រដ្ឋាភិបាលកម្ពុជាឯករាជ្យ ២៣ តុលា សង្ឃឹមថា តុលាការព្រហ្មទណ្ឌអន្តរជាតិ (ICC) នឹងបើកការស៊ើបអង្កេត និងចាត់វិធានការតាមផ្លូវច្បាប់ រួមទាំងការចេញដីកាចាប់ខ្លួនមេដឹកនាំ និងមេយោធាថៃ ពាក់ព័ន្ធនឹងឧក្រិដ្ឋកម្មក្នុងអំឡុងជម្លោះព្រំដែនកម្ពុជា-ថៃ។ ក្តីរំពឹងបែបនេះ គឺនៅមុនពេលរដ្ឋាភិបាលនៅក្រៅប្រទេសមួយនេះគ្រោងដាក់ភស្តុតាងបន្ថែមជូនរដ្ឋអាជ្ញាតុលាការព្រហ្មទណ្ឌអន្តរជាតិ ICC នៅចុងខែសីហានេះ។
ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣ តុលា លោក អ៊ុំ សំអាន សង្ឃឹមថា រដ្ឋអាជ្ញាតុលាការព្រហ្មទណ្ឌអន្តរជាតិ ICC នឹងពិនិត្យលើការចោទប្រកាន់ដែលពាក់ព័ន្ធនឹងការស្លាប់ និងរបួសរបស់ប្រជាពលរដ្ឋកម្ពុជា ព្រមទាំងការខូចខាតផ្ទះសម្បែង ហេដ្ឋារចនាសម្ព័ន្ធ និងប្រាសាទបុរាណនានា។ លោកថា ការប្រើប្រាស់យន្តការច្បាប់អន្តរជាតិអាចជាមធ្យោបាយមួយដើម្បីស្វែងរកយុត្តិធម៌សម្រាប់ជនរងគ្រោះ និងទប់ស្កាត់ការកើតមានអំពើហិង្សាបន្ថែមទៀតនៅតាមព្រំដែន។
លោកថារដ្ឋាភិបាល២៣ តុលា មានភស្តុតាងរឹងមាំបញ្ជាក់ពីសកម្មភាពឧក្រិដ្ឋកម្មរបស់យោធាថៃ រួមមានការបាញ់សម្លាប់ជនស៊ីវិលការផ្លោងគ្រាប់និងទម្លាក់គ្រាប់ពីយន្តហោះចម្បាំង លើកាស៊ីណូនិងសណ្ឋាគារដែលគេសង្ស័យថា មានបង្ខាំងពួកឆបោកតាមអនឡាញដែលបណ្តាលឱ្យស្លាប់និងរបួសជនស៊ីវិលខ្មែរនិងជនសុីវិលបរទេសជាច្រើននាក់ និង លើលំនៅឋានជនសុីវិលខ្មែរដែលបណ្តាលឱ្យពលរដ្ឋខ្មែរយ៉ាងតិច២១នាក់ស្លាប់និងរបួស៨៣នាក់ រួមមានស្ត្រី ក្មេងនិងទារកម្នាក់។
លោក អ៊ុំ សំអាន៖ «ហេតុដូច្នេះយើងសង្ឃឹមថា តុលាការ ICC នឹងបើកការស៊ើបអង្កេត និងចោទប្រកាន់ទៅលើមេដឹកនាំថៃ មេដឹកនាំយោធាថៃ ហើយនិង ចេញដីកាចាប់ខ្លួនពួកគេ ហើយនិង សង្ឃឹមថានឹងបានសងសំណងទៅដល់ជនរងគ្រោះកម្ពុជា ហេតុ ហើយនិងការខូចខាតហេដ្ឋារចនាសម្ព័ន្ធរបស់កម្ពុជាហ្នឹង យើងសំអាងទៅលើ យើងមានភស្តុតាង រឹងមាំដែលសង្ឃឹមថា តុលាការ ICC នឹងចាត់វិធានការ ចំពោះមេដឹកនាំថៃ មេដឹកនាំយោធាថៃ ទៅតាមបណ្ដឹងរបស់រាជរដ្ឋាភិបាលកម្ពុជា ឯករាជ្យ ២៣ តុលា»។
ជុំវិញបញ្ហានេះ ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានប្រាប់ទូរទស្សន៍អាស៊ីសេរីថា ប្រសិនបើមានការដាក់បណ្តឹង និងភស្តុតាងគ្រប់គ្រាន់ ICC អាចពិនិត្យលើការចោទប្រកាន់ពាក់ព័ន្ធនឹងឧក្រិដ្ឋកម្មអន្តរជាតិ។ លោក ថា ច្បាប់អន្តរជាតិ អនុវត្តចំពោះមេដឹកនាំគ្រប់ប្រទេសដោយមិនមានការលើកលែង ប្រសិនបើមានភស្តុតាងគ្រប់គ្រាន់បង្ហាញថា ឧក្រិដ្ឋកម្មដែលស្ថិតក្នុងសមត្ថកិច្ចរបស់ ICC បានកើតឡើង។
លោក ស៊ឹង សែនករុណា៖ «ហើយនៅពេលដែលសង្គ្រាមកើតមានឡើង យើងឃើញហើយ ក្នុងការដែលយោធាថៃបានប្រើនូវបទល្មើស គេហៅថាជាបទឧក្រិដ្ឋកម្មសង្គ្រាមហ្នឹង យើងឃើញទី១ គឺរំលោភទៅលើ បូរណភាពទឹកដីរបស់ប្រទេសកម្ពុជា, ទី២ បានប្រើប្រាស់អាវុធយុទ្ធភណ្ឌហ្នឹង ហួសហេតុសង្គ្រប់មកលើប្រទេសកម្ពុជា ហើយបាន បាញ់សម្លាប់ប៉ះពាល់ទៅដល់អាយុជីវិតរបស់ប្រជាពលរដ្ឋ ហើយនិងយោធាផងដែរ។ ហើយក្នុងហ្នឹង នៅពេលដែលបាញ់ហ្នឹង ក៏បានប្រើប្រាស់នូវអាវុធដែលជាសារធាតុគីមីទៅទៀត, អាហ្នឹងគឺសុទ្ធសឹងជាបទល្មើស ជាបទឧក្រិដ្ឋកម្មអន្តរជាតិ»។
មកទល់ពេលនេះ រដ្ឋាភិបាលលោក ហ៊ុន ម៉ាណែត បានត្រឹមតែបង្ហាញជំហរចង់ដោះស្រាយជម្លោះព្រំដែនជាមួយថៃដោយសន្តិវិធី និងតែងចេញលិខិតតវ៉ាទៅកាន់ភាគីថៃ ដែលកំពុងបន្តឈ្លានពានប្រទេសកម្ពុជាជាបន្តបន្ទាប់ ដូចជាការរាយបន្លាលួស ទូកុងតឺន័រ សាងសង់ផ្លូវ សាងសង់របងជាឯកតោភាគី ចែកដីរបស់ខ្មែរឲ្យពលរដ្ឋថៃកាន់កាប់ ការអភិវឌ្ឍន៍ជម្លោះឲ្យទៅជាតំបន់ទេសចរណ៍ និងចុងក្រោយនេះ យោធាថៃ បានសាងសង់លេណដ្ឋានយោធាថ្មីនៅតំបន់ច្រកទ្វារអន្តរជាតិថ្មដា និងផែនការពង្រីកបណ្ដាញអគ្គិសនីរបស់ថៃទៅកាន់តំបន់ប្រាសាទតាក្របី និងភ្នំ ៣៥០ជាដើម។ ប៉ុន្តែរដ្ឋាភិបាលលោក ហ៊ុន ម៉ាណែត មិនបាននាំយកបញ្ហានេះទៅកាន់តុលាការអន្តរជាតិ និងស្ថាប័នអន្តរជាតិធំៗឡើយ។
តាមច្បាប់ទីក្រុងរ៉ូម ICC មានសមត្ថកិច្ចលើឧក្រិដ្ឋកម្មធ្ងន់ធ្ងរបំផុត រួមមានអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្មឈ្លានពាន៕
