ពលរដ្ឋដែលមានទំនាស់ដីធ្លីជាមួយក្រុមហ៊ុនវៀតណាម នៅខេត្តក្រចេះ អះអាងថា ក្រុមហ៊ុនវៀតណាមបានគំរាមកំហែង ដោយបញ្ជាឲ្យអាជ្ញាធរចាប់តំណាងរបស់ពួកគាត់ចំនួន៥នាក់ទៀតដាក់ពន្ធនាគារ ដោយសារតែតំណាងទាំងនោះ តែងតែដឹកនាំពលរដ្ឋចេញតវ៉ាពាក់ព័ន្ធបញ្ហាដីធ្លី។ មន្ត្រីសង្គមស៊ីវិល ចាត់ទុកការគំរាមកំហែងនេះ ជាទង្វើខុសច្បាប់។
ពលរដ្ឋដែលមានវិវាទដីធ្លីជាមួយក្រុមហ៊ុនវៀតណាម ឈ្មោះ កាម៉ាដេនូ វេនឈ័រ (ខេមបូឌា) (Kamdhenu Ventures Cambodia Limited (KVCL) ) ស្ថិតនៅស្រុកសំបូរ ខេត្តក្រចេះ អះអាងថា តំណាងក្រុមហ៊ុនមួយនេះ នឹងបញ្ជាឲ្យអាជ្ញាធរខេត្តក្រចេះកែសំណុំរឿង ដើម្បីចាប់តំណាងពលរដ្ឋចំនួន៥នាក់ទៀតដាក់ពន្ធនាគារ ដោយសារតែតំណាងទាំងនោះ តែងតែដឹកនាំពលរដ្ឋចេញតវ៉ាពាក់ព័ន្ធនឹងបញ្ហាដីធ្លី។
តំណាងពលរដ្ឋម្នាក់នៅខេត្តក្រចេះ គឺលោកស្រី អែល រ៉ូស្សា អះអាងប្រាប់ទូរទស្សន៍អាស៊ីសេរី នៅថ្ងៃទី២៨ ខែមករាថា តំណាងក្រុមហ៊ុនវៀតណាម បានប្រាប់ពលរដ្ឋក្នុងភូមិថា ក្រុមហ៊ុននឹងបញ្ជាឲ្យអាជ្ញាធរខេត្តក្រចេះកែសំណុំរឿង ធ្វើយ៉ាងណាចាប់តំណាងរបស់ពលរដ្ឋដាក់ពន្ធនាគារបន្ថែមទៀត។
លោកស្រី អែល រ៉ូស្សា៖ «វៀតណាមនិយាយជាមួយខាងកោះឆ្មាថា នៅខ្ញុំមួយទៀត ពីព្រោះខ្ញុំតវ៉ាដីបន្តិចទៀតកែសំណុំរឿងដូចពូ ភេន ឡៃ ដែរហើយ យកទៅដាក់គុកដែរហើយ ខ្ញុំអត់ដែលបំផ្លាញព្រៃឈើផង ចង់កែសំណុំរឿងដូចពូ ភេន ឡៃ យកទៅដាក់ពន្ធនាគារដែរ អ៊ីចឹងពន្ធនាគារខេត្តក្រចេះ ដាក់គុកតែមនុស្សល្អ អត់ដាក់គុកមនុស្សអាក្រក់ផង»។
លោកស្រី អែល រ៉ូស្សា អះអាងទៀតថា មន្ត្រីបរិស្ថាន និងតំណាងក្រុមហ៊ុនតែងតែចុះទៅឃ្លាំមើលដីព្រៃសហគមន៍ និងដីស្រែចម្ការរបស់ពលរដ្ឋ ដោយពលរដ្ឋសង្ស័យថា មន្ត្រីបរិស្ថានកំពុងលួចលក់ដីព្រៃសហគមន៍ និងដីស្រែចម្ការរបស់ពលរដ្ឋ ឲ្យទៅក្រុមហ៊ុនវៀតណាម ។ លោកស្រីបន្ថែមថា មន្ត្រីបរិស្ថានមិនបានយកចិត្តទុកដាក់បង្ក្រាបបទល្មើសព្រៃឈើ ដែលកំពុងកើតមាននៅក្នុងតំបន់ការពារនោះទេ ផ្ទុយទៅវិញពួកគេ បានសហការជាមួយក្រុមហ៊ុនវៀតណាម ធ្វើបាបពលរដ្ឋរស់នៅតំបន់នោះ។
លោកស្រី អែល រ៉ូស្សា៖ «ខ្ញុំគិតថាខាងបរិស្ថានសហការគ្នាជាមួយក្រុមហ៊ុន គំរាមកំហែងប្រជាពលរដ្ឋមិនឲ្យតវ៉ារឿងដី ចង់យកដីទៅលក់ឲ្យក្រុមហ៊ុន ពីព្រោះអី ពូ ភេន ឡៃ អត់មានបំផ្លាញព្រៃឈើទេ» ។
ជុំវិញរឿងនេះ ទូរទស្សន៍អាស៊ីសេរី នៅមិនទាន់អាចទាក់ទងអភិបាលខេត្តក្រចេះ លោក វ៉ា ថន និង ប្រធានមន្ទីរបរិស្ថាន ខេត្តក្រចេះ លោក គា ប៊ូ ដើម្បីសុំការអត្ថាធិប្បាយបានទេ នៅថ្ងៃទី២៨ ខែមករា។
តំណាងពលរដ្ឋចំនួន ៥នាក់ ដែលក្រុមហ៊ុនគំរាមចាប់ដាក់ពន្ធនាគារ រួមមាន លោក អ៊ុន សុខុំ ប្រុក ភារម្យ ឌុច សាគី ស៊ឹង ករុណា និងលោកស្រី អែល រ៉ូស្សា។ រីឯអ្នកទាំង៥រូបនេះ ធ្លាប់ត្រូវបានសាលាដំបូងខេត្តក្រចេះ កោះហៅឲ្យចូលបំភ្លឺម្ដងរួចមកហើយ ពាក់ព័ន្ធនឹងការចោទប្រកាន់រំលោភកាន់កាប់ទ្រព្យសម្បត្តិរដ្ឋដោយខុសច្បាប់ និងបានប្រើប្រាស់អំពើហិង្សាទៅលើអ្នកកាន់កាប់អចលនវត្ថុដោយសុចរិត។ ប៉ុន្តែតំណាងពលរដ្ឋថា ពួកគាត់មិនបានប្រព្រឹត្តដូចការចោទប្រកាន់នោះឡើយ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី មានប្រសាសន៍ថា អាជ្ញាធរមិនគួរធ្វើតាមការបង្គាប់បញ្ជារបស់ក្រុមហ៊ុន ហើយធ្វើបាបពលរដ្ឋស្លូតត្រង់របស់ខ្លួននោះទេ អាជ្ញាធរត្រូវតែធ្វើទៅតាមច្បាប់ និងស្វែងរកដំណោះស្រាយឲ្យពលរដ្ឋ ប្រសើរជាងបង្កបញ្ហាកាន់តែធំឡើង។
លោក យិន ម៉េងលី៖ «អ៊ីចឹងការអូសបន្លាយរយៈពេលយូរនេះ យើងចាត់ទុកថា ជាការធ្វើទារុណកម្មមួយដែរ គឺទារុណកម្មផ្លូវចិត្ត អញ្ចឹងអាជ្ញាធរត្រូវតែហ៊ានប្រឈមទៅនឹងការពុះពារអ្វីដែលជាផ្លូវច្បាប់ឲ្យបានត្រឹមត្រូវ ដើម្បីប្រយោជន៍ប្រជាពលរដ្ឋរបស់គាត់ ដើម្បីឲ្យពលរដ្ឋមានជំនឿលើអាជ្ញាធរវិញ» ។
កាលពីថ្ងៃទី០៩ ខែមករាកន្លងទៅ មន្ត្រីបរិស្ថានបានចាប់ខ្លួនតំណាងពលរដ្ឋម្នាក់ គឺលោក ភេន ឡៃ ដោយចោទប្រកាន់តំណាងពលរដ្ឋរូបនេះ ពីបទកាប់រុករានទន្ទ្រានដីព្រៃដោយខុសច្បាប់។ រហូតមកដល់ពេលនេះ អាជ្ញាធរមិនទាន់ដោះលែង លោក ភេន ឡៃ ឲ្យនៅក្រៅឃុំនោះទេ បើទោះបីអាជ្ញាធរភូមិឃុំបានបញ្ជាក់ថា លោក ភេន ឡៃ មិនបានប្រព្រឹត្តដូចការចោទប្រកាន់របស់មន្ត្រីបរិស្ថានក្ដី។
កាលពីដើមឆ្នាំ២០២៤ ក្រុមហ៊ុនវៀតណាម កាម៉ាដេនូ វេនឈ័រ និងក្រុមហ៊ុន កសិកម្ម យុវជន ស្វាយរៀង បានឈូសឆាយបំផ្លាញផលដំណាំ ដុតផ្ទះសម្បែង និងហ៊ុមព័ទ្ធយកដីស្រែចម្ការរបស់ពលរដ្ឋនៅឃុំកោះខ្ញែរ ស្រុកសំបូរ ខេត្តក្រចេះ ជាង៣០០គ្រួសារ។ ពលរដ្ឋបាននាំគ្នាចេញតវ៉ាទាមទារ ឲ្យអាជ្ញាធរថ្នាក់ជាតិ ជួយរកដំណោះស្រាយឲ្យបានសមរម្យដល់ពលរដ្ឋ។ ប៉ុន្តែរហូតមកដល់ពេលនេះ អាជ្ញាធរពាក់ព័ន្ធមិនបានស្វែងរកដំណោះស្រាយឲ្យពលរដ្ឋនោះឡើយ៕
