អ្នកឃ្លាំមើល ទាមទារឲ្យ គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិចុះត្រួតពិនិត្យ និងស៊ើបអង្កេត ក្រុមហ៊ុនដែលធ្វើអាជីវកម្មឈើទ្រង់ទ្រាយធំនៅស្រុកកោះញែក ខេត្តមណ្ឌលគិរី ដើម្បីទប់ស្កាត់កុំឲ្យក្រុមហ៊ុនទាំងនោះ លួចកាប់ឈើនៅក្នុងតំបន់ការពារ រួចដឹកចូលក្នុងបរិវេណក្រុមហ៊ុនដីសម្បទានសេដ្ឋកិច្ច។ តែមន្ត្រីជំនាញជំរុញឲ្យ ពលរដ្ឋ និងអ្នកស្រឡាញ់បរិស្ថានប្ដឹង ឬរាយការណ៍ឲ្យអាជ្ញាធរខេត្តសាមីចុះបង្ក្រាបបទល្មើសទាំងនោះ។
ក្រោយអ្នកសារព័ត៌មាន និងពលរដ្ឋលេងបណ្ដាញសង្គមនាំគ្នាចែករំលែករូបភាព និងវីដេអូ បង្ហាញរថយន្តធនធ្ងន់ជាច្រើនគ្រឿង ដែលកំពុងដឹកជញ្ជូនឈើយកទៅលក់នៅក្រៅប្រទេស។ អ្នកឃ្លាំមើល ទាមទារឲ្យ គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិចុះត្រួតពិនិត្យ និងស៊ើបអង្កេត ក្រុមហ៊ុនដែលធ្វើអាជីវកម្មឈើទ្រង់ទ្រាយធំនៅស្រុកកោះញែក ខេត្តមណ្ឌលគិរី ដើម្បីទប់ស្កាត់កុំឲ្យក្រុមហ៊ុនទាំងនោះ លួចកាប់ឈើនៅក្នុងតំបន់ការពារ រួចដឹកចូលក្នុងបរិវេណក្រុមហ៊ុនដីសម្បទាន។
អ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង ប្រាប់ទូរទស្សន៍អាស៊ីសេរី នៅថ្ងៃទី១៤ ខែសីហាថា សកម្មភាពកាប់ឈើខុសច្បាប់ និងអាជីវកម្មឈើទ្រង់ទ្រាយធំ នៅតែបន្តវត្តមាន នាភូមិភាគឦសាន ហើយទីតាំងទាំងនោះ មិនឃើញមន្ត្រីពាក់ព័ន្ធចុះត្រួតពិនិត្យឲ្យគ្រប់ជ្រុងជ្រោយនោះឡើយ។ លោកបារម្ភថា ក្រុមហ៊ុនធ្វើអាជីវកម្មឈើធំៗ លួចកាប់ឈើនៅក្នុងតំបន់ព្រៃការពារ យកទៅបន្លំជាឈើដេញថ្លៃនៅក្នុងបរិវេណក្រុមហ៊ុនឯកជន។ លោកទាមទារឲ្យមន្ត្រីពាក់ពន្ធចុះស៊ើបអង្កេតក្រុមហ៊ុនធ្វើអាជីវកម្មឈើ ឲ្យបានត្រឹមត្រូវ និងយុត្តិធម៌។
លោក សេង សុខហេង៖ «ប្រសិនបើរដ្ឋាភិបាលនៅតែបន្តបែបនេះ យើងមើលឃើញថាគោលនយោបាយព្រៃឈើជាតិ នឹងបរាជ័យ ទិសដៅស្ការគម្របព្រៃឈើរបស់រដ្ឋាភិបាលប្រាកដបរាជ័យជាក់ជាមិនខាន ប្រសិនបើជាយើងការពារព្រៃឈើឲ្យបានគង់វង្ស វាប្រសើរជាងយើងព្យាយាមដាំ ព្រៃឈើមានស្រាប់ហើយ យើងគួរតែការពារ»។
ការលើកឡើងនេះ ធ្វើឡើងបន្ទាប់ពី អ្នកសារព័ត៌មានក្នុងស្រុក និងពលរដ្ឋលេងបណ្ដាញសង្គម នាំគ្នាចែករំលែករូបភាព និងវីដេអូ រថយន្តវ៉េអង ដឹកជញ្ជូនឈើចេញពីភូមិសាស្ត្រស្រុកកោះញែក ខេត្តមណ្ឌលគិរី រាប់សិបគ្រឿង ដោយសំអាងថា ការដឹកឈើទាំងនោះមានលិខិតអនុញ្ញាត និងជាឈើកាប់នៅក្នុងតំបន់ដីសម្បទានសេដ្ឋកិច្ចរបស់ក្រុមហ៊ុន ជា ចិន្ដា ដែលមានទីតាំងជាប់ដែនជម្រកសត្វព្រៃភ្នំព្រេច។
ជុំវិញរឿងនេះ អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី មិនធ្វើអត្ថាធិប្បាយច្រើននោះទេ ដោយលោកជំរុញឲ្យ ពលរដ្ឋ និងអ្នកស្រឡាញ់បរិស្ថានទាំងនោះ ទៅរាយការណ៍ប្រាប់អាជ្ញាធរខេត្ត ពីព្រោះសកម្មភាពទាំងនោះមិនទាន់ដល់ពេលគណៈកម្មការជាតិចុះបង្ក្រាប និងស្រាវជ្រាវឡើយ។
លោក អេង ហ៊ី៖ «គាត់ទៅទំនាក់ទនងជាមួយអាជ្ញាធរដែនដីទៅ ហើយអាជ្ញាធរខេត្តគេនឹងធ្វើការងារនឹងហើយ អាជ្ញាធរថ្នាក់ជាតិ ទាល់តែមានករណីណាមួយបានទៅធ្វើនឹងណុង អញ្ចឹងជូនដំណឹងទៅគាត់ទៅ ឲ្យគាត់រាយការណ៍ទៅអាជ្ញាធរដែនដី នៅខេត្តណារាយការណ៍ទៅនឹងទៅគេចុះធ្វើការរឿងនឹង»។
ចំណែកពលរដ្ឋរស់នៅស្រុកកោះញែក ម្នាក់សុំមិនបញ្ចេញឈ្មោះ និង សំឡេងព្រោះបារម្ភពីសុវត្ថិភាព អះអាងថា បច្ចុប្បន្នមានក្រុមហ៊ុនមួយក្នុងឃុំរយ៉កំពុងកាប់ឈើធ្វើអាជីវកម្មទ្រង់ទ្រាយធំ ដោយក្នុងមួយសប្ដាហ៍ ទៅពីរសប្ដាហ៍ មានរថយន្តវ៉េអងចាប់ពី១៥គ្រឿង ទៅ២០ គ្រឿងដឹកជញ្ជូនឈើចេញពីក្រុមហ៊ុនទាំងនោះ។ លោកថា តំបន់ដែលក្រុមហ៊ុនទាំងនោះកាប់ឈើធ្វើអាជីវកម្ម ដូចជានៅតំបន់ព្រៃខៀវ និងតំបន់ផ្សេងទៀត ដែលសន្តិសុខក្រុមហ៊ុនហាមឃាតពលរដ្ឋមិនឲ្យចូលទៅអាស្រ័យផលនៅតំបន់នេះនោះឡើយ។
បច្ចុប្បន្ននៅតំបន់ព្រៃការពារក្នុងភូមិសាស្ត្រស្រុកកោះញែក ខេត្តមណ្ឌលគិរី មានក្រុមហ៊ុនចំនួន៧ កំពុងធ្វើអាជីវកម្មទ្រង់ទ្រាយធំ ដូចជា ក្រុមហ៊ុន៩៥ ក្រុមហ៊ុន ជាចិន្ដា ក្រុមហ៊ុនវាសនា និងក្រុមហ៊ុនអាន ម៉ារ៉ានី ដែលមានទីតាំងជាប់ដែនជម្រកសត្វព្រៃភ្នំព្រេចជាដើម៕
