ពលរដ្ឋនិង មន្ត្រីបក្សប្រឆាំងថា ប្រធានព្រឹទ្ធសភា លោក ហ៊ុន សែន គួរតែចុះសួរសុខទុក្ខកងទ័ពរងបួស គ្រួសារកងទ័ពពលី និង ជនភៀសសឹក រាប់ម៉ឺននាក់ ដែលបានបាត់បង់ដីធ្លី និងផ្ទះសម្បែង ឱ្យបានញឹកញាប់ នោះទើបជារឿងប្រសើរ។ ការស្នើនេះ ក្រោយពីលោក ហ៊ុន សែន បានទៅសួរសុខទុក្ខ តារាកំប្លែងម្នាក់ ដែលសម្រាកព្យាបាលជំងឺនៅមន្ទីរពេទ្យកាលម៉ែត្រភ្នំពេញ និងបង្ហោះរូបថតនៅលើហ្វេសប៊ុក។
ចាប់តាំងពីកម្ពុជាត្រូវបានយោធាថៃឈ្លានពានទឹកដី និងបង្កសង្គ្រាមសម្លាប់ពលរដ្ឋខ្មែរ និងកងទ័ព នៅតាមព្រំដែន អស់ជាច្រើននាក់មក ប្រធានព្រឹទ្ធសភា លោក ហ៊ុន សែននិងជាអគ្គភស្តុភារកំពូលនៃកងយោធពលខេមរភូមិន្ទ នៅមិនទាន់ចុះមូលដ្ឋានបានម្ដង ដើម្បីជួបសួរសុខទុក្ខគ្រួសារកងទ័ពពលី កងទ័ពដែលកំពុងសម្រាកព្យាបាលនៅតាមមន្ទីរពេទ្យ និងជនភៀសសឹកនោះទេ។ ករណីនេះ មន្ត្រីបក្សប្រឆាំង និងពលរដ្ឋរិះគន់ថា លោក ហ៊ុន សែន ហាក់ពុំបានអើពើអំពីទុក្ខលំបាករបស់ពលរដ្ឋ និងកងទ័ព នោះឡើយ។
ពលការិនីម្នាក់ធ្វើការនៅប្រទេសកូរ៉េខាងត្បូង លោកស្រី វង់ សារ៉ែម ប្រាប់ទូរទស្សន៍អាស៊ីសេរីនៅថ្ងៃទី ២៣ ខែមីនា ថា លោក ហ៊ុន សែន គួរតែ យកចិត្តទុក្ខខ្ពស់ទៅលើកងទ័ពតាមព្រំដែន ដោយផ្ដល់ស្បៀង និងផ្គត់ផ្គង់អាវុធទំនើបៗដល់កងទ័ព និងសួរសុខទុក្ខជនភៀសសឹក ដែលកំពុងជួបការលំបាក។
លោកស្រីបន្តថា ការដែល លោក ហ៊ុន សែន ទៅសួរសុខទុក្ខតារាកំប្លែង ដែលកំពុងសម្រាកព្យាបាលនៅមន្ទីរពេទ្យ គឺជារឿងល្អហើយ ប៉ុន្តែហាក់ធ្វើឡើងមិនចំគោលដៅជាអាទិភាព។ កញ្ញា រិះគន់ លោក ហ៊ុន សែន ថា ជាមេដឹកនាំដែលតែងតែបង្កើតព្រឹត្តិការ ដើម្បីបន្លំភ្នែកមហាជនថាខ្លួនជាមេដឹកនាំល្អ ហើយ តែងតែខ្វល់ពីទុក្ខលំបាករបស់ពលរដ្ឋគ្រប់ទីកន្លែង។
លោកស្រី វង់ សារ៉ែម៖ «យើងឃើញហើយ បញ្ហានៅព្រំដែន។ បញ្ហាជនភៀសសឹក គឺគាត់ត្រូវការជំនួយខ្លាំងមែនទែន ហើយមានវិបត្តិផ្លូវចិត្តផង វិបត្តិបំណុលផង។ ពួកគាត់ត្រូវបានគេរឹតអូសផ្ទះ ដោយសារថៃ ឈ្លានពានផង ប៉ុន្តែ ហ៊ុន សែន មិនទៅបំពេញកិច្ចការដែលត្រូវធ្វើ បែរជាទៅយកឧស្សាហ៍តារាកំប្លែងនាយកក្រិន ដែលឃើញមហាជនចាប់អារម្មណ៍អ៊ីចឹងទៅ»។
ប្រធានព្រឹទ្ធសភា លោក ហ៊ុន សែន នៅថ្ងៃទី២២ ខែមីនា បានបង្ហោះសារនៅលើគណនីហ្វេសប៊ុក របស់លោកដោយរៀបរាប់ ថា លោកបានឆ្លៀត ទៅសួរសុខទុក្ខតារាកំប្លែងម្នាក់ ឈ្មោះ នាយក្រិន ដែលកំពុងសម្រាកព្យាបាលជំងឺ នៅមន្ទីរពេទ្យកាល់ម៉ែត ភ្នំពេញ។
ភ្ជាប់ជាមួយរូបភាពជាង១០សន្លឹក លោក ហ៊ុន សែន ក៏បានកោតសរសើរចំពោះសិល្បករ សិល្បការិនីដែលចូលរួមអាណិត នាយក្រិន ពិសេស ស្រីនិច ហៅ ប្រិមប្រិយ និងប្អូនរបស់នាយក្រិន ដែលបាន បោះបង់ការងារចោល ដើម្បីមកមើលថែទាំ នាយក្រិន នៅក្នុងមន្ទីរពេទ្យ។ ទន្ទឹមគ្នានោះ លោក ហ៊ុន សែន ក៏ហាក់ខ្វល់ខ្វាយសម្បើមណាស់ បានដើរតួនាទីចាត់ចែងឱ្យស្រីនិច ដែលជាប្អូននាយក្រិន ទៅជួយមើលថែកូនៗនាយក្រិន ទាំង៣នាក់ ដែលកំពុងរស់នៅខេត្តបាត់ដំបងជាបណ្ដោះអាសន្ន។
ទោះជាបែបនេះក្ដី គេនៅមិនទាន់ឃើញ លោក ហ៊ុន សែន ទៅជួបសួរសុខទុក្ខជនភៀសសឹក និងកងទ័ពតាមព្រំដែន ដែលកំពុង ខ្វះខាតស្បៀង ទឹកប្រើប្រាស់ និង គ្រួសារកងទ័ព ដែលមាន ឪពុក ឬ កូនបានពលីនៅក្នុងសមរភូមិ សង្គ្រាមជាមួយថៃនោះទេ។ ករណីនេះ អ្នកឃ្លាំមើលបញ្ហានយោបាយសង្គម ជំរុញឱ្យ លោក ហ៊ុន សែនគួរតែចេះបែងចែកការងារ ជាអាទិភាព និងមានប្រយោជន៍ធំដល់ជាតិ ល្អជាជាងផ្ដោតលើកិច្ចការងារតូចតាច។
ប្រមុខដឹកនាំស្ថាប័ន អធិបតេយ្យជាតិ ព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន ចាត់ទុក លោក ហ៊ុន សែន ទៅសួរសុខទុក្ខតារាកំប្លែងនាយក្រិនគឺគ្មានប្រយោជន៍ អ្វីនោះទេ ព្រោះកិច្ចការងារនេះ លោក ហ៊ុន សែន អាចឱ្យជំនួយការ ឬមន្ត្រីថ្នាក់ក្រោមជួបបាន ប្រសិនបើលោក ហ៊ុន សែន ពិតជាមានចិត្តធម៌មែននោះ។ លោកហាក់មើលមិនឃើញសោះថានេះ ជាអំពើចិត្តធម៌ ពិតប្រាកដ របស់ លោក ហ៊ុន សែន ក្រៅតែពី សកម្មភាពនយោបាយប្រជាភិថុតិ ដែលលោកតែងធ្វើ ដើម្បីបន្លំស្ថានការណ៍ ឬចង់លាក់បាំងភាពកម្សោយនៃការដឹកនាំរបស់រដ្ឋាភិបាលត្រកូល«ហ៊ុន»។
លោក អ៊ុំ សំអាន៖ «ត្រកូលហ៊ុននេះធ្វើនយោបាយបោកប្រាស់ប្រជាពលរដ្ឋអត់យកចិត្តទុកដាក់ចំពោះទាហានជួរមុខហ្នឹងហើយ បានធ្វើឱ្យយើងបាត់បង់ទឹកដី។ ច្បាំងចាញ់ថៃធ្វើឱ្យបាត់បង់ទឹកដីដល់ទៅ៥១ទីតាំង»។
ស្រដៀងគ្នានេះ មហាជនផ្ទុះការរិះគន់កូនប្រុសពៅ លោក ហ៊ុន សែន គឺលោកឧបនាយករដ្ឋមន្ត្រី ហ៊ុន ម៉ានី ដែលគ្រោង រៀបចំកម្មវិធីនគរសង្ក្រាន្ត រាំលេងសប្បាយដើម្បីអបអរសាទរថ្ងៃចូលឆ្នាំខ្មែរប្រពៃណីជាតិ នៅជំរុំភៀសសឹក និងនៅភ្នំពេញ ខណៈពលរដ្ឋកំពុងតែកើតទុក្ខ ដោយសារតែបាត់បង់ ផ្ទះសម្បែង និង ទឹកដី ក្រោយពីយោធាថៃបានរំលោភយកអស់។ អ្នកខ្លះបាន លើកឡើង ថា លោក ហ៊ុន ម៉ានី ហាក់មិនចេះខ្មាសភាគីថៃ ដែលកំពុងកាន់កាប់ដីធ្លីខ្មែរ និងកំពុងតែសស្រាក់សស្រាំ ក្នុងការសាងសង់សំណង់រឹង ដើម្បី គ្រប់គ្រង់ដីខ្មែរជាអចិន្ត្រៃយ៍។
ត្រឡប់មក លោក ហ៊ុន សែន វិញ បើទោះជាប្រទេសជាតិកំពុងស្ថិតក្នុងស្ថានភាពសេដ្ឋកិច្ចមិនប្រាកដប្រជាដោយសារសង្គ្រាមនៅតំបន់មជ្ឈិមបូព៌ា និងពលរដ្ឋបាត់បង់ផ្ទះ ដីធ្លី ដោយសារយោធាថៃឈ្លានពានក្តី លោកហាក់ខ្វល់ តែពីរឿងបង្ហោះវីដេអូ និង បទចម្រៀងរៀបរាប់ ពីគ្រួសារត្រកូល«ហ៊ុន» បែបមនោសញ្ចេតនា ស្នេហា និងកោតសរសើរពីការដឹកនាំរបស់ខ្លួនប៉ុណ្ណោះ។ អ្នកឃ្លាំមើល និងពលរដ្ឋជំរុញឱ្យរដ្ឋាភិបាល គួរតែគិតគូរពីផលប្រយោជន៍ជាតិ និងប្រជាជនជាធំ មិនគួរគិតតែពីរឿងបុគ្គល និង ប្រយោជន៍គ្រួសារនិយមនោះទេ៕
