តុលាការកំពូល ទើបតែបើកសវនាការលើបណ្តឹងសាទុក្ខរបស់មន្ត្រីបក្សប្រឆាំងលោក គា វិសាល បន្ទាប់ពីលោកបានចេញពីពន្ធនាគារ ជាង ៣ខែមកហើយ។ លោក គា វិសាល ហៅដំណើរការក្ដីនេះ ថា គឺជាអំពើអយុត្តិធម៌ផ្តួនលើរូបលោក ។ រីឯ សង្គមស៊ីវិលលើកឡើងថា ការបើកសវនាការដ៏យឺតយ៉ាវនេះ គឺជារឿងគ្មានន័យសម្រាប់ជនជាប់ចោទ។
នៅរសៀលថ្ងៃទី៦ ខែកក្កដានេះ តុលាការកំពូលទើបតែបើកសវនាការក្នុងសំណុំ រឿងពីបទ «ញុះញង់ឱ្យមានការរើសអើង» និងបទ «ជេរប្រមាថជាសាធារណៈ” លើអនុប្រធានគណបក្សកម្លាំងជាតិខេត្តកំពង់ចាម លោក គា វិសាល ក្រោយពីលោកបានអនុវត្តទោសពន្ធនាគារ គ្រប់រយៈពេលកំណត់ និងត្រូវបានដោះលែងពីពន្ធនាគារ តាំងពីខែមីនា ឆ្នាំ២០២៦ ម្ល៉េះ។
សវនាការតុលាការកំពូលនេះ ធ្វើឡើងតាមការប្ដឹងរបស់លោក គា វិសាល ដែល ជំទាស់នឹងការសម្រេចរបស់សាលាឧទ្ធរណ៍ភ្នំពេញ កាលពីខែធ្នូ ឆ្នាំ២០២៥ ឲ្យលោកជាប់ពន្ធនាគារ ២ឆ្នាំ តាមសាលក្រមរបស់សាលាដំបូងភ្នំពេញ។ លោក គា វិសាល បានប្ដឹងជំទាស់តាំងពីលោកនៅក្នុងពន្ធនាគារនៅឡើយ ប៉ុន្តែ តុលាការ កំពូល ទើបធ្វើធ្វើសវការនៅរសៀលនេះ។ តុលាការកំពូលនឹងប្រកាសសាលដីកា នៅព្រឹក ថ្ងៃទី១៣ ខែកក្កដា ឆ្នាំ២០២៦។
អនុប្រធានគណបក្សកម្លាំងជាតិខេត្តកំពង់ចាម លោក គា វិសាល ប្រាប់ទូរទស្សន៍អាស៊ីសេរី ថា តាំងពីដើមមក លោកច្រានចោលការចោទប្រកាន់ទាំងអស់របស់តុលាការ។ លោកថា លោករងភាពអយុត្តិធម៌ផ្ទួន ក្នុងសំណុំរឿងនេះ ពីព្រោះលោកត្រូវជាប់ពន្ធធនាគារដោយគ្មានកំហុស និង លើសពីនេះទៀត តុលាការដាក់លោកពេញ ២ឆ្នាំក្នុងពន្ធនាគារ នៅពេលមិនទាន់មានសាលក្រមស្ថាពរ កាត់ទោសលោកនៅឡើយ។ «»
ជុំវិញរឿងនេះ នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត យល់ឃើញថា កាលណាលោក គា វិសាល អនុវត្តទោសជាប់ពន្ធនាគារចប់សព្វគ្រប់បែបនេះ នោះតុលាការកំពូល អាចនឹងតម្កល់សាលដីកាសាលាឧទ្ធរណ៍ទុកជាបានការដដែល។ លោកថា តុលាការកំពូល យឺតពេលក្នុងការបើកការជំនុំជម្រះលើសំណុំរឿងលោក គា វិសាល ហើយថា ការអូសបន្លាយពេលវេលានេះ ធ្វើឲ្យបះពាល់សិទ្ធជនជាប់ចោទ។ «»
រដ្ឋមន្ត្រីក្រសួងយុត្តិធម៌ លោក កើត រិទ្ធ ធ្លាប់បាននិយាយថា ការជំនុំជម្រះ សេចក្ដីយឺតគឺជាអំពើអយុត្តិធម៌។
លោក គា វិសាល ធ្លាប់ជាប់ឃុំពីរលើកហើយ។ លើកទី១ កាលពីឆ្នាំ២០១៩ លោក ជាប់ឃុំពីបទ«ញុះញង់»ជុំវិញការបញ្ចេញមតិនៅ លើទំព័រហ្វេសប៊ុក និងវិទ្យុ ហើយលើកទី២ លោកជាប់ពន្ធនាគារ ក្នុងឆ្នាំ២០២៤។
កាលពីខែមីនា ឆ្នាំ២០២៤ លោក គា វិសាល ត្រូវបានអាជ្ញាធរចាប់ខ្លួន និងត្រូវបានផ្ដន្ទាទោសក្នុងខែសីហាឆ្នាំ២០២៤ដដែល ដោយសាលាដំបូងរាជធានីភ្នំពេញ ចោទ ប្រកាន់ពីបទ «ញុះញង់ឱ្យមានការរើសអើង»និងបទ «ជេរប្រមាថជាសាធារណៈ» តាមមាត្រា ៤៩៤ ៤៩៦ និង ៣០៧ នៃក្រមព្រហ្មទណ្ឌ ។ ការផ្ដន្ទាទោសនេះធ្វើឡើងបន្ទាប់ពីលោក គា វិសាល បានបង្ហោះសារនៅបណ្ដាញសង្គមហ្វេសប៊ុក រិះគន់កំណត់ត្រាស្ថានភាពប្រជាធិបតេយ្យរបស់រាជរដ្ឋាភិបាល។
លោក គា វិសាល ត្រូវបានតុលាការផ្ដន្ទាទោស ឲ្យដាក់ពន្ធនាគារ ២ឆ្នាំ និងពិន័យជាប្រាក់ចំនួន ៤លានរៀល (ប្រមាណ ១.០០០ ដុល្លារអាមេរិក)។ តុលាការ ក៏បានបង្គាប់ឱ្យលោក សងជំងឺចិត្តជាទឹកប្រាក់ចំនួន ២០លានរៀល (ប្រមាណ ៥.០០០ ដុល្លារអាមេរិក) ទៅដើមបណ្តឹង គឺលោក ម៉ៃ ហុងស្រៀង។ លោក គា វិសាល និង លោក ម៉ៃ ហុងស្រៀង ពីដើមឡើយគឺជាមន្ត្រីគណបក្សប្រឆាំងដូចគ្នា ប៉ុន្តែ លោក ម៉ៃ ហុងស្រៀង បានប្ដឹងលោក គា វិសាល ទៅតុលាការបន្ទាប់ពីលោក ម៉ៃ ហុងស្រៀង បានចុះចូលគណបក្សកាន់អំណាច ខណៈលោក គា វិសាល នៅបន្តជីវភាពនយោបាយជាមួយគណបក្សប្រឆាំង។
អ្នកឃ្លាំមើលលើកឡើងថា ជាទូទៅ លោក ហ៊ុន សែន ប្រើសកម្មជន និងមន្ត្រីបក្សប្រឆាំង ដែលចុះចូលគណបក្សប្រជាជនកម្ពុជា ឲ្យប្រឌិតរឿងវាយប្រហារ ឬ ប្ដឹងមន្ត្រីបក្សប្រឆាំងដែលនៅតែសកម្មជាមួយអ្នកប្រជាធិបតេយ្យ៕
