អ្នកឃ្លាំមើលសង្គមអះអាងថា វត្តមាននាវាចម្បាំងជើងទឹកអាមេរិកនៅលើទឹកដីកម្ពុជាគឺជាសញ្ញាវិជ្ជមានក្នុងទំនាក់ទំនងរវាងកម្ពុជានិងអាមេរិក ក៏ប៉ុន្តែទំនាក់ទំនងនេះស្ថិតនៅក្នុងភាពផុយស្រួយដោយសារតែរដ្ឋាភិបាលក្រុងវ៉ាស៊ីនតោនតែងតែទាមទារឲ្យរដ្ឋាភិបាលក្រុងភ្នំពេញបើកលំហសេរីភាពប្រជាធិបតេយ្យ និងគោរពសិទ្ធិមនុស្សឡើងវិញ។ ទំនាក់ទំនងរវាងកម្ពុជា និងអាមេរិក បានធ្លាក់ចុះនៅឆ្នាំ២០១៧ ក្រោយពីរដ្ឋាភិបាលក្រុងភ្នំពេញផ្អាកធ្វើសមយុទ្ធឆ្មាំអង្គរ ហើយរដ្ឋាភិបាលក្រុងវ៉ាស៊ីនតោនបានដាក់ក្តីសង្ស័យអំពីជំហរកម្ពុជាថា មានទំនោរទៅរកមហាយក្សចិន។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានអះអាងថា ការៀបចំសមយុទ្ធឆ្មាំអង្គរឡើងវិញ គឺជាសញ្ញាវិជ្ជមានដែលកម្ពុជា និងសហរដ្ឋអាមេរិកអាចវិលទៅរកភាពល្អប្រសើរក៏ប៉ុន្តែវាគ្រាន់តែជាចំនុចចាប់ផ្តើមតែប៉ុណ្ណោះ។
លោក សេក សុជាតិ បានអះអាងបន្ថែមថា សហរដ្ឋសហរដ្ឋអាមេរិកចង់ឃើញកម្ពុជាស្តារលទ្ធិប្រជាធិបតេយ្យ ហើយបើកទូលាយលំហូរសេរីភាព នយោបាយស្របតាមរដ្ឋធម្មនុញ្ញរបស់កម្ពុជា និងការប្រកាន់យកគោលនយោបាយការបរទេសអព្យាក្រឹត្យអចិន្ត្រៃយ៍។ លោក សេក សុជាតិ ក៏កត់សម្គាល់ផងដែរថា ទំនាក់ទំនងរវាងនាយករដ្ឋមន្ត្រីកម្ពុជាលោក ហ៊ុន ម៉ាណែត ជាមួយលោកប្រធានាធិបតីអាមេរិក ដូណាល់ ត្រាំ (Donald Trump) គឺមានភាពប្រសើរមួយចំនួន ហើយកម្ពុជាក៏បានឆ្លើយតបទៅនឹងលោក ដូណាល់ ត្រាំ ដែលអញ្ជើញកម្ពុជាឲ្យចូលក្នុងក្រុមប្រឹក្សាសន្តិភាពពិភពលោក។
លោក សេក សុជាតិ៖ «សង្ឃឹមថា រាល់លក្ខខណ្ឌដែលសហរដ្ឋអាមេរិកបានស្នើឡើងគឺកម្ពុជា និងពិចារណាជាពិសេសការដោះស្រាយបញ្ហាលំហូរលទ្ធិប្រជាធិបតេយ្យ លំហូរសេរីភាពនយោបាយ ហើយនឹងការដោះស្រាយបញ្ហាជាមួយនឹងបញ្ហាសង្គម រឺក៏ពាក់ព័ន្ធជាមួយនឹងនយោបាយកម្ពុជាអីចឹងជាដើម។ ហើយរឿងមួយដែលសំខាន់គឺកម្ពុជាអាចនឹងទទួលបាននូវការគាំទ្រពីសហរដ្ឋអាមេរិកក៏ដូចជាអាចទទួលបាននូវអត្ថប្រយោជន៍ផ្នែកសេដ្ឋកិច្ច និងពាណិជ្ជកម្ម បើសិនជាកម្ពុជាអាចធ្វើខ្លួនឲ្យក្លាយជាប្រទេសមួយដែលស្របទៅនឹងរដ្ឋធម្មនុញ្ញរបស់កម្ពុជា ហើយស្របទៅតាមកិច្ចព្រមព្រៀងសន្តិភាពទីក្រុងប៉ារីស»។
ថ្លែងនៅក្នុងសន្និសីទសារព័ត៌មាន នៅខាងមុខនាវា USS CINCINNATI(LCS 20) ក្នុងមូលដ្ឋានសមុទ្ររាម នា ថ្ងៃទី២៦ ខែមករា លោកនាយឧត្ដមនាវី សាមូអែល ប៉ាប៉ារូ (Samuel Paparo) មេបញ្ជាការកងទ័ពជើងទឹកសហរដ្ឋអាមេរិកប្រចាំតំបន់ឥណ្ឌូប៉ាស៊ីហ្វិក អះអាងថា នឹងមានសមយុទ្ធឆ្មាំអង្គរឡើងវិញ នៅចុងឆ្នាំ២០២៦ ឬនៅដើមឆ្នាំ២០២៧។
លោក សាមូអែល ប៉ាប៉ារូ បានឱ្យដឹងថា អាមេរិកយកចិត្តទុកដាក់យ៉ាងហ្មត់ចត់ លើសមយុទ្ធរួមគ្នានេះ ហើយអះអាងថា កំពុងរៀបចំផែនការ។ លោកថា នាពេលអនាគតអាមេរិកនឹងពង្រឹងភាពជាដៃគូជាមួយកម្ពុជាបន្ថែមទៀត ដើម្បីរួមគ្នាទទួលបានស្ថិរភាព និងសន្តិសុខ។
សមយុទ្ធឆ្មាំអង្គររវាង កម្ពុជា-អាមេរិក ខកខានអស់ជិត ១០ឆ្នាំហើយចាប់តាំងពី ឆ្នាំ២០១៧មក។ រដ្ឋាភិបាលកម្ពុជាបញ្ជាក់ថា ការផ្អាកសមយុទ្ធជាមួយអាមេរិក គឺដើម្បីផ្ដោតលើការរៀបចំការបោះឆ្នោតឃុំសង្កាត់ និងយុទ្ធនាការប្រឆាំងគ្រឿងញៀនថ្នាក់ជាតិ។ ទោះជាយ៉ាងណា កម្ពុជានៅតែបន្តធ្វើសមយុទ្ធ «នាគមាស» ជាមួយចិន និងកាន់តែធំឡើងជារៀងរាល់ឆ្នាំ ដែលធ្វើឱ្យគេមើលឃើញថា កម្ពុជាលំអៀងទៅរកប្រទេសចិន ខណៈសហរដ្ឋអាមេរិកវិញតែងបានរិះគន់រដ្ឋាភិបាលកម្ពុជាពីបញ្ហាសិទ្ធិមនុស្ស និងប្រជាធិបតេយ្យ។
កន្លងមក លោក ហ៊ុន សែន មិនសូវសប្បាយចិត្តនឹងសហរដ្ឋអាមេរិកនោះទេ ដោយសារតែប្រទេសមហាអំណាចប្រជាធិបតេយ្យមួយនេះតែងតែទាមទារឱ្យរដ្ឋាភិបាលក្រុងភ្នំពេញគោរពសិទ្ធិមនុស្ស និងអនុវត្តលទ្ធិប្រជាធិបតេយ្យ ដោយបើកចំហឱ្យគណបក្សនយោបាយមកពីគ្រប់និន្នាការអាចប្រកួតប្រជែងនយោបាយប្រកបដោយភាពត្រឹមត្រូវ និងយុត្តិធម៌។ កាលនៅក្នុងតំណែងជានាយករដ្ឋមន្ត្រី លោក ហ៊ុន សែន ថែមទាំងបានបើកកកាយប្រវត្តិសាស្ត្រមកចោទប្រកាន់លើសហរដ្ឋអាមេរិក ថា បានធ្វើកំហុស២ ទៅលើកម្ពុជា ក្នុងសម័យសង្គមរាស្ត្រនិយម និងរបបខ្មែរក្រហម។ ទន្ទឹមគ្នានេះបុរសខ្លាំងរូបនេះក៏ព្រមានសហរដ្ឋអាមេរិក កុំឱ្យធ្វើកំហុសលើកទី៣ មកលើកម្ពុជាផងដែរ។
កំហុសធំៗ ដែលលោក ហ៊ុន សែន លើកឡើងនេះ រួមមាន ការគាំទ្ររដ្ឋប្រហារយោធានៅទីក្រុងភ្នំពេញទម្លាក់សម្ដេចព្រះបរមរតនកោដ្ឋ នរោត្តម សីហនុ ចេញពីព្រះប្រមុខរដ្ឋ នៅឆ្នាំ១៩៧០ ដែលនាំឱ្យមានរបបប្រល័យពូជសាសន៍ ប៉ុល ពត សម្លាប់ប្រជាជនខ្មែររាប់លាននាក់។ ចំណែកកំហុសទី២ គឺការគាំទ្រអាសនៈរបស់ខ្មែរក្រហម នៅអង្គការសហប្រជាជាតិ រហូតដល់ទៅជាង ១២ឆ្នាំ គឺចាប់ពីឆ្នាំ១៩៧៩ រហូតដល់ឆ្នាំ១៩៩១។
ទោះជាយ៉ាងណា រដ្ឋាភិបាលនៃក្រុមគ្រួសារត្រកូល ហ៊ុន ហាក់កំពុងព្យាយាមបោះដៃទៅរកអាមេរិកវិញ ក្រោយពីប្រធានាធិបតីអាមេរិកលោក ដូណាល់ ត្រាំ ចូលរួមជ្រោមជ្រែងស្វែងរកដំណោះស្រាយបទឈប់បាញ់ក្នុងសង្គ្រាមឈ្លានពានរបស់យោធាថៃមកលើកម្ពុជា។ ទោះជាបែបនេះក្តី អ្នកឃ្លាំមើលលើកឡើងថា ទំនាក់ទំនងរវាងកម្ពុជា និងអាមេរិកមិនអាចប្រសើរបានទេ ប្រសិនបើរដ្ឋាភិបាលកម្ពុជានៅបន្តរំលោភសិទ្ធិពលរដ្ឋ និងគាបសង្កត់អ្នកនយោបាយប្រឆាំងដូចបច្ចុប្បន្ន៕
