តុលាការក្រុងភ្នំពេញចោទប្រកាន់លោក ខឿន វីរ៉ាត់ ពីបទ«ញុះញង់ »និង«ជេរប្រមាថ» ពាក់ព័ន្ធនឹងការបញ្ចេញមតិ និងចែករំលែកព័ត៌មានលើបណ្ដាញសង្គមចាប់តាំងពីចុងឆ្នាំ២០២៥។ សង្គមស៊ីវិល និងមេធាវី ចាត់ទុកការឃុំខ្លួនលោក ខឿន វីរ៉ាត់ លើកទី២ នេះ ថា ការបំបិទសិទ្ធិនយោបាយ និងបញ្ចេញមតិ។
មន្ត្រីជាន់ខ្ពស់បក្សកម្លាំងជាតិលោក ខឿន វីរ៉ាត់ ស្នើឲ្យចៅក្រមស៊ើបសួរ សាលាដំបូងរាជធានីភ្នំពេញ អនុញ្ញាតឲ្យលោកនៅក្រៅឃុំបណ្ដោះអាសន្ន ដើម្បីជួយមើលថែប្រពន្ធឈឺ ខណៈលោក ក៏កំពុងមានជំងឺប្រចាំកាយ ត្រូវជួបគ្រូពេទ្យជាប្រចាំដែរ។
សំណើនេះ ធ្វើឡើងបន្ទាប់ពីតំណាងអយ្យការបានចោទប្រកាន់លោក ខឿន វីវ៉ាត់ និងបញ្ជូនសំណុំរឿងទៅចៅក្រមស៊ើបសួរនៅថ្ងៃទី១០ ខែមេសានេះ។
មេធាវីលោក ខឿន វីរ៉ាត់ គឺលោក សឺន ជុំជួន ប្រាប់ទូរទស្សន៍អាស៊ីសេរីនៅថ្ងៃទី១០ ខែមេសា ថា តំណាងអយ្យការបានចោទប្រកាន់លោក ខឿន វីរ៉ាត់ ពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សង្គម»និងបទ«ជេរប្រមាថ» ពាក់ព័ន្ធនឹង ការបញ្ចេញមតិ និងការចែករំលែកព័ត៌មាននៅលើបណ្ដាញសង្គម ជាដើម។ លោកយល់ថា ការបញ្ចេញមតិ និងចែករំលែកព័ត៌មានរបស់កូនក្ដីលោកគឺអនុលោមទៅតាមច្បាប់ជាតិ និងអន្តរជាតិ ។ លោក សឺន ជុំជួន បញ្ជាក់ថា លោក ខឿន វីរ៉ាត់ បានស្នើទៅចៅក្រមស៊ើបសួរ កុំឲ្យឃុំខ្លួនលោក ពីព្រោះលោកកំពុងឈឺ និងប្រពន្ធក៏កំពុងមានជំងឺដែរ។
លោក សឺន ជុំជួន៖ «សំណូមពរហ្នឹង សុំឲ្យតុលាការហ្នឹង សម្រេចកុំឃុំខ្លួនគាត់។ ហេតុផលរបស់គាត់ ដោយសារតែស្ថានភាពសុខភាពគ្រួសារគាត់ ទាំងគាត់ក្ដី ហើយបើសិនជាឃុំខ្លួនទៅ មិនអាចឲ្យគាត់ទៅតាមការណាត់របស់គ្រូពេទ្យបានទេ ហើយពេទ្យមិនមែននៅក្នុងស្រុកទេគាត់ទៅព្យាបាលនៅក្រៅប្រទេស។ នេះជាហេតុផលសុំកុំឲ្យឃុំខ្លួន ដើម្បីគាត់មានឱកាសមើលគ្រួសារផង និងខ្លួនឯងផង»។
មន្ត្រីជាន់ខ្ពស់នៃគណបក្សកម្លាំងជាតិរូបនេះ ត្រូវបានសមត្ថកិច្ចរាជធានីភ្នំពេញ ចាប់ខ្លួនជាលើកទី២ កាលពីថ្ងៃទី៧ ខែមេសា។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ (LICAHDO) លោក អំ សំអាត ប្រាប់ទូរទស្សន៍អាស៊ីសេរីនៅថ្ងៃ ទី១០ ខែមេសាថា ចាប់ពីកម្ពុជាមានជម្លោះព្រំដែនមក អង្គការសិទ្ធិមនុស្សជាតិ និងអន្តរជាតិព្រួយបារម្ភចំពោះការចាប់ខ្លួនអ្នកបញ្ចេញមតិជាបន្តបន្ទាប់នេះ។ លោកទទូចឲ្យតុលាការ និងអាជ្ញាធរពិនិត្យឲ្យ បានដិត ដល់ថា អ្វីជាសេរីភាពក្នុងការបញ្ចេញមតិ និងអ្វីបទល្មើស ដើម្បីកុំឲ្យរំលោភ សិទ្ធិសេរីភាពបញ្ចេញមតិ ប៉ះពាល់លំហសេរីភាពសារព័ត៌មាន និងនយោបាយ ដែលនាំឲ្យមានការរិះគន់ពីសហគមន៍ជាតិ និងអន្តរជាតិ ជាពិសេស ក្នុងកាលៈទេសៈដែលរដ្ឋាភិបាល និងប្រជាពលរដ្ឋគ្រប់និន្នាការ ចង់ឃើញខ្មែររួបរួមសាមគ្គីគ្នា ឯកភាពជាតិ ដើម្បីឲ្យប្រទេស ជាតិរឹតមាំ ដែលបរទេសឈានពានកម្ពុជា។
លោក អំ សំអាត៖ «ព្រួយបារម្ភទៅលើការចាប់ខ្លួនជាបន្តបន្ទាប់ ទៅលើសកម្មជន នយោបាយ ទៅលើអ្នកសារព័ត៌មាន ទៅលើប្រជាពលរដ្ឋ ដែលបានបញ្ចេញមតិ នៅក្នុងបណ្ដាញសង្គម ដែលទាក់ទងនឹងបញ្ហាព្រំដែន ឬក៏លើកឡើងផ្សេងៗ ទៀតនៅក្នុងសង្គម ដែលបញ្ហាទាំងអស់នេះ វាអាចប៉ះពាល់ទៅដល់សេរីភាព នៅ ក្នុងការបញ្ចេញមតិ លំហសេរីភាពនយោបាយ លំហសេរីភាពសារព័ត៌មាន។ យើង មើលឃើញថា បញ្ហាទាំងអស់នេះ ជាចំណុចមួយ ដែលគួរឲ្យមានការព្រួយបារម្ភ ទាក់ទងនឹងសេរីភាពជាមូលដ្ឋានរបស់ពលរដ្ឋ ទាក់ទងទៅលើសិទ្ធិសេរីភាព ទាំងអស់ហ្នឹង»។
ទោះជាយ៉ាងណា លោក ខឿន វីរ៉ាត់ ត្រូវបានសមត្ថកិច្ចបញ្ជូនទៅឃុំនៅស្នងការវិញ បន្ទាប់ពីចៅក្រមស៊ើបសួរធ្វើការសាកសួរនៅថ្ងៃទី១០ ខែមេសា។
អ្នកឃ្លាំមើល ជំរុញឲ្យរដ្ឋាភិបាលលោក ហ៊ុន ម៉ាណែត បើកលំហសេរីភាព និងដោះស្រាយបញ្ហាប្រឈមតាមរយៈការសន្ទនា ជាជាងការប្រើប្រាស់ប្រព័ន្ធតុលាការ ដើម្បីបង្ក្រាបសំឡេងរិះគន់ ពីព្រោះយុទ្ធសាស្ត្របំបិទមាត់តាមរយៈការ ចោទប្រកាន់ដដែលៗនេះ នឹងធ្វើឲ្យប៉ះពាល់ដល់កិត្តិយសរបស់មេដឹកនាំ កម្ពុជា នៅលើឆាកអន្តរជាតិថា ជាមេដឹកនាំរំលោភសិទ្ធិមនុស្ស និងរុញច្រានសង្គមកម្ពុជាឲ្យធ្លាក់ក្នុងស្ថានភាពភ័យខ្លាច ដែលជាឧបសគ្គរារាំងដល់ការអភិវឌ្ឍធនធានមនុស្ស និងការកសាងឯកភាពជាតិ៕
