អង្គការសិទ្ធិមនុស្ស និងប្រឆាំងការជួញដូរមនុស្សនៅប្រទេសបង់ក្លាដែស (Bangladesh) អំពាវនាវដល់រដ្ឋាភិបាលកម្ពុជា និងរដ្ឋាភិបាលបង់ក្លាដែសពន្លឿននីតិវិធីបញ្ជូនពលរដ្ឋបង់ក្លាដែសជិត ២ពាន់នាក់ត្រឡប់ទៅស្រុកកំណើតវិញ ក្រោយពួកគេបន្តជាប់គាំងនៅប្រទេសកម្ពុជាអស់រយៈពេលជាច្រើនខែ។ អង្គការសិទ្ធិមនុស្សដដែលបញ្ជាក់ថា ពលករបង់ក្លាដែសទាំងនោះត្រូវបានបណ្ដាញឧក្រិដ្ឋជនបោកបញ្ឆោត និងជួញដូរយកទៅបង្ខាំងធ្វើទារុណកម្មក្នុងមជ្ឈមណ្ឌល ដើម្បីបង្ខំឱ្យពួកគាត់ធ្វើការជាអ្នកឆបោកតាមអនឡាញ ខណៈអ្នកខ្លះទៀតត្រូវបានគេដកហូតឯកសារលិខិតឆ្លងដែនជាដើម។
អង្គការសិទ្ធិមនុស្ស និងប្រឆាំងការជួញដូរមនុស្សនៅប្រទេសបង់ក្លាដែស (Bangladesh) ឈ្មោះ អានីរបាន់ សឺវ៉ាយវ័រ វ៉យស៍ ហ្វោនដេសិន (Anirban Survivor Voice Foundation) បានចេញសេចក្ដីថ្លែងការណ៍អំពាវនាវឱ្យរដ្ឋាភិបាលបង់ក្លាដែសសហការជាមួយកម្ពុជា ពន្លឿនការបញ្ជូនពលរដ្ឋខ្លួនជិត ២ពាន់នាក់ ដែលកំពុងជាប់គាំងនៅកម្ពុជា ឱ្យបានវិលត្រឡប់ទៅប្រទេសកំណើតវិញ។
អង្គការដដែលបញ្ជាក់ថា ពលរដ្ឋបង់ក្លាដែសទាំងនេះកំពុងប្រឈមនឹងភាពមិនប្រាកដប្រជា ខណៈអ្នកខ្លះអស់សង្ឃឹមដោយសារការសម្របសម្រួលបញ្ជូនពួកគេត្រឡប់ទៅប្រទេសកំណើតមានភាពយឺតយ៉ាវ។ ស្ថានភាពនេះធ្វើឱ្យអ្នកខ្លះរងសម្ពាធផ្លូវចិត្ត ដោយសារខ្វះកន្លែងស្នាក់នៅសមរម្យ និងគ្មានអាហារហូបចុកគ្រប់គ្រាន់ អំឡុងពេលពួកគេជាប់ឃុំក្នុងមជ្ឈមណ្ឌលអន្តោប្រវេសន៍នៅកម្ពុជា។
ប្រភពដដែលបញ្ជាក់ថា ពលករបង់ក្លាដែសភាគច្រើនមានលិខិតឆ្លងដែន និងទិដ្ឋាការស្របតាមច្បាប់ ប៉ុន្តែពេលមកដល់កម្ពុជា ពួកគេបែរជាត្រូវបានគេបោកបញ្ឆោត ឃុំឃាំង និងបង្ខំឱ្យធ្វើការក្នុងមជ្ឈមណ្ឌលឆបោកតាមអនឡាញ។ ជនរងគ្រោះ និងក្រុមគ្រួសារអះអាងថា ពលរដ្ឋបង់ក្លាដេសមួយចំនួនបានរងការរំលោភបំពានធ្ងន់ធ្ងរ រួមទាំងការវាយដំធ្វើទារុណកម្មលើរាងកាយ និងផ្លូវចិត្ត រងការបង្ខាំងក្នុងអគារ ត្រូវបណ្ដាញឧក្រិដ្ឋជនរឹបអូសលិខិតឆ្លងដែន និងរងការជំរិតទាមទារប្រាក់ពីក្រុមសាច់ញាតិ ដើម្បីជាថ្នូរដោះលែង។
អង្គការសិទ្ធិមនុស្សដដែលបានស្នើឱ្យរដ្ឋាភិបាលបង់ក្លាដេសរៀបចំជើងហោះហើរពិសេស និងសហការជាមួយអាជ្ញាធរកម្ពុជាឱ្យបានឆាប់រហ័ស ដើម្បីបញ្ជូនពលរដ្ឋរបស់ខ្លួនដែលបន្តជាប់គាំងនៅកម្ពុជាបានត្រឡប់ទៅប្រទេសកំណើតវិញ មុនថ្ងៃទី៣១ ខែតុលា ដើម្បីឱ្យពួកគេបានជួបជុំជាមួយក្រុមគ្រួសារសាច់ញាតិឡើងវិញ។
ប្រព័ន្ធផ្សព្វផ្សាយបង់ក្លាដែសក៏បានបន្តចុះព្រោងព្រាតពាក់ព័ន្ធជនជាតិបង់ក្លាដែសដែលបន្តឃុំឃាំងនៅមជ្ឈមណ្ឌលឆបោកតាមអនឡាញនៅកម្ពុជា។ កាសែតបង់ក្លាដែសជាច្រើនក៏រាយការណ៍បង្ហាញពីជីវិតសោកសៅ និងការទន្ទឹងរង់ចាំមើលផ្លូវរបស់ក្រុមគ្រួសារដែលមានសាច់ញាតិ ឬកូនចៅទៅធ្វើជាពលករនៅកម្ពុជាត្រូវបានបណ្ដាញឧក្រិដ្ឋជនបង្ខាំងធ្វើទារុណកម្ម។
ការទទូចរបស់អង្គការសិទ្ធិមនុស្សដែលមាននៅមូលដ្ឋានប្រទេសបង់ក្លាដែសនេះក៏ឡើងក្រោយពេលដែលសាកសពយុវជនបង់ក្លាដែស (Bangladesh) ម្នាក់ត្រូវបានបញ្ជូនមកដល់ប្រទេសកំណើតវិញកាលពីដើមខែតុលា បន្ទាប់ពីជនរងគ្រោះរងការធ្វើទារុណកម្មរហូតដល់ស្លាប់នៅក្នុងមជ្ឈមណ្ឌលឆបោកតាមអនឡាញនៅក្នុងប្រទេសកម្ពុជា។
ទូរទស្សន៍អាស៊ីសេរីមិនអាចទាក់ទង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ដើម្បីអត្ថាធិប្បាយជុំវិញរឿងនេះបានទេនៅថ្ងៃទី២០ ខែតុលា។
ជុំវិញរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ច្រាក់ (CHRAC) លោក រស់ សុដ្ឋា សោកស្ដាយដែលជនជាតិបង់ក្លាដែស និងជនបរទេសផ្សេងទៀតចាញ់បោកការលួងលោម និងរងអំពើទារុណកម្មពីក្រុមឆបោកតាមអនឡាញ។ លោកបន្ថែមទៀតថា កម្ពុជាគួរបង្កើនកិច្ចសហការជាមួយស្ថានទូតប្រទេសសាម៉ី ដើម្បីពិនិត្យលើការយឺតយ៉ាវបញ្ជូនជនបរទេសដែលមួយចំនួនអាចរងគ្រោះពីការជួញដូរទៅប្រទេសកំណើតពួកគេវិញ។
លោក រស់ សុដ្ឋា៖ «ការណ៍ដែលយើងបានរំដោះពួកគាត់មកហើយ គាត់បានរួចផុតពីក្រញាំនៃមេខ្លោង (Scam online) ហើយ ពួកគាត់នៅតែអូសបន្លាយបន្តទៅទៀត ហើយធ្លាក់ទៅលើបញ្ហាផ្សេងៗដូចជាបន្តទៅ (Scam) អីបន្តទៅទៀត អាហ្នឹងគឺជាបញ្ហាដែលអាជ្ញាធរត្រូវទទួលស្គាល់ត្រូវមានការទទួលខុសត្រូវចំពោះសកម្មភាពទាំងអស់នេះ ដែលអ្នកពាក់ព័ន្ធជាតិ អន្តរជាតិ ត្រូវតែពិនិត្យមើល ហើយចាត់វិធានការផ្លូវច្បាប់ចំពោះបុគ្គលទាំងឡាយណាដែលពាក់ព័ន្ធ»។
កន្លងទៅ ក៏មានជនជាតិឥណ្ឌូណេស៊ីរាប់រយនាក់បានដាក់សំណើទៅកាន់រដ្ឋាភិបាលរបស់ខ្លួន ដើម្បីបញ្ជូនពួកគេទៅប្រទេសកំណើតវិញឱ្យបានឆាប់។
ទាក់ទងនឹងជនជាតិឥណ្ឌូណេស៊ីនេះ អាជ្ញាធរកម្ពុជាកាលពីថ្ងៃទី១៩ ខែតុលា បានបញ្ជូនជនជាតិឥណ្ឌូណេស៊ី ជាង ១រយនាក់ (១៧៥នាក់) ត្រឡប់ទៅប្រទេសកំណើតវិញ។ អគ្គនាយកដ្ឋានអន្តោប្រវេសន៍ឱ្យដឹងថា ជនជាតិឥណ្ឌូណេស៊ីទាំងនេះបានចូលកម្ពុជាពាក់ព័ន្ធនឹងអំពើឆបោកតាមអនឡាញ ហើយការបណ្ដេញចេញនេះគឺជាផ្នែកមួយ ដើម្បីលុបបំបាត់ឧក្រិដ្ឋកម្មតាមអនឡាញ ស្រាវជ្រាវបង្ក្រាបដល់មេខ្លោង និងជួយសង្គ្រោះជនរងគ្រោះដែលត្រូវគេបោកបញ្ឆោតឱ្យទទួលបានសេរីភាពត្រឡប់ទៅស្រុកកំណើតវិញ។
ចំណែក ស្ថានទូតហ្វីលីពីនប្រចាំកម្ពុជាឱ្យដឹងនៅថ្ងៃទី២០ ខែតុលា ថា ថ្មីៗនេះខ្លួនក៏បានសហការជាមួយអាជ្ញាធរកម្ពុជា បញ្ជូនពលរដ្ឋរបស់ខ្លួនចំនួន ២៩នាក់ទៅប្រទេសកំណើតវិញ ក្រោយពួកគេបានចាញ់បោកមេខ្យល់ និងរងការបង្ខាំងក្នុងមជ្ឈមណ្ឌលឆបោកតាមអនឡាញនៅកម្ពុជា។
ក្រសួងការបរទេសសហរដ្ឋអាមេរិក និងអង្គការអន្តរជាតិជំនាញបានរកឃើញថា បណ្ដាញឧក្រិដ្ឋជនឆបោកតាមអនឡាញនៅកម្ពុជា ប្រើប្រាស់បណ្ដាញសង្គម ដើម្បីប្រកាសជ្រើសរើសបុគ្គលិកទាំងពលរដ្ឋកម្ពុជា និងប្រទេសក្នុងតំបន់ដូចជា ចិន វៀតណាម ថៃ ម៉ាឡេស៊ី ឥណ្ឌូណេស៊ី ប៉ាគីស្ថាន ឥណ្ឌា បង់ក្លាដែស រួមទាំងជនបរទេសមកពីតំបន់អាហ្វ្រិកផ្សេងទៀតដោយបោកបញ្ឆោតថា មានឱកាសការងារដែលផ្ដល់ប្រាក់ខែខ្ពស់។ ប៉ុន្តែ ពេលមកដល់កម្ពុជា ជនរងគ្រោះមួយចំនួនត្រូវបានបណ្ដាញឧក្រិដ្ឋជនបង្ខាំង ដកហូតលិខិតឆ្លងដែន និងបង្ខំឱ្យធ្វើការឆបោកតាមអនឡាញ។
រយៈពេលមួយឆ្នាំកន្លងទៅនេះ សមត្ថកិច្ចបានបង្ក្រាប និងបិទទីតាំងមជ្ឈមណ្ឌលឆបោកតាមអនឡាញជាង ៨រយទីតាំង (៨៣២)។ ក្នុងនោះអាជ្ញាធរកម្ពុជាអះអាងថា បានបញ្ជូនសំណុំរឿងជាង ៤រយករណីទៅតុលាការដោយមានជនសង្ស័យជិត ៤ពាន់នាក់ (៣,៩២៧) និងបានបណ្ដេញជនបរទេសចម្រុះជាតិសាសន៍ជាង ២២ម៉ឺននាក់ចេញពីកម្ពុជា។
ក្រសួងការបរទេសសហរដ្ឋអាមេរិកលើកឡើងក្នុងរបាយការណ៍ស្ដីពីការជួញដូរមនុស្សប្រចាំឆ្នាំ២០២៦ ថា ការបរាជ័យរបស់រដ្ឋាភិបាលកម្ពុជាក្នុងការកំណត់អត្តសញ្ញាណជនរងគ្រោះដែលត្រូវបានជួញដូរទៅកាន់មជ្ឈមណ្ឌលឆបោកតាមអនឡាញ បានធ្វើឱ្យពួកគេរស់នៅក្នុងស្ថានភាពឯកោ ខ្វះកន្លែងស្នាក់នៅសមរម្យ និងអាហារហូបចុកគ្រប់គ្រាន់។ អាមេរិកព្រមានថា ស្ថានភាពនេះបានធ្វើឱ្យជនរងគ្រោះប្រឈមនឹងហានិភ័យធ្លាក់ចូលក្នុងកណ្ដាប់ដៃរបស់បណ្ដាញឧក្រិដ្ឋជនជួញដូរមនុស្សជាថ្មីម្ដងទៀត៕
