

ថ្មីៗនេះ រដ្ឋាភិបាលថៃបានប្រកាសផ្ដល់ទិដ្ឋាការការងារដល់ពលករខ្មែរដែលធ្វើការនៅប្រទេសថៃឡើងវិញ ក្រោយពីបានផ្អាកអស់មួយរយៈ ដោយសារប្រទេសទាំងពីរមានជម្លោះព្រំដែនជិតមួយឆ្នាំ។ មន្ត្រីសង្គមស៊ីវិលចាត់ទុកការសម្រេចនេះថា ជារឿងល្អ ដើម្បីជួយសម្រួលដល់ទុក្ខលំបាករបស់ពលរដ្ឋខ្មែររាប់ម៉ឺននាក់ ដែលកំពុងធ្វើការនៅប្រទេសថៃទាំងដោយខុសច្បាប់ និងស្របច្បាប់ ហើយបានជួបប្រទះការលំបាកជាច្រើនក្នុងរយៈពេលជិតមួយឆ្នាំមកនេះ។
សេចក្ដីសម្រេចរបស់គណៈរដ្ឋមន្ត្រីថៃ ចុះថ្ងៃទី១៣ ខែវិច្ឆិកា ដែលទូរទស្សន៍អាស៊ីសេរីទើបទទួលបាននៅថ្ងៃទី២០ ខែវិច្ឆិកានេះ បានបង្ហាញថា រដ្ឋាភិបាលថៃបានសម្រេចជាថ្មីរៀបចំបញ្ជីឈ្មោះ និងផ្ដល់សិទ្ធិស្នាក់នៅ ព្រមទាំងទិដ្ឋាការការងារដល់ជនបរទេសដែលកំពុងធ្វើការនៅប្រទេសថៃដោយខុសច្បាប់ និងអ្នកដែលជិតផុតសុពលភាពឯកសារ ដើម្បីអាចបន្តសុពលភាពឡើងវិញ។
ការសម្រេចជាថ្មីនេះ ធ្វើឡើងក្រោយពីក្រសួងការងារថៃបានប្រកាសកាលពីថ្ងៃទី៩ ខែមីនា ឆ្នាំ២០២៦ ថា ថៃលែងអនុញ្ញាតឱ្យជ្រើសរើស ឬទទួលពលករខ្មែរចូលមកធ្វើការនៅក្នុងប្រទេសថៃ ហើយក៏លែងផ្ដល់ទិដ្ឋាការការងារដល់ពលរដ្ឋខ្មែរដែលកំពុងរស់នៅក្នុងប្រទេសថៃស្រាប់ដែរ។ មន្ត្រីថៃអះអាងនៅពេលនោះថា វិធានការនេះធ្វើឡើងដោយសារបារម្ភពីសន្តិសុខជាតិ បន្ទាប់ពីប្រទេសទាំងពីរមានជម្លោះប្រដាប់អាវុធតាមព្រំដែនកាលពីឆ្នាំ២០២៥។ ករណីនេះបានធ្វើឱ្យពលរដ្ឋខ្មែរជាច្រើនជួបការលំបាក ហើយអ្នកខ្លះត្រូវប៉ូលិសថៃចាប់ពិន័យជាប្រាក់រាប់ម៉ឺនបាត ដោយសារផុតសុពលភាពទិដ្ឋាការការងារ និងឯកសារស្នាក់នៅស្របច្បាប់។
ពលរដ្ឋខ្មែរដែលកំពុងធ្វើការនៅប្រទេសថៃ លោកស្រី លាង បុប្ផា ប្រាប់ទូរទស្សន៍អាស៊ីសេរីថា លោកស្រីសប្បាយចិត្តជាខ្លាំង នៅពេលបានឮថា រដ្ឋាភិបាលថៃនឹងផ្ដល់ទិដ្ឋាការការងារ និងលិខិតអនុញ្ញាតស្នាក់នៅដល់ពលរដ្ឋខ្មែរឡើងវិញ។ លោកស្រីរៀបរាប់ថា ក្នុងរយៈពេលជិតមួយឆ្នាំមកនេះ ពលករខ្មែររាប់ពាន់នាក់ត្រូវរស់នៅក្នុងប្រទេសថៃដោយភ័យខ្លាច និងរងការធ្វើទុក្ខបុកម្នេញពីពលរដ្ឋ និងប៉ូលិសថៃ ដោយសារគ្មានទិដ្ឋាការការងារ និងឯកសារស្នាក់នៅត្រឹមត្រូវ។
លោកស្រី លាង បុប្ផា៖ «ចង់នៅស្របច្បាប់ ពេលយើងទៅណាទៅណី យើងមិនបាច់ខ្លាចថា គេចាប់យើង ឬមួយក៏ម៉េច ព្រោះអីយើងមានស្របច្បាប់ អញ្ចឹង»។
សេចក្ដីសម្រេចរបស់គណៈរដ្ឋមន្ត្រីថៃដដែលបានបញ្ជាក់ថា ជនបរទេសដែលកំពុងធ្វើការនៅប្រទេសថៃ រួមទាំងពលករខ្មែរ ដែលនឹងផុតសុពលភាពទិដ្ឋាការ និងឯកសារស្នាក់នៅនៅខែកុម្ភៈ ឆ្នាំ២០២៧ ត្រូវទៅរៀបចំឯកសារ និងដាក់ពាក្យស្នើសុំបន្តទិដ្ឋាការការងារជាថ្មី ចាប់ពីខែវិច្ឆិកា ឆ្នាំ២០២៦។ ចំណែកជនបរទេសដែលកំពុងរស់នៅប្រទេសថៃដោយខុសច្បាប់ ឬបានផុតសុពលភាពទិដ្ឋាការយូរមកហើយ រដ្ឋាភិបាលថៃមិនទាន់កំណត់កាលបរិច្ឆេទជាក់លាក់សម្រាប់ឱ្យពួកគេបន្ត ឬរៀបចំឯកសារនៅឡើយទេ។
ជាមួយគ្នានេះ ពលករខ្មែរភាគច្រើនដែលកំពុងធ្វើការនៅប្រទេសថៃដោយខុសច្បាប់ ចង់ឃើញរដ្ឋាភិបាលកម្ពុជាសហការល្អជាមួយអាជ្ញាធរថៃឡើងវិញ ដើម្បីជួយសម្រួលដល់ពលករខ្មែរឱ្យអាចធ្វើការនៅប្រទេសថៃដោយស្របច្បាប់។ ជាពិសេស ពួកគេស្នើឱ្យរដ្ឋាភិបាលកម្ពុជាជួយសម្រួលថ្លៃធ្វើលិខិតឆ្លងដែនឱ្យមានតម្លៃទាប និងអាចទទួលបានឆាប់រហ័ស នៅពេលពួកគេត្រឡប់មកកម្ពុជាដើម្បីធ្វើលិខិតឆ្លងដែនឡើងវិញ។ ពួកគេក៏ស្នើឱ្យរដ្ឋាភិបាលកម្ពុជាផ្សព្វផ្សាយព័ត៌មានឱ្យបានទូលំទូលាយអំពីនីតិវិធីនៃការទៅធ្វើការនៅប្រទេសថៃឡើងវិញដោយស្របច្បាប់ និងមានសុវត្ថិភាព។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យក្រសួងការងារ លោក ស៊ុន មេសា ដើម្បីសុំការឆ្លើយតបជុំវិញរឿងនេះបានទេ នៅថ្ងៃទី២០ ខែវិច្ឆិកា។
មន្ត្រីគម្រោងផ្នែកការពារសិទ្ធិពលករចំណាកស្រុកប្រចាំប្រទេសថៃ នៃអង្គការសង់ត្រាល់ លោក លឹង សុផុន មានប្រសាសន៍ថា បច្ចុប្បន្នមានពលករខ្មែរជាង២ម៉ឺននាក់កំពុងធ្វើការនៅប្រទេសថៃដោយស្របច្បាប់ ហើយនឹងត្រូវផុតសុពលភាពឯកសារនៅដើមឆ្នាំ២០២៧។ លោកថា រដ្ឋាភិបាលថៃបានប្រកាសឱ្យពួកគេទៅបន្តសុពលភាពទិដ្ឋាការការងារ និងឯកសារឡើងវិញ ចាប់ពីខែវិច្ឆិកានេះ។ លោកបន្តថា ចំពោះពលករខ្មែរដែលកំពុងធ្វើការនៅប្រទេសថៃដោយខុសច្បាប់ រដ្ឋាភិបាលថៃក៏បានប្រកាសឱ្យត្រៀមចុះឈ្មោះតាមប្រព័ន្ធអនឡាញ ដើម្បីស្នើសុំទិដ្ឋាការការងារផងដែរ។
លោកយល់ថា នេះជាដំណឹងដ៏ល្អ ហើយលោកសង្ឃឹមថា អ្នកនយោបាយខ្មែរ និងថៃគួរតែបញ្ឈប់ការប្រើប្រាស់សារនយោបាយដែលបង្កផលប៉ះពាល់ដល់ពលករខ្មែរដែលកំពុងធ្វើការនៅប្រទេសថៃ ព្រោះពួកគេបានជួបការលំបាកជាច្រើនក្នុងរយៈពេលជិតមួយឆ្នាំមកនេះ។ លោកសង្ឃឹមថា រដ្ឋាភិបាលកម្ពុជានឹងសហការល្អជាមួយអាជ្ញាធរថៃ ដើម្បីឱ្យពលរដ្ឋខ្មែរទទួលបានសិទ្ធិស្របច្បាប់ក្នុងការបន្តធ្វើការនៅប្រទេសថៃ និងអាចរកចំណូលផ្គត់ផ្គង់គ្រួសារបាន។
«ខ្ញុំសំណូមពរចង់ឲ្យរដ្ឋាភិបាលកម្ពុជា ហើយនិងស្ថាប័នពាក់ព័ន្ធ ជាពិសេសខាងក្រសួងការបរទេសខ្មែរ មានប្រចាំការនៅទីក្រុងបាងកក ហ្នឹងរកវិធីសាស្ត្រណា គោលការណ៍ណា ដើម្បីជួយសម្របសម្រួលកិច្ចការជាមួយរដ្ឋាភិបាលថៃហ្នឹង។ ជួយលើកកម្ពស់ដល់ពលរដ្ឋខ្មែរ ដែលកំពុងតែរស់នៅក្នុងប្រទេសថៃ ដែលពួកគាត់ហ្នឹងព្រួយបារម្ភណាស់រាល់ថ្ងៃហ្នឹង។ ខ្ញុំមើលឃើញហ្នឹងថា លំបាកច្រើនមែនទែនតែម្ដង បាទ»។
លោក លឹង សុផុន
ចាប់តាំងពីយោធាថៃធ្វើសង្គ្រាមវាយប្រហារឈ្លានពានកម្ពុជាកាលពីឆ្នាំ២០២៥មក ពលករខ្មែររាប់សែននាក់ដែលធ្លាប់ធ្វើការនៅប្រទេសថៃបានសម្រុកត្រឡប់មកមាតុភូមិវិញ ដោយសារបារម្ភពីសុវត្ថិភាព។ ទន្ទឹមនឹងនេះ រដ្ឋាភិបាលថៃក៏បានប្រកាសលែងទទួលពលករខ្មែរឱ្យចូលទៅធ្វើការនៅប្រទេសថៃ និងលែងផ្ដល់ទិដ្ឋាការការងារដល់ពលករខ្មែរផងដែរ។
ទោះជាយ៉ាងណា ពលករខ្មែរជាច្រើនដែលត្រឡប់មកភូមិកំណើតវិញបានជួបការលំបាកយ៉ាងខ្លាំង ដោយសារពិបាករកការងារដែលមានស្ថិរភាពធ្វើនៅក្នុងស្រុក។ ស្ថានភាពនេះធ្វើឱ្យពួកគេប្រឈមនឹងបញ្ហាជីវភាព និងជំពាក់បំណុលធនាគារកាន់តែច្រើន។
ជាមួយគ្នានេះ ពលករខ្មែររាប់រយនាក់បានបង្ខំចិត្តត្រឡប់ទៅរកការងារធ្វើនៅប្រទេសថៃវិញដោយខុសច្បាប់។ អ្នកខ្លះត្រូវប៉ូលិសថៃចាប់ដាក់ពន្ធនាគារ និងអ្នកខ្លះទៀតត្រូវពិន័យជាប្រាក់រាប់ម៉ឺនបាត។ ករណីនេះ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចាត់ទុកថា ជាការបរាជ័យធ្ងន់ធ្ងររបស់រដ្ឋាភិបាលលោក ហ៊ុន ម៉ាណែត ក្នុងការផ្ដល់ការងារគ្រប់គ្រាន់ និងកម្រៃសមរម្យសម្រាប់ពលករខ្មែរ៕









