង សែនករុណា៖ «ខ្ញុំគាំទ្របើសិនជារូបភាពទាំងឡាយ បានបង្ហាញបានធ្វើឡើងបង្ហាញពីរឿងឈឺចាប់ឲ្យខ្មែរជំនាន់ក្រោយមានការឈឺចាប់ ហើយបញ្ឈប់ការបែកបាក់គ្នា រួបរួមសាមគ្គីគ្នា អីកុំយកនូវតម្រាប់ដែលធ្វើឲ្យមានការបែកបាក់ ឲ្យខ្មែរចុះខ្សោយត្រវបានបរទេសជិតខាងឈ្លានពានអីទាំងអស់នេះអាហ្នឹងវាជារូបភាពពិតជាក់ស្តែងជាង ជាជាងយើងយកទៅដាក់ពីវិមានឈ្នះឈ្នះ តែយើងចាញ់ ហើយបើយើងបែកបាក់ជាតិថាយើងរួបរួមជាតិ នេះគឺជារូបភាពមួយ ដែលមិនពិតប្រាកដ ហើយមិនឆ្លុះបញ្ចាំងការពិតទេ»។
ការលើកឡើងនេះ បន្ទាប់ពីនាយករដ្ឋមន្ត្រីកម្ពុជា លោហ៊ុន ម៉ាណែត បានថ្លែង នៅថ្ងៃទី១៥ ខែឧសភា នាឱកាសដែល អញ្ជើញជាអធិបតីភាពក្នុងពិធីអបអរសាទរទិវាអតីតយុទ្ធជន និងនិវត្តជនកម្ពុជា លើកទី១៩ ថា ក្នុងស្មារតីចងចាំនូវរាល់ព្រឹត្តិការណ៍ប្រវត្តិសាស្ត្រ និងការលះបង់ដ៏ខ្ពង់ខ្ពស់របស់កងទ័ព និងប្រជាពលរដ្ឋខ្មែរ លោកបានសម្រេចឱ្យឆ្លាក់រូបភាពអំពីសង្គ្រាមការពារអធិបតេយ្យភាព នៅលើជញ្ជាំងវិមានឈ្នះ-ឈ្នះ។ ការចារឹកព្រឹត្តិការណ៍ព្រំដែនកម្ពុជា-ថៃនេះ គឺដើម្បីទុកជាកេរដំណែលប្រវត្តិសាស្ត្ររាប់រយឆ្នាំ សម្រាប់កូនខ្មែរជំនាន់ក្រោយបានដឹង និងចងចាំ។
លោក ហ៊ុន ម៉ាណែត បានណែនាំឱ្យរៀបចំឆ្លាក់រូបភាពដែលឆ្លុះបញ្ចាំងពីទិដ្ឋភាពសំខាន់ៗចំនួន៣ នៃសង្គ្រាមការពារព្រំដែន ដើម្បីចារឹកទុកជាប្រវត្តិសាស្ត្រជាតិ។ ក្នុងនោះទិដ្ឋភាពទី១ នឹងបង្ហាញពីភាពឈឺចាប់ និងផលវិបាកនៃសង្គ្រាមឈ្លានពាន ដែលបង្កឱ្យមានការព្រាត់ប្រាស់ ជនភៀសសឹក ព្រមទាំងការបាត់បង់ជីវិត និងរបួសទាំងកងទ័ព និងប្រជាជនស៊ីវិល។ ទិដ្ឋភាពទី២ គឺការលើកតម្កើងវីរភាពដ៏អង់អាចក្លាហានរបស់កងទ័ព នគរបាលជាតិ និងអាវុធហត្ថ ដែលបានបូជាសាច់ស្រស់ឈាមស្រស់ដើម្បីការពារបូរណភាពទឹកដី។ រីឯទិដ្ឋភាពទី៣ នឹងបង្ហាញពីចលនាមហាគ្រួសារខ្មែរ និងសាមគ្គីភាពដ៏អស្ចារ្យរបស់ប្រជាជនគ្រប់និន្នាការទាំងក្នុង និងក្រៅប្រទេស ដែលបានរួបរួមគ្នាគាំទ្រកងកម្លាំងជួរមុខយ៉ាងខ្លាំងក្លាបំផុត។
លោក ហ៊ុន ម៉ាណែត៖ «ប៉ុន្តែសំខាន់ឆ្លាក់វានៅលើវិមានឈ្នះឈ្នះតែម្ដង ដើម្បីទុកជាកេរដំណែលរាប់រយឆ្នាំតទៅទៀត ជាប្រវត្តិសាស្ត្ររបស់យើង»។
ទាក់ទងទៅនឹងគំនូរសិល្បៈដើម្បីសន្តិភាព រដ្ឋាភិបាលលោក ហ៊ុន ម៉ាណែត បានគូរគំនួនចំនួន២ផ្ទាំងហើយ គឺមួយផ្ទាំងនៅខេត្តសៀមរាប និងផ្ទាំងទី២ នៅរាជធានីភ្នំពេញ។ គំនូរសិល្បៈដើម្បីសន្តិភាព បានដាក់បង្ហាញដល់សាធារណជននិងភ្ញៀវអន្តរជាតិ នៅបរិវេណសួនច្បារវត្តបទុមវតី។ ផ្ទាំងគំនូរនេះឆ្លុះបញ្ចាំងអំពីទុក្ខវេទនារបស់ជនស៊ីវិល និងការបំផ្លិចបំផ្លាញហេដ្ឋារចនាសម្ព័ន្ធ និងបេតិកភណ្ឌរបស់កម្ពុជាក្នុងជម្លោះព្រំដែនជាមួយថៃ។
ទាក់ទងទៅនឹងសង្គ្រាមកម្ពុជា ថៃ នេះរដ្ឋាភិបាលកម្ពុជាឯករាជ្យ២៣តុលា កាលពីថ្ងៃទី២២ ខែមេសា បានចេញសារកាន់ទុក្ខជាទម្ងន់ ចំពោះការបាត់បង់ទឹកដីខ្មែរ ហើយ រំលឹកឱ្យ ពលរដ្ឋទាំងអស់ ត្រូវតែចូលរួម ផ្លាស់ប្ដូរមេដឹកនាំត្រកូល«ហ៊ុន» ចេញពីអំណាច ដើម្បីរួមគ្នាទាមទារ ទឹកដីដែលបាត់បង់ទាំងនោះ យកមកវិញ។
តាមរយៈ សេចក្ដីប្រកាសព័ត៌មានដែលដាក់ចំណងជើងថា«កាន់ទុក្ខដ៏រន្ធត់» របស់ប្រជាជាតិខ្មែរ ដោយសារការបាត់បង់ទឹកដីកម្ពុជា ខ្លឹមសារទាំងមូល បានរៀបរាប់ថា កាលសម័យ លោក ហ៊ុន សែន ជានាយករដ្ឋមន្ត្រី ប្រជាជាតិខ្មែរ មានទុក្ខសោកជាខ្លាំង ដោយសារការបាត់បង់ទឹកដីមួយផ្នែកធំ ទៅប្រទេសជិតខាង ដូចជា កោះត្រល់ ចង្កោមកោះក្រចកសេះ កោះគជ រួមនឹងដែនសមុទ្ទជាង៧ម៉ឺនគីឡូម៉ែត្រការ៉េ និង តាមព្រំដែនដីគោកជាច្រើនហិកតារទៀត។
ចំណែក សម័យលោក ហ៊ុន ម៉ាណែត ជានាយករដ្ឋមន្ត្រី មិនដល់៣ឆ្នាំ ស្រួលបួលកម្ពុជាក៏បានធ្លាក់ខ្លួនកាន់តែរន្ធត់ ដោយសារការបាត់បង់ទឹកដី យ៉ាងតិច ៦៦តំបន់បន្ថែមទៀត ក្រោយពីយោធាថៃបានបង្កសង្គ្រាមឈ្លានពានវាយយក។
អ្នកឃ្លាំមើលសង្គមថា បើសង្គ្រាមកម្ពុជា-ថៃត្រូវបានបង្ហាញជារូបភាពនៃ “ជ័យជម្នះ” វាអាចបង្កការជជែកចម្រូងចម្រាស ព្រោះ ប្រជាពលរដ្ឋជាច្រើន ភៀសខ្លួន បាត់បង់ផ្ទះសម្បែង និងបាត់បង់ជីវភាព ដោយរស់នៅក្រោមភាពភ័យខ្លាច ដូច្នេះ ការចងចាំបែបជ័យជម្នះអាចមើលទៅមិនស្របជាមួយបទពិសោធន៍របស់ជនរងគ្រោះនោះទេ ដូច្នេះរដ្ឋាភិបាលមិនគួរឆ្លាក់រូបគំនូរនោះឲ្យពលរដ្ឋឈឺចាប់បន្ថែមទៀតនោះទេ៕
