ក្រុមឧក្រិដ្ឋជនចិននៅតែបន្តធ្វើសកម្មភាពចាប់ជំរិត បង្ខាំងមនុស្សធ្វើទារុណកម្ម និងសម្លាប់ជនរងគ្រោះទាំងជនបរទេស និងពលរដ្ឋខ្មែរ ដើម្បីជំរិតទារប្រាក់ក្នុងរូបភាពដ៏ឃោរឃៅ។ អំពើឧក្រិដ្ឋកម្មទាំងនេះមិនត្រឹមតែបង្កការភ័យខ្លាចដល់សាធារណជនប៉ុណ្ណោះទេ ប៉ុន្តែថែមទាំងបំផ្លាញកេរ្តិ៍ឈ្មោះ និងមុខមាត់កម្ពុជានៅលើឆាកអន្តរជាតិយ៉ាងធ្ងន់ធ្ងរ។ អ្នកឃ្លាំមើល និងមន្ត្រីបក្សប្រឆាំងរិះគន់ថា ការរីករាលដាលនៃបណ្ដាញឧក្រិដ្ឋជនបរទេសទាំងនេះ គឺជាលទ្ធផលដែលមេដឹកនាំត្រកូល ហ៊ុន បើកដៃឱ្យក្រុមឧក្រិដ្ឋជនចូលមកធ្វើសកម្មភាពនៅកម្ពុជា និងការខ្វះឆន្ទៈនយោបាយក្នុងការអនុវត្តច្បាប់ឱ្យបានម៉ឺងម៉ាត់។
ការហូរចូលនៃបណ្ដាញឧក្រិដ្ឋជនចិនដែលកន្លងមកល្បីខាងប្រតិបត្តិការឆបោកតាមអនឡាញ ចាប់ជំរិត និងសម្លាប់ជនរងគ្រោះភាគច្រើនជាជនបរទេសដើម្បីជំរិតទារប្រាក់នៅកម្ពុជា ពេលនេះបានធ្វើឱ្យពលរដ្ឋខ្មែរដែលជាម្ចាស់ប្រទេសក៏ក្លាយជាជនរងគ្រោះដោយការចាប់ជំរិត និងអំពើឃាតកម្មដ៏ឃោរឃៅដូចគ្នាដែរ។
ស្នងការដ្ឋាននគរបាលរាជធានីភ្នំពេញនៅថ្ងៃទី៣ ខែមិថុនា បានបង្ហាញមុខជនសង្ស័យជនជាតិចិន និងខ្មែរ ៤នាក់ ក្រោយបើកប្រតិបត្តិការបង្ក្រាបករណីចាប់ជំរិតទារប្រាក់ និងឃាតកម្មគិតទុកជាមុនលើជនរងគ្រោះខ្មែរ ២នាក់ ក្នុងនោះមានម្នាក់ជានារីភេទទី៣ និងម្នាក់ទៀតជាអ្នករត់តាក់ស៊ី។ យោងតាមរបាយការណ៍សមត្ថកិច្ចបង្ហាញថា ក្រុមជនសង្ស័យបានធ្វើទារុណកម្ម យកខ្សែចងដៃ ចង់ជើង និងរឹតកជនរងគ្រោះទាំងពីរនាក់នៅក្នុងផ្ទះសំណាក់មួយកន្លែង ស្ថិតក្នុងភូមិកោះក្របី ខណ្ឌច្បារអំពៅ រាជធានីភ្នំពេញកាលពីថ្ងៃទី២៣ ខែឧសភា រហូតដល់ស្លាប់។ បន្ទាប់មកក្រុមជនដៃដល់បានដឹកសាកសពទៅកប់រួមគ្នាក្នុងដីឡូតិ៍មួយកន្លែងនៅសង្កាត់ព្រែកលៀប ហើយថែមទាំងចាក់បេតុងគ្របពីលើរណ្ដៅសាកសព ដើម្បីបំបាត់ភស្តុតាង។ ជនរងគ្រោះនារីភេទទី៣ មានឈ្មោះ តាំង ស៊ីម៉េង និងជនរងគ្រោះម្នាក់ទៀតឈ្មោះ អែម គីមស្រ៊ុន មានមុខរបរអ្នករត់តាក់ស៊ី។ វត្ថុតាងដែលសមត្ថកិច្ចរឹបអូសបានមានដូចជា ដំបង ពូថៅ ខ្សែភ្លើង និងទូរស័ព្ទដៃ។
ស្នងការដ្ឋាននគរបាលរាជធានីភ្នំពេញអះអាងថា បានកសាងសំណុំរឿងនេះបញ្ជូនទៅតុលាការរួចហើយ ប៉ុន្តែនៅមានមេខ្លោង និងបក្ខពួកមួយចំនួនកំពុងរត់គេចខ្លួន ហើយសមត្ថកិច្ចកំពុងស្រាវជ្រាវតាមចាប់។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា ដើម្បីសាកសួរបន្ថែមជុំវិញរឿងនេះបានទេនៅថ្ងៃទី៣ ខែមិថុនា។
អ្នកឃ្លាំមើលបញ្ហាសិទ្ធិមនុស្សចាត់ទុកអំពើឃាតកម្មនេះថា ជាទង្វើដ៏សាហាវឃោរឃៅ និងអមនុស្សធម៌។ ពួកគាត់ថា អំពើឧក្រិដ្ឋកម្មនេះមិនត្រឹមតែឆក់យកជីវិតពលរដ្ឋខ្មែរដោយស្លាប់ក្នុងស្ថានភាពវេទនានោះទេ ថែមទាំងបន្សល់ទុកនូវការឈឺចាប់ផ្លូវចិត្តយ៉ាងធ្ងន់ធ្ងរដល់ក្រុមគ្រួសារផងដែរ។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា ទទូចដល់សមត្ថកិច្ចស្វែងរកមេខ្លោង និងបក្ខពួកក្រុមឃាតកឱ្យខាងតែបាន និងផ្ដន្ទាទោសឱ្យបានធ្ងន់ធ្ងរតាមផ្លូវច្បាប់។ លោកសង្កត់ធ្ងន់ថា អំពើចាប់ជំរិត និងការរីករាលដាលឧក្រិដ្ឋកម្មឆបោកតាមអនឡាញពេញប្រទេសដូចសព្វថ្ងៃនេះ គឺដោយសារតែគោលនយោបាយរបស់មេដឹកនាំក្រុងភ្នំពេញអនុវត្តច្បាប់ធូររលុង និងបើកដៃឱ្យបណ្ដាញឧក្រិដ្ឋជនចិនចូលមកកម្ពុជាតាមអំពើចិត្តដោយគ្មានការត្រួតពិនិត្យ និងសិក្សាឱ្យបានល្អិតល្អន់។
លោក ស៊ឹង សែនករុណា៖ «ក្នុងរយៈកាលចុងក្រោយនៃការដឹកនាំរបស់មេដឹកនាំបច្ចុប្បន្ន បាននាំមកនូវជនបរទេសដែលមានចរិតលក្ខណៈកោងកាច ហើយប្រព្រឹត្តនូវអំពើទុច្ចរិតបង្កចលាចល និងភាពអសន្តិសុខសង្គមនៅក្នុងប្រទេសកម្ពុជាយើងជាច្រើន ដែលយើងមើលឃើញរូបភាពបង្កបញ្ហាហិង្សា ការកាប់សម្លាប់ បាញ់សម្លាប់ ចាប់ជំរិតអីទាំងអស់នេះឯង។ យើងមានការព្រួយបារម្ភយ៉ាងខ្លាំង សង្គមមួយដែលមានអំពើទាំងអស់នេះកើតឡើង យើងអត់ចង់ឃើញរូបភាពនៃការដឹកនាំដែលបង្កឱ្យមានហានិភ័យនៅក្នុងសង្គមបែបនេះទេ អ៊ីចឹងយើងចង់ឃើញការដឹកនាំមួយដែលនាំមកនូវសេចក្ដីសុខសន្តិភាពពិតប្រាកដទាំងផ្លូវចិត្តផ្លូវកាយជូនទៅដល់ប្រជាពលរដ្ឋ»។
អំពើឃាតកម្មលើពលរដ្ឋខ្មែរដោយក្រុមឧក្រិដ្ឋជនចិនមិនមែនជាករណីថ្មីនោះទេ។ កន្លងមក ស្ត្រីខ្មែរ និងនារីភេទទី៣ ដែលប្រកបរបរបម្រើសេវាកម្សាន្ត និងផ្លូវភេទ បានរាយការណ៍ជាបន្តបន្ទាប់អំពីការចាប់ជំរិត ធ្វើទារុណកម្ម និងជំរិតទារប្រាក់ដោយជនជាតិចិនមួយចំនួន។ ក្រៅពីនេះ ក៏ធ្លាប់មានស្ត្រីខ្មែរម្នាក់នៅខេត្តកំពតឈ្មោះ ហេង សៀវលី ដែលជាគូស្នេហ៍របស់ជនជាតិចិនត្រូវបានសម្លាប់បំបិទមាត់ បន្ទាប់ពីនាងបានដឹងអំពីរឿងរ៉ាវ និងសកម្មភាពឧក្រិដ្ឋកម្មឆបោកតាមអនឡាញពួកគេ។
កាលពីថ្ងៃទី២៣ ខែឧសភា កន្លងទៅកម្លាំងសមត្ថកិច្ចរាជធានីភ្នំពេញក៏បានបង្ក្រាបជនជាតិ ២នាក់ និងបានរំដោះជនរងគ្រោះ ៤នាក់ពាក់ព័ន្ធករណីធ្វើទារុណកម្មចាប់ជំរិតទារប្រាក់។
ជុំវិញរឿងនេះ អ្នកនាំពាក្យគណបក្សប្រជាធិបតេយ្យជឿនលឿន លោក ប៉ោ មករា លើកឡើងថា អំពើចាប់ជំរិត បង្ខាំងមនុស្សធ្វើទារុណកម្ម និងបង្ខំឱ្យចូលរួមក្នុងប្រតិបត្តិការឆបោកតាមអនឡាញ កំពុងក្លាយជាការគំរាមកំហែងធ្ងន់ធ្ងរដល់សន្តិសុខសង្គម និងសុវត្ថិភាពរបស់ពលរដ្ឋខ្មែរ ក៏ដូចជាភ្ញៀវទេសចរអន្តរជាតិដែលមកកម្ពុជា។ លោកថា ការរីករាលដាលនៃឧក្រិដ្ឋកម្មឆ្លងដែនទាំងនេះ ឆ្លុះបញ្ចាំងពីភាពកម្សោយនៃការអនុវត្តច្បាប់ និងការដឹកនាំរបស់រដ្ឋាភិបាល ដោយសារតែបញ្ហាអំពើពុករលួយ និងបក្ខពួកនិយមដែលកំពុងចាក់ឫសយ៉ាងជ្រៅក្នុងស្ថាប័នរដ្ឋ។
លោក ប៉ោ មករា៖ «យើងឃើញថា តើពួកក្រុមឧក្រិដ្ឋជន ក្រុមឆបោកតាមប្រព័ន្ធអនឡាញ ក្រុមចាប់ជំរិតទាំងអស់ហ្នឹង គាត់ចូលមកតាមណា? យើងឃើញមានប្រភពបី តាមដែនអាកាស តាមគោក តាមផ្លូវទឹក។ ទាំងបីហ្នឹង តើមានការត្រួតពិនិត្យច្បាស់លាស់អត់? មានអំពើពុករលួយនៅក្នុងហ្នឹងអត់? ប្រសិនបើមានការរឹតត្បិត មានការអនុវត្តច្បាប់ដែលគ្មានអំពើពុករលួយ គ្មានបក្ខពួកនិយម ខ្ញុំគិតថា វាប្រសិទ្ធភាពខ្ពស់ជាង។ ហើយការបោសសម្អាតក្រុមទាំងអស់នេះ វាគួរតែចាប់ផ្ដើមពីមេធំៗ ឬក៏ដូចជាអ្នកដែលកាងពួកឧក្រិដ្ឋកម្មតាមអនឡាញហ្នឹង»។
អ្នកឃ្លាំមើល និងមន្ត្រីបក្សប្រឆាំងព្រមានថា ដរាបណាប្រព័ន្ធច្បាប់នៅកម្ពុជានៅតែធូររលុង និងពោរពេញដោយអំពើពុករលួយ បណ្ដាញឧក្រិដ្ឋជននឹងនៅតែបន្តធ្វើសកម្មភាពដោយមិនខ្លាចញញើតច្បាប់ឡើយ។ ពួកគាត់ព្រួយបារម្ភថា ស្ថានភាពបែបនេះនឹងធ្វើឱ្យពលរដ្ឋខ្មែរ និងជនបរទេសកាន់តែច្រើនបន្តធ្លាក់ខ្លួនជាជនរងគ្រោះនៃអំពើឧក្រិដ្ឋកម្មឆ្លងដែន អំពើឃាតកម្ម និងការចាប់ជំរិតបន្ថែមទៀត៕
