អតីតទីប្រឹក្សាគណបក្សកម្លាំងជាតិ លោក រ៉ុង ឈុន ខកចិត្តដែលតំណាងអយ្យការអមសាលាដំបូងរាជធានីភ្នំពេញ បដិសេធមិនទទួលយកលិខិតរបស់ លោកដែលស្នើសុំទៅចូលរួមពិធីបុណ្យកាន់បិណ្ឌ និងភ្ជុំបិណ្ឌនៅស្រុកកំណើត។ លោក រ៉ុង ឈុន ចាត់ទុកថា ទង្វើរបស់តំណាងអយ្យការ គឺជាការរើសអើងនយោបាយ។
រដូវកាលនៃពិធីបុណ្យកាន់បិណ្ឌ និងភ្ជុំបិណ្ឌនេះ សកម្មជនសិទ្ធិមនុស្ស សកម្មជនបរិស្ថាន និងអ្នកនយោបាយប្រឆាំងជាច្រើនរូបទៀត ក៏មិនមានឱកាសបានទៅវត្តអារាម ឬជួបជុំសាច់ញាតិជិតឆ្ងាយដែរ ដោយសារពួកគាត់ កំពុងជាប់ឃុំក្នុងពន្ធនាគារក្រោមហេតុផលនយោបាយ។
បន្ទាប់ពីប្រធានតុលាការកំពូល លោក ជីវ កេង បានចេញលិខិតបដិសេធសំណើររបស់អតីតទីប្រឹក្សាគណបក្សកម្លាំងជាតិ លោក រ៉ុង ឈុន មិនឲ្យធ្វើដំណើរទៅចូលរួមពិធីបុណ្យកាន់បិណ្ឌនិងភ្ជុំបិណ្ឌនៅឯស្រុកកំណើតនោះ នៅព្រឹកថ្ងៃទី២៩ខែកញ្ញានេះ លោក រ៉ុង ឈុន និងអ្នកគាំទ្រជិត១០នាក់ បានយកលិខិតស្នើសុំច្បាប់ក្នុងគោលបំណងដូចគ្នានេះទៅដាក់ជូនតំណាងអយ្យការអមសាលាដំបូងរាជធានីភ្នំពេញវិញម្តង។ ប៉ុន្តែស្ថាប័នតំណាងអយ្យការអមសាលាដំបូងរាជធានីភ្នំពេញ មិនត្រឹមតែឆ្លើយបដិសេធភ្លាមៗនោះទេ សូម្បីតែលិខិតស្នើសុំរបស់លោក រ៉ុង ឈុន ក៏មិនទទួលយកដែរ។
លោក រ៉ុង ឈុន បង្ហាញការសោកស្តាយថា នៅពេលដែលលោកយកលិខិតទៅដាក់នោះ មន្ត្រីរដ្ឋបាលតុលាការ បានទុកឱ្យលោករង់ចាំអស់រយៈពេលជាងកន្លះម៉ោង។ចុងក្រោយ មន្ត្រីតុលាការប្រាប់លោកថា តុលាការមិនអាចទទួលយកលិខិតរបស់លោកបានទេ ក្រោមហេតុផលថា តុលាការកំពូល បានចេញសាលដីកាស្ថាពររួចហើយដោយហាមឃាត់មិនឱ្យរូបលោកចាកចេញពីរាជធានីភ្នំពេញឡើយ ។
លោក រ៉ុង ឈុន ថ្លែងទាំងហួសចិត្តថា ដោយសារតែមានការហាមឃាត់ពីសាលដីកាតុលាការកំពូលនេះហើយ ទើបលោកបានរៀបចំលិខិតស្នើសុំការអនុញ្ញាត ដើម្បីបានទៅចូលរួមធ្វើបុណ្យភ្ជុំបិណ្ឌតាមប្រពៃណី និងទំនៀមទម្លាប់ខ្មែរនៅស្រុកកំណើត។លោកយល់ថា សកម្មភាពនេះស្តែងឱ្យឃើញពីរូបភាពរើសអើង និងខុសពីបែបបទរដ្ឋបាល ព្រោះជាទូទៅនៅពេលប្រជាពលរដ្ឋយកលិខិតទៅដាក់ មន្ត្រីរដ្ឋបាលត្រូវតែវាយត្រាទទួលយកជាមុនសិន រួចទើបសេចក្តីសម្រេចថាអនុញ្ញាត ឬមិនអនុញ្ញាត ត្រូវធ្វើឡើងតាមក្រោយ។ «»
លោក រ៉ុង ឈុន បានដាក់លិខិតពីរលើកហើយទៅតុលាកាកំពូល និងទៅតំណាងអយ្យការអមសាលាដំបូងរាជធានីភ្នំពេញ ដើម្បីស្នើសុំការអនុញ្ញាតទៅចូលរួមពិធីបុណ្យកាន់បិណ្ឌនិងភ្ជុំបិណ្ឌជាមួយបងប្អូននិងក្មួយៗ ទៅតាមប្រពៃណីទំនៀមទម្លាប់ខ្មែរ និងធ្វើបុណ្យទានឧទ្ទិសកុសលដល់អ្នកមានគុណដែលបានចែកឋាននៅឯស្រុកកំណើត ស្ថិតនៅភូមិចុងកោះឃុំតាលន់ ស្រុកស្អាង ខេត្តកណ្តាល។
ទោះជាយ៉ាងណា ប្រធានតុលាការកំពូល លោក ជីវ កេង និងព្រះរាជអាជ្ញាសាលាដំបូងរាជធានីភ្នំពេញ បានឆ្លើយបដិសេធនិងរុញដាក់គ្នាទៅវិញទៅមក។
ក្រៅពីលោក រ៉ុង ឈុន នេះ ក្រុមគ្រួសាររបស់អ្នកជាប់ឃុំដោយសារការអនុវត្តសិទ្ធិនយោបាយ និងសិទ្ធិបញ្ចេញមតិជាច្រើនរូបទៀត ក៏កំពុងស្រងេះស្រងោចខ្លោចផ្សារ ដោយសារពួកគាត់មិនមានឱកាសបានជួបជុំក្រុមគ្រួសារនិងធ្វើបុណ្យទានជុំគ្នានៅក្នុង ឱកាសបុណ្យកាន់បិណ្ឌ និងភ្ជុំបិណ្ឌនេះ។
ប្រពន្ធរបស់សកម្មជនមាតាធម្មជាតិដែលកំពុងជាប់ពន្ធនាគារត្រពាំងផ្លុង លោក ថុន រដ្ឋា គឺ លោកស្រី ប៉ាត់ រស្មី ដែលកំពុងតស៊ូចិញ្ចឹមកូន៣នាក់ បានបង្ហាញអារម្មណ៍សោកសៅនៅក្នុងឱកាសបុណ្យភ្ជុំបិណ្ឌឆ្នាំនេះ។ លោកស្រី នៅមិនទាន់មានគម្រោងធ្វើបាយម្ហូបទៅជួបប្តីនៅពន្ធនាគារនៅឡើយ ព្រោះដោយសារនៅឆ្ងាយ រវល់មើលថែកូន និងខ្វះលុយកាក់ជាដើម។ «»
នៅក្នុងរដូវបុណ្យទាននេះ ប្រពន្ធរបស់សកម្មជនបរិស្ថានរូបនេះ អំពាវនាវឲ្យក្រុមអ្នកកាន់អំណាច ចេះធ្វើបុណ្យទានដោយចិត្តបរិសុទ្ធ ហើយដោះលែងប្តី និងអ្នកជាប់ឃុំដោយអយុត្តិធម៌ឯទៀត។ «»
ក្នុងពិធីបុណ្យភ្ជុំបិណ្ឌនេះ នៅតាមទីវត្តអារាមនានា ព្រះសង្ឃតែងសូត្រធម៌ និងផ្សព្វផ្សាយពាក្យទូន្មានរបស់ព្រះពុទ្ធបរមគ្រូ អំពីរឿងកម្មផល ឬអំពើបាបដែលមនុស្សគួរចៀសវាង ហើយត្រូវសាងអំពើល្អ និងដឹងគុណចំពោះបុព្វការីជនជាដើម។ ប៉ុន្តែទិដ្ឋភាពជាក់ស្តែងនៅក្នុងសង្គមខ្មែរ ហាក់មិនបានយកទស្សនៈវិជ្ជានេះមកអនុវត្តឡើយ។ គេសង្កេតឃើញថា អ្នកមានអំណាច តែងធ្វើបាបរំលោភជិះជាន់លើអ្នកគ្មានអំណាចនិងជនទន់ខ្សោយតាមទំនើងចិត្ត ដែលមិនត្រឹមតែផ្ទុយពីពាក្យទូន្មានរបស់ព្រះពុទ្ធសាសនាទេ ថែមទាំងផ្ទុយពីគោលការណ៍ច្បាប់ជាតិ និងអន្តរជាតិថែមទៀត។
ទាក់ទងនឹងរឿងនេះដែរ ព្រះតេជព្រះគុណ ប៊ុត ប៊ុនតិញ មានថេរដីកាថា រដូវបុណ្យទានបែបនេះ រដ្ឋាភិបាលត្រកូលហ៊ុន និងតុលាការ ត្រូវតែបើកសេរីភាពពេញលេញដល់លោក រ៉ុង ឈុន និងដោះលែងសកម្មជននយោបាយ សកម្មជនសង្គម សកម្មជនបរិស្ថាន និងអ្នករិះគន់ទាំងអស់ ដើម្បីឲ្យពួកគាត់ បានជួបជុំគ្រួសារ និងធ្វើបុណ្យទាន។ ព្រះអង្គ បន្តថា ការធ្វើដូច្នេះនឹងបង្ហាញឲ្យឃើញពីស្ថានភាពធូរស្រាលផ្នែកនយោបាយ និងធ្វើឲ្យសង្គមខ្មែរ ស្គាល់ភាពសុខសាន្តខ្លះ។ ទោះជាយ៉ាងណា ព្រះតេជព្រះគុណ ប៊ុត ប៊ុនតិញ គ្មានជំនឿថា រដ្ឋាភិបាលត្រកូលហ៊ុន ចេះធ្វើអំពើល្អឡើយដោយព្រះអង្គ កត់សម្គាល់ថា លោក ហ៊ុន សែន និងលោក ហ៊ុន ម៉ាណែត ខ្វាយខ្វល់តែរឿងពង្រឹងអំណាចប៉ុណ្ណោះ។ «»
របាយការណ៍របស់អង្គការលីកាដូដែលបានចងក្រងចំនួនអ្នកជាប់ឃុំដោយសារការប្រើប្រាស់សិទ្ធិ បង្ហាញថា គិតត្រឹមថ្ងៃទី២៩ ខែកញ្ញា ចំនួនអ្នកកំពុងជាប់ឃុំមានចំនួន១១០នាក់ ក្នុងនោះមានអ្នកនយោបាយបក្សប្រឆាំង សកម្មជនបរិស្ថាន អ្នកសារព័ត៌មាន សហជីព សកម្មជនដីធ្លី និងអ្នកបញ្ចេញមតិលើបណ្តាញសង្គម ជាពិសេសពាក់ព័ន្ធនឹងបញ្ហាសង្គ្រាមខ្មែរ-ថៃជាដើម៕
