នាយករដ្ឋមន្ត្រី លោក ហ៊ុន ម៉ាណែត ព្រមានដកអាជ្ញាប័ណ្ណក្រុមហ៊ុនណាដែលនាំចូលប្រេងពីប្រទេសថៃ។ ការព្រមាននេះ ធ្វើឡើងបន្ទាប់ពីសារព័ត៌មានថៃ រាយការណ៍ថា មានការលួចនាំប្រេងខុសច្បាប់ពីប្រទេសថៃ ចូលមកកម្ពុជា។
នាយករដ្ឋមន្ត្រី ហ៊ុន ម៉ាណែត នៅថ្ងៃទី៣ ខែមេសានេះ បានបញ្ជាឲ្យរដ្ឋមន្ត្រី ក្រសួងរ៉ែ និងថាមពល លោក កែវ រតនៈ អគ្គនាយកអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម រួមទាំង លោក ស ថេត អគ្គស្នងការនគរបាលជាតិ ត្រូវស្រាវជ្រាវឲ្យឃើញមុខសញ្ញាពាក់ព័ន្ធទាំងអស់ ដែលនាំប្រេងពីថៃចូលកម្ពុជា ហើយត្រូវចាត់វិធានការច្បាប់ឲ្យបានតឹងបំផុត។ លោក ហ៊ុន ម៉ាណែត សរសេរ នៅលើហ្វេសប៊ុករបស់លោកថា ប្រសិនជាមានពាក់ព័ន្ធជាមួយក្រុមហ៊ុនប្រេងណាមួយ ត្រូវដកអាជ្ញាប័ណ្ណ។ នាយករដ្ឋមន្ត្រី អះអាងដែរថា បើពាក់ព័ន្ធមន្ត្រីរាជការ ឬកងកម្លាំងប្រដាប់អាវុធកម្ពុជា ត្រូវបញ្ចប់តួនាទី និងបណ្ដេញចេញពីក្របខណ្ឌ ជាកំហិត មិនថាបុគ្គលនោះមានតួនាទី ឬឋានន្តរស័ក្តិប៉ុណ្ណានោះទេ។
ការបញ្ជានេះ ធ្វើឡើងបន្ទាប់ពីបណ្ដាញព័ត៌មាន ដឹ នេហ្សិន (The Nation ) របស់ថៃ រាយការណ៍កាលពីថ្ងៃទី០២ ខែមេសា ថា នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក អានុទីន ចាន់វីរៈគុល (Anutin Charnvirakul) បានបើកការវាយប្រហារខ្លាំងៗ ទៅលើក្រុមអ្នករត់ពន្ធប្រេងឥន្ធនៈខុសច្បាប់ ចូលប្រទេសកម្ពុជា។ លោក អានុទីន បានហៅពួកអ្នកនាំប្រេងឥន្ធនៈចូលកម្ពុជា ថាជា «ជនក្បត់ជាតិ» និង បង្កការគំរាមកំហែងសន្តិសុខជាតិ។
ក្នុងសន្និសីទសារព័ត៌មានកាលពីថ្ងៃទី០២ ខែមេសា លោក អានុទីន បានបញ្ជាឲ្យមានការបង្ក្រាបទ្រាយទ្រាយធំ លើការរត់ពន្ធប្រេងឥន្ធនៈខុសច្បាប់ចូលមកកម្ពុជា ដោយពាក់ស្លាកក្រុមហ៊ុនដែលគាំទ្រដោយសាជីវកម្ម។ ការបង្ក្រាបដ៏ធំរបស់ថៃនេះ គឺជាប្រតិបត្តិការរួមកម្រិតខ្ពស់ ដែលមានការចូលរួមពីនគរបាល កម្លាំងយោធា និងការិយាល័យប្រឆាំងការលាងលុយកខ្វក់។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី ចាត់ទុកការព្រមានរបស់លោក ហ៊ុន ម៉ាណែត ថា គ្រាន់តែជានយោបាយប្រជាភិថុតិ និងជាការសម្ដែងសាច់ដុំតាមទម្លាប់ចាស់ ដើម្បីបិទបាំងភាពអសកម្មមន្ត្រីរបស់ខ្លួនតែប៉ុណ្ណោះ។ លោកថា កន្លងមក មុននឹងមានភាគីថៃចេញមុខទម្លាយរឿងរ៉ាវរត់ពន្ធនេះ រដ្ឋាភិបាលហាក់ធ្វើមិនដឹងមិនឮ ហើយបណ្ដោយឲ្យមានការនាំ ប្រេង និងទំនិញខុសច្បាប់ចូលកម្ពុជា យ៉ាងអណាធិបតេយ្យ។
លោក សេង វណ្ណលី យល់ថា ជាធម្មតា រដ្ឋាភិបាលលោក ហ៊ុន ម៉ាណែត ចេញបញ្ជាឲ្យបង្ក្រាបម្ដងៗ លុះត្រាតែមានសម្ពាធពីខាងក្រៅ ឬមានការរិះគន់ខ្លាំងៗ តាមបណ្ដាញសង្គម ប៉ុន្តែក្រោយពេលរឿងរ៉ាវស្ងប់ស្ងាត់ទៅវិញ យុទ្ធនាការ បង្ក្រាបក៏ស្ងាត់ដែរ។ លោកថា បើលោក ហ៊ុន ម៉ាណែត ចង់បង្ហាញឆន្ទៈកែទម្រង់ កម្ចាត់អំពើល្មើសឲ្យពិតប្រាកដមែន លោកនាយករដ្ឋមន្ត្រីត្រូវនិយាយមែន ធ្វើមែន ដោយត្រូវហ៊ានចាត់ការមន្ត្រីមានអំណាចណា ដែលនៅពីក្រោយក្រុមហ៊ុនរត់ពន្ធ ទាំងនោះ ឲ្យឃើញជាក់ស្ដែងចាប់ពីថ្ងៃនេះទៅ។
លោក សេង វណ្ណលី៖ «ខ្ញុំឆ្ងល់ហេតុអ្វីបានជារដ្ឋាភិបាល ទើបតែភ្ញាក់ខ្លួនបញ្ជាឲ្យស្រាវជ្រាវ នៅពេលដែលថៃគេចុះផ្សាយពេលស្រុកគេទៅហើយ។ នេះសបញ្ជាក់ឲ្យឃើញថា បើគ្មានការរិះគន់ពីក្រៅទេ ម្ហេះមន្ត្រីពុករលួយ ក្រុមហ៊ុនកាងទាំងនោះ ប្រហែលនៅតែបន្តជញ្ជក់ឈាមរដ្ឋដោយសេរី។ ខ្ញុំគិតថា សកម្មភាពជាក់ស្ដែង សំខាន់ជាងពាក្យសម្ដី ហើយបើលោក ហ៊ុន ម៉ាណែតពិតជាចង់កែទម្រង់មែនត្រូវ ចាប់ផ្ដើមវះកាត់សាច់ស្អុយ ដែលជាមន្ត្រីធំៗនៅជុំវិញខ្លួនលោក និងគណបក្សជា មុនសិន កុំបង្ហាញតែការបង្ក្រាបនៅលើអ្នកដឹកជញ្ជូនតូចតាច ដើម្បីធ្វើជាឆាក ល្ខោន នយោបាយប្រជាភិថុតិ ឲ្យប្រជាពលរដ្ឋមើលទៅហាក់ដូចជាស្មោះត្រង់ ព្រោះថា សាធារណជនមើលទៅលែងជឿលើពាក្យសម្ដី ដែលនិយាយឲ្យរួចពីមាត់ មួយឆាវៗទៀតហើយ»។
ក្រសួងពាណិជ្ជកម្មកម្ពុជា ឲ្យដឹងកាលពីថ្ងៃទី៣១ ខែមីនាថា ប្រេងសាំងធម្មតា មានតម្លៃ ៥៤៥០រៀលក្នុងមួយលីត្រ ហើយប្រេងម៉ាស៊ូត ថ្លៃ ៧៥០០រៀល ក្នុងមួយលីត្រ ហើយតម្លៃនេះ អនុវត្តចាប់ពីថ្ងៃទី០១ ខែមេសា រហូតដល់ថ្ងៃជូនដំណឹងជាថ្មី។
អ្នកឃ្លាំមើលថា រដ្ឋាភិបាលលោក ហ៊ុន ម៉ាណែត គ្មានទាំងសមត្ថភាពក្នុងការទប់ស្កាត់ការរត់ពន្ធប្រេងខុសច្បាប់ពីប្រទេសជិតខាង និង គ្មានទាំងសមត្ថភាពក្នុងការរកប្រភពផ្គត់ផ្គង់ប្រេងឥន្ធនៈនៅកម្ពុជា ទើបមានកំណើនចរន្តនាំប្រេងឥន្ធនៈ ខុសច្បាប់ចូលកម្ពុជាកាន់តែច្រើន នៅពេលកម្ពុជាខ្វះលទ្ធភាពផ្គត់ផ្គង់ប្រេង។ ពួកគាត់ថា ប្រឈមនឹងការខ្វះប្រេងឥន្ធនៈដូចសព្វថ្ងៃ វិធានការរបស់លោក ហ៊ុន ម៉ាណែត អាចជាល្ខោនសម្ដែងឱ្យតែល្អមើល ដោយមាត់និយាយថា ទប់ស្កាត់ឲ្យតឹងរ៉ឹង តែនៅពីក្រោយខ្នង បែរជាបើកដៃឱ្យបក្ខពួកខ្លួន ដែលមានអំណាច បើកព្រំដែននាំប្រេងខុសច្បាប់ចូលកម្ពុជា៕
