ក្រុមឈ្មួញមានអំណាចនាំគ្នាសម្រុកដឹកឈើមានតម្លៃ ចេញពីកម្ពុជា យកទៅលក់នៅវៀតណាមយ៉ាងរលូន តាមច្រកព្រំដែនដាក់ដាំ ក្នុងខេត្តមណ្ឌលគិរី ដោយគ្មានអាជ្ញាធរចុះទប់ស្កាត់នោះទេ។ អ្នកឃ្លាំមើលថា នេះមិនមែនជាករណីថ្មីឡើយ ពីព្រោះក្រុមឈ្មួញទាំងនោះតែងតែចេញរកស៊ីបទល្មើសព្រៃឈើនូវរដូវប្រាំង។
ពលរដ្ឋនៅឃុំដាក់ដាំ ស្រុកអូររាំង ខេត្តមណ្ឌលគិរី អះអាងថា ស្របពេលកម្ពុជា កំពុងមានជម្លោះព្រំដែនជាមួយប្រទេសថៃ និងរដូវប្រាំងឈានចូលមកដល់ ក្រុមឈ្មួញមានលុយ មានអំណាច នាំគ្នាសម្រុករកស៊ីកាប់ និងដឹកជញ្ជូនឈើមានតម្លៃយកទៅលក់ប្រទេសវៀតណាមរៀងរាល់យប់ ដោយគ្មានសមត្ថកិច្ចពាក់ព័ន្ធហាមឃាត់ ឬបង្ក្រាបបទល្មើសទាំងអស់នេះនោះទេ។
តំណាងសហគមន៍នៅឃុំដាក់ដាំ លោក បូរ៉េត កំពី ប្រាប់ទូរទស្សន៍អាស៊ីសេរី នៅថ្ងៃទី២៦ ខែកុម្ភៈថា បច្ចុប្បន្នបទល្មើសព្រៃឈើនៅក្នុងខេត្តមណ្ឌលគិរី មានពីរប្រភេទ ទីមួយក្រុមឈ្មួញនាំគ្នាកាប់ទន្ទ្រានដីព្រៃយកធ្វើជាកម្មសិទ្ធិ និងទីពីរកាប់ឈើធ្វើអាជីវកម្មឆ្លងដែនដោយខុសច្បាប់ ហើយក្រុមឈ្មួញទាំងនោះ នាំគ្នាចូលទៅកាប់ឈើមានតម្លៃនៅក្នុងតំបន់ព្រៃការពារនានា ដូចជា ដែនជម្រកសត្វព្រៃកែវសីមា និងតំបន់ការពារក្នុងភូមិសាស្ត្រទឹកជ្រោះប៊ូស្រា រួចដឹកជញ្ជូនយកទៅលក់នៅប្រទេសវៀតណាម តាមច្រកដាក់ដាំជារៀងរាល់យប់។ លោកថា អាជ្ញាធរនៅតំបន់នោះបានឃើញបទល្មើសទាំងអស់នេះដែរ ប៉ុន្តែអាជ្ញាធរមិនបានបង្ក្រាបបទល្មើសទាំងអស់នេះនោះឡើយ។
លោក បូរ៉េត កំពី៖ «អាជ្ញាធរយើងគាត់ព្រងើយកន្តើយ បទល្មើសការដឹកឈើយ៉ាងអនាធិបតេយ្យបាត់បង់ព្រៃឈើឬក៏ធនធានធម្មជាតិនៅក្នុងស្រុក អាជ្ញាធរខ្លះគាត់មិនជួយទប់ស្កាត់ អាចអាជ្ញាធរឬមន្ត្រីជំនាញ គួរតែទប់ស្កាត់ឲ្យបានទាន់ពេល នៅពេលដែលមានការរាយការណ៍ពីសហគមន៍ឬប្រជាពលរដ្ឋ»។
ពលរដ្ឋថា ក្រុមឈ្មួញបានប្រើប្រាស់គោយន្តជាមធ្យោបាយដឹកជញ្ជូនឈើចេញពីក្នុងព្រៃជ្រៅ និងមានឡានកែច្នៃចាំទទួល និងដឹកជញ្ជូនឆ្លងដែរតែម្ដង ដោយក្នុងមួយយប់ ចាប់ពី៣០ឡានទៅ៤០ឡាន តាមច្រកព្រំដែនកម្ពុជា-វៀតណាម ក្នុងឃុំដាក់ដាំ។
ចំណែកអ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង លើកឡើងថា នេះមិនមែនជាករណីថ្មីនោះទេ ដែលខេត្តនៅតាមព្រំដែនមានបទល្មើសព្រៃឈើកើតឡើង ពីព្រោះអាជ្ញាធរទាំងនោះ តែងតែឃុបឃិតជាមួយអ្នកប្រព្រឹត្តបទល្មើសជាប្រចាំ និងរៀងរាល់រដូវប្រាំងចូលមកដល់។ លោកថា ថ្នាក់ជាតិគួរតែចុះស៊ើបអង្កេត ទៅលើអាជ្ញាធរថ្នាក់ក្រោមជាតិ ប្រសិនបើរកឃើញថា ជាប់ពាក់ព័ន្ធបទល្មើសព្រៃឈើ គួរតែចាត់វិធានការតាមច្បាប់ឲ្យបានតឹងរ៉ឹង ទាំងជនល្មើស និងអ្នកសមគំនិត។
លោក សេង សុខហេង៖ «បើសិនគាត់ការពារមិនបាន គាត់គួរតែរកវិធានការ ឬកំណែទម្រង់ឲ្យបានទាន់ពេល ក្នុងការបង្ក្រាបនេះឲ្យបានទាន់ពេល ត្រូវចាប់អ្នកជាប់ពាក់ព័ន្ធយកមកដាក់ទោស ឬអនុវត្តតាមផ្លូវច្បាប់ ត្រូវតែអនុវត្តឲ្យបានមិនត្រូវបណ្ដែតបណ្ដោយអ៊ីចឹងនោះទេ»។
ជុំវិញរឿងនេះ ទូរទស្សន៍អាស៊ីសេរី ពុំអាចទាក់ទងអភិបាលខេត្តមណ្ឌលគិរី លោក ថង សាវុន និងប្រធានមន្ទីរបរិស្ថានខេត្តមណ្ឌលគិរី លោក ហាល់ វិបុល ដើម្បីសុំការអត្ថាធិប្បាយបានទេនៅថ្ងៃទី២៦ ខែកុម្ភៈ។ ចំណែកអ្នកនាំពាក្យក្រសួងបរិស្ថាន លោក ខ្វៃ អាទិត្យា ក៏ទូរទស្សន៍អាស៊ីសេរី មិនអាចទាក់ទងបានដែរ នៅថ្ងៃដដែលនេះ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី មានប្រសាសន៍ថា មន្ត្រីជំនាញមិនគួរស្ងប់ស្ងាត់ និងផ្អែកទៅតាមស្ថានការណ៍សព្វថ្ងៃនោះទេ អាជ្ញាធរត្រូវតែសកម្មក្នុងការបង្ក្រាបបទល្មើសព្រៃឈើគ្រប់ទម្រង់ មិនត្រូវបណ្ដែតបណ្ដោយឲ្យមានការរត់ពន្ធឈើបែបនេះឡើយ។ លោកថា ប្រសិនបើមានបទល្មើសនៅក្នុងខេត្តមណ្ឌលគិរី អ្នកដែលទទួលខុសត្រូវលើបញ្ហានេះ គឺអាជ្ញាធរខេត្ត និងសមត្ថកិច្ចការពារព្រំដែន។
លោក យិន ម៉េងលី៖ «បើខ្ញុំ ខ្ញុំមិនចង់ឲ្យមើលទៅលើអ្នកប្រព្រឹត្តទេ ខ្ញុំពិនិត្យមើលទៅលើអ្នកទទួលខុសត្រូវវិញ ហេតុអ្វីបានជាបណ្ដោយឲ្យមានបទល្មើសកើតឡើងនៅក្នុងដែនដី នៅក្នុងដែនសមត្ថកិច្ចរបស់ខ្លួន ពិនិត្យហើយចាត់វិធានការទៅលើអ្នកទទួលខុសត្រូវ ខ្ញុំគិតថាបទល្មើសល្អជាងទៅបង្ក្រាបក្រុមឧក្រិដ្ឋជន»។
ក្រៅពីបទល្មើសព្រៃឈើរត់ពន្ធឆ្លងដែន នៅខេត្តមណ្ឌលគិរី ក៏មានក្រុមហ៊ុនចំនួន៤ ផ្សេងទៀត កំពុងតែសំងំធ្វើអាជីវកម្មឈើទ្រង់ទ្រាយធំ ក្នុងភូមិសាស្ត្រស្រុកកោះញែក ក្នុងនោះដូចជា ក្រុមហ៊ុន៩៥ និងក្រុមហ៊ុនវាសនាកសិកម្មជាដើម។ ដោយរថយន្តដឹងឈើក្រុមហ៊ុនមួយនេះ ធ្លាប់ដឹកឈើក្រឡាប់ធ្លាក់ផ្លូវនៅចំណុចអូរងើយ ភូមិសាស្ត្រឃុំសែនមនោរម្យ ស្រុកអូររាំង ដែលកាប់ប្រមូលឈើចេញពីតំបន់ព្រៃការពារចំនួន២ គឺដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រេច៕
