អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ស្នើជាថ្មី ដល់លោកនាយករដ្ឋមន្ត្រី ហ៊ុន ម៉ាណែត ឱ្យជួយទួលថ្វាយព្រះមហាក្សត្រដើម្បីលើកលែងទោសដល់រូបលោក និងប្រតិភូដទៃទៀត មុនលោកទៅកាន់ប្រទេសកម្ពុជានៅខែក្រោយ ដើម្បីជជែករឿងព្រំដែន។ ការស្នើនេះ ក្រោយពីលោក ហ៊ុន ម៉ាណែត នៅតែមិនទាន់ឆ្លើយតបនឹងលក្ខខណ្ឌរបស់លោកនៅឡើយ ប៉ុន្តែបែរជារកលេសឌឺដង មកលើលោក អ៊ុំ សំអាន វិញ។ អ្នកវិភាគយល់ថា លោក ហ៊ុន ម៉ាណែត គួរតែឆ្លើយតបជាវិជ្ជមានចំពោះការដាក់លក្ខខណ្ឌរបស់លោក អ៊ំ សំអាន ប្រសិនបើលោកចង់ជជែករកខុសត្រូវរឿងបញ្ហាទឹកដីមែននេះ។
បើទោះបីជា សារឆ្លើយឆ្លងគ្នារវាងលោកនាយករដ្ឋមន្ត្រី ហ៊ុន ម៉ាណែត និងលោក អ៊ុំ សំអាន រឿងបបួលគ្នាជជែកដេញដោលពាក់ព័ន្ធបញ្ហាព្រំដែនលើទឹកដីកម្ពុជា មានការវិវត្តន៍ថ្មីៗជាបន្តបន្ទាប់ក្ដី លោក ហ៊ុន ម៉ាណែត នៅពុំទាន់ឆ្លើយតបតាមលក្ខខណ្ឌរបស់ លោក អ៊ុំ សំអាន ដែលទទូចឱ្យរដ្ឋាភិបាលជួយអន្តរាគមន៍ ដល់ព្រះមហាក្សត្រ លើកលែងទោស រូបលោក និងប្រតិភូដទៃទៀត នៅឡើយ។ លោក អ៊ុំ សំអាន សង្ឃឹមថា លោក ហ៊ុន ម៉ាណែត នឹងឆ្លើយតបជាវិជ្ជមាន។
ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន ប្រាប់ទូរទស្សន៍អាស៊ីសេរីនៅថ្ងៃទី១៤ ខែតុលា ថា លោកនៅតែមានសង្ឃឹមថា លោក ហ៊ុន ម៉ាណែត នឹងឆ្លើយតបជាវិជ្ជមាននូវសំណើរបស់លោក ដើម្បីបានត្រឡប់ទៅកាន់មាតុភូមិដើម្បី ជជែករឿងព្រំដែនជាមួយរដ្ឋាភិបាល។ លោកអះអាងថាសំណើរបស់លោក ទៅកាន់ លោក ហ៊ុន ម៉ាណែត ឱ្យជួយអន្តរាគមន៍ដល់ព្រះមហាក្សត្រ ដើម្បីលើកលែងទោស ដល់រូបលោក និងប្រតិភូជាការបើកផ្លូវដ៏សំខាន់ ទៅកម្ពុជាក្នុងពេលឆាប់ៗ។
បន្ថែមពីលើនោះ លោកនៅតែចាត់ទុកការជជែកបញ្ហាព្រំដែនដោយផ្ទាល់ជាមួយ រដ្ឋាភិបាលបក្សកាន់អំណាច គឺជាស្មារតីផ្សះផ្សាជាតិ ឯកភាពជាតិនិងការបង្រួបបង្រួមជាតិ មិនមែនជាការវាយប្រហារគ្នា ដើម្បីឈ្នះចាញ់នោះទេ បើទោះពីជាសាររបស់លោក ហ៊ុន ម៉ាណែត ឆ្លើយតបទៅកាន់លោកក្នុងលក្ខខណ្ឌផ្ចាញ់ផ្ចាល និងបន្ទាបបន្ថោកលោក ជាញឹកញាប់ក្ដី។
លោក អ៊ុំ សំអាន៖ «ខ្ញុំសូមស្នើទៅកាន់ លោក ហ៊ុន ម៉ាណែត ធ្វើម៉េចធ្វើតាមសំណើដែលខ្ញុំដាក់ជូននឹងទៅ វានឹងដំណើរការបានហើយ សម្រាប់កិច្ចពិភាក្សានៅប្រទេសកម្ពុជា។ ប៉ុន្តែគាត់ហាក់ដូចជាយកលេសនេះ យកលេសនោះ មិនព្រមធ្វើទៅតាមសំណើរបស់យើង ។ មិនជាសំណើអ្វីដែលធ្ងន់ធ្ងរ ដែលគាត់មិនអាចធ្វើបាននោះទេ»។
ការលើកឡើងនេះ ក្រោយពីលោក ហ៊ុន ម៉ាណែត បានឆ្លើយតបទៅកាន់ លោក អ៊ុំ សំអាន នៅសារចុងក្រោយថា ការដាក់លក្ខខណ្ឌរបស់លោក អ៊ុំ សំអាន គឺជាការដោះខ្លួនចេញពីការអញ្ជើញរបស់លោក មកកម្ពុជា ដើម្បីជជែកលើខ្សែព្រំដែន នៅចន្លោះបង្គោលព្រំដែនលេខ៥២ និង៥៩។ លោក ហ៊ុន ម៉ាណែត បានឌឺដងថា បើគ្រាន់តែ យកឯកសារពាក់ព័ន្ធ ដើម្បីបញ្ជាក់លើដីប៉ុន្មានគីឡូម៉ែត្រ លោក អ៊ុំ សំអាន មិនហ៊ានមកជជែកដោយផ្ទាល់ផង មិនអាចជជែកបញ្ហាព្រំដែនទាំងមូលបានឡើយ។ លោក ហ៊ុន ម៉ាណែត បន្តថា នឹងរងចាំចម្លើយជាថ្មី ពីលោក អ៊ុំ សំអាន ឱ្យបានច្បាស់លាស់ ដោយផ្ដោតលើការជជែកបញ្ហាបង្គោលព្រំដែនលេខ៥២ ដល់៥៩ ប៉ុណ្ណោះ។
ទូរទស្សន៍អាស៊ីសេរីពុំអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតបជុំវិញរឿងនេះបានទេនៅថ្ងៃទី១៤ ខែតុលា ដោយហៅទូរស័ព្ទចូល តែគ្មានអ្នកទទួល។
ទោះជាយ៉ាងណា ការអញ្ជើញរបស់ លោក ហ៊ុន ម៉ាណែត ទៅកាន់លោក អ៊ុំ សំអាន មកប្រទេសកម្ពុជាដើម្បីជជែករឿងព្រំដែន គឺលោកកំណត់ថានឹងជជែកតែទៅលើចន្លោះបង្គោលព្រំដែនលេខ៥២ និង៥៩ ក្នុងភូមិសាស្ត្រខេត្តបាត់ដំបង ដែលមានព្រំដែនជាប់នឹងខេត្តចន្ទបុរី ប្រទេសថៃ ប៉ុណ្ណោះ ក្រោយពីលោក ហ៊ុន ម៉ាណែត ខឹងសម្បារនឹងលោក អ៊ុំ សំអាន ដែលបានចោទលោកថា កាត់ដីឱ្យថៃជិត១គីឡូម៉ែត្រ។ ការចោទប្រកាន់នេះ ក្រោយពីលោក ហ៊ុន ម៉ាណែត បានអះអាងថាការធ្វើរបងបេតុងរបស់ថៃនៅចន្លោះបង្គោលលេខ៥២ ដល់៥៩ មិនបានប៉ះពាល់ដីខ្មែរនោះទេ។
ប៉ុន្តែ ពលរដ្ឋមួយចំនួន ដែលរស់នៅក្នុងភូមិស្វាយស និងភូមិព្រះពុទ្ធ ស្រុកកំរៀង ខេត្តបាត់ដំបង ដែលមានដីស្រែចម្ការ តាមបណ្ដោយចន្លោះបង្គោលព្រំដែន លេខ៥២ ដល់៥៥ បានប្រាប់ទូរទស្សន៍អាស៊ីសេរី ក្នុងលក្ខខណ្ឌមិនបញ្ចេញឈ្មោះ និងសំឡេង ព្រោះបារម្ភពីសុវត្ថិភាពថា មានដីស្រែ និងចម្ការដំឡូងមីរាប់សិបហិកតារ របស់ពលរដ្ឋបានបាត់បង់ ខណៈដែលថៃកំពុងធ្វើរបងបេតុង និងរំកិលបង្គោលព្រំដែន ចូលដីខ្មែរយ៉ាងជ្រៅ។ ពួកគាត់ថា ករណីនេះអាជ្ញាធរបានព្យាយាមបិទបាំង និងគំរាមមិនឱ្យពលរដ្ឋនិយាយព្រោះខ្លាចប៉ះពាល់មុខមាត់រដ្ឋាភិបាល។ ពួកគាត់ទទូចឱ្យរដ្ឋាភិបាល ត្រូវចុះពិនិត្យឡើងវិញ ព្រោះកម្ពុជាពិតជាបានបាត់បង់ដីមែន។
អ្នកតាមដានផ្នែកភូមិសាស្ត្រនយោបាយ លោក សេង វណ្ណលី យល់ថា ការអញ្ជើញរបស់លោក ហ៊ុន ម៉ាណែត ឱ្យលោក អ៊ុំ សំអានទៅជជែករឿងបង្គោលព្រំដែនលេខ៥២ ដល់៥៩ មិនមែនជាចេតនាស្មោះត្រង់ ក្នុងការដោះស្រាយបញ្ហាបច្ចេកទេសព្រំដែននោះទេ បើទោះបីជាតំបន់នោះកម្ពុជាបានបាត់បង់ទឹកដី ឬមិនបាត់បង់ក្ដី ក៏គ្រាន់តែជាល្បែងនយោបាយ ដើម្បីគ្រប់គ្រងព័ត៌មាន និងបង្វែរអារម្មណ៍សាធារណជន។ ព្រោះលោក ហ៊ុន ម៉ាណែត គ្មានភាពក្លាហានពិតប្រាកដនោះទេ។
លោកបន្តថា រឿងរ៉ាវព្រំដែន ជាប្រធានបទដ៏រសើប ដែលអាចអង្រួនប្រជាប្រិយភាព និងអំណាចរបស់រដ្ឋាភិបាលបក្សកាន់អំណាច ដូច្នេះ លោក ហ៊ុន ម៉ាណែត ចង់ប្រែក្លាយកិច្ចពិភាក្សាបញ្ហាព្រំដែនលើឯកសារ និងផែនទី ជាក់ស្ដែងឱ្យក្លាយទៅជាការប្រកួតប្រជែងភាពក្លាហានបុគ្គល ថាតើហ៊ានចូលស្រុក ឬអត់ ប៉ុណ្ណោះ។ លោកបញ្ជាក់ថា ការធ្វើបែបនេះ ជួយឱ្យរដ្ឋាភិបាលអាចទាញយកប្រៀបផ្នែកជាតិនិយម កាត់បន្ថយសម្ពាធពីការតម្រូវឱ្យបង្ហាញភស្តុតាងបច្ចេកទេសជាសាធារណៈ និងបង្កើតសម្ពាធផ្លូវចិត្តលើអ្នករិះគន់ថា បើមិនព្រមមក គឺស្មើនឹងគ្មានភស្តុតាង ឬមិនគោរពប្រជាពលរដ្ឋ។
លោក សេង វណ្ណលី៖ «ខ្ញុំជឿថា ប្រសិនបើរដ្ឋាភិបាលពិតជាមានចេតនាចង់បំភ្លឺកង្វល់របស់ប្រជាពលរដ្ឋ និងផ្ទៀងផ្ទាត់ភស្តុតាងដោយស្មោះត្រង់មែននោះ ទីកន្លែងនៃការជជែកមិនគួរជាឧបសគ្គទាល់តែសោះ ហើយការចាប់ផ្ដើមតាមអនឡាញ នឹងក្លាយជាការល្បងមើលឆន្ទៈពិតប្រាកដរបស់ភាគីទាំងសងខាង»។
លោក សេង វណ្ណលី យល់ឃើញថា ស្ថានភាពនេះ លោក អ៊ុំ សំអាន មិនគួរទៅកម្ពុជានោះទេ ខណៈដែលប្រព័ន្ធយុត្តិធម៌ រងការចោទប្រកាន់ថាជាឧបករណ៍នយោបាយ ហើយការការធានាសុវត្ថិភាពត្រឹមពាក្យសម្ដី មិនអាចទុកចិត្តបានឡើយ។ លោកអះអាងថា លោក អ៊ុំ សំអាន និងក្រុមការងារ អាចនឹងត្រូវចាប់ខ្លួនភ្លាមៗ នៅពេលជាន់ទឹកដីខ្មែរ។ លោកបន្តថា ដើម្បីសុវត្ថិភាព លុះត្រាតែមានការធានាផ្លូវច្បាប់ និងមានការចូលរួមឃ្លាំមើលពីស្ថាប័នអន្តរជាតិ ឬអង្គការសហប្រជាជាតិជាលាយលក្ខណ៍អក្សរច្បាស់លាស់ ទើបការធ្វើដំណើរចូលមាតុភូមិកំណើត អាចមានសុវត្ថិភាព ហើយការជជែកក៏មានលក្ខខណ្ឌទូលំទូលាយ។ លោកថា លក្ខខណ្ឌទាំងនេះមិនធ្ងន់ធ្ងរនោះទេ ប្រសិនបើលោក ហ៊ុន ម៉ាណែត មានឆន្ទៈ ចង់បង្ហាញពីភាពស្អាតស្អំពិតប្រាកដ៕
