សាច់ញាតិអ្នកទោសមនសិការ ដែលកំពុងជាប់ឃុំនៅពន្ធនាគារ បង្ហាញអារម្មណ៍ឈឺចាប់ និងសោកសៅនៅពេលឃើញគ្រួសារអ្នកកាន់អំណាច ដូចជា គ្រួសារលោក ហ៊ុន សែន និងអ្នកដទៃទៀត ជួបជុំគ្រួសារ សើចសប្បាយ នៅពេលរដូវបុណ្យកាន់ភ្ជុំបិណ្ឌ ខណៈពួកគាត់បែរជា បាត់បង់សមាជិកគ្រួសារ ដោយសារតែរដ្ឋាភិបាលបក្សកាន់អំណាច បានប្រើប្រាស់ប្រព័ន្ធតុលាការ ចាប់ ពួកគាត់ ដាក់ពន្ធនាគារ ពាក់ព័ន្ធ ការឈឺឆ្អាលបញ្ហាប្រទេសជាតិ។
ខុសពីគ្រួសារអ្នកកាន់អំណាច និងពលរដ្ឋដទៃទៀត ដែលកំពុងតែជួបជុំគ្រួសារហើយ នាំគ្នាទៅវត្តអារាម ដើម្បីធ្វើបុណ្យទាន ក្នុងថ្ងៃបុណ្យកាន់បិណ្ឌ និងភ្ជុំបិណ្ឌ សាច់ញាតិសកម្មជននយោបាយ សកម្មជនបរិស្ថាន និងសកម្មជនសិទ្ធិមនុស្ស បង្ហាញអារម្មណ៍សោកសៅ និងក្ដុកក្ដួល នៅពេល ប្ដី កូន និងឪពុក កំពុងជាប់ពន្ធនាគារ ទាំងអយុត្តិធម៌។ ពួកគាត់ទទូចឱ្យរដ្ឋាភិបាលដោះលែងអ្នកទោសមនសិការទាំងនោះឱ្យមានសេរីភាពវិញ។
ប្អូនស្រី សកម្មជនចលនាមាតាធម្មជាតិ កញ្ញា ឡុង គន្ធា គឺកញ្ញា ឡុង សុខលីន ប្រាប់ទូរទស្សន៍អាស៊ីសេរីនៅថ្ងៃទី៣០ ខែកញ្ញាថា ជារៀងរាល់ឆ្នាំ នៅពេលមានបុណ្យទានម្ដងៗ កញ្ញាតែងតែឃើញគ្រួសារអ្នកដទៃ រួមនឹងគ្រួសារនាយករដ្ឋមន្ត្រីផង ជួបជុំគ្រួសារ និងបង្ហាញមនោសញ្ចេតនារីករាយ ក៏ប៉ុន្តែ សម្រាប់គ្រួសារសកម្មជនបរិស្ថានដែលកំពុងជាប់ពន្ធនាគារជាង២ឆ្នាំមកហើយ នោះ បែរជាមានអារម្មណ៍សោកសៅ។ កញ្ញាយល់ថា តុលាការ មិនគួរផ្ដន្ទាទោសឱ្យពួកគាត់ឱ្យជាប់ពន្ធនាគារចន្លោះពី៦ ទៅ៨ឆ្នាំ ដោយសារតែរឿងការពារធនធានធម្មជាតិ។
កញ្ញាស្នើទទូចឱ្យរដ្ឋាភិបាលដោះលែងសកម្មជនបរិស្ថានទាំង៥រូប ឱ្យមានសេរីភាពឡើងវិញនៅថ្ងៃបុណ្យភ្ជុំបិណ្ឌខាងមុខនេះ ដើម្បីបានជួបជុំគ្រួសារ ព្រោះពួកគាត់ ពុំមានកំហុសនោះទេ។
កញ្ញា ឡុង សុខលីន៖ «ខ្ញុំពិតជាចង់ឃើញពួកគាត់ទាំងអស់គ្នាមានសេរីភាព មកជួបជុំគ្រួសារនៅក្នុងឱកាសបុណ្យភ្ជុំបិណ្ឌនេះ ព្រោះអីនៅថ្ងៃបុណ្យភ្ជុំបិណ្ឌ ថ្ងៃបុណ្យប្រពៃណីខ្មែរ គ្រួសារនីមួយៗតែងតែមានការជួបជុំក្រុមគ្រួសារ។ អ៊ីចឹងខ្ញុំពិតជាចង់ឃើញបងស្រីខ្ញុំ មកជួបជុំក្រុមគ្រួសារ ហើយបានទៅធ្វើបុណ្យទាំងអស់។ ទទូចឱ្យរាជរដ្ឋាភិបាលមានការដោះលែងពួកគាត់ឱ្យមានសេរីភាពឡើងវិញ នៅក្នុងឱកាសបុណ្យភ្ជុំបិណ្ឌនេះ។ »
កន្លងមកនេះ គេតែងតែឃើញ លោក ហ៊ុន សែន បង្ហាញពីសកម្មភាពស្និទ្ធស្នាលជាច្រើនជាមួយចៅប្រុស ចៅស្រីដែលលោកអួតថាមានជាង៣០នាក់។ ចំណែកនៅពេលបុណ្យទានម្ដងៗក្រុមគ្រួសារត្រកូលហ៊ុន តែងតែដឹកនាំគ្នាទៅធ្វើបុណ្យយ៉ាងអធិកអធម រួមនឹងការផឹកស៊ីរាំលេងសប្បាយ។ ក៏ប៉ុន្តែនៅពីក្រោយភាពរីករាយនៃគ្រួសារត្រកូលហ៊ុននោះ ពលរដ្ឋរិះគន់ថា លោក ហ៊ុន សែន ផ្ទាល់តែងតែប្រកាសពីយុទ្ធនាការ«ងើបមួយវាយមួយ»ប្រឆាំងមកលើអ្នកនយោបាយបក្សប្រឆាំង សកម្មជនបរិស្ថាន និងពលរដ្ឋ តាមរយៈការចាប់អ្នកទាំងនោះដាក់ពន្ធនាគារចន្លោះពី៥ឆ្នាំ ទៅ១០ឆ្នាំ ដែលធ្វើឱ្យ អ្នកទាំងនោះ ត្រូវព្រាត់ប្រាសប្រពន្ធកូន និងគ្រួសារ។
រីឯប្រពន្ធអនុប្រធានគណបក្សភ្លើងទៀន លោកថាច់ សេដ្ឋា លោកស្រី ថាច់ សុខបូរ៉ានី បានរៀបរាប់ទាំងអារម្មណ៍ ក្ដុកក្ដួលថា លោកស្រីឈឺចាប់ណាស់ នៅពេលដែលឃើញគ្រួសារគេសើចសប្បាយរីករាយ ជួបជុំគ្រួសារ ប៉ុន្តែ លោកស្រី បែរជាទឹកភ្នែកហូរ ព្រោះប្ដីលោកស្រី ជាប់ពន្ធនាគារអស់ជាង៣ឆ្នាំហើយ ទាំងដែលគ្មានកំហុសសោះ។ លោកស្រីថា ថ្ងៃបុណ្យកាន់បិណ្ឌឆ្នាំនេះ មិនខុសពិធីបុណ្យទានប្រពៃណីជាតិផ្សេងៗទៀតនោះទេ គឺតែងតែបួងសួងឱ្យប្ដី ឆាប់ទទួលបានសេរីភាពវិញ ដើម្បីបានជួបជុំគ្រួសារ។
លោកស្រី ថាច់ សុខបូរ៉ានី៖ «ពួកគាត់ចេះស្រឡាញ់គ្រួសារពួកគាត់ ចាស ចេះស្រឡាញ់កូនចៅគាត់ ចុះពួកខ្ញុំ? ពួកខ្ញុំហ្នឹងមិនមែនមនុស្សទេអី? អត់ចេះស្រឡាញ់គ្រួសារ អត់ចេះស្រឡាញ់កូន អត់ស្រឡាញ់អីទេអី? អត់ស្រឡាញ់ឪពុកម្ដាយទេ? ចង់និយាយថា គាត់ ពួកគាត់អត់មានអាសូរពួកខ្ញុំដែលបែកបាក់គ្រួសារ ដែលអត់មានខុសអីអីសោះ ជាប់ពន្ធនាគារអូនឯងគិតមើល?»
បន្ថែមពីលើនោះ លោកស្រីស្នើឱ្យរដ្ឋាភិបាល ដោះលែងប្ដីលោកស្រី និងអ្នកទោសនយោបាយដទៃទៀតឱ្យមានសេរីភាពឡើងវិញ នៅថ្ងៃបុណ្យភ្ជុំបិណ្ឌឆ្នាំនេះ ព្រោះថាការបន្តឃុំខ្លួនពួកគាត់ដាក់ពន្ធនាគារ ពុំផ្ដល់ផលចំណេញអ្វីដល់ការអភិវឌ្ឍជាតិនោះទេ ក្រៅតែពីការធ្វើឱ្យស្ថានភាពនយោបាយ និងបញ្ហាសិទ្ធិមនុស្សបន្តរងការរិះគន់ពីសហគមន៍ជាតិ និងអន្តរជាតិ។
លោកស្រី ថាច់ សុខបូរ៉ានី៖ «មិនថាគ្រួសារខ្ញុំ មិនថាគ្រួសារបងប្អូនដទៃទៀត ផ្សេងៗហ្នឹង ឱ្យសុំដោះលែងទាំងអស់ ពួកគាត់អត់មានខុសអីទេ ពួកយើងអត់មានខុសអីទេ ហើយ ពួកគាត់ធ្វើដើម្បីជាតិសោះ និយាយដើម្បីជាតិសោះ និយាយការពិតសោះ ចាប់ពួកគាត់ដាក់គុក សួរថាពួកខ្ញុំហ្នឹងមិន គ្រួសារហ្នឹងឈឺចាប់ និយាយទៅ ពេលបុណ្យទាន ពួកខ្ញុំយំរហូតហ្នឹង ពេលពួកខ្ញុំទៅវត្ត ពួកខ្ញុំអុជធូប ក៏យំយំដែរ ខ្ញុំយំរហូតហ្នឹង ទឹកភ្នែកហូរមកឯងហ្មង តែពួកគាត់ដែលធ្វើអញ្ចឹង ហេតុអ្វីបានជាពួកខ្ញុំអត់រួចទេ »។
ទូរទស្សន៍អាស៊ីសេរី ពុំអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតបជុំវិញរឿងនេះបានទេ នៅថ្ងៃទី៣០ ខែកញ្ញា ដោយហៅទូរស័ព្ទចូលតែគ្មានអ្នកទទួល។
អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្សកម្ពុជា ហៅកាត់ថា អាដហុក (ADHOC) លោក យិន ម៉េងលី សង្កេតឃើញថា កម្ពុជាតែងតែមានទម្លាប់មួយនៅពេលរដូវបុណ្យជាតិធំៗ គឺមានការដោះលែងអ្នកទោស ដូច្នេះ ដើម្បីជាបង្ហាញពីគោលគំនិតនៃការបង្រួមប្រួមជាតិពិតប្រាកដ ដូចដែលរដ្ឋាភិបាលតែងតែនិយាយនោះ គួរតែយករដូវបុណ្យភ្ជុំបិណ្ឌនេះ ដោះលែងអ្នកទោសនយោបាយ និងសកម្មជនបរិស្ថាន ឱ្យមានសេរីភាពឡើងវិញ។
លោក យិន ម៉េងលី៖ «អញ្ចឹង យើងចង់ឱ្យមានការលើកលែង យកចិត្តទុកដាក់ទៅលើក្រុមទាំងអស់នេះ ហើយការដោះលែងក្រុមទាំងអស់នេះ ក៏ជាសញ្ញាមួយធ្វើឱ្យមុខមាត់រដ្ឋាភិបាលបានរីកចម្រើនដែរ។ បាទ ព្រោះរាយការណ៍ពិសេសក៏បាននិយាយ ក៏បានអំពាវនាវសុំឱ្យមានការដោះលែងអ្នកទាំងអស់ហ្នឹងដែរ បាទ។ អញ្ចឹងធ្វើឱ្យរដ្ឋាភិបាលមានមុខមាត់នៅក្នុងប្រទេស មានមុខមាត់នៅលើឆាកអន្តរជាតិ មើលឃើញថា យើងចាប់ផ្ដើមធ្វើការបង្រួបបង្រួមជាតិ ធ្វើការផ្សះផ្សាជាតិឡើងវិញហើយ បាទ»។
បច្ចុប្បន្នមានអ្នកទោសនយោបាយ សកម្មជនបរិស្ថាន សកម្មជនសង្គម និងអ្នកសារព័ត៌មានចំនួន១១០នាក់ ដែលកំពុង ជាប់ពន្ធនាគារ ក្រោយពីពួកគាត់បានប្រើប្រាស់សិទ្ធិសេរីភាពបញ្ចេញមតិ អំពីបញ្ហាសង្គម និង កិច្ចការការពារធនធានធម្មជាតិ ស្របតាមច្បាប់។ កន្លងទៅការចាប់ពលរដ្ឋ និងអ្នកនយោបាយដាក់ពន្ធនាគារតាមទំនើងចិត្ត របស់រដ្ឋាភិបាលបក្សកាន់អំណាចត្រូវបានសហគមន៍ជាតិ និងអន្តរជាតិរិះគន់ គឺជាការរំលោភសិទ្ធិមនុស្សធ្ងន់ធ្ងរ ។
គ្រួសារអ្នកទោសនយោបាយ និងអ្នកឃ្លាំមើលសង្ឃឹមថា លោក ហ៊ុន សែន និង លោក ហ៊ុន ម៉ាណែត នឹងផ្លាស់ប្ដូរការដឹកនាំ ដោយផ្ដោតលើផលប្រយោជន៍ជាតិជាធំ ជាជាងធ្វើនយោបាយគុំកួន ដោយចាត់ទុកពលរដ្ឋជាសត្រូវ ខណៈដែលប្រទេសជាតិ កំពុងតែរងផលប៉ះពាល់មុខមាត់សារតែ បណ្ដាញឧក្រិដ្ឋជនឆបោកតាមប្រព័ន្ធអនឡាញ បញ្ហាសេដ្ឋកិច្ច ពលរដ្ឋគ្មានការងារធ្វើបានត្រឹមត្រូវ រួមនឹងបញ្ហាយោធាថៃបង្កសង្គ្រាម ឈ្លានពានកម្ពុជា ជាដើម។ពួកគាត់ថា នេះ ជារឿងចាំបាច់ ដែលរដ្ឋាភិបាលត្រូវផ្ដោតលើការផ្សះផ្សាជាតិឡើងវិញ តាមរយៈការដោះលែងអ្នកទោសមនសិការ ដើម្បីរួមគ្នាដោះស្រាយបញ្ហា ជាតិឡើងវិញ៕
