មន្ត្រីជាន់ខ្ពស់កម្ពុជាអះអាងថា សមត្ថកិច្ចបានបិទមជ្ឈមណ្ឌលឆបោកតាមអនឡាញជិត ២រយទីតាំង និងឃាត់ខ្លួនជនសង្ស័យយ៉ាងហោច ១៧៣នាក់នៅក្នុងយុទ្ធនាការបង្ក្រាបឧក្រិដ្ឋកម្មអនឡាញក្នុងរយៈពេលប៉ុន្មានសប្ដាហ៍ចុងក្រោយនេះ។ អ្នកឃ្លាំមើលវាយតម្លៃថា យុទ្ធនាការបង្ក្រាបនេះរដ្ឋាភិបាលលោក ហ៊ុន ម៉ាណែត គ្មានឆន្ទៈចាប់មេខ្លោងកំពូលៗដែលមានឥទ្ធិពល និងអំណាចក្នុងជួររដ្ឋាភិបាលឡើយ ដែលធ្វើឱ្យឧក្រិដ្ឋកម្មឆបោកតាមអនឡាញនឹងមិនសាបរលាបចេញពីកម្ពុជានោះទេ។
ទេសរដ្ឋមន្ត្រី និងជាប្រធានគណៈកម្មការប្រយុទ្ធប្រឆាំងការឆបោកតាមអនឡាញលោក ឆៃ ស៊ីណារិទ្ធ អះអាងថា ជនសង្ស័យចំនួន ១៧៣នាក់ដែលជាមេបណ្ដាញឧក្រិដ្ឋកម្មឆបោកតាមអនឡាញនៅកម្ពុជាត្រូវបានសមត្ថកិច្ចចាប់ខ្លួនក្នុងប្រតិបត្តិការបង្ក្រាបចាប់តាំងពីចុងឆ្នាំ២០២៥ មក។ ចំណែក ជនបរទេសដែលទាសករតាមអនឡាញ ១ម៉ឺន ១ពាន់នាក់ផ្សេងទៀតត្រូវបានបណ្ដេញចេញពីកម្ពុជា។
លោក ឆៃ ស៊ីណារិទ្ធ ថ្លែងប្រាប់ទីភ្នាក់ងារសារព័ត៌មានរ៉យទ័រស៍ (Reuters) កាលពីថ្ងៃទី១១ ខែកុម្ភៈថា កម្ពុជាបានខិតខំដោះស្រាយបញ្ហាឧក្រិដ្ឋកម្មឆបោកតាមអនឡាញដែលបង្កជាបញ្ហារំលោភសិទ្ធិមនុស្សទូទាំងពិភពលោក។ លោកថា ក្នុងប្រតិបត្តិការបង្ក្រាបប៉ុន្មានសប្ដាហ៍មកនេះ សមត្ថកិច្ចបានបិទមជ្ឈមណ្ឌលឆបោកតាមអនឡាញរបស់ក្រុមឧក្រិដ្ឋជនយ៉ាងហោច ១៩០ ទីតាំងដែលអគារអនឡាញទាំងនោះមាននៅខេត្តកំពត និងបណ្ដាខេត្តជាប់ព្រំដែន។
លោក ឆៃ ស៊ីណារិទ្ធ បញ្ជាក់ទៀតថា ជនសង្ស័យចំនួន ១៧៣នាក់គឺជាឧក្រិដ្ឋជនជាន់ខ្ពស់ដែលសមត្ថកិច្ចឃាត់ខ្លួនបានបន្ទាប់ពីសហរដ្ឋអាមេរិកបានចោទប្រកាន់ឧក្រិដ្ឋជន ចេន ហ្ស៊ី ហើយកម្ពុជាបានធ្វើបត្យាប័នបញ្ជូនទៅកាត់ទោសនៅប្រទេសចិន។
ក្រោយមានការចាប់ខ្លួនក្រុមមេខ្លោងកំពូលជាពិសេសគឺឧក្រិដ្ឋជន ចេន ហ្ស៊ី (Chen Zhi) ជនបរទេសរាប់ម៉ឺននាក់ដែលអ្នកខ្លះគឺជាជនរងគ្រោះនៃអំពើឆបោកតាមអនឡាញបាននាំគ្នាសម្រុករត់ចេញពីអគារនានានៅទូទាំងប្រទេសកម្ពុជាដូចជាឃ្មុំបែកសម្បុក។ មកដល់ពេលនេះ ជនបរទេសចម្រុះជាតិសាសន៍មួយចំនួនរស់នៅដោយឯកោ និងដើរដេកតាមដងផ្លូវដូចជាជនអនាថា ដើម្បីរង់ចាំស្ថានទូតរបស់ខ្លួនរៀបចំឯកសារត្រឡប់ទៅប្រទេសកំណើតវិញ។ អង្គការលើកលែងទោសអន្តរជាតិ (Amnesty International) ចាត់ទុកបញ្ហានេះថា ជាវិបត្តិមនុស្សធម៌អន្តរជាតិនៅកម្ពុជា និងរិះគន់រដ្ឋាភិបាលត្រកូលហ៊ុន ថា វិធានការបង្ក្រាបឧក្រិដ្ឋកម្មឆបោកតាមអនឡាញគ្មានតម្លាភាព និងស្តង់ដារក្នុងការជួយសង្គ្រោះជនរងគ្រោះ។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា សាទរចំណាត់ការបង្ក្រាបរបស់សមត្ថកិច្ច ប៉ុន្តែលោកថា ការបង្ក្រាបទីតាំងអគារអនឡាញ និងចាប់ខ្លួនជនសង្ស័យនាពេលកន្លងមកមិនទាន់ចំគោលដៅមេខ្លោងធំៗដែលធ្វើឱ្យសហគមន៍ជាតិ និងអន្តរជាតិមានទំនុកចិត្តនៅឡើយ។ លោកថា មេខ្លោងធំៗដែលជាមន្ត្រីកំពូលៗ និងឧកញ៉ាគ្រាក់ៗដែលអាមេរិក និងស្ថាប័នជំនាញបង្ហាញមុខពាក់ព័ន្ធនឹងឧក្រិដ្ឋកម្មអនឡាញកន្លងមករដ្ឋាភិបាលក្រុងភ្នំពេញគួរតែស៊ើបអង្កេត និងចាប់ខ្លួនពួកគេ ដើម្បីស្ដារមុខមាត់សេដ្ឋកិច្ចកម្ពុជាឡើងវិញ។
លោក ស៊ឹង សែនករុណា៖ «ប្រសិនជាធ្វើឱ្យឃើញតែរូបភាព ហើយអ្វីៗនៅពីក្រោយខ្នងនៅតែបន្តដដែលខ្ញុំគិតថា គ្មានតម្លៃអ្វីដែលគេអាចជឿជាក់បានទេ ហើយកម្ពុជានៅតែជាប់ឈ្មោះអសោចនៅលើឆាកអន្តរជាតិអ៊ីចឹង គឺមិនអាចលាងសម្អាតបាននៅខណៈពេលដែលបណ្ដាប្រទេសផ្សេងៗ ប្រទេសដែលគេមានពលរដ្ឋកំពុងតែរងគ្រោះ និងកំពុងតែតាមដានលើវិធានការហ្នឹងដែរ»។
ទោះជាអាជ្ញាធរអះអាងពីការឃាត់ខ្លួនបណ្ដាញមេខ្លោងមួយចំនួនចុងក្រោយ ប៉ុន្តែសមត្ថកិច្ចមិនបានបង្ហាញមុខឱ្យសាធារណជនបានឃើញនោះទេ។ ក្រៅពីនេះ ការបង្ក្រាបចុងក្រោយរបស់រដ្ឋាភិបាលត្រកូល ហ៊ុន ដោយសារតែរងសម្ពាធពីអន្តរជាតិនោះក៏ត្រូវបានគេមើលឃើញថា ការបង្ក្រាបធ្វើឡើងដោយច្បោលៗពោលទីតាំងអគារឆបោកតាមអនឡាញរបស់អ្នកមានអំណាចដូចជា សមាជិកព្រឹទ្ធសភាបក្សកាន់អំណាចលោក លី យ៉ុងផាត់ នៅអូរស្មាច់ និងអគារម្ចាស់កាស៊ីណូក្រោននៅប៉ោយប៉ែតគឺលោក កុក អាន ជាដើមនៅតែដំណើរការ។ លើសពីនេះ ទីតាំងអគារឆបោកតាមអនឡាញដែលសមត្ថកិច្ចធ្លាប់ចុះបង្ក្រាបនៅតំបន់មួយចំនួនដូចជានៅភ្នំបូកគោខេត្តកំពត ក៏ត្រូវបានពលរដ្ឋរាយការណ៍ថា មានជនបរទេសជាច្រើនត្រូវគេបញ្ជូនឱ្យទៅធ្វើការងារនៅខាងក្នុងអគារវិញជាបណ្ដើរៗហើយ៕
