ពលរដ្ឋចាញ់បោកក្រុមហ៊ុន ប្រ៊ីលានស៊ីធី របស់អតីតឧកញ៉ា ឡេង ចាន់ណា ព្រមានចេញតវ៉ាឆាប់ៗ បើតុលាការ និងរដ្ឋាភិបាល នៅតែមិនអើពើដោះស្រាយ ជូនពួកគាត់។ ការព្រមាននេះ បន្ទាប់ពីសំណុំរឿងឆបោកប្រាក់ពលរដ្ឋ ប្រមាណ ៣០០ លានដុល្លារ បន្តអូសបន្លាយដោយគ្មានដំណោះស្រាយ បើទោះបីជាពលរដ្ឋ ស្វែងរកកិច្ចអន្តរាយគមន៍ពីរដ្ឋាភិបាល និងស្ថាប័នពាក់ព័ន្ធឲ្យជួយក៏ដោយ។
ពលរដ្ឋចាញ់បោកក្រុមហ៊ុនប្រ៊ីលាន ស៊ីធី អះអាងថា ប្រសិនបើតុលាការមិនកំណត់ពេលវេលាជាក់លាក់ ក្នុងការដោះស្រាយសំណងឲ្យបានឆាប់នោះទេ ពួកគាត់ជា ជនរងគ្រោះ នឹងប្រមូលផ្ដុំគ្នាតវ៉ាទ្រង់ទ្រាយធំនៅមុខផ្ទះនាយករដ្ឋមន្ត្រី។
តំណាងពលរដ្ឋចាញ់បោកក្រុមហ៊ុន ប្រ៊ីលាន ស៊ីធី លោកស្រី ហាក់ ណារ៉េត ប្រាប់ទូរទស្សន៍អាស៊ីសេរី នៅថ្ងៃទី១៩ ខែមីនាថា រយៈពេលប្រមាណ ៣ឆ្នាំហើយ ដែលពួកគាត់រង់ចាំដំណោះស្រាយពីស្ថាប័នតុលាការ ខណៈក្រសួងយុត្តិធម៌បានត្រឹមចេញក្រដាសមួយសន្លឹកឲ្យតុលាការពន្លឿន។ លោកស្រីបន្តថា ការអូស បន្លាយ នេះ ធ្វើឲ្យពួកគាត់រងគ្រោះផ្ទួនៗគ្នា ដោយអ្នកខ្លះសម្លាប់ខ្លួន ខ្លះបែកបាក់គ្រួសារ កូនៗបោះបង់ការសិក្សា ដោយសារ គ្រួសារជាប់បំណុលធនាគារវ័ណ្ឌក។
លោកស្រី ហាក់ ណារ៉េត៖ «នៅតែថាពន្លឿនពួកខ្ញុំម៉េចសុខចិត្ត ព្រោះអីរងគ្រោះនេះ មិនមែន តិចឆ្នាំទេ វា ៣ ឆ្នាំហើយ ធនាគារចង់អូសកទៅហើយ ទៅភូមិក៏គេហៅ ទៅឃុំក៏ គេហៅដីស្រែ ដែលឪពុកម្ដាយចែកឲ្យក៏លក់អស់ លុយក៏អស់ទៀត អ៊ីចឹងសួរថា ប្រជាពលរដ្ឋសង្ឃឹមអីទៀត បើសិនជាអត់មានដំណោះស្រាយបែបនេះ គឺពួកខ្ញុំអត់ អាចនៅរង់ចាំទៀតទេ ព្រោះពីវា៣ ឆ្នាំ បើសិនជានៅរង់ចាំ គាត់ថា គាត់ធ្វើហើយ គាត់ពន្លឿនហើយ ប៉ុន្តែបើនៅតែប៉ុននេះទៀត ពួកខ្ញុំមិនងាប់ហើយ»។
តំណាងពលរដ្ឋម្នាក់ទៀត គឺលោកស្រី ហាប ហៀម លើកឡើងថា ពួកគាត់បាន លក់ទ្រព្យសម្បត្តិដោះបំណុលធនាគារ និងសងឯកជន ពីព្រោះតែ រង់ចាំ ដំណោះស្រាយពីតុលាការ ប៉ុន្តែស្ថាប័ននេះ ចេះតែពន្យារពេល ដោយលើក ហេតុផលថា ជនរងគ្រោះមិនទាន់ចូលបំភ្លឺនៅតុលាការ។ លោកស្រីចាត់ទុកការ លើកឡើង របស់តុលាការរយៈពេលប្រមាណ ២ ឆ្នាំនេះ បង្ហាញថា តុលាការហាក់ គ្មានឆន្ទៈក្នុងការដោះស្រាយជូនពួកគាត់នោះទេ។
លោកស្រី ហាប ហៀម ប្រាប់ទូរទស្សន៍អាស៊ីសេរីនៅថ្ងៃទី១៩ ខែមីនាថា ជនរង គ្រោះជាង ៨ពាន់នាក់អស់ការអត់ធ្មត់ ទើបគ្រោងនាំគ្នាប្រមូលផ្ដុំតវ៉ាជាថ្មីទៀត ពីព្រោះការស្វែងរកកិច្ចអន្តរាគមន៍ពីក្រសួងយុត្តិធម៌ និងរដ្ឋាភិបាលកន្លងមកមិនបានផលអ្វីសោះ។
លោកស្រី ហាប ហៀម៖ «នាំគ្នាធ្វើបាតុកម្មចំនួន ៣ថ្ងៃហ្នឹង សុំធ្វើផ្ទះនាយករដ្ឋមន្ត្រីតែម្ដង ពួកខ្ញុំបានដាក់ទៅខាងតុលាការរួចហើយ ប្រាប់ទៅខាងតុលាការរួចហើយ បើនៅតែអត់មានដំណោះស្រាយទៀត ពីព្រោះអ្វីដែលខ្ញុំទាមទារមក វាយូរឆ្នាំហើយ អត់មានដំណោះស្រាយអ្វីទាំងអស់។ អ្វីដែលតុលាការលើកឡើងមក ជនរងគ្រោះខ្ញុំ ទាំងអស់គ្នា ទទួលបានដំណឹងហើយ គឺអស់សង្ឃឹម ក្នុងប្រព័ន្ធច្បាប់ អស់សង្ឃឹមនឹងតុលាការមែនទែន អត់មានសង្ឃឹមអ្វីទៅនឹងតុលាការលើកឡើងទេ»។
ទូរទស្សន៍អាស៊ីសេរី មិនអាចសុំការអត្ថាធិប្បាយ ពីអ្នកនាំពាក្យសាលាដំបូងខេត្តសៀមរាបលោក យិន ស្រាង ទាក់ទងនឹងរឿងនេះ បានទេ នៅថ្ងៃទី១៩ ខែមីនា។
សំណុំរឿងរកស៊ីឆបោកដ៏ធំ របស់ក្រុមហ៊ុន ប្រ៊ីលានស៊ីធី រយៈពេល ជាង២ ឆ្នាំមកនេះ តុលាការបានចាប់ឃុំខ្លួននាយិកាក្រុមហ៊ុន អ្នកស្រី ឡេង ចាន់ណា និងបក្ខពួក ប្រមាណ១០នាក់ដាក់ពន្ធធនាគារ។
បន្ថែមពីនេះ កាលពីខែសីហាកន្លងទៅ អង្គភាពប្រឆាំងអំពើពុករលួយ (ACU) សម្រេចព្យួរតំណែងអនុប្រធានអង្គភាពរបស់ខ្លួន និងមានតួនាទី ជារដ្ឋលេខាធិការ ក្រសួងអប់រំ គឺលោក ស៊ាន បូរ៉ាត់ ព្រមទាំងព្យួរតំណែងអនុរដ្ឋលេខាធិការក្រសួងការពារជាតិឧត្តមសេនីយ៍ ស ថាវី ដោយសារជាប់ពាក់ព័ន្ធករណីឆបោក លុយរាប់លានដុល្លារជាមួយអ្នកស្រី ឡេង ចាន់ណា ដែរ។ លោក ស៊ាន បូរ៉ាត់ គឺជាមនុស្សជំនិតរបស់លោក ហ៊ុន ម៉ាណែត ព្រោះលោកគឺជាអនុប្រធានយុវជនគណបក្សប្រជាជនកម្ពុជា ដែលមានលោក ហ៊ុន ម៉ាណែត ជាប្រធាន។
អ្នកឃ្លាំមើលលើកឡើងថា ការពន្យារដោះស្រាយរបស់តុលាការនេះដោយសារ អ្នកនៅពីក្រោយខ្នងសំណុំរឿងឆបោកលុយពលរដ្ឋចំនួន ៣០០លានដុល្លារ គឺ ជាអ្នកមានអំណាច ទើបតុលាការដោះស្រាយមិនចេញ ខណៈអ្នកស្រី ឡេង ចាន់ណា កាលនៅមានសេរីភាពធ្លាប់បាននិយាយថា ការចាត់ការណាមួយលើក្រុមហ៊ុន ប្រ៊ីលានស៊ីធី របស់អ្នកស្រី ស្មើនឹងប៉ះពាល់លោក ហ៊ុន ម៉ាណែត រហូតដល់អ្នកស្រី ហ៊ានប្រកាសប្រាប់សមាជិក ក្រុមហ៊ុនថា ប្រ៊ីលានស៊ីធី គឺជាក្រុមហ៊ុនរបស់លោក ហ៊ុន ម៉ាណែត៕
