កម្លាំងអាជ្ញាធររាជធានីភ្នំពេញបានស្រែកសម្លុត និងចាប់ទាញបដាដែលមានរូបថតក្រុមគ្រួសារត្រកូល ហ៊ុន ពីជនរងគ្រោះក្រុមហ៊ុន ហួយវ័ន ផេ (Huione Pay) ដើម្បីរារាំងមិនឱ្យពួកគាត់តវ៉ាទាមទារលុយរបស់ខ្លួននៅខាងមុខស្ថានទូតចិនឡើយនៅថ្ងៃទី៤ ខែកញ្ញា។ មន្ត្រីសិទ្ធិមនុស្សស្នើដល់កម្លាំងអាជ្ញាធរឱ្យបញ្ឈប់ការធ្វើទុក្ខបុកម្នេញ និងតាមយាយីជនរងគ្រោះ ព្រមទាំងទាមទារឱ្យស្ថាប័នពាក់ព័ន្ធចេញមុខដោះស្រាយដោយសន្តិវិធី ដើម្បីកុំឱ្យកម្ពុជាកាន់តែរងភាពអាម៉ាស់លើឆាកអន្តរជាតិបន្ថែមទៀត។
អតិថិជនក្រុមហ៊ុន ហួយវ័ន ផេ ប្រមាណ ៦០នាក់បន្តប្រមូលផ្ដុំគ្នាតវ៉ានៅខាងមុខស្ថានទូតចិន ដើម្បីទាមទារឱ្យលោក ហ៊ុន តូ សងលុយកម្លាំងញើសរបស់ពួកគាត់វិញ។ ទោះយ៉ាងណា អតិថិជនមួយចំនួនត្រូវបានកម្លាំងអាជ្ញាធររុញច្រាន និងសម្រែកសម្លុតគំរាមកំហែង ព្រមទាំងចាប់ទាញបដា និងរូបភាពគ្រួសារសាច់ញាតិលោក ហ៊ុន សែន មិនឱ្យជនរងគ្រោះលើកបង្ហាញដូចសព្វមួយដងឡើយ។
ជនរងគ្រោះម្នាក់ សុំមិនបញ្ចេញឈ្មោះព្រោះបារម្ភពីសុវត្ថិភាព ប្រាប់ទូរទស្សន៍អាស៊ីសេរីនៅថ្ងៃទី៤ ខែកញ្ញាថា លោកស្រី និងជនរងគ្រោះជនជាតិចិនផ្សេងទៀត ខកចិត្តនឹងរដ្ឋាភិបាលដែលមិនអើពើដោះស្រាយបញ្ហា ប៉ុន្តែបែរជាបញ្ជូនកម្លាំងសមត្ថកិច្ច និងអនុញ្ញាតឱ្យជនស៊ីវិលតាមយាយី និងគំរាមកំហែងលើជនរងគ្រោះទៅវិញ។ លោកស្រីចាត់ទុកទង្វើអាជ្ញាធរថា អនុវត្តផ្ទុយពីច្បាប់ និងរំលោភសិទ្ធិរបស់ជនរងគ្រោះធ្ងន់ធ្ងរ។ លោកស្រីបន្ថែមថា ជនរងគ្រោះទាំងអស់សុទ្ធតែអាជីវករ និងជាអ្នករកស៊ីស្របច្បាប់ទើបហ៊ានចេញតវ៉ា ហើយពួកគាត់គ្មានបំណងអ្វីក្រៅពីចង់បានលុយរបស់ខ្លួនដែលខិតខំប្រឹងប្រែងរកស៊ីដោយលំបាកត្រឡប់មកវិញឡើយ។
អតិថិជន៖ «សម្រាប់ខ្ញុំ ទុក្ខលំបាកបច្ចុប្បន្នហ្នឹង វាវេទនាហួសពីនិយាយ ព្រោះអីលុយយើងទាំងស្រុងត្រូវជាប់គាំងនៅក្នុងហ្នឹង បំណុលយើងត្រូវដោះស្រាយសងគេប្រចាំខែប្រចាំថ្ងៃ ហើយនៅពេលដែលស្ងប់ស្ងាត់រឿង យើងអត់ទទួលបានដំណឹងអីសោះ សូម្បីតែការដោះស្រាយ ឬក៏ផ្លូវបង្ហាញណាដែលអាចឱ្យយើងធ្វើដំណើរទៅកាន់ការសួរ ឬក៏ដោះស្រាយរឿងហ្នឹងម៉េចៗហ្នឹង វាអត់មានអីទាំងអស់ គឺងងឹតសូន្យឈឹងហ្មង។ សម្រាប់ពួកខ្ញុំជាប្រជាពលរដ្ឋដែលមានលុយជាប់នៅក្នុងហ្នឹងទាំងប៉ុន្មានហ្នឹង គ្រាន់តែចង់ឱ្យពួកគាត់ហ្នឹងធ្វើការឱ្យបានលឿន ក្នុងលក្ខខណ្ឌណាក៏ដោយ ធ្វើម៉េចព្យាយាមរកដំណោះស្រាយជូនប្រជាពលរដ្ឋដែលរងគ្រោះទាំងអស់ ហើយពួកខ្ញុំម្នាក់ៗក៏អត់ចង់ទៅតវ៉ា ដើម្បីឱ្យវាមើលមកអាក្រក់មើលទេបង។ រាល់ថ្ងៃហ្នឹង ខ្ញុំនៅតែអត់អស់ចិត្ត មិនគួរណាខ្លួនខ្ញុំធ្លាក់ក្នុងស្ថានភាពបែបហ្នឹង»។
ស្ត្រីដដែលអះអាងថា ក្រុមហ៊ុន ហួយវ័ន បានបង្កកលុយរបស់លោកស្រីជាង ១០ម៉ឺនដុល្លារអាមេរិក។ លោកស្រីក៏កំពុងប្រឈមនឹងបញ្ហាជំពាក់បំណុលវ័ណ្ឌក រហូតធនាគារគំរាមរឹបអូសទ្រព្យសម្បត្តិ ដោយសារតែមិនអាចដកលុយរបស់ខ្លួនមកបង្វិលទូទាត់ថ្លៃទំនិញក្នុងអាជីវកម្មផ្នែកគ្រឿងសំណង់ និងផ្គត់ផ្គង់អាហារ ព្រមទាំងថ្លៃសិក្សារបស់កូន។
កាលពីថ្ងៃទី៣ ខែកញ្ញា លោកស្រី និងជនរងគ្រោះផ្សេងទៀតក៏បានទៅស្នើសុំឯកសារពាក់ព័ន្ធពីក្រុមហ៊ុន ជម្រះបញ្ជីឈ្មោះ រីចឆ៍ & ផាតនើរ (Reachs & Partners) ដើម្បីតាមដានសំណុំរឿងនៅតុលាការ ប៉ុន្តែក្រុមហ៊ុននេះបដិសេធ។
ក្រុមហ៊ុនជម្រះបញ្ជី រីចឆ៍ & ផាតនើរ ដែលជាអ្នកជម្រះបញ្ជីទូទាំងបំណុលលើអតិថិជនហួយវ័ន បានបញ្ជូនសំណុំរឿងអតិថិជនដែលបានចុះឈ្មោះទៅតុលាការ កាលពីខែកក្កដា និងប្រកាសថា ខ្លួនគ្មានលទ្ធភាពដោះស្រាយជូនអតិថិជនឡើយ ដោយសារក្រុមហ៊ុន ហួយវ័ន ផេ របស់លោក ហ៊ុន តូ បានក្ស័យធន។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល ដើម្បីសាកសួរបន្ថែមជុំវិញរឿងនេះបានទេនៅថ្ងៃទី៤ ខែកញ្ញា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត លើកឡើងថា ការយាយី និងការធ្វើទុក្ខបុកម្នេញរបស់កម្លាំងអាជ្ញាធរលើក្រុមជនរងគ្រោះ គឺជាការបំបាក់ស្មារតី និងធ្វើឱ្យជនរងគ្រោះកាន់តែអស់សង្ឃឹមទទួលបានលុយរបស់ខ្លួនត្រូវមកវិញ។ លោកថា ស្ថាប័នក្រសួងពាក់ព័ន្ធ និងស្ថាប័នតុលាការ គួរតែពន្លឿននីតិវិធីដោះស្រាយជូនអតិថិជនដោយប្រកបដោយតម្លាភាព និងយុត្តិធម៌ ខណៈការតវ៉ាជាប្រចាំរបស់អតិថិជនក៏ជះផលអវិជ្ជមានដល់មុខមាត់រដ្ឋាភិបាលខ្លួនឯងដែរ។
លោក អំ សំអាត៖ «បើសិនជាបញ្ហានេះចេះតែបន្ត និងអូសបន្លាយវែងយូរទៅ យើងមើលមិនឃើញថា តើវាអាចនឹងមានបាតុភូតអីកើតឡើង អាចថា នៅពេលដែលគាត់អស់សង្ឃឹមខ្លាំង អាចមានអំពើហិង្សា ឬក៏ស្អីកើតឡើងទៅ វាជារឿងធ្ងន់ធ្ងរមួយបន្ថែមទៀត។ អ៊ីចឹង អ្វីដែលសំខាន់ គឺនៅពេលដែលគាត់ស្វែងរកកិច្ចអន្តរាគមន៍ ឬក៏មានការដាក់លិខិតសុំកិច្ចអន្តរាគមន៍ទៅស្ថាប័នពាក់ព័ន្ធ ស្ថាប័នដែលទទួលបានលិខិតហ្នឹងគួរតែរកមធ្យោបាយសម្របសម្រួល ឬក៏អន្តរាគមន៍ទៅលើករណីរបស់គាត់ ដើម្បីទីមួយ គឺធ្វើឱ្យពួកគាត់ហ្នឹងមានទំនុកចិត្ត»។
ក្រុមជនរងគ្រោះបញ្ជាក់ថា ទោះបីប្រឈមនឹងការបង្ក្រាបដោយហិង្សាពីសំណាក់កម្លាំងសមត្ថកិច្ច ក៏ពួកគាត់នៅតែបន្តចេញតវ៉ា រហូតទទួលបានលុយដែលរកបានដោយកម្លាំងញើសឈាមរបស់ខ្លួនត្រឡប់មកវិញ។ ជនរងគ្រោះក្រុមហ៊ុន ហួយវ័ន ផេ ថា អ្វីដែលពួកគាត់ខ្លាចនៅពេលនេះ មិនមែនការចាប់ចងឡើយ ប៉ុន្តែគឺការគ្មានអាហារចូលពោះ និងការប្រឈមនឹងការរឹបអូសទ្រព្យសម្បត្តិពីធនាគារ។
អតិថិជនខ្មែរ និងជនជាតិចិនក៏គ្រោងរៀបចំញត្តិ ដើម្បីដាក់ជូនស្ថានទូតអាមេរិក ចក្រភពអង់គ្លេស និងសហភាពអឺរ៉ុប ដើម្បីស្នើឱ្យជួយគាំពារសិទ្ធិពួកគាត់ និងដាក់សម្ពាធលើរដ្ឋាភិបាលក្រុងភ្នំពេញចេញមុខដោះស្រាយលុយពលរដ្ឋដែលបាត់បង់។
ក្រុមហ៊ុន ហួយវ័ន ផេ ជាផ្នែកមួយនៃក្រុមហ៊ុន ហួយវ័ន គ្រុប (Huione Pay) មានកម្មវិធីទូទាត់លុយតាមអនឡាញ និងកម្មវិធីលើទូរស័ព្ទដៃដែល លោក ហ៊ុន តូ ត្រូវជាក្មួយបង្កើតលោក ហ៊ុន សែន ជាសហប្រធានមួយរូប។ សហរដ្ឋអាមេរិក និងចក្រភពអង់គ្លេសបានដាក់ទណ្ឌកម្មក្រុមហ៊ុននេះដោយរកឃើញថា បានលាងលុយកខ្វក់ឱ្យក្រុមចោរព័ត៌មានវិទ្យាកូរ៉េខាងជើង និងក្រុមឧក្រិដ្ឋជនឆបោកតាមអនឡាញក្នុងទំហំទឹកប្រាក់ប្រមាណ ៤ពាន់លានដុល្លារអាមេរិក។
ក្រុមហ៊ុនវិភាគទិន្នន័យប្រតិបត្តិការកុំព្យូទ័រតាមប្រព័ន្ធបច្ចេកវិទ្យាប្លុកឆេន (Blockchain) ឈ្មោះ «អេលីបទីក» (Elliptic) ដែលមានមូលដ្ឋាននៅទីក្រុងឡុងដ៍ (London) ចក្រភពអង់គ្លេស (UK) ធ្លាប់បានលាតត្រដាងថា បងជីដូនមួយរបស់លោកនាយករដ្ឋមន្ត្រី ហ៊ុន ម៉ាណែត គឺលោក ហ៊ុន តូ ក្នុងនាមជាសហប្រធានមួយរូបទទួលប្រាក់ចំណេញកប់ក្ដោងក្នុងទំហំរាប់ពាន់លានដុល្លារដែលបានមកពីអំពើលាងលុយកខ្វក់ពីការឆបោកតាមអនឡាញនៅជុំវិញពិភពលោក៕
