ពលរដ្ឋរិះគន់រដ្ឋាភិបាលត្រកូលហ៊ុនដែលខ្វល់តែរឿងបំបែកសំឡេងប្រឆាំងតាមរយៈការផ្តល់តួនាទីឱ្យចុះចូល ដើម្បីបំបាត់សំឡេងរិះគន់ ខណៈថៃបន្តឈ្លានពានទឹកដីខ្មែរ ហើយពលរដ្ឋខ្មែរបន្តរស់នៅទាំងទុក្ខវេទនា។ ការរិះគន់នេះធ្វើឡើងបន្ទាប់នាយករដ្ឋមន្ត្រីលោក ហ៊ុន ម៉ាណែត បានផ្តល់តួនាទីដល់កូនស្រីលោក កឹម សុខា គឺកញ្ញា កឹម មនោវិទ្យា មានឋានៈស្មើរដ្ឋមន្ត្រីដើម្បីជួយការងាររដ្ឋាភិបាលទាំងដែលតុលាការនៅតែបន្តរឹតត្បិតសេរីភាពនយោបាយរបស់លោក កឹម សុខា។ ពលរដ្ឋ ចាត់ទុកទង្វើមេដឹកនាំកម្ពុជា ជារឿងអត់បានការ និងជាការបំផ្លាញជាតិឯង។
ពលរដ្ឋខ្មែរទាំងក្នុង និងក្រៅប្រទេសខកបំណងចំពោះទង្វើមេដឹកនាំកម្ពុជា លោក ហ៊ុន ម៉ាណែត និងលោក ហ៊ុន សែន ដែលប្រើប្រាស់កលល្បិចនយោបាយបំបែកបំបាក់សាមគ្គីភាពជាតិកម្ពុជា ជាពិសេសសំឡេងប្រឆាំង ជាជាងការបង្រួបបង្រួមជាតិ ខណៈប្រទេសកម្ពុជាកំពុងញាំញីដោយបញ្ហាធំៗជាច្រើនដូចជា បញ្ហាឆបោកអនឡាញ ដែលពិភពលោកកំពុងឃ្លាំមើល បញ្ហាថៃឈ្លានពាននិងគ្រប់គ្រងទឹកដីខ្មែរជាច្រើនតំបន់ និងបញ្ហាសេដ្ឋកិច្ចជាតិ ដែលធ្វើឲ្យពលរដ្ឋខ្មែររងទុក្ខវេទនាជាដើម។ ការរិះគន់នេះ គឺក្រោយពេលលោក ហ៊ុន ម៉ាណែត តែងតាំងកញ្ញា កឹម មនោវិទ្យា កូនស្រីប្រធានគណបក្សប្រឆាំង ជាប្រេសិតពិសេស របស់លោកនាយករដ្ឋមន្ត្រី ហ៊ុន ម៉ាណែត។
អតីតប្រធានគណៈកម្មាការប្រតិបត្តិគណបក្សភ្លើងទៀន និងជាអតីតបេក្ខជនតំណាងរាស្ត្រគណបក្សភ្លើងទៀន ខេត្តកណ្តាល លោក លី ម៉េងឃាង ថ្លែងថា រដ្ឋាភិបាលត្រកូលហ៊ុន ហាក់រវល់តែរឿងកំប៉ិកកំប៉ុក ដែលគ្មានប្រយោជន៍សម្រាប់ជាតិឡើយ។ លោកបន្តថា ទង្វើមេដឹកនាំសព្វថ្ងៃកំពុងបំបែកសំឡេងអ្នកស្នេហាជាតិដោយការតែងតាំងកូនស្រីអតីតមេបក្សប្រឆាំងឲ្យកាន់ដំណែងខ្យល់ ដើម្បីសាងរូបភាពឲ្យប្រជាពលរដ្ឋលែងជឿជាក់គ្នា និងលែងយកចិត្តទុកដាក់លើរឿងប្រទេសជាតិ និងរឿងព្រំដែនដែលថៃកំពុងឈ្លានពាន។ លោកថា រដ្ឋាភិបាលគួរយកពេលវេលា ប្តឹងថៃទៅតុលាការអន្តរជាតិពីការឈ្លានពានទឹកដី ប្រសើរជាងការបំបែកខ្មែរគ្នាឯង។
លោក លី ម៉េងឃាង៖ «លោក ហ៊ុន ម៉ាណែត គួរតែគិតគូររឿង ២ សំខាន់ដែលត្រូវគិតគូរ ទី១ គឺដោះស្រាយបញ្ហាផ្ទះសម្បែងប្រជាពលរដ្ឋដែលរងផលប៉ះពាល់ដោយសារសង្គ្រាមរវាងខ្មែរ និងថៃហ្នឹង ដែលមិនទាន់មានផ្ទះគ្រប់គ្រាន់។ គាត់បាត់បង់ទ្រព្យសម្បត្តិនោះគឺត្រូវតែដោះស្រាយ។ ហើយនិងពលរដ្ឋខ្មែរដែលរងគ្រោះដោយសារតែធនាគារ ៦ បិទទ្វារបង្កកទ្រព្យលុយរបស់ពួកគាត់ហ្នឹង ត្រូវតែដោះស្រាយសងលុយទាំងអស់ហ្នឹងទៅឱ្យប្រជាពលរដ្ឋខ្មែរវិញ។ ស្តារកិត្តិយសឱ្យប្រជាពលរដ្ឋខ្មែរ ស្តារកិត្តិយសឱ្យប្រទេសកម្ពុជានោះ គឺត្រូវតែចាប់មេស្គេម (Scam) អនឡាញឱ្យទៅសហរដ្ឋអាមេរិក មិនត្រូវបណ្តែតបណ្តោយទុកធ្វើមិនដឹងមិនលឺនោះទេ»។
យុវជននៅឃុំព្រែកអំបិល ស្រុកស្អាង ខេត្តកណ្តាល លោក តំ សង់ ប្រាប់ទូរទស្សន៍អាស៊ីសេរីថា រដ្ឋាភិបាលគួរដោះលែងអ្នកទោសនយោបាយ និងមនសិការទាំងអស់ដែលកំពុងជាប់ឃុំ ដើម្បីឲ្យពួកគាត់មកចូលរួមជួយជាតិប្រឆាំងការឈ្លានពានរបស់ថៃ និងជួយសង្គមពិតប្រាកដជាជាងខ្វល់ខ្វាយតែរឿងអត់បានការ។
លោក តំ សង់៖ «ខ្ញុំគិតថាមិនមានផលប្រយោជន៍អីជាដុំកំភួនដល់ប្រទេសកម្ពុជាយើងទេ ព្រោះដោយសារប្រទេសកម្ពុជាយើងឥឡូវគឺសហគមន៍អន្តរជាតិគេមើលមកថា យើងមានបញ្ហាច្រើនក្នុងសង្គមកម្ពុជាយើងហ្នឹងណា។ បញ្ហាដែលថៃឈ្លានពានក៏យើងជាបញ្ហាចោទមួយដែរ ដែលរាជរដ្ឋាភិបាលត្រូវដោះស្រាយ ត្រូវយកចិត្តទុកដាក់»។
យុវជនមកពីខេត្តកំពត លោក ព្រំ រ័ត្ន និយាយថា លោកខកចិត្តដែលរដ្ឋាភិបាលចំណាយពេលអត់បានការក្នុងរឿងដែលមិនចំណេញដល់ប្រទេសជាតិបែបនេះ។ លោកថា ប្រសិនបើរដ្ឋាភិបាលចង់ឲ្យមានការផ្សះផ្សាជាតិពិតប្រាកដ មិនចាំបាច់តែងតាំងកូនមេបក្សប្រឆាំងឲ្យធ្វើជាប្រេសិតពិសេសនាយករដ្ឋមន្ត្រីនោះទេ ប៉ុន្តែរដ្ឋាភិបាល គួរបើកលំហសិទ្ធិសេរីភាពឲ្យពលរដ្ឋអាចអនុវត្តសិទ្ធបានពេញលេញក្នុងការជួយសង្គមជាតិ រួមទាំងអ្នកប្រឆាំងនៅក្រៅប្រទេសឲ្យចូលរួមជួយសង្គមកម្ពុជាក្នុងគ្រាអាសន្ននេះ។
លោក ព្រំ រ័ត្ន៖ «ភាគីដែលនៅក្នុងនយោបាយអឺសព្វថ្ងៃហ្នឹង មានទាំងអ្នកនៅក្នុងប្រទេស នៅក្រៅប្រទេស បើយើងចង់រួបរួមជាតិពិតប្រាកដពិតមែន យើងបើកលំហជាទូទៅអញ្ចឹងណា ដើម្បីយើងមានគ្រប់ភាគីមកចូលរួម ដើម្បីគិតគូររឿងជាតិទាំងអស់គ្នា ព្រោះជាតិជាជាតិរួមរបស់យើងណាស់។ គាត់អាចចំណេញរូបភាពនយោបាយណាមួយ គាត់ធ្វើក្នុងនាមគាត់គណបក្សកាន់អំណាចណា ប៉ុន្តែក្នុងនាមយើងជាពលរដ្ឋ យើងផ្ដោតសំខាន់ឆ្ពោះទៅបញ្ហាធំ នោះគឺការឈ្លានពានរបស់បរទេស ដែលយើងចង់ឃើញរដ្ឋាភិបាលយកចិត្តទុកដាក់ខ្លាំងជាងនេះ»។
ពលរដ្ឋខ្មែររស់នៅសហរដ្ឋអាមេរិក លោកស្រី សៅ សុគន្ធា លើកឡើងថា លោក ហ៊ុន ម៉ាណែត កំពុងបន្លប់ស្ថានការណ៍ បោកប្រាស់ប្រជាពលរដ្ឋ កុហកភូតភរអន្តរជាតិពីការបង្រួបបង្រួមជាតិក្លែងក្លាយ ដើម្បីបិទបាំងអំពើទុច្ចរិត និងអសមត្ថភាពរបស់លោក ក្នុងការដឹកនាំប្រទេស។ លោកស្រីថា ប្រសិនបើរដ្ឋាភិបាលត្រកូលហ៊ុន បន្តដឹកនាំបែបឡប់ឡែបែបបំបែកបំបាក់ជាតិឯងបែបនេះ កម្ពុជានឹងធ្លាក់ក្នុងគ្រោះមហន្តរាយ។ មិនតែប៉ុណ្ណោះ លោកស្រី ទទូចឲ្យរដ្ឋាភិបាលគួរគិតគូរពីពលរដ្ឋដែលកំពុងរងផលប៉ះពាល់ពីបញ្ហាបង្ក្រាបក្រុមឆបោកអនឡាញ ដែលធ្វើឲ្យកម្ពុជាបាត់បង់ភ្ញៀវទេសចរណ៍ ហើយធ្វើឲ្យពលរដ្ឋបាត់បង់ការងារ និងចំណូលគ្រួសារ ធ្លាក់ខ្លួនជំពាក់បំណុលធនាគារផងដែរ។
លោកស្រី សៅ សុគន្ធា៖ «អ្វីដែលធាតុពិត ហ៊ុន ម៉ាណែត ធ្វើ គឺដើម្បីរក្សាអំណាចរបស់ខ្លួន ក៏ដូចជាគ្រួសាររបស់ខ្លួនតែប៉ុណ្ណោះ។ អញ្ចឹងណា ប្រទេសកម្ពុជានឹងធ្លាក់នៅក្នុងស្ថានការណ៍ដ៏អាក្រក់ ដែលមិនអាចស្តារឡើងវិញ សឹងតែថាដូចរបៀបដូចថារបប ៣ ឆ្នាំ ៨ ខែ ២០ ថ្ងៃអញ្ចឹងណា… គឺចេតនាពង្វក់ទឹកចិត្តប្រជាពលរដ្ឋខ្មែរឱ្យជឿជាក់ថា ខ្លួនពិតជាអ្នកដឹកនាំដ៏ល្អ តែធាតុពិតគ្រាន់តែអ្វីៗជាការក្លែងបន្លំតែប៉ុណ្ណោះចាស៎»។
ចំណែកប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា មានប្រសាសន៍ថា លោកមានក្តីបារម្ភចំពោះការឈ្លានពានរបស់ថៃ ដែលបន្តធ្វើរបងព័ទ្ធយកដីខ្មែរ ខណៈរដ្ឋាភិបាលមិនបានគិតគូររិះរកវិធីដោះស្រាយ បែរជារកតែវិធីដោះសាគ្មានទទួលខុសត្រូវទៅវិញ។ លោកថា រដ្ឋាភិបាលគួរយកចិត្តទុកដាក់ឲ្យបានខ្លាំងក្លាលើបញ្ហាឆបោកអនឡាញ ដែលអន្តរជាតិកំពុងតាមដានសកម្មភាពមេដឹកនាំក្នុងការវែកមុខរកមេក្លោងធំៗដែលបានបោកប្រាស់លុយរបស់ពលរដ្ឋទូទាំងប្រទេសរាប់ពាន់លានដុល្លារ។ លោកទទូចឲ្យរដ្ឋាភិបាលបើកលំហប្រជាធិបតេយ្យ បញ្ឈប់ការធ្វើទុកបុកម្នេញសំឡេងប្រឆាំង ដើម្បីជាធ្លុងមួយក្នុងការជួយជាតិពិតប្រាកដ។
លោក ស៊ឹង សែនករុណា៖ «រឿងទាំងអស់នេះមិនដោះស្រាយបានទេ។ ខ្ញុំគិតថា ទោះបីអឺមេដឹកនាំខិតខំបំបែកសំឡេងបក្សប្រឆាំង ខិតខំឱ្យក្រុមដែលគាំទ្រខ្លួនដែលពូកែធ្វើមាតិកាបង្វែរ ប្រឌិត បំភ័យព័ត៌មាន ឬក៏កើតនូវព័ត៌មានប្លែកៗអីជាដើម ក៏ដោយ ក៏បញ្ហាទាំងអស់ហ្នឹងវាមិនត្រូវបានដោះស្រាយនោះទេ។ បញ្ហាហ្នឹងគឺនៅតែធ្លាក់ទៅលើការទទួលខុសត្រូវរបស់មេដឹកនាំដដែលទេ»។
ការរិះគន់របស់ពលរដ្ឋ និងអ្នកឃ្លាំមើលបែបនេះ គឺស្របពេលដែលរដ្ឋាភិបាលថៃ កំពុងរៀបចំការគ្រប់គ្រងទឹកដីខ្មែរជាអចិន្ត្រៃយ៍ប្រគល់ឲ្យប្រជាពលរដ្ឋថៃរស់នៅ និងបានអនុម័តថវិកាចំនួនជាង ១៣លានដុល្លារសហរដ្ឋអាមេរិកបន្ថែមទៀត ដើម្បីយកទៅចំណាយលើការពង្រឹងប្រព័ន្ធការពារនៅតាមបណ្ដោយព្រំដែន ខណៈរដ្ឋាភិបាលឪពុកកូនត្រកូលហ៊ុន គឺលោក ហ៊ុន សែន និងលោក ហ៊ុន ម៉ាណែត កំពុងខ្វាយខ្វល់រឿងសាងរូបភាពអូសទាញ និងបំបែកបំបាក់អ្នកនយោបាយបក្សប្រឆាំង។ យោធាថៃបានពង្រីកទាំងកម្លាំងទ័ព សព្វាវុធ សាងសង់ផ្លូវយុទ្ធសាស្ត្រ និងលេណដ្ឋានក្នុងតំបន់យុទ្ធសាស្ត្រសំខាន់ៗយ៉ាងរឹងមាំ ចំណែកមេដឹកនាំកម្ពុជាហាក់មិនខ្វល់ខ្វាយ ឬយកករណីនេះប្តឹងទៅតុលាការអន្តរជាតិ ICC និង ICJ ឡើយ៕
