លោកនាយករដ្ឋមន្ត្រី ហ៊ុន ម៉ាណែត បានចេញមុខបកស្រាយថា ការផ្ដល់តួនាទីឱ្យកូនស្រីច្បងលោក កឹម សុខា គឺ កញ្ញា កឹម មនោវិទ្យា ជាការផ្សះផ្សាជាតិ និងជួយដោះស្រាយបញ្ហាជាតិនៅលើឆាកអន្តរជាតិ។ លោក ហ៊ុន ម៉ាណែត ក៏បានប្រកាសស្វាគមន៍អ្នកនយោបាយគ្រប់និន្នាការឲ្យចូលរួមជាមួយរដ្ឋាភិបាលរបស់លោក ប្រសិនបើចង់ជួយជាតិ។ មន្ត្រីបក្សប្រឆាំងចាត់ទុកការបង្រួបបង្រួមជាតិរបស់លោក ហ៊ុន ម៉ាណែត គឺជាកលល្បិចដ៏ពិសពុល។
ការប្រកាសពន្យល់របស់លោកនាយករដ្ឋមន្ត្រី ហ៊ុន ម៉ាណែត អំពីការផ្ដល់តួនាទីឱ្យកញ្ញា កឹម មនោវិទ្យា ជាប្រេសិតពិសេស គឺជាជំហានឆ្ពោះទៅរកការឯកភាពជាតិ និងជួយរដ្ឋាភិបាលលើបញ្ហាវិនិយោគ និងបញ្ហាព្រំដែននោះ រងការរិះគន់ថា ជាការបង្កើតរូបភាពបោកប្រាស់សហគមន៍អន្តរជាតិ និងសាធារណជនថា រដ្ឋាភិបាលមានចិត្តទូលាយ ប៉ុន្តែធាតុពិតរដ្ឋាភិបាលរបស់លោក នៅតែបន្តបិទខ្ទប់សិទ្ធិសេរីភាពបញ្ចេញរបស់ពលរដ្ឋ និងអ្នកនយោបាយ ខណៈ អ្នកទោសមនសិការជាច្រើនកំពុងជាប់ពន្ធនាគារទាំងអយុត្តិធម៌ ដោយគ្មានការដោះលែងឱ្យមានសេរីភាពឡើងវិញ។
ថ្លែងនៅក្នុងពិធីជួបសំណេះសំណាលជាមួយអាចារ្យ អាចារិនីទូទាំងប្រទេស លោក ហ៊ុន ម៉ាណែត លើកឡើងថាថ្មីៗនេះ រដ្ឋាភិបាលបានផ្ដល់តួនាទីដល់កូនស្រី លោក កឹម សុខា គឺ កញ្ញា កឹម មនោវិទ្យា ជាប្រេសិតពិសេស ដើម្បីជួយកិច្ចការងារជាតិ ដែលលោកហៅថា ជាការផ្សះផ្សាជាតិ និងជាការបើកឱ្យមានកិច្ចសន្ទនានយោបាយរវាងបក្សប្រឆាំង និងបក្សកាន់អំណាច។ ទន្ទឹមគ្នានោះ លោកក៏បានឌឺដង មកលើអ្នករិះគន់មួយចំនួននៅក្រៅប្រទេស ដែលចង់ឱ្យមានវប្បធម៌សន្ទនា និងការផ្សះផ្សាជាតិ ប៉ុន្តែ មិនចូលរួមជាមួយរដ្ឋាភិបាល ហើយបន្តបន្តរិះគន់ និងជេរប្រមាថ មកលើរដ្ឋាភិបាល ជាដើម។ លោកចាត់ទុកករណីនេះជាឧបសគ្គ ធ្វើឱ្យប៉ះពាល់ការផ្សះផ្សា និងបង្រួបបង្រួមជាតិ ដែលបង្កឡើងដោយក្រុមបក្សប្រឆាំង និងអ្នកវិភាគមួយចំនួន។
លោក ហ៊ុន ម៉ាណែត៖ «ខ្ញុំសូមប្រាប់បងប្អូនជនរួមជាតិទាំងអស់លោក ប៉ុន្មានថ្ងៃនេះឃើញថា ស្អីត្រកូលកឹម ត្រកូលហ៊ុន ត្រកូលអី អស់តម្លៃហើយ។ ចុះទស្សនៈដើម្បីប្រទេសជាតិ ធ្វើសកម្មភាពដើម្បីប្រទេសជាតិ តាមវិធីសាស្ត្រការនិយាយគ្នា ក្រែងចង់បានសន្តិភាព? ក្រែងចង់បាននូវការឯកភាពជាតិនៅក្នុងដំណាក់កាលដែលមានការឈ្លានពាន? ដល់ពេលយើងបើកច្រកទទួល ទៅជារឿងផ្សេង។ ឥឡូវឃើញលិខិតណា បណ្ដេញចេញ ស្អី ចោទប្រកាន់ស្អី? ខ្ញុំថា បើសិនជាមានឆន្ទៈពិតប្រាកដ ខ្ញុំប្រាប់គាត់ថា ឱ្យមានឆន្ទៈពិតប្រាកដ និយមន័យឱ្យទូលំទូលាយ គោរពគ្នាទៅវិញទៅមក។ កុំមកជេរខ្ញុំថាអត់បើកច្រក តែអ្នកឯងជេរខ្ញុំរាល់ថ្ងៃ ហើយថាប្រកែកមិនព្រមទទួល? ទទួលស្អី បើគ្រាន់តែលូកដៃទៅ ទះកំផ្លៀងអីរហូត អត់ស្ដាប់!»។
បើទោះបីជា លោក ហ៊ុន ម៉ាណែត អះអាងថា រដ្ឋាភិបាលរបស់លោកបើកឱ្យមានការចូលរួម ពីសំណាក់អ្នកនយោបាយ និងពលរដ្ឋគ្រប់និន្នាការ ដើម្បីផ្សះផ្សា និងបង្រួបបង្រួមជាតិក្ដី អ្នកឃ្លាំមើល និងមន្ត្រីបក្សប្រឆាំងយល់ថា ការឱ្យនិយមន័យរបស់លោក ហ៊ុន ម៉ាណែត ដ៏ចង្អៀតនេះ ធ្វើឡើងដោយគ្មានការពិចារណាគ្រប់ជ្រុងជ្រោយ និងប្រកបដោយល្បិចកល ខណៈសកម្មជននយោបាយ សកម្មជនបរិស្ថាន និងសកម្មជនសិទ្ធិមនុស្ស ១៣២នាក់ កំពុងតែជាប់ពន្ធនាគារ ទាំងអយុត្តិធម៌ ដោយសារតែធ្វើ ទុក្ខបុកម្នេញ ពីសំណាក់រដ្ឋាភិបាល។
ជាមួយគ្នានោះពួកគាត់ថា ដើមហេតុចម្បងដែលធ្វើឱ្យប្រទេសជាតិបែកបាក់ មិនមែនមកពីគណបក្សប្រឆាំង និងពលរដ្ឋរិះគន់ចំណុចអវិជ្ជមាន របស់រដ្ឋាភិបាលនោះទេ គឺដោយសារតែ រដ្ឋាភិបាលបាន រំលាយគណបក្សសង្គ្រោះជាតិ កាលពីឆ្នាំ២០១៧ ដកហូតសិទ្ធិធ្វើនយោបាយពីមន្ត្រីជាន់ខ្ពស់គណបក្សប្រឆាំង រាប់សិបនាក់ ធ្វើទុក្ខបុកម្នេញពលរដ្ឋ មិនឱ្យធ្វើនយោបាយប្រកបដោយសេរីភាព ហើយថែមទាំងបិទសិទ្ធិ មិនឱ្យបញ្ចេញមតិ រឿងជាតិ ឱ្យបានស៊ីជម្រៅ ជាដើម។ ពួកគាត់ថាប្រសិនបើលោក ហ៊ុន ម៉ាណែត ចង់ឱ្យប្រទេសជាតិ មានការផ្សះផ្សាជាតិមែន គួរតែមើលលើកចំណុច ទាំងនេះ មិនមែនឱ្យអ្នកនយោបាយបក្សប្រឆាំងចូលរួមជីវភាពនយោបាយ និងបញ្ឈប់ការរិះគន់ រដ្ឋាភិបាល ទើបហៅថា ការបង្រួបបង្រួម និងការផ្សះផ្សាជាតិនោះទេ។
អ្នកនាំពាក្យរដ្ឋាភិបាលឯករាជ្យ២៣តុលាការ លោក គឹម សុខ យល់ថា ដើម្បីដោះស្រាយបញ្ហានេះ លោក ហ៊ុន ម៉ាណែត ត្រូវបើកឱ្យគណបក្សប្រឆាំង ដំណើរការឡើងវិញ ហើយ ស្ដារប្រជាធិបតេយ្យឱ្យបានពេញលេញ តាមរយៈការដោះលែងអ្នកទោសនយោបាយ ការផ្ដល់សិទ្ធិសេរីភាពដល់ពលរដ្ឋ ឱ្យចូលរួមការបោះឆ្នោត ដោយសេរី ត្រឹមត្រូវ និងយុត្តិធម៌។ លោកបារម្ភថា ប្រសិនបើ លោក ហ៊ុន ម៉ាណែត នៅតែឱ្យនិយមបង្រួបបង្រួមជាតិ និងការផ្សះផ្សាជាតិ តាមគំនិតអាត្មានិយមបែបនេះ គឺជាគ្រោះថ្នាក់ដ៏ធំបំផុតសម្រាប់ជាតិ។
លោក គឹម សុខ៖ «ដូច្នេះហើយ លោក ហ៊ុន ម៉ាណែត ឈប់ច្រឡំអំពីការផ្សះផ្សាបង្រួបបង្រួមជាតិ ថាទាល់តែចូលគណបក្សប្រជាជន ទាល់តែចូលរដ្ឋាភិបាល ហើយស្មោះត្រង់នឹងគណបក្សប្រជាជន ហើយស្មោះត្រង់នឹងរដ្ឋាភិបាល បានផ្សះផ្សាបង្រួបបង្រួមជាតិទេ បញ្ជាក់ឲ្យច្បាស់ ការផ្សះផ្សាបង្រួបបង្រួមជាតិគឺការ យកបញ្ហាជាតិមកដាក់លើតុដោះស្រាយជាមួយគ្នាគ្រប់ភាគីទាំងអស់ ដោយស្មើមុខ ប្រាប់ប្រជាពលរដ្ឋឲ្យយល់ឲ្យដឹង និងស្មោះត្រង់ចំពោះ ប្រយោជន៍ប្រជាពលរដ្ឋ និងប្រទេសជាតិ។ អាហ្នឹងគោលការណ៍ផ្សះផ្សាបង្រួបបង្រួមជាតិហ្នឹងគឺស្មោះត្រង់នឹង ប្រជាពលរដ្ឋ និងប្រទេសជាតិ មិនមែនស្មោះត្រង់ និងគណបក្សប្រជាជន ឬក៏រដ្ឋាភិបាលទេ»។
បន្ថែមពីលើនេះ អ្នកឃ្លាំមើលយល់ថា លោក ហ៊ុន ម៉ាណែត ហាក់បែងចែកមិនដាច់រវាង ពាក្យថា« រិះគន់» និងការ «ជេរប្រមាថ» ព្រោះលោក បានចាត់ទុក មតិរិះគន់ពីអ្នកនយោបាយបក្សប្រឆាំង និងពលរដ្ឋពីក្រៅប្រទេស ដើម្បីជំរុញឱ្យរដ្ឋាភិបាល ដោះស្រាយបញ្ហាជាតិឱ្យបានត្រឹមត្រូវ បែរជា ចាត់ទុកថា ការជេរប្រមាថទៅវិញ។ ពួកគាត់ថា មកទល់បច្ចុប្បន្ន ទាំងអ្នកនយោបាយបក្សប្រឆាំង និងអ្នកវិភាគនយោបាយដែលខ្វល់ខ្វាយពីប្រទេសជាតិពិតប្រាកដ គឺតែងតែផ្ដល់មតិ និងដំណោះស្រាយ ប្រកបដោយក្រមសីលធម៌ និងមានហេតុផលច្បាស់លាស់ ប៉ុន្តែ រដ្ឋាភិបាលទៅវិញទេ ដែលពុំសូវយកមតិទាំងនោះ ដើម្បីកែប្រែកំហុស។
ជាក់ស្ដែងទាំងគណបក្សប្រឆាំង និងពលរដ្ឋគឺតែងតែ ជំរុញឱ្យរដ្ឋាភិបាលប្ដឹងថៃទៅតុលាការយុត្តិធម៌អន្តរជាតិ ប្រឆាំងនឹងការឈ្លានពានទឹកដីកម្ពុជា និង ជំរុញឱ្យចាប់ខ្លួនមេខ្លោងដែលជាជនជាតិខ្មែរ ពាក់ព័ន្ធ ឧក្រិដ្ឋកម្មឆបោកតាមអនឡាញ ឱ្យមកផ្ដន្ទាទោសជាដើម ក៏រដ្ឋាភិបាល ពុំសូវអើពើនោះដែរ ផ្ទុយទៅវិញ រដ្ឋាភិបាលតែងតែចាប់ខ្លួនពលរដ្ឋ និងអ្នកនយោបាយនៅក្នុងស្រុកដែលបញ្ចេញមតិទាំងនោះដាក់ពន្ធនាគារ។
អ្នកឃ្លាំមើលវាយតម្លៃថា ការអះអាងពីការឯកភាពជាតិរបស់លោក ហ៊ុន ម៉ាណែត គ្មានតម្លៃទាល់តែសោះ ប្រសិនបើគ្មានការដោះលែងអ្នកទោសនយោបាយ ការបើកលំហសេរីភាពសារព័ត៌មាន និងការឈប់ធ្វើទុក្ខបុកម្នេញលើអ្នកមាននិន្នាការផ្ទុយ។ ពួកគាត់យល់ថា ការតែងតាំងកូនស្រី លោក កឹម សុខា នៅពេលនេះ គ្រាន់តែជាផ្សែងបិទបាំងអំណាចផ្ដាច់ការ និងការកេងចំណេញនយោបាយតែប៉ុណ្ណោះ៕
