សង្គមស៊ីវិលបន្តទាមទាររកយុត្តិធម៌ដល់កម្មករដែលត្រូវអាជ្ញាធរបង្ក្រាបដោយហិង្សា នៅផ្លូវវេងស្រេង កាលពី ១២ឆ្នាំមុន ដោយទាមទារឱ្យអាជ្ញាធររកអ្នកទទួលខុសត្រូវនៃអំពើហិង្សាដ៏ព្រៃផ្សៃនោះ។
អង្គការលីកាដូ (Licadho)នៅថ្ងៃទី៥ ខែមករា បានរំលឹកឡើងវិញដល់ថ្ងៃដែលកងកម្លាំងរបស់អាជ្ញាធរកម្ពុជា បានបង្ក្រាបយ៉ាងហិង្សា មកលើក្រុមកម្មករដែលបានធ្វើបាតុកម្មទាមទារដំឡើងប្រាក់ឈ្នួលអប្បបរមានៅលើផ្លូវវេងស្រេង ។
បើតាមលីកាដូហេតុការណ៍នោះ បានធ្វើឱ្យកម្មករចំនួន ៤នាក់ស្លាប់ និងកុមារាអាយុ ១៥ឆ្នាំ ម្នាក់បាត់ខ្លួនរហូតមកទល់បច្ចុប្បន្ន។
ក្រោយពេលបង្ក្រាបយ៉ាងហិង្សា អាជ្ញាធរក៏បានចាប់ខ្លួនកម្មករ មេដឹកនាំសហជីព និងអ្នកការពារសិទិ្ធមនុស្សជាច្រើននាក់ដាក់ពន្ធនាគារ ហើយរហូតមកដល់ពេលនេះ ពួកគេពុំទាន់ទទួលបានយុត្តិធម៌នោះទេ ខណៈអាជ្ញាធរព្យាយាមបំភ្លេចករណីនេះ មិនអើពើចាត់វិធានការតាមផ្លូវច្បាប់ឡើយ។
កាលពីឆ្នាំ២០១៤ ក្រុមកម្មករបានផ្ទុះការតវ៉ា ក្រោយពីរដ្ឋាភិបាលសម្រេចកំណត់ប្រាក់ខែគោលរបស់កម្មករវិស័យកាត់ដេរ និងវាយនភណ្ឌត្រឹម ១០០ដុល្លារ ដែលពួកគេអះអាងថា មិនសមស្របនឹងការចំណាយ។
ប៉ុន្តែ រដ្ឋាភិបាលមិនត្រឹមតែមិនដំឡើងជូនកម្មករនោះទេ ថែមទាំងបានបង្ក្រាបការតវ៉ារបស់ពួកគេទៀត។ ជនរងគ្រោះដែលបានបាត់បង់ជីវិតនៅពេលនេះរួមមាន លោក គឹម ផាលាភ លោក សាម រ៉ាវី លោក យាន រិទ្ធី លោក ផេង កុសល និងកុមារាដែលបាត់ខ្លួនឈ្មោះ ខឹម សុផាត៕
