សេដ្ឋកិច្ចនៅតាមតំបន់មួយចំនួនដូចជា ខេត្តព្រះសីហនុ និងបណ្ដាខេត្តជាប់ព្រំដែនកំពុងធ្លាក់ចុះក្រោយការបង្ក្រាបអគារអនឡាញ និងបណ្ដាញឆបោកតាមអ៊ីនធឺណិត។ អាជីវករខ្នាតតូចជាច្រើនត្អូញត្អែរពីការលក់ដូរធ្លាក់ចុះខ្លាំង រីឯអ្នករត់កង់បីក៏រកចំណូលមិនសូវបាននៅពេលដែលជនបរទេសនាំគ្នាសម្រុកចាកចេញ។ អ្នកឃ្លាំមើលរិះគន់ថា បញ្ហានេះកើតឡើងដោយសារតែរដ្ឋាភិបាលត្រកូល ហ៊ុន អសមត្ថភាពអភិវឌ្ឍវិស័យសេដ្ឋកិច្ចតាមផ្លូវត្រឹមត្រូវ តែបែរជារៀបចំជាប្រព័ន្ធឱ្យសេដ្ឋកិច្ចជាតិពឹងផ្អែកលើឧក្រិដ្ឋកម្មដែលធ្វើឱ្យពលរដ្ឋជួបវិបត្តិសេដ្ឋកិច្ចនៅពេលនេះ។
ក្រុមអាជីវករលក់ដូរតូចតាចដែលធ្លាប់រកស៊ីនៅក្បែរៗតំបន់មជ្ឈមណ្ឌលឆបោកតាមអនឡាញនៅបណ្ដាខេត្តមួយចំនួនកំពុងជួបបញ្ហាសេដ្ឋកិច្ច ក្រោយសមត្ថកិច្ចបន្តចុះប្រតិបត្តិការចាប់ជនបរទេសនៅតាមអគារឆបោកតាមអនឡាញ។
ទន្ទឹមគ្នានេះ រដ្ឋាភិបាលត្រកូល «ហ៊ុន» ក៏រងការរិះគន់ថា បានទាញប្រទេសកម្ពុជាឱ្យក្លាយជា «អាណាចក្រនៃជម្រកឧក្រិដ្ឋជន» ដែលមិនត្រឹមតែនាំអន្តរាយដល់សេដ្ឋកិច្ចជាតិឡើយ ថែមទាំងធ្វើឱ្យកម្ពុជាអាប់ឱនកេរ្តិ៍ឈ្មោះនៅលើឆាកអន្តរជាតិនាពេលកន្លងមកនេះ។
អ្នករត់កង់បីម្នាក់នៅខេត្តព្រះសីហនុលោក គឹម ស៊ឺន ប្រាប់ទូរទស្សន៍អាស៊ីសេរីនៅថ្ងៃទី៤ ខែមីនាថា ក្រោយសមត្ថកិច្ចបង្ក្រាបទីតាំងអគារឆបោកតាមអនឡាញ ទីក្រុងព្រះសីហនុមានសភាពស្ងាត់ជ្រងំ ដែលធ្វើឱ្យការរកស៊ីរបស់លោកធ្លាក់ចុះ។ លោកបញ្ជាក់ថា ការរីករាលដាល មជ្ឈមណ្ឌលឆបោកតាមអនឡាញនៅក្រុងព្រះសីហនុក៏បានបង្កបញ្ហាអសន្តិសុខសង្គមជាច្រើនដូចជា ជនជាតិចិនខ្លះបាញ់បោះសេរី ការជួញដូរគ្រឿងញៀន និងករណីចាប់ជំរិតនាពេលកន្លងមក។ ទោះជាយ៉ាងណា លោកចង់ឃើញរដ្ឋាភិបាលកម្ចាត់ឧក្រិដ្ឋកម្មឆបោកឱ្យមានប្រសិទ្ធភាព និងអភិវឌ្ឍខេត្តជាប់មាត់សមុទ្រនេះប្រកបដោយភាពត្រឹមត្រូវ ដើម្បីឱ្យប្រជាពលរដ្ឋអាចទាញប្រយោជន៍ពីសេដ្ឋកិច្ច។
លោក គឹម ស៊ឺន៖ «កាលអាជ្ញាធរគេអត់ទាន់ចុះបង្ក្រាបអនឡាញយើងរកមធ្យម យើងរកលំបាកដែរតែមធ្យមតែឥឡូវវាលំបាកខ្លាំងបើប្រៀបធៀបពីមុន និងឥឡូវគឺខុសគ្នាឆ្ងាយ ពីមុខយើងរកអត់សូវប្រឹងទេយើងរស់ស្រួល ១០ម៉ឺន ១០ម៉ឺនជាង តែឥឡូវទាល់តែយើងប្រឹងខ្លាំងរកលុយមិនបាន ៧ ទៅ ៨ម៉ឺនផង ប្រឹងទាំងយប់ផងថ្ងៃផង។ តែអាជ្ញាធរគេបង្ក្រាបអនឡាញក៏វាល្អដែរ ទីមួយស្រុកទេសយើងសុវត្ថិភាពវាអត់សូវមានចោរ បង្កើតឱ្យមានល្បែងហ្នឹងចោរច្រើនណាស់កំពង់សោមឥឡូវមិនដូចពីមុន ជាពិសេសគ្រឿងញៀនដូចអត់ថមថយសោះ ឮតែចាប់ៗតែនៅតែមានចរាចរ»។
ចំណែក អាជីវករលក់ដូរនៅតាមតំបន់តាមច្រកព្រំដែនដូចជា ច្រកដូង ឬឡែមខេត្តបាត់ដំបង ក្រុងបាវិតខេត្តស្វាយរៀង និង ក្រុងប៉ោយប៉ែតខេត្តបន្ទាយមានជ័យជាដើមក៏រងផលប៉ះពាល់សេដ្ឋកិច្ចធ្ងន់ធ្ងរដែរ។ ពលរដ្ឋឱ្យដឹងថា ទីតាំងអគារជាច្រើនក្នុងក្រុងប៉ោយប៉ែតត្រូវដាក់ស្លាកជួល ប៉ុន្តែនៅតាមអគារខ្លះក៏នៅមានជនបរទេសជាច្រើននាក់រស់នៅប្រមូលផ្ដុំគ្នាធ្វើការដដែល ទោះបីជាសមត្ថកិច្ចចុះបង្ក្រាបទីតាំងមជ្ឈមណ្ឌលឆបោកតាមអនឡាញជាបន្តបន្ទាប់ក្ដី។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី ឱ្យដឹងថា សេដ្ឋកិច្ចពលរដ្ឋនៅតាមជាយដែនរងផលប៉ះពាល់ផ្ទួនៗ ក្រោយការបង្ក្រាបឧក្រិដ្ឋកម្មអនឡាញ និងម្យ៉ាងទៀតច្រកព្រំដែនក៏ត្រូវបានបិទខ្ទប់ដោយសារបញ្ហាជម្លោះព្រំដែនកម្ពុជា-ថៃ។ លោកថា បញ្ហាអំពើឆបោកតាមអនឡាញមិនត្រឹមតែមិនផ្ដល់ស្ថិរភាពដល់សេដ្ឋកិច្ចអ្នករកស៊ីសេដ្ឋកិច្ចក្រៅប្រព័ន្ធ ឧក្រិដ្ឋកម្មនេះបានអូសទាញប្រជាពលរដ្ឋខ្មែរឱ្យក្លាយជាជនរងគ្រោះ និងរងការរំលោភបំពានសិទ្ធិការងារផ្សេងៗតាមរយៈការលួងលោមឱ្យរួមចំណែកធ្វើការឆបោកមនុស្សជុំវិញពិភពលោក។
លោក ឌិន ពុទ្ធី៖ «ពួកអ្នកឆបោកតាមអនឡាញ (Scamer) ក៏ជួលកម្លាំងពលកម្មរបស់ប្រជាពលរដ្ឋខ្មែរទៅធ្វើគឺធ្វើការលើសម៉ោងគ្មានថ្ងៃឈប់សម្រាក អត់មានច្បាប់ទម្លាប់ត្រឹមត្រូវទៅតាមច្បាប់ការងារទេ។ អ៊ីចឹងអ្នកទៅធ្វើការងារក៏ជាអ្នករងគ្រោះដែរបានលុយតិចតួចមែន ប៉ុន្តែរងគ្រោះគឺជាប់ឈ្មោះឆបោកអ្នកដទៃដោយសារតែការបញ្ជាពីមេ (Scamer) ហើយនេះគឺជារឿងមួយដែលអកុសលដែលពលរដ្ឋខ្មែររងគ្រោះ។ រដ្ឋាភិបាលបង្ក្រាបហ្នឹងគឺជាការចាប់ផ្ដើមល្អ ហើយខ្ញុំគិតថា រដ្ឋាភិបាលបង្ក្រាបទាំងអស់ជាពិសេសមេៗអនឡាញ (Scamer) តែម្ដង»។
លោកនាយករដ្ឋមន្ត្រីលោក ហ៊ុន ម៉ាណែត លើកឡើងកាលពីពេលថ្មីៗនេះថា ការរីករាលដាលនៃមជ្ឈមណ្ឌលឆបោកតាមអនឡាញថ្វីត្បិតតែមានការផ្ដល់ប្រយោជន៍សេដ្ឋកិច្ចដោយប្រយោលដល់អាជីវកម្មក្នុងស្រុក ប៉ុន្តែលោកថា រដ្ឋាភិបាលកម្ពុជាមិនបានទទួលផលប្រយោជន៍ពីឧក្រិដ្ឋកម្មនេះឡើយ។ ក្នុងកិច្ចប្រជុំកំពូលធុរកិច្ចអាស៊ាន-កម្ពុជានៅថ្ងៃទី៤ ខែមីនា លោក ហ៊ុន ម៉ាណែត ក៏បានប្រកាសប្ដេជ្ញាថា នឹងលុបបំបាត់មជ្ឈមណ្ឌលឆបោកតាមអនឡាញឱ្យអស់ពីកម្ពុជាត្រឹមខែមេសា ដើម្បីធានាដល់អ្នកវិនិយោគ។
ការរីករាលដាលអំពើឆបោកតាមអនឡាញមិនត្រឹមតែបង្កផលប៉ះពាល់ដោយផ្ទាល់ចំពោះអាជីវករអ្នករកស៊ីតូចតាចតែប៉ុណ្ណោះទេ សម្រាប់យុវជនពេញ កម្លាំងដែលបានប្រឡូកក្នុងវិស័យការងារនេះជាច្រើននាក់ក៏ត្រូវប្រឈមអត់ការងារធ្វើ និងបាត់បង់ចំណូល។ លើសពីនេះ ពួកគាត់ក៏មិនអាចធ្វើចំណាកស្រុកទៅប្រទេសជិតខាងដូចមុន ដើម្បីធ្វើការបានចំណូលដោះស្រាយជីវភាពក្នុងគ្រួសារ និងដោះបំណុលធនាគារឡើយ ខណៈការងារនៅក្នុងស្រុកក៏មានកំណត់ហើយទទួលបានប្រាក់ខែតិច។
ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ លោក ឌី ថេហូយ៉ា ថ្លែងថា អំពើឆបោកតាមអនឡាញបានបំផ្លាញកេរ្តិ៍ឈ្មោះ និងសេដ្ឋកិច្ចកម្ពុជាទាំងមូល។ លោកបារម្ភថា បើរដ្ឋាភិបាលនៅតែអសមត្ថភាពកម្ចាត់ឧក្រិដ្ឋកម្មឆបោកតាមអនឡាញ និងបង្កើតឱកាសការងារត្រឹមត្រូវនោះពលរដ្ឋដែលចំណាកស្រុកពីថៃក៏ប្រឈមអត់ការងារធ្វើ ហើយពួកគាត់ក៏ងាយរងគ្រោះដោយសារតែអំពើឆបោកតាមអនឡាញនេះដែរ។
លោក ឌី ថេហូយ៉ា៖ «ពលរដ្ឋខ្មែរធ្វើការនៅប្រទេសថៃជាង ២លាននាក់ត្រឡប់មកវិញជាង ៥០ភាគរយហើយ។ ប្រសិនបើប្រទេសកម្ពុជាសេដ្ឋកិច្ចគ្មានការអភិវឌ្ឍច្បាស់ណាស់ការងារវាមិនអាចកើនឡើងទេ។ កាលណាគាត់អត់មានការងារធ្វើ អ៊ីចឹងពួកគាត់គឺជាក្រុមជនដែលងាយរងគ្រោះគាត់អត់មានដីស្រែចម្ការធ្វើ ដើម្បីបានចំណូលចិញ្ចឹមជីវភាពប្រចាំថ្ងៃ អ៊ីចឹងប្រសិនបើមានអ្នកទាក់ទងបង្ហាញពីការងារស្រួលឱកាសបានលុយចេះចុះ ប្រាកដណាស់គាត់អាចនឹងចាញ់បោកគេ។ អាហ្នឹងហើយគឺជាភាពរងគ្រោះ និងភាពគ្រោះថ្នាក់ទីមួយប្រទេសជាតិទាំងមូល ទីពីរប្រជាជាតិកម្ពុជាតែម្ដងដែលពិបាកក្នុងការងើបពីស្ថានភាពអាក្រក់នៃអំពើជួញដូរក្នុងកាលៈទេសៈបែបនេះ ប្រសិនបើគ្មានឆន្ទៈពិតប្រាកដក្នុងការចាត់វិធានការលុបបំបាត់ ឬបោសសម្អាតនោះទេ»។
អ្នកឃ្លាំមើលថា ផលប៉ះពាល់សេដ្ឋកិច្ចលើប្រជាពលរដ្ឋ និងក្រុមអាជីវករនាពេលនេះឆ្លុះបញ្ចាំងពីសេដ្ឋកិច្ចតាមមូលដ្ឋានកន្លងមក គឺពលរដ្ឋបានពឹងផ្អែកសេដ្ឋកិច្ចប្រចាំថ្ងៃពីបណ្ដាញឧក្រិដ្ឋកម្មទាំងនេះស្ទើរតែទាំងស្រុង ប៉ុន្តែវាក៏មិនបានធានាដល់ស្ថិរភាពនៃសេដ្ឋកិច្ចពលរដ្ឋក្នុងរយៈពេលយូរអង្វែងនោះទេ។ មន្ត្រីសង្គមស៊ីវិលចង់ឃើញរដ្ឋាភិបាលបោសសម្អាតឧក្រិដ្ឋកម្មឆបោកតាមអនឡាញដោយបង្ក្រាបឱ្យចំគោលដៅមេខ្លោងធំៗដែលមានអំណាច និងបង្កើតឱកាសការងារបែបថ្លៃថ្នូរ ដោយមិនបណ្ដែតបណ្ដោយឱ្យឧក្រិដ្ឋកម្មរាលដាលបំផ្លាញប្រទេសជាតិ និងផ្ដល់សេដ្ឋកិច្ចមិនប្រាកដប្រជាដល់ពលរដ្ឋតាមមូលដ្ឋានដូចពេលបច្ចុប្បន្ននេះឡើយ៕
