អ្នកឃ្លាំមើលសង្គម អះអាងថា រដ្ឋាភិបាលលោក ហ៊ុន ម៉ាណែត បរាជ័យទាំងស្រុងចំពោះវិធានការលុបបំបាត់នូវមជ្ឈមណ្ឌលឆបោកតាមអនឡាញឱ្យអស់ត្រឹមខែមេសា ដោយសារពុំបានចាត់វិធានការឲ្យដល់ឬសគលទៅលើមេក្លោងដែលនៅពីក្រោយបទល្មើសឆបោកអនឡាញ។ ការលើកឡើងនេះ បើទោះជាបីជាក្រសួងមហាផ្ទៃកម្ពុជា សហការជាមួយស្ថានទូតចិន បន្តបណ្តេញជនជាតិចិនពាក់ព័ន្ធនឹងករណីឆបោកតាមអនឡាញ ចេញពីប្រទេសកម្ពុជាជាបន្តបន្ទាប់ក្តី។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី បានប្រាប់ទូរទស្សន៍អាស៊ីសេរី ថា វិធានការលុបបំបាត់នូវមជ្ឈមណ្ឌលឆបោកតាមអនឡាញឱ្យអស់ត្រឹមខែមេសា របស់លោក ហ៊ុន ម៉ាណែត គឺបរាជ័យទាំងស្រុង ពីព្រោះអ្វីដែលរដ្ឋាភិបាលបានធ្វើគឺគ្រាន់តែជាការធ្វើសមយុទ្ធបង្ក្រាបលើឈ្មួញតូចតាចដើម្បីបង្ហាញទៅកាន់សហគមន៍អន្តរជាតិថារដ្ឋាភិបាលលោក ហ៊ុន ម៉ាណែត កំពុងតែចាត់ធានការណ៍លើមជ្ឈមណ្ឌលឆបោកតាមអនឡាញប៉ុណ្ណោះ។
លោក សេង វណ្ណលី បានឲ្យដឹងទៀតថា បើសិនជារដ្ឋាភិបាលលោក ហ៊ុន ម៉ាណែត ចង់ឲ្យការបង្ក្រាបឧក្រិដ្ឋកម្មអនឡាញមានប្រសិទ្ធភាពមែនគឺរដ្ឋាភិបាលត្រូវតែហ៊ានវះកាត់សាច់អាក្រក់របស់ខ្លួនចេញ ដោយនាំមេក្លោងធំៗយកមកផ្តន្ទាទោសទៅតាមច្បាប់ដោយគ្មានការលើកលែងហើយការខកខានមិនបានបង្ក្រាបឲ្យអស់ដូចការសន្យាគឺវាបង្ហាញអំពីភស្តុតាងដែលមិនអាចប្រកែកបានថាឧស្សាហកម្មឆបោកបានក្លាយទៅជាសេដ្ឋកិច្ចស្រមោលដែលមានឥទ្ធិពលលើសពីសមត្ថភាពដឹកនាំសេដ្ឋកិច្ចរបស់លោក ហ៊ុន ម៉ាណែត ផ្ទាល់។
លោក សេង វណ្ណលី៖ «ខ្ញុំយល់ថាវាគឺជាសកម្មភាពដែលមានលក្ខណៈជ្រើសរើសនឹងមិនទាន់ឈានទៅដល់ការលប់បំបាត់ឬសគល់នៃបញ្ហានេះនៅឡើយទេ បើសិនជាលោក ហ៊ុន ម៉ាណែត ពិតជាមានបំណងចង់សម្រេចឲ្យបាននូវសមិទ្ធផលពិតប្រាកដមែននោះ អឺខ្ញុំគិតថាលោកត្រូវតែបង្ហាញពីភាពក្លាហានក្នុងការនាំខ្លួនមេក្លោងធំៗមកផ្ដន្ទាទោសដោយគ្មានការលើកលែង»។
ការអះអាងរបស់អ្នកតាមដានភូមិសាស្ត្រនយោបាយរូបនេះ គឺបន្ទាប់ពីអគ្គនាយកដ្ឋានអន្តោប្រវេសន៍បានបង្ហោះសារនៅលើហ្វេសប៊ុករបស់ខ្លួនថា ក្រសួងមហាផ្ទៃកម្ពុជា នៅយប់ថ្ងៃទី៥ ឈានចូលថ្ងៃទី៦ ខែឧសភា បានសហការជាមួយស្ថានទូតចិន បន្តបណ្តេញជនជាតិចិនសរុបចំនួន ៣៣០នាក់ពាក់ព័ន្ធនឹងករណីឆបោកតាមអនឡាញ ចេញពីប្រទេសកម្ពុជា តាមរយៈយន្តហោះពិសេសនៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ។
ជុំវិញករណី ឆបោកអនឡាញ នេះដែរ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានឲ្យដឹងថា លោកនៅតែមានការព្រួយបារម្ភសម្រាប់ពលរដ្ឋខ្មែរនិងប្រទេសខ្មែរទាំងមូលដែលពិភពលោកបានចាត់ទុកថាជាប្រទេសនៃមជ្ឈមណ្ឌលឆបោកអនឡាញ ពីព្រោះរដ្ឋាភិបាលលោក ហ៊ុន ម៉ាណែត ពុំទាន់បានធ្វើអ្វីឲ្យចេញជាលទ្ធផលទុកចិត្តនិងទទួលយកបាននៅឡើយទេ ដោយសារតែមានឧកញ៉ាគ្រាក់ៗនៅពីក្រោយបទល្មើសឧក្រិដ្ឋកម្មឆបោកអនឡាញ ដូចជា ឧកញ៉ា ហ៊ុន តូ ដែលត្រូវជាបងជីដូនមួយរបស់លោក ហ៊ុន ម៉ាណែត ឧកញ៉ា ទ្រី ភាព ឧកញ៉ា លី យ៉ុងផាត់ ឧកញ៉ា កុក អាន និងឧកញ៉ាគ្រាក់ៗផ្សេងទៀត និងមន្ត្រីជាន់ខ្ពស់មួយចំនួន ដែលធ្វើជាខ្នងបង្អែកឱ្យឧក្រិដ្ឋជនអនឡាញអន្តរជាតិ នៅតែមានសេរីភាពនៅឡើយ។
លោក ស៊ឹង សែនករុណា៖ «យើងឃើញហើយថាបំណាច់ខែមេសានឹងបញ្ចប់បទល្មើសឆបោកអនឡាញនៅក្នុងប្រទេសកម្ពុជាហ្នឹង ក៏ប៉ុន្តែផ្ទុយទៅវិញយើងឃើញថានៅតែបន្តកើតមានឡើងជាហូរហែ អីចឹងមានន័យថាការបង្ក្រាបហ្នឹងវាអត់ទាន់ទៅដល់ឬសគល់នៃបទល្មើសហ្នឹងទេ ខណៈដែលយើងមើលឃើញមេក្លោងពាក់ព័ន្ធនៅក្នុងប្រទេសកម្ពុជាមានឥទ្ធិពល មានអំណាចពាក់ព័ន្ធទៅហ្នឹងគណបក្សកាន់អំណាចក៏ដូចជាមេដឹកនាំយើងឃើញថានៅអត់ទាន់មានវិធានការទេ ផ្ទុយទៅវិញយើងមើលឃើញថា រូបភាពហ្នឹងវាហាក់ដូចនៅមានរឿងការពារគ្នាទៅវិញទៅមកទៀត»។
លោក ស៊ឹង សែនករុណា បន្ថែមទៀតថា រដ្ឋាភិបាលលោក ហ៊ុន ម៉ាណែត ត្រូវចាត់វិធានការឲ្យចំគោលដៅ គឺមិនត្រូវមានការរើសអើងអ្នកធំ អ្នកតូច រឺជនជាតិណានោះទេ គឺត្រូវចាប់ពួកគេមកផ្ដន្ទាទោសទៅតាមច្បាប់របស់ប្រទេសកម្ពុជា មុននឹងបញ្ជូនពួកគេទៅស្រុកកំណើតរបស់គេវិញ បើមិនដូច្នោះទេ វិធានការរបស់លោក ហ៊ុន ម៉ាណែត គ្រាន់តែជាល្បែងឆ្ពិនភ្នែកសាធារណជន ជាតិ និងអន្តរជាតិតែប៉ុណ្ណោះ។
ជុំវិញករណី ឆបោកអនឡាញនេះដែរ នាយករដ្ឋមន្ត្រីកម្ពុជា លោក ហ៊ុន ម៉ាណែត ថ្លែងនៅក្នុងកិច្ចប្រជុំកំពូលធុរកិច្ចអាស៊ានឆ្នាំ២០២៦ កន្លងមក ថា រាជរដ្ឋាភិបាលបានសម្រេចផ្លាស់ប្ដូរយ៉ាងម៉ឺងម៉ាត់នូវគោលនយោបាយជាតិពីការទប់ស្កាត់ឱ្យទៅជាការលុបបំបាត់ទាំងស្រុងនូវមជ្ឈមណ្ឌលឆបោកតាមអនឡាញឱ្យអស់ត្រឹមខែមេសា ឆ្នាំ២០២៦។ លោកទទួលស្គាល់ថា ឧក្រិដ្ឋកម្មនេះ មិនត្រឹមតែបានសម្អុយឈ្មោះកម្ពុជានៅក្នុងឆាកអន្តរជាតិទេ ប៉ុន្តែក៏កំពុងតែបំផ្លាញសេដ្ឋកិច្ចស្មោះត្រង់ប្រទេសដ៏តូចមួយក្នុងសហគមន៍អាស៊ានដែរ។
អង្គការលើកលែងទោសអន្តរជាតិ Amnesty International បានចេញរបាយការណ៍ស៊ើបអង្កេតថ្មីមួយនៅ ខែមេសា ឆ្នាំ២០២៦ បានរកឃើញថា យ៉ាងហោចណាស់កាស៊ីណូចំនួន ១២ទីតាំងមានពាក់ព័ន្ធនឹងការបង្ខំមនុស្សឲ្យធ្វើការក្នុងឧស្សាហកម្មបោកប្រាស់តាមអ៊ីនធឺណត។ បើទោះជាមានភស្តុតាងជាច្រើនបង្ហាញថាកាស៊ីណូទាំងនោះជាប់ពាក់ព័ន្ធនឹងមជ្ឈមណ្ឌលឆបោកអនឡាញ និងការរំលោភសិទ្ធិមនុស្សធ្ងន់ធ្ងរ យ៉ាងណាក៏ដោយ ក៏អាជ្ញាធរកម្ពុជានៅតែអនុញ្ញាតឱ្យកាស៊ីណូទាំងនោះបន្តដំណើរការ។
អង្គការលើកលែងទោសអន្តរជាតិបន្ថែមថា សកម្មភាពរបស់អាជ្ញាធរខ្មែរពេលនេះហាក់ផ្ទុយគ្នាពីការប្តេជ្ញាចិត្តរបស់រដ្ឋាភិបាលក្នុងការប្រយុទ្ធប្រឆាំងនឹងបណ្ដាញបោកប្រាស់តាមអ៊ីនធឺណេត។ អង្គការនេះក៏បានអំពាវនាវឲ្យរដ្ឋាភិបាលកម្ពុជា ពន្យល់ថា តើហេតុអ្វីបានជាកាស៊ីណូដែលភ្ជាប់ទៅនឹងការជួញដូរមនុស្ស និងការធ្វើទារុណកម្មនៅតែទទួលបានការអនុម័តបន្តអាជីវកម្មពីរដ្ឋាភិបាល។លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប) បានឲ្យដឹងថា ចាប់ពីខែកក្កដា ឆ្នាំ២០២៥ ដល់ខែមីនា ឆ្នាំ២០២៦ គឺក្នុងរយៈពេល ៩ខែចុងក្រោយ សមត្ថកិច្ចកម្ពុជាក្នុងរាជធានី-ខេត្តបានបង្ក្រាបអំពើឆបោកតាមប្រព័ន្ធបច្ចេកវិទ្យាបានចំនួនជាង ២៥០ករណី និងបានបណ្តេញជនបរទេសចំនួន ១១,០០០ នាក់ចេញពីកម្ពុជា។ អាជ្ញាធរកម្ពុជាក៏បានបញ្ជូនសំណុំរឿងពាក់ព័ន្ធនឹងបទល្មើសឆបោកអនឡាញចំនួន ១១២ករណីទៅកាន់តុលាការ និងមានជនបរទេសយ៉ាងតិចណាស់ ១ពាន់នាក់ត្រូវបានសមត្ថកិច្ចបញ្ជូនទៅកាត់សេចក្តីនៅតុលាការ។
អ្នកឃ្លាំមើលសង្គមមួយចំនួន ចង់ឃើញ សមត្ថកិច្ចនាំយកអ្នកនៅពីក្រោយឧក្រិដ្ឋកម្មនេះមកផ្ដន្ទាទោស ដើម្បីឈានទៅផ្ដាច់ឫសគល់នៃឧក្រិដ្ឋកម្មតាមប្រព័ន្ធបច្ចេកវិទ្យា និងស្ដារទំនុកចិត្តរបស់អន្តរជាតិឡើងវិញ។ ពួកគេថា បើការបង្ក្រាបរបស់រដ្ឋាភិបាលមិនចំមុខសញ្ញាមេខ្លោងធំៗ វានឹងធ្វើឱ្យឧក្រិដ្ឋកម្មនេះកក្រើកជាថ្មីឡើងវិញដែលនឹងអនុញ្ញាតឲ្យប្រទេសជិតខាងយករឿងនេះមកធ្វើជាលេសវាយប្រហារ ឬឈ្លានពានមកលើកម្ពុជានៅថ្ងៃខាងមុខទៀត៕
