មន្ត្រីបក្សប្រឆាំង និងសង្គមស៊ីវិល ស្នើឱ្យក្រសួងមហាផ្ទៃពិនិត្យឱ្យបានច្បាស់ជៀសវាងផ្សាយព័ត៌មានមិនពិត រឿងបក្សប្រឆាំង ទទួលលុយពីក្រៅប្រទេសសម្រាប់ការបោះឆ្នោត ក្រោយពីក្រសួងបានចេញសារ គំរាមរំលាយគណបក្សប្រឆាំងប្រសិនបើហ៊ានទទួលថវិកា ពីរដ្ឋបរទេស ដើម្បីធ្វើសកម្មភាពនយោបាយ នៅកម្ពុជា។ ការគំរាមរបស់ក្រសួងនេះ ធ្វើឡើងដោយសំអាងអត្ថបទភាសាអង់គ្លេសមួយបាន ចុះផ្សាយកាលពីពេលថ្មីៗនេះថា មានគណបក្សប្រឆាំងចំនួន៥ និង សង្គមស៊ីវិល ចំនួន៣ នឹងទទួលបាន ថវិកាពីសហរដ្ឋអាមេរិកចំនួន២លានដុល្លារ ដើម្បីជួយគាំទ្រកម្លាំងគណបក្សប្រឆាំង និងសកម្មភាពលើក កម្ពស់ប្រជាធិបតេយ្យនៅកម្ពុជា។
ខណៈដែលសកម្មភាពនយោបាយ របស់គណបក្សប្រឆាំង និងអង្គការសង្គមស៊ីវិលនៅកម្ពុជា កាន់តែរួមតូច ដោយសារតែ ការរឹតត្បិតពីសំណាក់ រដ្ឋាភិបាលត្រកូល«ហ៊ុន» កាន់តែខ្លាំង នៅប៉ុន្មានឆ្នាំចុងក្រោយ ស្រាប់តែ មានអត្ថបទភាសាអង់គ្លេសមួយរបស់គេហទំព័រឈ្មោះ ឌឹ សាន់ដេរ ហ្គាដៀន (The Sunday guardian) បានចុះផ្សាយអំពីផែនការរអាមេរិកត្រៀមនឹងផ្ដល់ថវិកាចំនួន ២លានដុល្លារ គាំទ្រគណបក្សប្រឆាំងនៅកម្ពុជា ដើម្បីត្រៀមចូលរួមប្រកួតប្រជែងការបោះឆ្នោត នៅឆ្នាំ២០២៧-២០២៨ ដែលករណីនេះធ្វើឱ្យក្រសួងមហាផ្ទៃ ចេញសារព្រមាន។
អនុប្រធានគណបក្សឆន្ទៈខ្មែរ លោក សុន ឆ័យ ប្រាប់ទូរទស្សន៍អាស៊ីសេរីនៅថ្ងៃទី២៤ ខែមិថុនាថា លោកបានអានអត្ថបទរបស់ ឌឹក សាន់ដេរ ហ្គាដៀន (The Sunday guardian) ដែលបានផ្សាយកាលពីថ្មីៗដែរ ដែលថា អាមេរិកនឹងត្រៀមផ្ដល់ថវិកា២លានដុល្លារឱ្យគណបក្សប្រឆាំងចំនួន៥ ដែលមានគណបក្សឆន្ទៈខ្មែរ ដើម្បីចង់សម្ពន្ធភាពជាមួយបក្សដទៃទៀត ក្នុងការត្រៀមខ្លួន ចូលរួមប្រកួតប្រជែងការ បោះឆ្នោតឆ្នាំ២០២៧។ លោកបញ្ជាក់ថា នេះជា«ព័ត៌មានមិនពិត»។
លោកបង្ហាញការ សោកស្ដាយ ដែលអត្ថបទនេះ គ្មានមូលដ្ឋានត្រឹមត្រូវ ហើយបែរជា ក្រសួងមហាផ្ទៃ យកធ្វើជា អំណះអំណាង ដោយគ្មានការត្រួតពិនិត្យឱ្យបានត្រឹមត្រូវ រួចចេញ សារគំរាមកំហែងមកលើបក្សប្រឆាំង។ លោកបន្តថា កន្លងទៅនេះ គណបក្សប្រឆាំងជួបបញ្ហាជាច្រើន ដូចជា កាជួបប្រជុំជាមួយអ្នកគាំទ្រតាមមូលដ្ឋាន និងការលើកស្លាកគណបក្សតាមទីសាធារណៈ គឺតែងតែត្រូវសមត្ថកិច្ច យាយី រំខាន និងបដិសេធមិនឱ្យធ្វើ។ លោកបន្តថា នៅពេលមានអត្ថបទនេះចុះផ្សាយ មិនពិតទៀត ធ្វើឱ្យបក្សប្រឆាំង កាន់តែលំបាក និងព្រួយបារម្ភ ពីដំណើរការនៃការរៀបចំការ បោះឆ្នោតនាពេលខាងមុខ។ លោកជំរុញ ឱ្យក្រសួង មហាផ្ទៃ គួរតែត្រួតពិនិត្យព័ត៌មានឱ្យច្បាស់លាស់ មុនចេញសេចក្ដីថ្លែងការណ៍ ណាមួយ ដែល ខុសទៅ នឹងការពិត។
លោក សុន ឆ័យ៖ «ដល់បន្ថែមព័ត៌មានបែបនេះទៀតធ្វើឱ្យយើងរឹតតែព្រួយបារម្ភ ថែមទៀតថាតើ វាអាចនឹងមានរឿងអ្វីកើតឡើង ចំពោះយើងដែលជាគណបក្សក្រៅរដ្ឋាភិបាល ។ ដើម្បីជៀសវាងកុំឱ្យមានព័ត៌មានបែបនេះ រដ្ឋាភិបាលត្រូវពិនិត្យមើលប្រភពព័ត៌មានទាំងនេះឱ្យបានច្បាស់លាស់សិន មុននឹងយកមកប្រើប្រាស់ចេញជាសេចក្ដីថ្លែងការណ៍» ។
គេហទំព័រមួយឈ្មោះ ឌឹ សាន់ដេរ ហ្គាដៀន (The Sunday guardian) កាលពីថ្ងៃទី២១ ខែមិថុនា បានចុះផ្សាយអត្ថបទ មានចំណងជើងថា«សហរដ្ឋអាមេរិកគាំទ្រផែនការដើម្បីពង្រឹងក្រុមប្រឆាំងរបស់កម្ពុជា»។ នៅក្នុងអត្ថបទនោះ បានពិពណ៌នាថាជា «សំណើសម្ងាត់»ដែលធ្វើឡើង តាមរយៈអង្គការ មូលនិធិជាតិដើម្បីប្រជាធិបតេយ្យ (NED) ដែលមានមូលដ្ឋាននៅសហរដ្ឋអាមេរិក។ គម្រោងថវិកានេះ ផ្ដល់ដល់ប្រទេសទាំងអស់នៅលើពិភពលោក ក្នុងគោលបំណង លើកកម្ពស់លទ្ធិប្រជាធិបតេយ្យ និងសិទ្ធិ មនុស្ស។
ប្រភពបន្តថា កញ្ចប់ថវិកា ដែលនឹងឧបត្ថម្ភពីស្ថាប័នអន្តរជាតិមួយនេះ មាន ២លានដុល្លារ គឺធ្វើឡើងដើម្បីពង្រឹងចលនាបក្សប្រឆាំងនៅកម្ពុជា រួមទាំងការផ្ដល់លទ្ធភាពក្នុងការ ចងសម្ព័ន្ធភាពរបស់ គណបក្សចំនួនប្រាំ ឱ្យទៅជាស្ថាប័ននយោបាយតែមួយ មុនពេលការ បោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ ២០២៧ និង ការបោះឆ្នោតសកលឆ្នាំ ២០២៨។
ក្នុងនោះគណបក្សប្រឆាំងដែលនឹងទទួលបានថវិការួមមាន គណបក្សភ្លើងទៀន គណបក្សឆន្ទៈខ្មែរ បក្សប្រជាធិបតេយ្យមូលដ្ឋាន បក្សកំណែទម្រង់កម្ពុជា និងបក្សកម្ពុជានិយម ដែលបច្ចុប្បន្ន ដូរមកជា គណបក្សប្រជាធិបតេយ្យជឿនលឿន។ រីឯ អង្គការសង្គមស៊ីវិល ដែលនឹងទទួលបានថវិកានេះដែរ រួមមាន មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់«សង់ត្រាល់» គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថាខុមហ្វ្រែល (COMFREL) និង អង្គការកម្មវិធីអភិវឌ្ឍន៍ធនធានយុវជនកម្ពុជា(YRDP)។
ក្រោយពីព័ត៌មាននេះ ត្រូវអ្នកប្រើប្រាស់បណ្ដាញសង្គមកម្ពុជា យកមកបង្ហោះចែកចាយជាបន្តបន្ទាប់មក ក្រសួងមហាផ្ទៃ នៅថ្ងៃទី២៣ ខែមិថុនា ក៏បានចេញសេចក្ដីប្រកាសព័ត៌មាន ដោយព្រមានថា ប្រសិនបើការផ្សព្វផ្សាយព័ត៌មាននេះ គឺជាការពិត គឺគណបក្សនយោបាយទាំងអស់ ដែលបានទទួលវិភាគទាន ពីភាគីបរទេស ទោះក្នុងរូបភាព ណាក៏ដោយ គឺជាសកម្មភាពល្មើសនឹងច្បាប់ស្ដីពី គណបក្សនយោបាយ និងច្បាប់នានាជាធរមាន។
ក្រសួងមហាផ្ទៃបញ្ជាក់ថា ក្នុងករណីល្មើសច្បាប់ ក្រសួងនឹងផាកពិន័យជាប្រាក់ និងអាចប្ដឹងរំលាយគណបក្សនយោបាយនោះ ទៅតុលាការកំពូល។ បន្ថែមពីលើនោះ ក្រសួងថា នៅក្នុងច្បាប់បានចែងថា មិនឱ្យគណបក្សនយោបាយស្ថិតនៅ ក្រោមចំណុះ ឬការបង្គាប់បញ្ជារបស់គណបក្សនយោបាយបរទេស ឬរដ្ឋាភិបាលបរទេសនោះទេ ដូច្នេះ ក្នុងករណីល្មើសតុលាការ អាចសម្រេចផ្អាកសកម្មភាព ឬរំលាយគណបក្សនយោបាយនោះតែម្ដង។
ជុំវិញរឿងនេះ នាយកប្រតិបត្តិនៃ មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់«សង់ត្រាល់» លោក មឿន តុលា បានឱ្យដឹងថា អត្ថបទរបស់ ឌឹក សាន់ដេរ ហ្គាដៀន (The Sunday guardian) នេះ គឺឃើញចុះផ្សាយចំនួន២លើករួចមកហើយ អំពីករណីស្រដៀងគ្នានេះ ប៉ុន្តែលោកថា ស្ថាប័ននេះ តែងតែផ្សាយព័ត៌មានមិនពិត និងគ្មានមូលដ្ឋានត្រឹមត្រូវ។ លោកបញ្ជាក់ថា អត្ថបទដែលស្ថាប័ននេះបានផ្សាយ អំពីផែនការអាមេរិកផ្ដល់ថវិកា២លានដុល្លារនោះ«មិនពិត»។
លោក មឿន តុលា៖ «យើងអត់មានទទួលបានថវិកាទាំងនោះទេ។ សង្ស័យថាអ្នកសារព័ត៌មានទាំងនោះចេះតែយកព័ត៌មានបំភ្លៃ ដែលយើងធ្លាប់ធ្វើការជាមួយ USAID កាលមិននោះ ប៉ុន្តែឥឡូវយើងលែងមានទៀតហើយ»។
ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា យល់ថាប្រសិនបើថវិកានេះ ផ្ដល់ឱ្យទៅបក្សប្រឆាំង និងអង្គការស៊ីវិលមែន ក៏មិនអាចថា «បទល្មើស»នោះទេ។ លោកបញ្ជាក់ថា ប្រសិនបើថវិកានោះ ឧបត្ថម្ភ ដើម្បីលើកកម្ពស់លទ្ធិប្រជាធិបតេយ្យ និងសិទ្ធិមនុស្សនោះ គឺជារឿងល្អ ដែលរដ្ឋាភិបាលត្រូវសាទរ មិនគួរចេញសារគំរាម នោះឡើយ។ លោកថា រឿងដែលត្រូវខ្វល់នោះគឺបក្សអំណាច ទៅវិញទេ ដែលកន្លងទៅមានក្រុមឧកញ៉ា និងអ្នកមានអំណាចមួយចំនួន បានយកលុយកខ្វក់បានពីការរំលោភបំពាន់ បោកប្រាស់ពលរដ្ឋយកទៅឧបត្ថម្ភបក្សកាន់អំណាច។
លោក ស៊ឹង សែនករុណា៖ «គួរតែបញ្ចប់ការធ្វើទុក្ខបុកម្នេញគ្រប់រូបភាពនោះវិញទៅ ហើយទទួលយកអ្វីដែលជាការជួយជ្រោមជ្រែងពីសហគមន៍អន្តរជាតិ ដើម្បីឱ្យគេមើលឃើញថា កម្ពុជាមានការកែប្រែ ឱ្យមានភាពល្អប្រសើរ ហើយដើរតាមគម្លង់ប្រជាធិបតេយ្យពិតប្រាកដ»។
មន្ត្រីសង្គមស៊ីវិល ស្នើឱ្យរដ្ឋាភិបាល គួរតែប្ដូរទម្លាក់ដឹកនាំ ដែលចាំតែចាប់កំហុសបក្សប្រឆាំង និងអង្គការសង្គមស៊ីវិល ដោយគ្មានបានពិចារណាឱ្យបានត្រឹមត្រូវ និងគិតពីផលប្រយោជន៍ជាតិជាធំ ព្រោះការធ្វើបែបនេះពុំផ្ដល់ផលចំណេញដល់ជាតិនោះទេ។ ផ្ទុយទៅវិញ ទង្វើរបស់រដ្ឋាភិបាលត្រូវបានសហគមន៍អន្តរជាតិ មើលឃើញថាកម្ពុជាកំពុងតែដើរនាំប្រទេស បែបផ្ដាច់ការ កាន់តែខ្លាំង៕
