លោកនាយករដ្ឋមន្ត្រី ហ៊ុន ម៉ាណែត ទទួលស្គាល់ថា បញ្ហាឧក្រិដ្ឋកម្មឆ្លងដែនដូចជា អំពើឆបោកតាមអនឡាញ ជួញដូរមនុស្ស គ្រឿងញៀន និងការលាងលុយកខ្វក់គឺមានភាពប្រទាក់ក្រឡាគ្នាដែលក្រុមបណ្ដាញឧក្រិដ្ឋជននៅតែបន្តមានប្រតិបត្តិការនៅកម្ពុជា និងបានធ្វើឱ្យខូចប្រយោជន៍សេដ្ឋកិច្ច និងកេរ្តិ៍ឈ្មោះជាតិលើឆាកអន្តរជាតិ។ ទន្ទឹមនឹងការទទួលស្គាល់នេះ លោក ហ៊ុន ម៉ាណែត មិនបានបង្ហាញជំហរក្នុងការបោសសម្អាតកម្ចាត់អ្នកដែលពាក់ព័ន្ធ ជាពិសេសមេខ្លោងអ្នកមានអំណាចកំពូលៗដែលកាងឧក្រិដ្ឋកម្មឆបោកតាមអនឡាញនេះឡើយ។
លោកនាយករដ្ឋមន្ត្រី ហ៊ុន ម៉ាណែត បន្តអំពាវនាវដល់ស្ថាប័នពាក់ព័ន្ធពង្រឹងប្រតិបត្តិការក្នុងយុទ្ធនាការបោសសម្អាតឧក្រិដ្ឋកម្មឆបោកតាមអនឡាញឱ្យអស់ចេញពីទឹកដីកម្ពុជា។ ជាមួយគ្នានេះ លោកក៏ស្នើឱ្យអាជ្ញាធរមានសមត្ថកិច្ច និងស្ថាប័នរដ្ឋពាក់ព័ន្ធទាំងអស់ត្រូវពង្រឹងការអនុវត្តច្បាប់ និងចាត់ទុកបញ្ហាគ្រឿងញៀនជាគោលដៅអាទិភាព និងពង្រីក កិច្ចសហប្រតិបត្តិការជាមួយបណ្ដាប្រទេសក្នុងតំបន់ ដើម្បីបង្ក្រាបបទល្មើសគ្រឿងញៀន និងស៊ើបអង្កេតលើក្រុមបណ្ដាញឧក្រិដ្ឋជនលាងលុយកខ្វក់នៅកម្ពុជា។
លោក ហ៊ុន ម៉ាណែត លើកឡើងថា យុទ្ធនាការបោសសម្អាតមជ្ឈមណ្ឌលឆបោកតាមអនឡាញចុងក្រោយនេះក៏អាចនឹងធ្វើឱ្យប៉ះពាល់ដល់សេដ្ឋកិច្ចពលរដ្ឋដែលជាម្ចាស់អាជីវកម្ម អ្នកលក់ដូរ និងម្ចាស់ផ្ទះជួលជាដើម ប៉ុន្តែលោកអះអាងថា រដ្ឋាភិបាលមិនអនុញ្ញាតឱ្យបណ្ដាញឧក្រិដ្ឋកម្មនេះបន្តមានវត្តមាននៅកម្ពុជាបន្តទៀតឡើយ។ លោកទទួលស្គាល់ថា បណ្ដាញឧក្រិដ្ឋជនដែលប្រើប្រាស់ទឹកដីកម្ពុជាប្រតិបត្តិការអំពើឧក្រិដ្ឋកម្មទាំងនេះបានធ្វើឱ្យខូចខាតផលប្រយោជន៍សេដ្ឋកិច្ច វិស័យទេសចរណ៍ និងកេរ្តិ៍ឈ្មោះកម្ពុជាលើឆាកអន្តរជាតិ។
លោក ហ៊ុន ម៉ាណែត៖ «បើយើងមិនថែទាំសេដ្ឋកិច្ច ស សេដ្ឋកិច្ចខ្មៅកាន់តែរីកវាប៉ះពាល់ដល់សេដ្ឋកិច្ចពណ៌ស វាធ្វើឱ្យប្រទេសជាតិរបស់យើងមានការលំបាក អ៊ីចឹងបានខ្ញុំសុំឱ្យមានការយោគយល់ការចូលរួម យើងត្រូវមានការវះកាត់ និងរួមគ្នា ដើម្បីបោសសម្អាតបញ្ហា (Scam) នេះឱ្យចេញពីប្រទេសយើងទាំងអស់គ្នា ដើម្បីឱ្យជាតិខ្មែរ ប្រទេសខ្មែរទាំងមូលកុំឱ្យពាក់ព័ន្ធជាមួយអាហ្នឹង។ រដ្ឋបាលរាជធានីខេត្តបានអនុវត្ត ហើយសុំបន្តតទៅទៀត ចលនានេះគឺជាចលនាដែលយើងត្រូវបន្តធ្វើដើម្បីសម្អាតផ្ទះយើង»។
លោកថ្លែងបែបនេះ ក្នុងពិធីបិទសន្និបាតបូកសរុបលទ្ធផលការងារ ឆ្នាំ២០២៥ និងលើកទិសដៅការងារឆ្នាំ២០២៦ របស់អាជ្ញាធរជាតិប្រយុទ្ធប្រឆាំងគ្រឿងញៀនកាលពីរសៀលថ្ងៃទី៦ ខែមីនា។ ទន្ទឹមនឹងការទទួលស្គាល់ពីផលប៉ះពាល់លោក ហ៊ុន ម៉ាណែត មិនបានបង្ហាញជំហរ ឬឆន្ទៈកម្ចាត់ និងស៊ើបអង្កេតសាច់ញាតិបក្ខពួកខ្លួនដូចជា លោក ហ៊ុន តូ រួមទាំងមន្ត្រីឧកញ៉ាគ្រាក់ៗដូចជាលោក លី យ៉ុងផាត់ និងលោក កុក អាន ដែលរងការចោទប្រកាន់ថា ជាមេខ្លោងកាងឧក្រិដ្ឋកម្មឆបោកតាមអនឡាញឡើយ។ ក្រៅពីនេះ ទន្ទឹមនឹងមេដឹកនាំក្រុងភ្នំពេញអំពាវនាវឱ្យពលរដ្ឋចូលរួមសហការប្រឆាំងឧក្រិដ្ឋកម្មអាជ្ញាធរនៃរបបត្រកូល ហ៊ុន បែរជាបន្តបង្ក្រាបពលរដ្ឋដែលហ៊ាននិយាយការពិត និងបន្តចាប់អ្នកកាសែតដែលរាយការណ៍ពីទីតាំងមជ្ឈមណ្ឌលឆបោកតាមអនឡាញទៅវិញ។
លោក ហ៊ុន ម៉ាណែត ក៏បន្តបដិសេធចំពោះការចោទប្រកាន់ថា ចំណូលនៃសេដ្ឋកិច្ចរបស់រដ្ឋាភិបាលកម្ពុជាទទួលបានពីឧក្រិដ្ឋកម្មឆបោកតាមអនឡាញ។ លោកបកស្រាយថា អ្នកដែលទទួលបានផលប្រយោជន៍សេដ្ឋកិច្ចពីបណ្ដាញឧក្រិដ្ឋកម្មអនឡាញគឺជាពលរដ្ឋដែលជាម្ចាស់អាជីវកម្ម និងអ្នករត់តាក់ស៊ីជាដើម ដែលមានមុខរបរ ឬប្រកបការងារនៅតំបន់មជ្ឈមណ្ឌលឆបោកតាមអនឡាញ។
ស្ថាប័នអន្តរជាតិជំនាញធំៗបានវាយតម្លៃថា កម្ពុជាអាចក្លាយជាឋានសួគ៌នៃបណ្ដាញឧក្រិដ្ឋជនបង្កើតជាអាណាចក្រមជ្ឈមណ្ឌលឆបោកតាមអនឡាញបានដូចសព្វថ្ងៃគឺដោយសារតែជាប្រទេសគ្មាននីតិរដ្ឋ និងជាប្រទេសមានអំពើពុករលួយខ្លាំងជាងគេក្នុងតំបន់អាស៊ី។
ប្រធានចលនាខ្មែរ ដើម្បីប្រជាធិបតេយ្យ (KMD) អ្នកស្រី មូរ សុខហួរ មានប្រសាសន៍ថា ទំហំនៃឧក្រិដ្ឋកម្មដែលរីកពាសពេញប្រទេស លោក ហ៊ុន ម៉ាណែត មិនអាចប្រកាសទទួលស្គាល់ ហើយគេចចេញពីការទទួលខុសត្រូវបាននោះទេ។ អ្នកស្រីថា ទាមទារឱ្យមានការបង្កើតគណៈកម្មាធិការអន្តរជាតិឯករាជ្យ ព្រោះអ្នកស្រីថា គណៈកម្មាធិការជាតិដែលរដ្ឋាភិបាលត្រកូល ហ៊ុន ដាក់ចេញបង្ក្រាបឧក្រិដ្ឋជនតាមអនឡាញនោះប្រៀបបីដូចជា «យកចោរទៅចាប់ចោរ»។ ក្រៅពីនេះ អ្នកស្រីមើលឃើញថា ចំណាត់បង្ក្រាបកន្លងមកមិនត្រឹមតែគ្មានចាប់ខ្លួនមេខ្លោងមានអំណាចកំពូលនោះទេ រដ្ឋាភិបាលត្រកូល ហ៊ុន ក៏មិនបានផ្ដល់កិច្ចគាំពារជួយដល់ជនរងគ្រោះពីអំពើឆបោកតាមអនឡាញឡើយ។
អ្នកស្រី មូរ សុខហួរ៖ «អ្នកដែលរងគ្រោះមកពីប្រទេសក្នុងសកលលោកមានរហូតដល់អាហ្វ្រិកទៀតនោះសម្លាប់ខ្លួនផង មានការធ្វើទារុណកម្មគ្រប់បែបទាំងអស់នៅមជ្ឈមណ្ឌលឆបោកហ្នឹង។ តាមច្បាប់អន្តរជាតិអ្នកទាំងនោះគឺជាជនរងគ្រោះ អ្នកនោះត្រូវតែទទួលបានការពារពីប្រទេសរបស់ខ្លួន ព្រមទាំងប្រទេសដែលសព្វថ្ងៃគ្នានៅឯណា គ្នានៅប្រទេសកម្ពុជា។ យើងអត់មានឃើញថា រដ្ឋាភិបាលប្រទេសកម្ពុជាមានចាត់វិធានការច្បាស់លាស់ក្នុងការការពារអ្នកទាំងនោះទេ។ អ្នកទាំងនោះបានរត់ចេញមកហើយបើគ្នាមានថវិកា គ្នាមានមធ្យោបាយទៅប្រទេសវិញដោយខ្លួនឯង»។
ក្នុងរយៈពេលប៉ុន្មានឆ្នាំចុងក្រោយនេះ ក្រុមឧក្រិដ្ឋជនឆបោកតាមអនឡាញបានជ្រើសយកប្រទេសកម្ពុជាបង្កើតជាអាណាចក្រមជ្ឈមណ្ឌលឆបោកតាមអនឡាញពាសពេញប្រទេសបានដោយងាយស្រួល តាមរយៈកសាងទំនាក់ទំនង និងឃុបឃិតជាមួយមន្ត្រីកំពូលៗក្នុងជួររដ្ឋាភិបាល និងឧកញ៉ាឈ្មួញទុច្ចរិតមួយចំនួននៅកម្ពុជា។ ឧក្រិដ្ឋជនខ្លះទៀតដូចជា ចេន ហ្ស៊ី ចូលមកពង្រីកមជ្ឈមណ្ឌលឆបោកតាមអនឡាញនៅកម្ពុជាតាមរយៈការទិញសញ្ជាតិខ្មែរពីរដ្ឋាភិបាលត្រកូល ហ៊ុន និងទទួលបានការកាងការពារដោយផ្ទាល់ ដើម្បីពង្រីកបណ្ដាញឧក្រិដ្ឋកម្ម ដែលបង្កការឈឺចាប់ដល់ជនរងគ្រោះតាមរយៈការឆបោកលុយរាប់ពាន់លានដុល្លារ និងការធ្វើទារុណកម្មមនុស្សរាប់សិបនាក់នៅជុំវិញពិភពលោក៕
