អ្នកឃ្លាំមើលយល់ថា ការថ្លែងព្រះរាជសាររបស់ព្រះមហាក្សត្រ នៅវិមានសាមគ្គីភាពនៃព្រឹទ្ធសភា ដែលកោតសរសើរ លោក ហ៊ុន សែន និងលោក ហ៊ុន ម៉ាណែត ថាជាអ្នកដឹកនាំឆ្លាតវៃក្នុងការការពារទឹកដី និងអនុវត្តនូវគោលនយោបាយឈ្នះៗ ធ្វើឱ្យប្រទេសជាតិរីកចម្រើន និងមានការផ្សះផ្សាជាតិដែលខុសទៅនឹងទិដ្ឋភាពជាក់ស្ដែងនេះ ទំនងជាការរៀបចំរបស់មន្ត្រីអែបអបមួយចំនួនបង្គាប់ឱ្យព្រះអង្គ មានព្រះបន្ទូល ដើម្បីស្អំចិត្តរដ្ឋាភិបាលត្រកូលហ៊ុន។
អ្នកឃ្លាំមើលលើកឡើងថា មូលហេតុដែលព្រះមហាក្សត្រ មានព្រះរាជបន្ទូលលើកសរសើរលោក ហ៊ុន សែន ក្នុងពិធីសម្ពោធដាក់ឱ្យប្រើប្រាស់វិមានសាមគ្គីភាព ឬអគារថ្មីនៃព្រឹទ្ធសភា នៅព្រឹកថ្ងៃទី២១ សីហានេះ ដោយសារព្រះអង្គ ស្ថិតនៅក្រោមសម្ពាធរបស់លោក ហ៊ុន សែន ជាពិសេសលិខិតដែលព្រះមហាក្សត្រអាននោះ គឺជាការរៀបចំរបស់ក្រុមលោក ហ៊ុន សែន តែម្តង។
ប្រធានសមាគមខ្មែររដ្ឋ Victoria ប្រចាំប្រទេសអូស្ត្រាលី លោក ជា យូហ៊ន ប្រាប់ទូរទស្សន៍អាស៊ីសេរីនៅថ្ងៃទី២១ ខែសីហាថា ពុំមែនជារឿងចម្លែកទេ ដែលព្រះមហាក្សត្រតែងតែមានព្រះរាជបន្ទូល សរសើរលើសលប់ ចំពោះរដ្ឋាភិបាលត្រកូលហ៊ុន ព្រោះព្រះអង្គដឹងថា ប្រសិនបើ ហ៊ានមានព្រះរាជបន្ទូលអំពីបញ្ហាប្រទេសជាតិ ដូចជាបញ្ហាបាត់បង់ទឹកដីទៅឱ្យថៃរឿងឧក្រិដ្ឋកម្មឆបោកតាមអនឡាញ បញ្ហាប្រជាធិបតេយ្យ និងសិទ្ធិមនុស្ស ជាដើម ព្រះអង្គនឹង ត្រូវបានលោក ហ៊ុន សែន គំរាមកំហែង ដូចកាលសម័យព្រះមហាក្សត្រព្រះបាទ សម្ដេចនរោត្តមសីហនុ។ ដូច្នេះ លោកថា ការសរសើររបស់ព្រះអង្គ គឺជាការរៀបចំឡើងដោយមន្ត្រីបក្សកាន់អំណាច។
លោក ជា យូហ៊ន៖ «ព្រះមហាក្សត្រយើងនឹង លោកគ្មានហ៊ានធ្វើអីទេ គឺនិយាយតាមតែគេហ្នឹង ហ៊ាននិយាយថា ហ៊ុន សែន អាក្រក់ អឺ! អត់ហ៊ានទេ។ ដូច្នេះ ចាំតែហៃអើ!ចាក់ខ្សែ ទៅតាមគេហ្នឹង គឺថាគេឱ្យធ្វើអី ធ្វើហ្នឹង ក្រោមបង្គាប់បញ្ជារបស់ ហ៊ុន សែន ហ្នឹងបាទ។ ដូច្នេះ ខ្ញុំឃើញថា បើសិនជាស្រុកខ្មែរយើងមានអ្នកដឹកនាំរបៀបហ្នឹង វាហ្នឹង វិនាសហើយ បាទ។ គួរទុកពេលវេលាឱ្យប្រជាជនខ្មែរទាំងអស់មានសិទ្ធិក្នុងការសម្រេចជោគវាសនាប្រទេសជាតិដោយខ្លួនឯង»។
ការលើកឡើងនេះ ក្រោយពីព្រះព្រះមហាក្សត្រ ព្រះបាទសម្ដេចនរោត្តម សីហមុនី មានព្រះរាជបន្ទូល នៅថ្ងៃទី២១ ខែសីហា ក្នុងពិធីសម្ពោធឱ្យប្រើប្រាស់អគារវិមានសាមគ្គីភាពនៃព្រឹទ្ធសភា ថា ក្រោមការដឹកនាំប្រទេស ប្រកបដោយចក្ខុវិស័យ គតិបណ្ឌិតដ៏ឆ្នើម និងពិតប្រាកដរបស់លោកហ៊ុន សែន បានអនុវត្តប្រកបដោយជោគជ័យ នូវនយោបាយឈ្នះ ឈ្នះ ជាបន្តបន្ទាប់មក និង បានអនុវត្តគោលនយោបាយកែទម្រង់មុតស្រួច និងស៊ីជម្រៅលើគ្រប់វិស័យ សេដ្ឋកិច្ច សង្គម ដែលធ្វើឱ្យកម្ពុជា ទទួលបានការអភិវឌ្ឍ និងការរីកចម្រើន ជាលំដាប់។
ទន្ទឹមគ្នានោះ ព្រះអង្គមានព្រះរាជបន្ទូលថា បច្ចុប្បន្នកម្ពុជាក៏ មានមហាសាមគ្គីជាតិជាធ្លុងមួយ ក្រោមម្លប់សន្តិភាពដ៏រឹងមាំ និងយូរអង្វែងក្នុងផ្ទៃប្រទេស ខណៈកំណើនសេដ្ឋកិច្ច បានហក់ខ្ពស់ជាប់មិនដាច់ ក្នុងរយៈពេលពីរទសវត្សរ៍នេះដែលមិនធ្លាប់មាននៅក្នុងប្រវត្តិសាស្ត្រកម្ពុជា។ បន្ថែមពីលើនោះ ព្រះមហាក្សត្រ ក៏មានបន្ទូលថា ក្រោមការដឹកនាំរបស់លោក ហ៊ុន សែន បានអង្រឹងឯកភាពជាតិ រក្សាការពារអធិបតេយ្យភាពជាតិ ដ៏ថ្លៃថ្លា និង អរិយធម៌អង្គរ ដ៏បវរផងដែរ។
ព្រះបាទសម្ដេចនរោត្តម សីហមុនី៖ «ក្នុងឱកាសដ៏ប្រសើរនេះ ខ្ញុំសូមថ្លែងអំណរគុណដ៏ជ្រាលជ្រៅ ចំពោះសម្ដេចអគ្គមហាសេនាបតីតេជោ ជាប្រធានព្រឹទ្ធសភា និងជាប្រធានក្រុមប្រឹក្សាផ្ទាល់ព្រះមហាក្សត្រ នៅគ្រប់កាលៈទេសៈ ដែលប្រទេសជាតិ ត្រូវទទួលរងការរំលោភបំពាន និងការគំរាមកំហែងយ៉ាងធ្ងន់ធ្ងរពីសំណាក់បរទេសនានាពេលកន្លងទៅ សម្ដេចបានដឹកនាំ និងនៅរួមសុខ រួមទុក្ខជាមួយប្រជាពលរដ្ឋ ជាពិសេសជាមួយបងប្អូនវីរយុទ្ធជនជាតិយើង នៅគ្រប់លំដាប់ថ្នាក់ និងនៅតាមទីតាំងបញ្ជាការជួរមុខ តាមបណ្ដាលព្រំដែនកម្ពុជា។ រួមទាំងបានរួមចំណែកជាមួយរាជរដ្ឋាភិបាលកម្ពុជា ក្នុងការផ្ដល់ប្រឹក្សាយោបល់យុទ្ធសាស្ត្រ ផ្ដល់ការលើកទឹកចិត្ត គាំទ្រគ្រប់បែបយ៉ាង និងគ្រប់ទិដ្ឋភាពដោយគ្មានពេលសម្រាក ទាំងយប់ទាំងថ្ងៃ ដើម្បីបុព្វហេតុតែមួយគត់ គឺការការពារឱ្យខាងតែបាន នូវបូរណភាពទឹកដី និងដែនអធិបតេយ្យភាពជាតិរបស់យើង»។
បើទោះបីជាព្រះមហាក្សត្រមានព្រះរាជបន្ទូលបែបនេះក្ដី អ្នកឃ្លាំមើលយល់ថា នេះគ្រាន់តែជាព្រះរាជសារដែលមន្ត្រីរដ្ឋាភិបាលរៀបចំឱ្យព្រះអង្គអាន ដើម្បីស្អំចិត្តលោក ហ៊ុន សែន ព្រោះលោក ហ៊ុន សែន ជាមនុស្សចូលចិត្តឱ្យគេសរសើរ និងលើកតម្កើង បើទោះបីជាប្រទេសជាតិកំពុងតែ ត្រូវបានសត្រូវឈ្លានពានទឹកដី អស់ជិត១០០ទីតាំងក្ដី ក៏លោក ពុំសូវអើពើ ផ្ទុយទៅវិញលោកណែនាំឱ្យអាម៉ីអាថោង និពន្ធបទចម្រៀងសរសើររដ្ឋាភិបាល និងស្នាដៃមួយចំនួនក្រោមការដឹកនាំរបស់រដ្ឋាភិបាលត្រកូលហ៊ុន ដោយពុំអើពើ ប្ដឹងថៃទៅកាន់តុលាការអន្តរជាតិឡើយ។
រឹតតែធ្ងន់ធ្ងរទៀតនោះ អ្នកឃ្លាំមើលយល់ថា ក្នុងស្ថានភាពដែលពលរដ្ឋគ្មានការងារធ្វើ ហើយជួបវិបត្តិសេដ្ឋកិច្ច គួរតែរដ្ឋាភិបាលត្រូវប្រឹងប្រែងរកការងារឱ្យពលរដ្ឋធ្វើ ផ្ទុយទៅវិញ មន្ត្រីរដ្ឋាភិបាល បែរជា យកលេសថា នេះជាបាតុភូត នៃការប្រែប្រួលសេដ្ឋកិច្ចសាកលនៅលើពិភពលោក ដោយសារតែ សង្គ្រាមនៅ បច្ឆិមបូព៌ាជាដើម។ ចំណែក បញ្ហាឧក្រិដ្ឋកម្មឆបោកតាមអនឡាញ ដែលមានជាប់ពាក់ព័ន្ធរដ្ឋាភិបាល បំផ្លាញកេរ្តិ៍ឈ្មោះរបស់កម្ពុជានៅលើឆាកអន្តរជាតិ ក៏លោកហ៊ុន សែន មិនអាចដោះស្រាយប្រកបដោយប្រសិទ្ធភាពបានដែរ ដែលករណីនេះធ្វើឱ្យប៉ះពាល់យ៉ាងខ្លាំងដល់វិស័យទេសចរណ៍ និងការវិនិយោគពីក្រៅប្រទេស។
លោក ជា យូហ៊ន យល់ឃើញថា ក្រោមការដឹកនាំតាមបែបផ្ដាច់ការរបស់ លោក ហ៊ុន សែន គឺចូលចិត្តណាស់ពាក្យសរសើរ ដោយមិនខ្វល់ពីបញ្ហាប្រទេសជាតិ និងភាពមហន្តរាយនាពេលអនាគត ខណៈដែលទឹកដីបន្តបាត់បង់ទៅប្រទេសជិតខាង។ លោកថានេះជារឿងដ៏ឈឺចាប់បំផុត ខណៈដែល លោក ហ៊ុន សែន ក្រៅពីការស្ដាប់ពាក្យសរសើរ គឺមានតែរៀបចំយុទ្ធសាស្ត្រចាប់ពលរដ្ឋដាក់ពន្ធនាគារ និងបំបែកបំបាក់អ្នករាជាធិបតេយ្យ ទាំងក្នុងស្រុក និងក្រៅស្រុកជាដើម៕
