អ្នកឃ្លាំមើលលើកឡើងថា ទំនុកចិត្ត ពីមហាជនលើមេបក្សប្រឆាំងលោក កឹម សុខា និងកូនស្រី កញ្ញា កឹម មនោវិទ្យា នៅតែធ្លាក់ចុះ បើទោះបីជាប្រមុខរដ្ឋាភិបាលលោក ហ៊ុន ម៉ាណែត បានអះអាងថា អ្នកទាំងពីរមិនបានចុះចូលជាមួយបក្សកាន់អំណាចក្ដី។ ការលើកឡើងនេះ ក្រោយពីកញ្ញា កឹម មនោវិទ្យា ប្រាប់ទីផ្នែកងារសារព័ត៌មានអន្តរជាតិ AFP ថាតួនាទីប្រេសិតពិសេសដែលលោក ហ៊ុន ម៉ាណែត ផ្តល់ឱ្យ មិនពាក់ព័ន្ធនឹងឪពុករបស់កញ្ញា និងគណបក្សប្រជាជនកម្ពុជានោះទេ។
ក្រោយពីមានការរិះគន់ និងវែកញែកជាច្រើន លើបណ្ដាញសង្គមពាក់ព័ន្ធ កូនស្រីមេប្រឆាំង គឺកញ្ញា កឹម មនោវិទ្យា ទទួលបានតួនាទីធំក្នុងជួររដ្ឋាភិបាលមក កញ្ញាបានចេញមុខលាងសម្អាតខ្លួន និងការពារកិត្តិយសឪពុករបស់កញ្ញាថា មិនជាប់ពាក់ព័ន្ធបក្សកាន់អំណាចនោះទេ ប៉ុន្តែ អ្នកឃ្លាំមើលយល់ថា បើទោះបីជាកញ្ញា ព្យាយាមលាងសម្អាតខ្លួនក្ដី ករណីនេះមិនអាចស្ដារទំនុកចិត្ត ពីពលរដ្ឋបាននោះទេ ប្រសិនបើ តួនាទីកើតឡើង ដោយការដោះដូរលក្ខខណ្ឌមួយចំនួន ដែលតម្រូវឱ្យ កញ្ញា មិនរិះគន់ចំណុចអវិជ្ជមាន និងធ្វើការងារដោយគ្រាន់តែរណបរដ្ឋាភិបាល។
អ្នកជំនាញផ្នែកភូមិសាស្ត្រនយោបាយ លោក សេង វណ្ណលី ប្រាប់ទូរទស្សន៍អាស៊ីសេរីនៅថ្ងៃទី២០ ខែសីហាថា បើទោះបីជា កញ្ញា កឹម មនោវិទ្យា អះអាងថា មិនបានចូលជាសមាជិកគណបក្សប្រជាជនកម្ពុជា និងថា មិនពាក់ព័ន្ធឪពុករបស់កញ្ញាក្ដី នេះមិនអាចលុបបំបាត់សំណួរធំៗអំពីជំហរនយោបាយរបស់កញ្ញា និងគ្រួសារលោក កឹម សុខា បានទេ។ លោកបន្តថា បញ្ហាមិនមែនចូលបក្ស ឬមិនចូលបក្សកាន់អំណាចនោះឡើយ ប៉ុន្តែស្ថិតនៅត្រង់ថា តើការសហការជាមួយរដ្ឋាភិបាលត្រូវដាក់លក្ខខណ្ឌឱ្យឈប់រិះគន់ និងឈប់វាយប្រហាររដ្ឋាភិបាលឬយ៉ាងណា។
លោកថាជារឿងគួរឱ្យសោកស្ដាយ ប្រសិនបើការចូលរួមជួយជាតិ ត្រូវភ្ជាប់ជាមួយការមិនអាចរិះគន់បក្សកាន់អំណាច នោះមិនមែនជាលំហនយោបាយឯករាជ្យដែលពលរដ្ឋសាទរនោះឡើយ ប៉ុន្តែ ជាកលល្បិចដែលបក្សកាន់អំណាចរៀបចំ ដើម្បីការពារផលប្រយោជន៍អំណាច ជាជាងផលប្រយោជន៍ជាតិពិតប្រាកដ។
លោកអះអាងថា ចំពោះអនាគតរបស់លោក កឹម សុខា និងកញ្ញា មនោវិទ្យា បើទោះពីជាមានគោលគំនិត ចង់ចូលរួមជាមួយបក្សផ្សេង ដែលមិនមែនជាគណបក្សកាន់អំណាចក្ដី ការទទួលបានទំនុកចិត្ត ពីមហាជន ជារឿងពិបាកស្ដារឡើងវិញ ប្រសិនបើនៅតែ រក្សាទំនាក់ទំនងជិតស្និទ្ធជាមួយរដ្ឋាភិបាល ហើយមិនហ៊ានរិះគន់ចំណុចអវិជ្ជមានរបស់រដ្ឋាភិបាល ដើម្បីផលប្រយោជន៍ជាតិជាធំ ពេលនោះ បើទោះបី បង្កើតគណបក្សថ្មីក្ដីក៏គ្រាន់តែជាគណបក្សប្រឆាំងដែលរណបរដ្ឋាភិបាល ហើយ គ្មានថ្ងៃប្រកួតប្រជែង ជាមួយបក្សកាន់អំណាចបានឡើយ។ ដូច្នេះលោកថា ពលរដ្ឋនឹងមើលឃើញថា អ្វីដែលលោកកំពុងធ្វើ គ្រាន់តែជាថ្នូរដើម្បីផលប្រយោជន៍ផ្ទាល់ខ្លួន។
លោក សេង វណ្ណលី៖ «សំណួរថា លោក កឹម សុខា នៅតែជាអ្នកនយោបាយប្រឆាំង ឬនឹងក្លាយជាអ្នកនយោបាយរណប មិនអាចវាស់តាមពាក្យថា មិនចូល CPP ទេ ប៉ុន្តែត្រូវវាស់តាមសកម្មភាព។ បើលោកមិនអាចរិះគន់រដ្ឋាភិបាល មិនអាចប្រឆាំងគោលនយោបាយដែលខ្លួនយល់ថាខុស និងមិនអាចឈរជាមួយអ្នកដែលរងសម្ពាធនយោបាយបាន នោះទោះមិនមែនជាសមាជិក CPP ក៏ដោយ រូបភាពនយោបាយរបស់លោកអាចនៅតែត្រូវមើលថា ជិតស្និទ្ធ ឬស្ថិតក្នុងរង្វង់ដែលរដ្ឋាភិបាលអាចទទួលយកបាន។ នេះជាហានិភ័យធំចំពោះមរតក លោក កឹម សុខា ព្រោះវាអាចធ្វើឱ្យលោកផ្លាស់ពីនិមិត្តរូបនៃការប្រកួតប្រជែង នយោបាយ ទៅជានិមិត្តរូបនៃការសម្របខ្លួន»។
ការលើកឡើងនេះ ក្រោយពីកញ្ញា កឹម មនោវិទ្យា ប្រាប់សារព័ត៌មានអន្តរជាតិ AFP ថ្មីៗនេះ ថាតួនាទី ជាប្រេសិតពិសេសនេះមិនពាក់ព័ន្ធជាមួយឪពុកកញ្ញា និងបក្សកាន់អំណាចនោះទេ។ កញ្ញាបន្តថា ការខ្វែងគំនិតគ្នានៅក្នុងឆាកនយោបាយគឺជារឿងមួយ ប៉ុន្តែការទទួលខុសត្រូវ របស់កញ្ញា ចំពោះប្រទេសកម្ពុជា គឺជារឿងមួយផ្សេងទៀត។ ដូច្នេះកញ្ញាបញ្ជាក់ថា តំណែងថ្មីនេះ នឹងផ្ដោតលើ «កិច្ចការអន្តរជាតិ» ជាពិសេសការអភិវឌ្ឍសេដ្ឋកិច្ច និង «ការការពារបូរណភាពទឹកដីរបស់កម្ពុជា» បន្ទាប់ពីតំបន់ព្រំដែនត្រូវបាន «កាន់កាប់ដោយខុសច្បាប់ពីសំណាក់យោធាថៃ»។
យ៉ាងណា លោក សេង វណ្ណលី យល់ថា ប្រសិនបើ លោក កឹម សុខា និងកញ្ញា កឹម មនោវិទ្យា មិនចូលជាមួយគណបក្សកាន់អំណាចដោយផ្ទាល់ក្ដី អ្វីដែលពួកគេគួរធ្វើដើម្បីបង្ហាញពីទំនួលខុសត្រូវ ក្នុងនាមជាអ្នកនយោបាយ គួរតែបញ្ជាក់ជំហរឱ្យច្បាស់ និងឈប់ទុកឱ្យសាធារណជនសន្និដ្ឋានជំនួសលោក។ ជាពិសេស លោក កឹម សុខា គួរនិយាយថា ការផ្សះផ្សាមិនមានន័យថា បោះបង់សិទ្ធិរិះគន់ ហើយការជួយជាតិមិនមានន័យថា ត្រូវស្ងៀមចំពោះអ្វីដែលរដ្ឋាភិបាលធ្វើខុសនោះទេ។ លោកបន្តថា ប្រសិនបើលោក កឹម សុខានៅតែចង់រក្សាមរតកនយោបាយ និងទំនុកចិត្តរបស់អ្នកគាំទ្រ លោកត្រូវបង្ហាញថា ខ្លួននៅតែ ឯករាជ្យពីរដ្ឋាភិបាល ឯករាជ្យពីគ្រួសារ និងឯករាជ្យពីការដោះដូរ នយោបាយ បើមិនដូច្នោះទេ ទោះមានគណបក្សថ្មី ឬតួនាទីថ្មីក៏ដោយ ក៏ពិបាកស្ដារទំនុកចិត្តពីពលរដ្ឋ។
ស្របទៅនឹងការអះអាងរបស់ កញ្ញា កឹម មនោវិទ្យា ដែលថាខ្លួនមិនជាប់ពាក់ព័ន្ធគណបក្សប្រជាជនកម្ពុជានោះ លោក ហ៊ុន ម៉ាណែត បានថ្លែងកាលពីម្សិលមិញថា លោកស្វាគមន៍ឱ្យមានការបង្រួបបង្រួមជាតិ និងឯកភាពជាតិ ដើម្បីឱ្យចូលរួមធ្វើកិច្ចការងារ ជាមួយរដ្ឋាភិបាល។ប៉ុន្តែលោកថា មិនស្វាគមន៍នោះទេ ចំពោះអ្នកនយោបាយ ដែលបន្តរិះគន់ និងវាយប្រហារមកលើបក្សកាន់អំណាច។ ចំណុចនេះ ត្រូវបានអ្នកវិភាគ និងពលរដ្ឋមើលឃើញថា ការចូលរួមធ្វើកិច្ចការងារជាតិ ជាមួយរដ្ឋាភិបាល គឺគ្រាន់តែ ដើម្បីល្អមើល ប៉ុន្តែនៅតែស្ថិតក្រោមលក្ខខណ្ឌនៃការបិទខ្ទប់សិទ្ធិសេរីភាពបញ្ចេញមតិខណៈអ្នកទោសនយោបាយជាច្រើន នៅតែមិនត្រូវបានដោះលែង។
ជាមួយគ្នានេះ ប្រមុខដឹកនាំរដ្ឋាភិបាលឯករាជ្យ២៣តុលាការ លោក សម រង្សី បានថ្លែងនៅក្នុងវេទិកាអ្នកស្ដាប់ទូរទស្សន៍អាស៊ីសេរីកាលពីថ្ងៃទី១៩ ខែសីហាថា ការរំពឹងថា រដ្ឋាភិបាលត្រកូលហ៊ុន នឹងផ្សះផ្សាជាតិ និងឯកភាពជាតិ តាមរយៈការបើកឱ្យមានវប្បធម៌សន្ទនា នៅពេលនេះគឺគ្រាន់តែជា ល្បែងនយោបាយ ដ៏ស្មោកគ្រោក របស់លោក ហ៊ុន សែន ដើម្បីបិទបាំងពីអសមត្ថភាព ដែលមិនអាចការពារបូរណភាពទឹកដី ពីការឈ្លានពានរបស់យោធាថៃ និងការដែលធ្វើឱ្យប្រទេសជាតិមានកេរ្តិ៍ឈ្មោះ មិនល្អ លើឆាកអន្តរជាតិ ពាក់ព័ន្ធ ឧក្រិដ្ឋកម្ម ឆបោកតាមអនឡាញ និងការរំលោភសិទ្ធិមនុស្ស ជាដើម។
លោកបន្ថែមថា អ្នកដែលចូលប្រឡាក់ប្រឡូស ជាមួយ របបក្រុងភ្នំពេញ គឺគ្មានថ្ងៃ ដែលពលរដ្ឋគាំទ្រ និងជឿទុកចិត្តថា នឹងស្ដារប្រព័ន្ធប្រជាធិបតេយ្យ និងសិទ្ធិមនុស្ស បាននោះឡើយ ព្រោះលោក ហ៊ុន សែន គ្មានថ្ងៃ ចង់ស្ដារមុខមាត់ប្រទេសជាតិដោយភាពថ្លៃថ្នូរនោះទេ ក្រៅតែពីការធ្វើគ្រប់យ៉ាង ដើម្បីការពារអំណាចត្រកូល៕
