តុលាការកំពូលសម្រេចតម្កល់សាលដីកាសាលាឧទ្ធរណ៍ ដែលផ្ដន្ទាទោសមន្ត្រីបក្សប្រឆាំងលោក គា វិសាល ដាក់ពន្ធនាគារ ២ឆ្នាំ ឱ្យនៅដដែល។ ក្រោយការសម្រេចរបស់តុលាការ លោក គា វិសាល អះអាងថា បើចង់ឱ្យតុលាការទម្លាក់ចោលការចោទប្រកាន់លើរូបលោក លុះត្រាណាតែលោក ចុះចូលជាមួយគណបក្សប្រជាជនកម្ពុជា។ រីឯសង្គមស៊ីវិលផ្នែកសិទ្ធិមនុស្សថា ចំណាត់ការយឺតយ៉ាវ របស់តុលាការកំពូល ធ្វើឱ្យជនជាប់ចោទ មិនបានយុត្តិធម៌ តាមការរំពឹងទុក។
តុលាការកំពូលនៅថ្ងៃទី១៣ ខែកក្កដា ច្រានចោលបណ្ដឹងសាទុក្ខរបស់លោក គា វិសាល ដោយតម្កល់សាលដីកាសាលាឧទ្ធរណ៍ ដែលផ្ដន្ទាទោសលោកឱ្យជាប់ពន្ធនាគារ ២ឆ្នាំឱ្យនៅដដែល។
ការសម្រេចរបស់តុលាការកំពូល នៅថ្ងៃនេះ ធ្វើឡើងបន្ទាប់ពីអនុប្រធានគណបក្ស កម្លាំងជាតិខេត្តកំពង់ចាមលោក គា វិសាល បានអនុវត្តទោសក្នុងពន្ធនាគារគ្រប់ រយៈពេលកំណត់ និងត្រូវបានដោះលែងពីពន្ធនាគារតាំងពីខែមីនា។
អនុប្រធានគណបក្សកម្លាំងជាតិខេត្តកំពង់ចាម លោក គា វិសាល ប្រាប់ទូរទស្សន៍អាស៊ីសេរី នៅថ្ងៃទី១៣ ខែកក្កដានេះ ថា លោកមិនដឹងនិយាយយ៉ាងណា អំពីយុត្តិធម៌នោះទេ ដោយអះអាងថា លោកដឹងជាមុនរួចហើយ គឺបើចង់ឱ្យតុលាការទម្លាក់ចោលការចោទប្រកាន់ទាំងអស់លើលោក លុះត្រាណាតែលោកយល់ព្រម ចុះចូលគណបក្សប្រជាជនកម្ពុជា ដែលកំពុងកាន់អំណាច។ លោកកត់សម្គាល់ថា នេះជាទម្លាប់សម្រេចសេចក្ដីជាធម្មតា របស់តុលាការនៅកម្ពុជា ទៅលើសំណុំរឿង ដែលពាក់ព័ន្ធនឹងអ្នកនយោបាយ សកម្មជននយោបាយ និងសកម្មជនសង្គម។
លោក គា វិសាល៖ «ជំហរខ្ញុំ! ខ្ញុំមិនចុះចូលទេប៉ុន្តែបើសិនជាខ្ញុំចុះចូល ខ្ញុំជឿថា តុលាការនឹងទម្លាក់បទចោទប្រកាន់ទាំងអស់ គឺខ្ញុំជឿជាក់កន្លែងហ្នឹង ពិសេស រឿងចុះចូលលាចេញពីបក្សប្រឆាំងហើយ ទៅចុះចូលរួមជីវភាពជាមួយគណបក្សប្រជាជនកម្ពុជា គឺដាច់ខាត គេដោះលែង អាហ្នឹងវាជាទូទៅវាអ៊ីចឹង»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូលោក អំ សំអាត ប្រាប់ទូរទស្សន៍អាស៊ីសេរី នៅថ្ងៃទី១៣ ខែកក្កដា ថា សំណុំរឿង លោក គា វិសាល គឺជាការអនុវត្តនីតិវិធីយឺតយ៉ាវរបស់តុលាការកំពូល ពីព្រោះមន្ត្រីបក្ស ប្រឆាំងរូបនេះ បានអនុវត្តទោសចប់សព្វគ្រប់ហើយ តាំងពីជាង ៣ខែមុនតុលាការ កំពូលបើកសវនាកាជំនុំជម្រះ និង ប្រកាសសាលដីកាម្ល៉េះ។ លោកយល់ថា កាលណាសំដៅដល់យុត្តិធម៌ និងភាពស្មើគ្នាចំពោះមុខច្បាប់ តុលាការគួរតែពិនិត្យ អាទិភាពនៃសំណុំរឿង ដែលគួរតែអនុវត្តនីតិវិធីឱ្យទាន់ពេលវេលា ប៉ុន្តែតុលាការ កំពូល ទំនងជាចាត់ការតាមលំដាប់រឿងចូលទៅតុលាការ។ លោកថា ចំណាត់ការ បែបនេះ ធ្វើឱ្យជនជាប់ចោទ មិនទទួលបានយុត្តិធម៌ តាមការរំពឹងទុកនោះទេ។
លោក អំ សំអាត៖ «បញ្ហានេះ យើងឃើញថា ទោះជាយ៉ាងណា ក៏សាលដីកា តុលាការកំពូល វាជាសាលដីកាចុងក្រោយ ហើយស្ថាពរទៅហើយ លោក គា វិសាល ក៏អនុវត្តចប់មុន សាលដីការបស់តុលាការកំពូលទៅទៀត។ អាហ្នឹងជារឿង មួយដែរ បើនិយាយពីការសង្ឃឹមរបស់លោក គា វិសាល ហ្នឹង បានន័យថា វាអត់អាចទទួលយកបាននូវយុត្តិធម៌ ដោយសារតែគាត់អនុវត្តទោសចប់ហើយ បានសវនាការ និងសាលដីការបស់តុលាការកំពូលប្រកាសតាមក្រោយ»។
លោក គា វិសាល ធ្លាប់ជាប់ពន្ធនាគារពីរលើកហើយ។ លើកទី១ លោកជាប់ពន្ធនាគារ ជាង ១ឆ្នាំ ពីឆ្នាំ២០១៩ ដល់ឆ្នាំ២០២០ ពីបទ«ញុះញង់» ជុំវិញ ការបញ្ចេញ មតិលើទំព័រហ្វេសប៊ុក និងវិទ្យុ ហើយលើកទី២ លោកជាប់ពន្ធនាគារ ២ឆ្នាំ ចាប់ពីឆ្នាំ ២០២៤ ដល់ដើមឆ្នាំ២០២៦។
ក្នុងខែមីនា ឆ្នាំ២០២៤ លោក គា វិសាល ត្រូវបានអាជ្ញាធរចាប់ខ្លួន និងត្រូវបានផ្តន្ទាទោសក្នុងខែសីហាឆ្នាំ២០២៤ដដែល ដោយសាលាដំបូងរាជធានីភ្នំពេញ ចោទ ប្រកាន់ពីបទ «ញុះញង់ឱ្យមានការរើសអើង»និងបទ «ជេរប្រមាថជាសាធារណៈ» តាមមាត្រា ៤៩៤ ៤៩៦ និង ៣០៧ នៃក្រមព្រហ្មទណ្ឌ ។ ការផ្តន្ទាទោសនេះ ធ្វើ ឡើងបន្ទាប់ពីលោក គា វិសាល បានបង្ហោះសារ លើបណ្តាញសង្គមហ្វេសប៊ុក រិះគន់កំណត់ត្រាស្ថានភាពប្រជាធិបតេយ្យរបស់រាជរដ្ឋាភិបាល។
លោក គា វិសាល ត្រូវបានតុលាការផ្តន្ទាទោសដាក់ពន្ធនាគារ ២ឆ្នាំ និង ពិន័យជាប្រាក់ចំនួន ៤លានរៀល។ សាលាដំបូងរាជធានីភ្នំពេញ ក៏បានបង្គាប់ឱ្យលោក សងជំងឺចិត្តជាទឹកប្រាក់ចំនួន ២០លានរៀលទៅដើមបណ្តឹង គឺលោក ម៉ៃ ហុងស្រៀង។ លោក គា វិសាល និង លោក ម៉ៃ ហុងស្រៀង ពីដើមឡើយ គឺជាមន្ត្រី គណបក្សប្រឆាំងដូចគ្នា ប៉ុន្តែ លោក ម៉ៃ ហុងស្រៀង បានប្ដឹងលោក គា វិសាល ទៅតុលាការបន្ទាប់ពីលោក ម៉ៃ ហុងស្រៀង បានចុះចូលគណបក្សកាន់អំណាច ខណៈលោក គា វិសាល នៅបន្តជីវភាពនយោបាយជាមួយគណបក្សប្រឆាំង។
ក្ដីក្ដាំនេះ បានឡើងដល់សាលាឧទ្ធរណ៍ និងតុលាការកំពូល បន្ទាប់ពីលោក គា វិសាល មិនសុខចិត្តទទួលយកសេចក្ដីសម្រេចរបស់សាលាដំបូង។ យ៉ាងណា តុលាការ ជាន់ខ្ពស់ទាំងពីរថ្នាក់ នៅតែរក្សាសាលក្រមសាលាដំបូងដដែល៕
