តុលាការខេត្តតាកែវផ្ដន្ទាទោសជនពិការលោក ភុន យុទ្ធ ឲ្យជាប់ពន្ធនាគារ ១៨ខែពីបទ«មិនរាងចាលក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិម» និងបទ«ញុះញង់»។ គ្រួសារ និងសង្គមស៊ីវិល សោកស្ដាយ និងថា ការសម្រេចនេះ នឹងរងការរិះគន់ពីសហគមន៍អន្តរជាតិបន្ថែមទៀត។
នេះជាលើកទី៣ហើយដែលលោក ភុន យុទ្ធ ត្រូវបានតុលាការផ្ដន្ទាទោស ឱ្យជាប់ពន្ធនាគារចំនួន ១ឆ្នាំកន្លះដូចៗគ្នា ក្នុងរយៈពេលជិត៧ឆ្នាំ ចុងក្រោយ នេះ។
ប្រពន្ធរបស់លោក ភុន យុទ្ធ ខកចិត្ត និងចាត់ទុកការសម្រេចរបស់តុលាការ ដែលឲ្យប្ដីជាប់ពន្ធនាគារជាង ១ ឆ្នាំជាថ្មីទៀតនេះ ថា ជាការធ្វើទុក្ខបុកម្នេញផ្លូវចិត្តលោកស្រី ដែលត្រូវទទួលបន្ទុករ៉ាប់រងគ្រួសារជំនួសប្ដីតែម្នាក់ឯង។
ការលើកឡើងនេះ បន្ទាប់ពីចៅក្រមសាលាដំបូងខេត្តតាកែវ នៅថ្ងៃទី២៨ ខែមេសា បានសម្រេចផ្ដន្ទាទោសជនមានពិការភាពលោក ភុន យុទ្ធ ឲ្យជាប់ពន្ធនាគារចំនួន ១ ឆ្នាំ ៦ ខែ ពីបទ«មិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម» និងបទ« ញុះញង់ឱ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងការបញ្ចេញមតិលើបណ្ដាញសង្គមរិះគន់ការដឹកនាំរបស់រដ្ឋាភិបាលត្រកូលហ៊ុន។
ប្រពន្ធរបស់លោក ភុន យុទ្ធ គឺលោកស្រី វ៉ិត មុំ ដែលជាជនមានពិការភាពដែរ នោះ ប្រាប់ទូរទស្សន៍អាស៊ីសេរីនៅថ្ងៃទី ២៨ ខែមេសា ថា ការផ្ដន្ទាទោសឲ្យប្ដីជាប់ ពន្ធនាគារជាង ១ ឆ្នាំនេះ នឹងធ្វើឲ្យគ្រួសារ ជួបការលំបាកកាន់តែខ្លាំង។ លោកស្រីស្នើឲ្យតុលាការដោះលែងប្ដីលោកស្រីនៅក្រៅឃុំបណ្ដោះអាសន្ន ដើម្បីជួបជុំគ្រួសារ និងរកប្រាក់ដោះស្រាយបញ្ហាប្រឈមផ្សេងៗនៅក្នុងគ្រួសារ។
លោកស្រី វ៉ិត មុំ៖ «ខ្ញុំមើលទៅប៉ះពាល់ក្រុមគ្រួសារយើងក្រផង ណាមួយគាត់ជាបង្គោលគ្រួសារ។ ណាមួយគ្រួសារ ណាមួយចំណូលចូលវាអត់មានដែរ វាលំបាក ខ្លាំងចំណាយកូនរៀនផង ចំណាយហូបចុក ចំណាយទៅមើលគាត់ច្រើន ហើយប្រ ចាំខែប្រចាំថ្ងៃមើលទៅដាក់វាច្រើនឆ្នាំពេក ហើយណាមួយគាត់ជនពិការផង ពិបាក ភ្នែកមើលណាស់»។
បុរសមានពិការភាព លោក ភុន យុទ្ធ ត្រូវសមត្ថកិច្ចចាប់ខ្លួនលើកទី៣ នៅថ្ងៃ ២៩ ខែតុលា ឆ្នាំ២០២៥ ។ ការចាប់ខ្លួនលើកទី ៣ នេះ បន្ទាប់ពីលោកត្រូវបានដោះលែងឲ្យមានសេរីភាពវិញ នៅខែកញ្ញា ឆ្នាំ ២០២៥ បន្ទាប់ពីបានអនុវត្តទោស រយៈពេល ១ឆ្នាំ ៦ខែ។
នាយកទទួលបន្ទុកកិច្ចការទូទៅ នៃអង្គការការពារ សិទ្ធិ មនុស្ស លីកាដូ (LICAHDO) លោក អំ សំអាត សោកស្ដាយ ចំពោះការផ្ដន្ទាទោសលោក ភុន យុទ្ធ ពាក់ព័ន្ធនឹងការបញ្ចេញមតិនេះ ថា នឹងធ្វើឲ្យមានការរិះគន់ ទាក់ទងនឹង ការ រំលោភ ឬការរឹតត្បិតលំហសេរីភាពបញ្ចេញមតិ ដែលប្រទេសកម្ពុជា បានផ្ដល់ សច្ចាប័ន និងទទួលស្គាល់បទដ្ឋានអន្តរជាតិស្ដីពីសិទ្ធិមនុស្ស ព្រមទាំងមានចែងក្នុងរដ្ឋធម្មនុញ្ញ។ លោកថា នៅក្នុងសង្គមប្រជាធិបតេយ្យ សេរីភាពបញ្ចេញមតិគឺ ជាមូលដ្ឋានគ្រឹះ ដែលពលរដ្ឋមានសិទ្ធិបញ្ចេញមតិ ដើម្បីរិះគន់ ស្ថាបនា ភាព អសកម្មផ្សេងៗរបស់មន្ត្រីសាធារណៈ និងលើកឡើងអំពីបញ្ហា ព្រមទាំងកង្វល់នានា ដែលកើតឡើងក្នុងសង្គម ហើយក៏ជាការចូលរួមចំណែក ដើម្បីអភិវឌ្ឍប្រទេសជាតិ។
លោក អំ សំអាត៖ «ជាពិសេស កតិកាសញ្ញាស្ដីពីសិទ្ធិពលរដ្ឋ សិទ្ធិនយោបាយ កតិកាសញ្ញាស្ដីពីសិទ្ធិ សេដ្ឋកិច្ច សង្គម និងវប្បធម៌។ អ៊ីចឹងកម្ពុជាយើង គួរតែគោរព និងអនុវត្តតាមបទដ្ឋានទាំងអស់នេះ ដោយមួយ ការគោរពអ៊ីចឹង រដ្ឋត្រូវធានា អំពីសេរីភាពក្នុងការបញ្ចេញមតិរបស់ប្រជាពលរដ្ឋ ទី២ គឺរដ្ឋត្រូវតែការពារ បើសិន ជាមានការរំលោភបំពានទៅលើសេរីភាពក្នុងការបញ្ចេញមតិ រដ្ឋត្រូវតែមានកិច្ចការពារ ទី៣ បំពេញបន្ថែម បានន័យថា រដ្ឋត្រូវមានគោលនយោបាយ ហើយបទដ្ឋាន គតិយុត្តិធម៌ ដើម្បីធានាការពារដល់សេរីភាពនៅក្នុងការបញ្ចេញមតិ»។
លោក ភុន យុទ្ធ ដែលមានកូនស្រីម្នាក់អាយុជាង ១០ ឆ្នាំនៅក្នុងបន្ទុក ត្រូវបានសមត្ថកិច្ចចាប់ខ្លួនលើកទី១កាលពីចុងខែតុលា ឆ្នាំ២០១៩ ដោយតុលាការខេត្តសៀមរាប ផ្ដន្ទាទោសលោកឲ្យជាប់ពន្ធនាគារចំនួន ១៨ខែ ពីបទ« ញុះញង់ បង្កឲ្យ មានការរើសអើង»និងបទ«ជេរប្រមាថជាសាធារណៈ» ខណៈការចាប់ខ្លួនលើកទី២ កាលពីថ្ងៃទី១៩ ខែមីនាឆ្នាំ២០២៤ ដោយតុលាការខេត្តតាកែវ សម្រេចផ្ដន្ទាទោស លោកឲ្យជាប់ពន្ធនាគារ ១ឆ្នាំ ៦ខែ ពីបទ«ញុះញង់ឲ្យមានការរើសអើង » នៅថ្ងៃទី១២ ខែវិច្ឆិកា ២០២៤ ពាក់ព័ន្ធនឹងការបញ្ចេញមតិ និងរិះគន់រដ្ឋាភិបាល លើបណ្ដាញសង្គម៕
