ក្រុមអ្នកឃ្លាំមើលបញ្ហាសង្គមបន្តជំរុញដល់រដ្ឋាភិបាលលោក ហ៊ុន ម៉ាណែត ចាត់វិធានការម៉ឺងម៉ាត់ទៅលើអ្នកមានលុយមានអំណាចដែលជួលផ្ទះវិឡា ឬទីតាំងភូមិគ្រឹះរបស់ខ្លួនទៅឱ្យក្រុមបណ្ដាញឆបោកតាមអនឡាញបន្តប្រតិបត្តិការ។ ការលើកឡើងនេះ កើតឡើងបន្ទាប់ពីសមត្ថកិច្ចបង្ក្រាបទីតាំងវិឡាស្កឹមស្កៃមួយកន្លែងទៀតក្នុងខេត្តព្រះសីហនុ និងឃាត់ខ្លួនមនុស្សយ៉ាងហោចណាស់ ៣៤នាក់ពាក់ព័ន្ធប្រតិបត្តិការឆបោកតាមអនឡាញ។
ក្រុមអ្នកមានលុយ និងអំណាចមួយចំនួននៅតែបន្តបើកទ្វារភូមិគ្រឹះ និងផ្ទះវីឡារបស់ខ្លួន ដើម្បីជួលឱ្យក្រុមបណ្ដាញឆបោកតាមអនឡាញ ខណៈបណ្ដាញឧក្រិដ្ឋជនទាំងនេះ កំពុងបែកខ្ញែកទីតាំងប្រតិបត្តិការពីមជ្ឈមណ្ឌលអគារធំៗ មកលាក់ខ្លួននៅតាមអគារតូចៗដូចជាផ្ទះវិឡា និងបន្ទប់ជួល ដើម្បីបន្តប្រតិបត្តិការឆបោករបស់ពួកគេ។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា រិះគន់ថា ចំណាត់ការបង្ក្រាបឧក្រិដ្ឋកម្មរបស់រដ្ឋាភិបាលកន្លងមក ធ្វើឡើងត្រឹមតែជារូបភាពបង្ហាញការចាប់ខ្លួនតែមន្ត្រីថ្នាក់ក្រោម ឬអ្នកពាក់ព័ន្ធតូចតាច ប៉ុន្តែមិនហ៊ានប៉ះពាល់ដល់មេខ្លោង និងមន្ត្រីអ្នកមានអំណាចគ្រាក់ៗនៅថ្នាក់លើនោះឡើយ។ លោកលើកឡើងទៀតថា ប្រព័ន្ធយុត្តិធម៌ និងការអនុវត្តច្បាប់នៅកម្ពុជាបច្ចុប្បន្ន មិនអាចកម្ទេចឧក្រិដ្ឋកម្មឆ្លងដែននេះបានឡើយ ដោយសារតែមន្ត្រីអនុវត្តច្បាប់ និងអាជ្ញាធរចាំតែស្ដាប់បទបញ្ជាដោយផ្ទាល់ពីថ្នាក់ដឹកនាំកំពូលដូចជា លោក ហ៊ុន សែន លោក ហ៊ុន ម៉ាណែត មុននឹងមានវិធានការលើបុគ្គលណាមួយដែលពាក់ព័ន្ធនឹងអំពើឧក្រិដ្ឋកម្ម។
ទោះជាយ៉ាងណា លោក ស៊ឹង សែនករុណា ព្រមានថា ប្រសិនបើរដ្ឋាភិបាលនៅតែបន្តពង្រឹងអំពើនិទ្ទណ្ឌភាព និងការពារក្រុមបក្ខពួកនិយមខ្លួនដែលពាក់ព័ន្ធនឹងអំពើឧក្រិដ្ឋកម្មនេះ កម្ពុជានឹងបន្តរងភាពអាម៉ាស់ និងរងផលប៉ះពាល់កាន់តែធ្ងន់ធ្ងរទាំងផ្នែកសេដ្ឋកិច្ច ពាណិជ្ជកម្ម និងទំនាក់ទំនងអន្តរជាតិ។
លោក ស៊ឹង សែនករុណា៖ «ការណ៍ដែលមិនចាត់វិធានការលើអ្នកមានអំណាចបែបហ្នឹង បង្ហាញបញ្ជាក់យ៉ាងច្បាស់ថា អ្នកប្រព្រឹត្តដែលជាបក្ខពួករបស់ខ្លួន អ្នកដែលមានអំណាច និងឥទ្ធិពលដែរហ្នឹង គឺច្បាស់ជារួចខ្លួនហើយ គឺមិនត្រឹមមិនចាត់វិធានការទេ អាចនឹងមានការ ការពារទៅទៀត មានការការពារពីក្រោយខ្នងអីទៅទៀត។ អ៊ីចឹងយើងមិនរំពឹងថា ការចាត់វិធានការទៅលើឧក្រិដ្ឋកម្មឆបោកអនឡាញនេះ មិនអាចធ្វើទៅបានទេ បើមិនកម្ចាត់ពីកំពូលមកមុន។ ត្រូវមានវិធានការឱ្យបានច្បាស់លាស់នៅពេលដែលចាប់ផ្ដើមចាត់វិធានការពីលើមក អ៊ីចឹងអ្នកដែលតូចតាចខាងក្រោមហ្នឹង រឹតតែមិនហ៊ានប្រព្រឹត្តបន្តទៀតហើយ ពីព្រោះគេមើលឃើញថា ឋានៈអ្នកខាងលើប៉ុណ្ណឹងហើយ គេចាត់វិធានការ រឿងអីពួកគាត់ដែលជាអ្នកតូចតាច គាត់ហ៊ានទៅប្រព្រឹត្តនូវអំពើបែបហ្នឹង»។
ការលើកឡើងនេះ កើតឡើងបន្ទាប់ពីកម្លាំងសមត្ថកិច្ចបានបង្ក្រាបទីតាំងមជ្ឈមណ្ឌលឆបោកតាមអនឡាញមួយកន្លែង ដែលស្ថិតនៅក្នុងផ្ទះវិឡាដ៏ធំមួយ ក្នុងភូមិ២ សង្កាត់លេខ៣ ខេត្តព្រះសីហនុ។
ស្នងការដ្ឋាននគរបាលខេត្តព្រះសីហនុឱ្យដឹងនៅថ្ងៃទី១ ខែតុលា ថា ក្នុងប្រតិបត្តិការនេះ សមត្ថកិច្ចបានឃាត់ខ្លួនជនបរទេសចម្រុះជាតិសាសន៍រួមមានជនជាតិចិន ម៉ាឡេស៊ី កូរ៉េ និងខ្មែរ សរុបចំនួន ៣៤នាក់ ដែលសង្ស័យពាក់ព័ន្ធនឹងប្រតិបត្តិការឆបោកតាមអនឡាញ។
ឃ្លិបវីដេអូដែលស្នងការដ្ឋាននគរបាលខេត្តព្រះសីហនុបង្ហោះក្នុងអំឡុងប្រតិបត្តិការបង្ក្រាប បង្ហាញឱ្យឃើញក្រុមជនសង្ស័យអង្គុយធ្វើការជុំគ្នានៅមុខកុំព្យូទ័រ និងទូរស័ព្ទដៃជាច្រើនគ្រឿង នៅក្នុងផ្ទះវិឡាដែលបំពាក់ដោយគ្រឿងសង្ហារិមប្រណិតៗ។ ទោះជាយ៉ាងណា សមត្ថកិច្ចខេត្តព្រះសីហនុមិនទាន់បង្ហាញអត្តសញ្ញាណ ឬបញ្ជាក់អំពីចំណាត់ការលើម្ចាស់វិឡា ដែលបានជួលទីតាំងឱ្យក្រុមសង្ស័យប្រើប្រាស់ធ្វើជាកន្លែងប្រតិបត្តិការឆបោកតាមអនឡាញនេះនៅឡើយទេ។
ទូរទស្សន៍អាស៊ីសេរីមិនអាចទាក់ទងស្នងការនគរបាលខេត្តព្រះសីហនុ លោក ស រដ្ឋា ដើម្បីសាកសួរបន្ថែមជុំវិញរឿងនេះបានទេនៅថ្ងៃទី១ ខែតុលា។
ជុំវិញរឿងនេះ ប្រធានស្ថាប័នប្រជាធិបតេយ្យ យុត្តិធម៌ និងសិទ្ធិមនុស្សនៃរដ្ឋាភិបាលឯករាជ្យ ២៣ តុលា លោក អ៊ូ សាមឌី លើកឡើងថា រដ្ឋាភិបាលកម្ពុជាគ្មានឆន្ទៈបង្ក្រាបអ្នកមានអំណាចដែលពាក់ព័ន្ធនឹងឧក្រិដ្ឋកម្មនោះទេ ហើយសកម្មភាពបង្ក្រាបកន្លងមកលោកថា គ្រាន់តែធ្វើឡើង ដើម្បីបំភ័ន្តភ្នែកសហគមន៍អន្តរជាតិប៉ុណ្ណោះ។ លោកបន្តថា ដោយសារតែការបង្ក្រាបគ្មានប្រសិទ្ធភាព និងមិនប៉ះពាល់ដល់មេខ្លោង ទើបក្រុមឧក្រិដ្ឋជនបានបែកខ្ញែក និងបត់បែនវិធីសាស្ត្រប្រតិបត្តិការពីមជ្ឈមណ្ឌលធំៗមកជាទម្រង់តូចៗដូចជាតាមបន្ទប់ជួល និងផ្ទះ វិឡារបស់អ្នកមានលុយមានអំណាចវិញ។
លោក អ៊ូ សាមឌី៖ «ស្ថាបត្យកម្មហ្នឹងវាបំបែកពីធំទៅដល់តូចៗម្ដង អ៊ីចឹងកាលណាតូចៗ វាមានការលំបាកនៅក្នុង FBI ដែលចុះមកស៊ើបអង្កេត ឬមួយក៏តាមចាប់ បើសិនជាចាប់ៗបានតែមេតូចៗទេ ហើយមេតូចៗហ្នឹងអត់អាចភ្ជាប់ទៅដល់មេធំដូចលោក កុក អាន អីពីមុនទេ គ្រាន់តែចាប់មួយអ៊ីចឹងទៅ បញ្ជូនទៅស្រុកវិញអ៊ីចឹងទៅ ចាប់មួយអ៊ីចឹងទៅ បញ្ជូនទៅស្រុកមួយអ៊ីចឹងទៅ ហើយវាងាយស្រួលនៅក្នុងការរដ្ឋាភិបាលដោះស្រាយបញ្ហាទៀតថា ស្ថាបត្យកម្មនេះឥឡូវលែងមានមេធំនៅពីក្រោយ មានតែតូចតាចអ៊ីចឹងទៅ វាអត់អាចពាក់ព័ន្ធដល់ ហ៊ុន តូ អត់អាចមានភស្តុតាងដូចមុនទៀតទេ អ៊ីចឹងបានស្ថាបត្យកម្មអនឡាញនេះគឺអត់ឈប់ទេបង គេនៅតែបើកដដែល ហើយបើកច្រើនជាងមុនទៀត»។
ករណីសមត្ថកិច្ចចុះបង្ក្រាបទីតាំងឆបោកតាមអនឡាញហើយលាក់បាំងអត្តសញ្ញាណ ឬមិនចាត់វិធានការច្បាប់លើម្ចាស់វិឡាជួលឱ្យក្រុមឆបោកតាមអនឡាញមិនមែនជារឿងថ្មីឡើយ។ កន្លងមក ប្រតិបត្តិការបង្ក្រាបទីតាំងឆបោកនៅតាមសណ្ឋាគារ ភូមិគ្រឹះរបស់អ្នកមានលុយមានអំណាចនៅខេត្តព្រះសីហនុ តំបន់ជ្រៃធំ ខេត្តកណ្ដាល កំពង់ស្ពឺ បាត់ដំបង និងរាជធានីភ្នំពេញ សមត្ថកិច្ចតែងតែបង្ហាញត្រឹមតែរូបភាពចាប់បញ្ជូនខ្លួនបុគ្គល ឬជនបរទេសដែលអ្នកខ្លះជាជនរងគ្រោះនៃអំពើជួញដូរមនុស្ស ដើម្បីបញ្ជូនពួកគេត្រឡប់ទៅប្រទេសដើមវិញប៉ុណ្ណោះ។ រីឯម្ចាស់ ភូមិគ្រឹះ ឬម្ចាស់ទីតាំងវិឡាស្កឹមស្កៃដែលជួយជ្រោមជ្រែង និងទទួលបានផលប្រយោជន៍ ឬលុយកាក់ថ្លៃជួលវិឡាពីក្រុមឧក្រិដ្ឋជន តែងតែត្រូវបានសមត្ថកិច្ចរក្សាភាពស្ងៀមស្ងាត់ និងមិនត្រូវបាននាំខ្លួនមកផ្ដន្ទាទោសតាមច្បាប់ ឬរងការរឹបអូសទ្រព្យសម្បត្តិ ដើម្បីឱ្យសាធារណជនបានឃើញឡើយ។
ក្រុមអ្នកឃ្លាំមើលព្រមានថា ដរាបណាអាជ្ញាធររដ្ឋាភិបាលនៅតែបន្តអនុវត្តច្បាប់ស្តង់ដារពីរ និងការពារម្ចាស់ទីតាំងដែលមានខ្នងបង្អែកទាំងនោះ បណ្ដាញឧក្រិដ្ឋជនឆបោកតាមអនឡាញនឹងនៅតែអាចផ្លាស់ប្ដូររូបភាព និងបន្តពង្រីកឫសគល់នៃបណ្ដាញឧក្រិដ្ឋកម្មពួកគេកាន់តែជ្រៅនៅក្នុងសង្គមកម្ពុជាដដែល៕
