អាជ្ញាធររបបក្រុងភ្នំពេញបន្តចាប់ខ្លួនមន្ត្រីជាន់ខ្ពស់គណបក្សកម្លាំងជាតិ១រូបទៀត ខណៈកិច្ចប្រជុំកំពូលហ្វ្រង់កូហ្វូនីនឹងចាប់ផ្តើមបើកនៅថ្ងៃស្អែកនេះ។ មន្ត្រីសិទ្ធិមនុស្សយល់ថា ការបន្តចាប់ខ្លួនសកម្មជនគណបក្សប្រឆាំង និងធ្វើទុក្ខបុកម្នេញលើសកម្មជនសិទ្ធិមនុស្ស ពលរដ្ឋ និងបរិស្ថានជាដើម អាចជះឥទ្ធិពលអាក្រក់ដល់ទំនាក់ទំនងការទូតជាមួយសហគមន៍អន្តរជាតិ។
ស្របពេលមេដឹកនាំនៃបណ្តាប្រទេសជាច្រើន កំពុងមានវត្តមានជាបន្តបន្ទាប់នៅកម្ពុជា ដើម្បីចូលរួមក្នុងកិច្ចប្រជុំកំពូលហ្វ្រង់កូហ្វូនីដែលនឹងចាប់ផ្តើមប្រព្រឹត្តទៅនៅថ្ងៃទី១៤ វិច្ឆិកា នេះ អាជ្ញាធររបបក្រុងភ្នំពេញបន្តធ្វើទុក្ខបុកម្នេញ និងចាប់ខ្លួនមន្ត្រីជាន់ខ្ពស់គណបក្សជំទាស់ជាបន្តបន្ទាប់។
ជាក់ស្តែង កាលពីថ្ងៃទី១០ វិច្ឆិកា ប្រធានគណៈកម្មាធិការប្រតិបត្តិគណបក្សកម្លាំងជាតិក្រុងបូកគោ លោក បេង រ៉ាវ័យ អាយុ ៤២ឆ្នាំ ត្រូវបានស្នងការនគរបាលខេត្តកំពត ចាប់ខ្លួន ក្រោយរូបគាត់ត្រូវបានគេបញ្ឆោតហៅឱ្យទៅទីស្នាក់ការសង្កាត់ព្រែកត្នោត ក្នុងក្រុងបូកគោ។
អ្នកនាំពាក្យគណបក្សកម្លាំងជាតិ លោក សុខ គឹមសេង ប្រាប់ទូរទស្សន៍អាស៊ីសេរីថា អាជ្ញាធរមានសមត្ថកិច្ច បានប្រើប្រាស់គ្រប់រូបភាពក្នុងការឃាត់ខ្លួនសកម្មជនគណបក្សកម្លាំងជាតិ ដូចជាការហៅទៅជួប ឬហៅទៅពិភាក្សានៅកន្លែងណាមួយ រួចហើយក៏ចាប់ខ្លួនតែម្តង ដោយមិនបានប្រើប្រាស់គោលការណ៍ច្បាប់ឲ្យបានត្រឹមត្រូវនោះទេ។ លោកថា អាជ្ញាធរចាប់ខ្លួន លោក បេង រ៉ាវ័យ ដោយគ្មានមូលហេតុឡើយ។ លោកទទូចឲ្យរដ្ឋាភិបាល គួរមានការប្តេជ្ញាចិត្តខ្ពស់ក្នុងការអនុវត្តគោលការណ៍ប្រជាធិបតេយ្យសេរីពហុបក្សស្របតាមរដ្ឋធម្មនុញ្ញដែលប្រជាពលរដ្ឋជាម្ចាស់អំណាច មានសិទ្ធិចូលរួមនយោបាយ និងបញ្ចេញមតិ ហើយគួរអនុវត្តឲ្យស្មើភាពគ្នាចំពោះមុខច្បាប់។
«គោលដៅរបស់គណបក្សកម្លាំងជាតិ យើងអត់មានអីផ្សេងក្រៅអំពីការចូលរួមការបោះឆ្នោតតាមគោលការណ៍ប្រជាធិបតេយ្យទេអឺដែលរៀបចំដោយអឺសេរី ត្រឹមត្រូវ និងយុត្តិធម៌ទេ តែបើសិនជាបន្តការធ្វើទុក្ខបុកម្នេញដល់អឺគណបក្សក្រៅរដ្ឋាភិបាល ជាពិសេសគណបក្សកម្លាំងជាតិអឺការបោះឆ្នោតទៅថ្ងៃខាងមុខអឺយើងពិបាកនៅក្នុងការអឺទទួលថា ជាអឺការរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ណាស់។»
លោក សុខ គឹមសេង
ការចាប់ខ្លួនលោក បេង រ៉ាវ័យ គឺកើតឡើងក្នុងថ្ងៃតែមួយជាមួយការចាប់ខ្លួនសមាជិកគណៈកម្មាធិការនាយក និងជាសមាជិកក្រុមការងារនៃគណបក្សកម្លាំងជាតិ ខេត្តកំពត លោក ឆាយ ជំនោ ដែលត្រូវអាជ្ញាធរចាប់ខ្លួនដោយគ្មានមូលហេតុដូចគ្នាកាលពីថ្ងៃទី១០ វិច្ឆិកា។
ទូរទស្សន៍អាស៊ីសេរី នៅមិនទាន់អាចទាក់ទងស្នងការនគរបាលខេត្តកំពត លោក ម៉ៅ ចន្ទ័មធុរិទ្ធ ដើម្បីសុំការបំភ្លឺជុំវិញរឿងនេះបានទេ នៅថ្ងៃទី១៣ ខែវិច្ឆិកានេះ ។
បើតាម លោក សុខ គឹមសេង គិតត្រឹមថ្ងៃទី១៣ វិច្ឆិកានេះ មានសកម្មជន និងថ្នាក់ដឹកនាំគណបក្សកម្លាំងជាតិសរុបចំនួន ២១ នាក់ហើយ ដែលកំពុងជាប់ឃុំនៅក្នុងពន្ធនាគារ ខណៈ ៨រូបផ្សេងទៀត បានបំពេញលក្ខខណ្ឌច្បាប់នៅក្រៅឃុំ។
ប្រធានសមាគមការពារសិទ្ធិមនុស្សអាដហុក លោក នី សុខា មានប្រសាសន៍ថា រដ្ឋាភិបាលហាក់មិនឆ្លើយតបជាវិជ្ជមាននឹងសំណើររបស់អន្តរជាតិ ដែលកំពុងទទូចទាមទារឲ្យរដ្ឋាភិបាល ដោះលែងសកម្មជនគណបក្សប្រឆាំង សកម្មជនសិទ្ធិមនុស្ស និងបរិស្ថាន ជាបន្តបន្ទាប់នៅមុនកិច្ចប្រជុំកំពូលនេះឡើយ។ លោកថា ការបន្តចាប់ខ្លួនសកម្មជននយោបាយនេះ គឺបង្ហាញឲ្យឃើញយ៉ាងច្បាស់អំពីការរឹតត្បិតសេរីភាពរបស់សកម្មជននយោបាយនៅមុនការបោះឆ្នោត។ លោកអះអាងថា បើរដ្ឋាភិបាលនៅតែបន្តអូសបន្លាយធ្វើទុក្ខបុកម្នេញមកលើសកម្មជននយោបាយ សកម្មជនបរិស្ថាន និងពលរដ្ឋស្លូតត្រង់បន្តទៀតនោះ វានឹងជះឥទ្ធិពលមិនល្អដល់ដំណើរការនៃការកសាងប្រទេស ការផ្សះផ្សា ការបង្រួបបង្រួមជាតិ និងធ្វើឲ្យស្ថានភាពនៃការគោរពសិទ្ធិមនុស្សកាន់តែធ្លាក់ចុះជាងនេះទៀត។
«យើងសង្ឃឹមថា ការបោះឆ្នោតនាពេលខាងមុខ គួរណាស់តែរដ្ឋាភិបាល អាជ្ញាធរមានការបើកឲ្យទូលាយនូវអឺសេរីភាពខាងអឺនយោបាយ ខាងការបញ្ចេញមតិ សេរីភាពជួបជុំសមាគមអីជាដើមប៉ុន្តែផ្ទុយទៅវិញយើងឃើញថា អាជ្ញាធរនៅតែបន្តធ្វើការចាប់ខ្លួន ធ្វើការយាយី អឺទៅដល់សកម្មជនទាំងអស់ហ្នឹងអឺតទៅទៀត។ ដូច្នេះ អ្វីដែលខ្ញុំយល់ថា ប្រសិនជាការបន្តអូសបន្លាយនៅតែមានការអូសបន្លាយក្នុងការធ្វើទុក្ខបុកម្នេញទៅលើសកម្មជននយោបាយ សកម្មជនអីទាំងអស់ហ្នឹងតទៅទៀតទេ មិនមែនជាផលល្អសម្រាប់អឺរដ្ឋាភិបាលកម្ពុជាក្នុងការអឺផ្សារភ្ជាប់នូវទំនាក់ទំនងល្អ កិច្ចសហប្រតិបត្តិការល្អជាមួយបណ្តាប្រទេស ពិសេសគឺអឺប្រទេសដែលក្នុងអឺជាសហគមន៍អឺរ៉ុបទេបាទ»។
លោក នី សុខា
ខណៈអាជ្ញាធរបង្កើនការចាប់ខ្លួនសកម្មជននយោបាយបក្សប្រឆាំងឥតឈប់ឈរ សង្គមស៊ីវិលជាតិ និងអន្តរជាតិ បានបង្ហាញក្ដីព្រួយបារម្ភ ចំពោះស្ថានភាពសិទ្ធិមនុស្ស និង លទ្ធិប្រជាធិបតេយ្យ នៅកម្ពុជា ដែលកំពុងធ្លាក់ចុះយ៉ាងខ្លាំង។ ពួកគាត់អំពាវនាវឲ្យរដ្ឋាភិបាលកម្ពុជា ធានានូវសិទ្ធិសេរីភាពជាមូលដ្ឋានរបស់ពលរដ្ឋ លើកកម្ពស់ការចូលរួមតាមបែបប្រជាធិបតេយ្យ ដោះលែងអ្នកទោសនយោបាយ និងមនសិការជាង១០០នាក់ ដែលកំពុងជាប់ឃុំដោយសារការប្រើប្រាស់សិទ្ធិរបស់ខ្លួន។
ចំណែក គណបក្សកម្លាំងជាតិ អំពាវនាវដល់អាជ្ញាធរបញ្ឈប់ការចាប់ខ្លួនថ្នាក់ដឹកនាំ យុវជន និងសកម្មជនគណបក្សប្រឆាំង និងដោះលែងលោក បេង រ៉ាវ័យ និងអ្នកទោសមនសិការទាំងអស់ឲ្យមានសេរីភាពឡើងវិញ៕
