សមត្ថកិច្ចបានសាកសួរជនបង្កឈ្មោះ ស៊ីវ ជ័យសិដ្ឋ ដែលជាកូនប្រុសមន្ត្រីប៉ូលិសផ្កាយ១ នៅខេត្តបន្ទាយមានជ័យ គឺលោក ស៊ីវ សុជាតិ បន្ទាប់ពីរត់គេចខ្លួនជាច្រើនថ្ងៃ រឿងបើកបរឡានទំនើបបុកពលរដ្ឋ ៦នាក់ស្លាប់នៅខេត្តបាត់ដំបង។ អ្នកឃ្លាំមើលរិះគន់ថា ការពន្យារពេលនាំជនបង្កមកអនុវត្តច្បាប់ គឺជាកលល្បិចរបស់ឪពុករបស់ជនបង្កដែលមានទាំងអំណាច និងទឹកលុយក្នុងការឃុបឃិតជាមួយបក្ខពួករបស់ខ្លួន ដើម្បីជួយឱ្យកូនប្រុសអាចគេចផុតពីការទទួលទោសតាមផ្លូវច្បាប់។
ជនសង្ស័យឈ្មោះ ស៊ីវ ជ័យសិដ្ឋ បានសារភាពនៅចំពោះមុខសមត្ថកិច្ចខេត្តបាត់ដំបងថា ខ្លួនគឺជាអ្នកបើកបររថយន្តសេរីទំនើប និងធ្វើដំណើរតែម្នាក់ឯងក្នុងហេតុការណ៍គ្រោះថ្នាក់ចរាចរណ៍ដែលបុករះបណ្ដាលឱ្យមនុស្ស ៦នាក់ស្លាប់។
សេចក្ដីប្រកាសព័ត៌មានរបស់ស្នងការដ្ឋាននគរបាលខេត្តបាត់ដំបងនៅរសៀលថ្ងៃទី១ ខែមេសាឱ្យដឹងថា ជនសង្ស័យឈ្មោះ ស៊ីវ ជ័យសិដ្ឋ ត្រូវបានឃាត់ខ្លួនដោយឪពុកគឺលោក ស៊ីវ សុជាតិ ដែលជាស្នងការរងនគរបាលខេត្តបន្ទាយមានជ័យ ដើម្បីប្រគល់ជូនសមត្ថកិច្ចខេត្តបាត់ដំបង។
ទូរទស្សន៍អាស៊ីសេរីមិនអាចទាក់ទង នាយកការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបងលោក ចាន់ សុធី ដើម្បីសាកសួរបន្ថែមជុំវិញរឿងបាននោះទេនៅថ្ងៃទី១ ខែមេសា។
ហេតុការណ៍គ្រោះចរាចរណ៍កាលពីយប់ថ្ងៃទី២៧ ខែមីនា ជនសង្ស័យបានបើកឡានសេរីទំនើបបុករះម៉ូតូ ២គ្រឿងនៅស្រុកមោងឫស្សី ខេត្តបាត់ដំបងបណ្ដាលឱ្យពលរដ្ឋ ៣គ្រួសារដែលមានមនុស្សចំនួន ៦នាក់បានស្លាប់ក្នុងនោះរួមមានទាំងស្ត្រីពពោះកូនក្នុងផ្ទៃ ៣ខែផងបានស្លាប់ទាំងម្ដាយទាំងកូនយ៉ាងអនោចអធម៌ និងមានក្មេងប្រុសម្នាក់ទៀតរងរបួសធ្ងន់កំពុងសង្គ្រោះបន្ទាន់ក្នុងមន្ទីរពេទ្យខេត្តសៀមរាប។ ភ្លាមៗក្រោយកើតហេតុសមត្ថកិច្ចមិនបានបើកការស្រាវជ្រាវតាមចាប់ជនបង្កនោះទេ ដោយគ្រាន់តែចេញសេចក្ដីប្រកាសឱ្យជនសង្ស័យចូលខ្លួនមកបំភ្លឺដោយខ្លួនឯង។
ទាក់ទងនឹងរឿងនេះ អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ លើកឡើងថា ប្រជាពលរដ្ឋខ្មែរស្លូតត្រង់រស់នៅអាណោចអាធម៌ក្រោមរបបដឹកនាំដោយត្រកូល ហ៊ុន ដោយសារតែអ្នកមានអំណាច ឬកូនចៅរបស់ពួកគេអាចសម្លាប់ពលរដ្ឋទាំងចេតនា និងអចេតនា ដោយគ្មានការធានាពីការអនុវត្តច្បាប់លើជនប្រព្រឹត្តធ្ងន់ធ្ងរនោះទេ។ លោកថា ករណីកូនប្រុសមេប៉ូលិសផ្កាយ១ លោក ស៊ីវ សុជាតិ នៅពេលដែលអនុវត្តច្បាប់គឺក្រុមបក្ខពួករបស់គ្រួសារជនបង្កពួកគេនឹងប្រើប្រាស់គ្រប់ល្បិចកល ដើម្បីរំដោះឱ្យជនល្មើសអាចរួចផុតពីការទទួលទោសតាមច្បាប់ ដូចករណីកូនចៅអ្នកមានអំណាចផ្សេងទៀត ឬមន្ត្រីក្រុមឧកញ៉ាដែលកំពុងប្រព្រឹត្តអំពើរកស៊ីបែបឧក្រិដ្ឋកម្ម។
លោក គឹម សុខ៖ «ការផ្លាស់ប្ដូរស្ថានភាពកម្ពុជាយើងឱ្យមានយុត្តិធម៌ ទាល់តែប្រជាពលរដ្ឋ យុវជនខ្មែររួបរួមកម្លាំងគ្នា ចេញទាមទារតវ៉ាឱ្យមានការផ្លាស់ប្ដូរអ្នកដឹកនាំបច្ចុប្បន្នហ្នឹងតែម្ដង ផ្លាស់ប្ដូរប្រព័ន្ធការពារឧក្រិដ្ឋកម្មហ្នឹងចេញ ទើបអាចធានារកយុត្តិធម៌ជូនប្រទេសកម្ពុជា។ ពីព្រោះប្រព័ន្ធឧក្រិដ្ឋកម្មដែលដឹកនាំដោយក្រុមគ្រួសារហ៊ុននេះ ការពារតែពួកអ្នកខូចនៅជុំវិញក្រុមគ្រួសារ ហ៊ុន អ្នកធ្វើបាបប្រជាពលរដ្ឋស្លូតត្រង់នៅជុំវិញក្រុមគ្រួសារហ៊ុន ប៉ុណ្ណោះ។ ចំណែកឯ សមាជិកក្រុមគ្រួសារ និងបក្ខពួករបស់ពួកគេ ទោះធ្វើខុសយ៉ាងម៉េចក៏ដោយ គេរកល្បិចដើម្បីឱ្យគេចពីសំណាញ់ច្បាប់បន្តិចម្តងៗតាមកាលៈទេសៈ»។
អ្នកឃ្លាំមើលថា ករណីកូនប្រុសស្នងការរងខេត្តបន្ទាយមានជ័យ លោក ស៊ីវ សុជាតិ មិនគួរបញ្ចប់ដោយការបង្ខំឱ្យជនបង្កចូលសារភាពប៉ុណ្ណោះទេ ប៉ុន្តែសមត្ថកិច្ចត្រូវរៀបចំសំណុំរឿងឱ្យបានម៉ឺងម៉ាត់ ដើម្បីបញ្ជូនទៅតុលាការផ្ដន្ទាទោសឱ្យសមស្របតាមច្បាប់។ ពួកគេក៏ទាមទារឱ្យអាជ្ញាធរបើកការស៊ើបអង្កេតលើទ្រព្យសម្បត្តិរបស់លោក ស៊ីវ សុជាតិ ដែលជាមន្ត្រីប៉ូលិសពាក់ផ្កាយ១ ដោយសារមានទ្រព្យសម្បត្តិមហាសាល ជាពិសេសរថយន្តសេរីទំនើបតម្លៃរាប់ម៉ឺនដុល្លារដែលត្រូវបានប្រើដោយកូនប្រុសបង្កគ្រោះថ្នាក់បណ្ដាលឱ្យពលរដ្ឋ ៣គ្រួសារបាត់បង់ជីវិត។
រថយន្តសេរីទំនើបម៉ាក (MERCEDES BENZ AMG GT53) របស់ជនសង្ស័យ ស៊ីវ ជ័យសិដ្ឋ ដែលបើកបុកសម្លាប់ពលរដ្ឋនៅបាត់ដំបងមានតម្លៃជាង ១០ម៉ឺនដុល្លារ។ ជនសង្ស័យអាយុ ២០ឆ្នាំដែលពលរដ្ឋហៅថា ជើងកាងអាងឪរូបនេះក៏តែងតែបង្អួតសម្ភារៈនិយមប្រណិតៗផ្សេងទៀតនៅតាមបណ្ដាញសង្គមដូចកាបូប និងគ្រឿងអលង្ការជាដើមដែលមានតម្លៃរាប់ម៉ឺនដុល្លារ។ ឪពុករបស់ជនសង្ស័យគឺលោក ស៊ីវ សុជាតិ ក៏មិនមែនជាមន្ត្រីប៉ូលិសស្អាតស្អំនោះទេ និងរងការចោទប្រកាន់ថា ប្រើប្រាស់អំណាចតួនាទីធ្វើជាខែល ដើម្បីធ្វើជាអ្នកកាងទំនិញខុសច្បាប់ និងទំនិញគេចពន្ធដែលឈ្មួញនាំពីបរទេសចូលកម្ពុជា។ ក្រៅពីមានតួនាទីជាស្នងការរងនគរបាលខេត្តលោក ស៊ីវ សុជាតិ ក៏ជាទីប្រឹក្សារបស់ប្រធានព្រឹទ្ធសភាលោក ហ៊ុន សែន និងជាប្រធានក្រុមការងារគណបក្សប្រជាជនកម្ពុជាចុះជួយឃុំគយម៉ែង ខេត្តបន្ទាយមានជ័យ។ ចំណែក ភរិយារបស់លោក ស៊ីវ សុជាតិ និងត្រូវជាម្ដាយរបស់លោក ស៊ីវ ជ័យសិដ្ឋ គឺអ្នកស្រី ខា អ៊ាង គឺជាម្ចាស់អាជីវកម្ម ទៀ ណាំហាក់ និងជាសមាជិកគ្រួសារ (CEO Master Club) និងជាអនុប្រធានសភាពាណិជ្ជកម្មប្រចាំខេត្តបន្ទាយមានជ័យ។
អ្នកនាំពាក្យរដ្ឋាភិបាលឯករាជ្យ ២៣ តុលា លោក គឹម សុខ ជឿជាក់ថា ទ្រព្យសម្បត្តិមហាសាលដែលលោក ស៊ីវ សុជាតិ និងកូនជាជនសង្ស័យថតបង្អួតតាមបណ្ដាញសង្គមនោះគឺបានមកពីការរកស៊ីលើរបរទុច្ចរិតរបស់ឪពុក ដោយសារតែមានខ្នងក្រាស់គឺមានលោក ហ៊ុន សែន ជាអ្នកកាងការពារ។
ជាមួយគ្នានេះ លោក គឹម សុខ កត់សម្គាល់ថា កំហឹងមហាជនរួមគ្នាងើបឡើងប្រឆាំងរឿងអយុត្តិធម៌ករណីកូនអ្នកធំបើកបរបង្កគ្រោះថ្នាក់សម្លាប់ពលរដ្ឋនេះគឺជាកម្លាំងស្មារតីជាតិដ៏សំខាន់។ លោកថា បើកម្លាំងមហាជនរួមគ្នាប្រឆាំងប្ដូររបបផ្ដាច់ការត្រកូល ហ៊ុន ដូចករណីនេះប្រជាពលរដ្ឋក៏អាចគេចផុតពីការរស់នៅក្រោមការគាបសង្កត់របស់រដ្ឋាភិបាលត្រកូល ហ៊ុន និងមន្ត្រីគ្រាក់ៗដែលរកស៊ីបែបឧក្រិដ្ឋកម្ម៕
