អ្នកចាញ់បោកអតីតឧកញ៉ា ហ៊ី គឹមហុង លើកឡើងថា បច្ចុប្បន្ន មានអ្នករងគ្រោះធ្លាក់ខ្លួនឈឺនិងស្លាប់បន្តបន្ទាប់ ដោយសារតែ វិបត្តិគ្រួសារ និងរងសម្ពាធពីធនាគារ ខណៈតុលាការនៅតែអូសបន្លាយក្នុងការផ្ដល់យុត្តិធម៌និង ដំណោះស្រាយ។ សង្គមស៊ីវិលទទូចឲ្យតុលាការគួរពន្លឿននីតិវិធីឲ្យបានលឿន បើមិនដូច្នេះទេនឹងមានពលរដ្ឋស្លាប់កើនឡើងទៀត។
ពលរដ្ឋដែលដាក់ប្រាក់វិនិយោគជាមួយក្រុមហ៊ុនលោក ហ៊ី គឹមហុង អះអាងថា ថ្មីៗនេះ មានពលរដ្ឋពីរនាក់ទៀតស្លាប់ ដោយសារតែវិបត្តិគ្រួសារ និងរងសម្ពាធពីធនាគារ ខណៈដំណោះស្រាយពីតុលាការនៅតែមិនទាន់មានពន្លឺយុត្តិធម៌ សម្រាប់ពួកគាត់។
កាលពីថ្ងៃទី២០ ខែឧសភា ក្រុមពលរដ្ឋរងគ្រោះ អះអាងថា សាលាដំបូងរាជធានី ភ្នំពេញ នឹងធ្វើសេចក្ដីសម្រេចនៅថ្ងៃទី២០ ខែមិថុនា ប៉ុន្តែមកដល់ពេលនេះ ពួកគាត់ ថា នៅថ្ងៃទី២០ ខែមិថុនានេះ តុលាការមិនទាន់ប្រកាសសាល ក្រមសំណុំ រឿងឆបោករបស់ក្រុមហ៊ុនពិភពដីមាសរបស់ឧកញ៉ា ហ៊ី គឹមហុង នោះទេ ដោយទាមទារឲ្យពួកគាត់ដាក់ឯកសារបន្ថែមទៀត។
តំណាងពលរដ្ឋស្រុកបង្វិល ខេត្តបាត់ដំបង លោក ភាព សុផា ប្រាប់ទូរទស្សន៍អាស៊ីសេរី នៅថ្ងៃទី១៩ ខែមិថុនា ថា អ្នកខ្លះកំពុងលក់ទ្រព្យសម្បត្តិបណ្ដើរៗ និងអ្នកខ្លះ ទៀត លក់ឡាយឡុងសងបំណុលធនាគារអស់ហើយ ប៉ុន្តែនៅតែដោះបំណុលមិនរួច។
លោក ភាព សុផា៖ «អ្នកខ្លះក៏សងបានខ្លះ អ្នកខ្លះ ក៏មានដី ៣ រៃ គាត់លក់បាន ១ ម៉ឺន ២ពាន់ដុល្លារ គាត់ជំពាក់ ៣ ម៉ឺន ៦ ពាន់ដុល្លារ អ៊ីចឹងទៅ គាត់សងនៅសល់ ២ ម៉ឺន ៤ ពាន់ដុល្លារអ៊ីចឹងទៅ។ រួមគាត់ទៅចងការគេថែម យកមកទប់បង់ ២ ម៉ឺន ជាង ឥឡូវឡើងបាន ៣ ម៉ឺនជាងទៀតអ៊ីចឹងដដែល។ដីលំនៅឋាន វាឡាយឡុងមិនកើត កូនចៅនៅពេញ និយាយទៅឧបសគ្គ វាចាក់ច្រេះតែម្ដង»។
លោកថា បញ្ហានេះ ធ្វើឲ្យអ្នករងគ្រោះខ្លះធ្លាក់ខ្លួនឈឺ និងអ្នកខ្លះទៀតស្លាប់ ព្រោះតែវិបត្តិផ្លូវចិត្ត និងសម្ពាធបំណុលធនាគារ។ លោកទទូចឲ្យតុលាការពន្លឿននីតិវិធី និងផ្ដល់យុត្តិធម៌ដល់ពួកគាត់ ដោយរឹបអូសទ្រព្យរបស់លោក ហ៊ី គឹមហុង ដើម្បីយកមកទូទាត់សងសំណងជូនពួកគាត់ឲ្យបានឆាប់។
លោក ភាព សុផា៖ «គាត់ថែមម្នាក់ទៀតហើយ ក្រុមខ្ញុំ ទើបបូជាឆ្លងម្សិលមិញ គាត់ពិបាកចិត្តពេក គាត់គិតច្រើន ខ្ញុំប្រាប់គាត់ថា កុំគិតច្រើនពេក មានអីដោះស្រាយ ទៅ ហើយតែស្លាប់ទៅហើយកូនចៅដីយើងនៅតែគេឡាយឡុងដដែលទេ ហើយកុំគិត ហើយកុំគិតច្រើន ប៉ុន្តែគាត់នៅតែគិតច្រើនរហូតដល់ស្លាប់។ ក្រុមខ្ញុំតែប៉ុន្មាន នាក់ទេ គឺស្លាប់ច្រើនជាងគេក្រុមផ្សេងៗ ប៉ុន្តែក្រុមខ្ញុំតិចទេ ក្រុមតែ ១១ ទៅ ១២ នាក់ទេ ប៉ុន្តែស្លាប់អស់ ៤ ទៅ៥ នាក់ហើយ»។
ពលរដ្ឋរងគ្រោះនៅខេត្តបាត់ដំបង លោក សោម ឆេង ប្រាប់ទូរទស្សន៍ អាស៊ីសេរី នៅថ្ងៃទី១៩ ខែមិថុនា ថា ការពន្យារពេលដោះស្រាយជូនពួកគាត់នេះ បានធ្វើឲ្យពលរដ្ឋរងគ្រោះ ប្ដីប្រពន្ធពីរគូស្លាប់ ខណៈម្នាក់ទៀតកំពុងធ្លាក់ខ្លួនឈឺ។
លោក សោម ឆេង៖ «ប្ដីប្រពន្ធៗ ស្លាប់អស់ពីរគូហើយ ហើយម្នាក់មួយស្លាប់ប្ដីមួយដែរ អ៊ីចឹងអស់ ៥ នាក់ហើយ។ មូលហេតុមកពីចាញ់បោកក្រុមហ៊ុន ហើយគាត់គ្មានលទ្ធភាពរកចំណូលទៅសងគេអ៊ីចឹង។ គាត់ចេះតែគិតច្រើន និយាយរួមទៅអារម្មណ៍គាត់មិនប្រក្រតីវាទៅជាចង់វិកលចរិតអ៊ីចឹង គិតច្រើនយូរៗទៅធ្លាក់ខ្លួនឈឺអត់មានលុយព្យាបាលរកអ្វីមិនបាន ឈានដល់ដំណាក់កាលចុងក្រោយ មច្ចុរាជផ្ដាច់ជីវិតអ៊ីចឹង។ ឥឡូវហ្នឹង សមាជិកម្នាក់ទៀត កំពុងវិវត្តទៅរកផ្លូវហ្នឹង មួយទៀតហើយ ខាងខេត្តបាត់ដំបង»។
ពលរដ្ឋរងគ្រោះរូបនេះ ចាត់ទុកការយឺតយ៉ាវ និងការអូសបន្លាយពេលក្នុងការផ្ដល់ដំណោះស្រាយសំណាក់តុលាការនេះថា ជារឿងអយុត្តិធម៌សម្រាប់ពួកគាត់ ជាជនរងគ្រោះ ខណៈធនាគារតែងតែបង្ខំឲ្យពួកគាត់ លក់ទ្រព្យសម្បត្តិ ដែលសល់តិចតួច។ លោកចង់ឃើញតុលាការពន្លឿននីតិវិធី និងកាត់ក្ដីយុត្តិធម៌ទៀងត្រង់ ដើម្បីកុំឲ្យពលរដ្ឋបាត់បង់ទំនុកចិត្តលើប្រព័ន្ធយុត្តិធម៌។
លោក សោម ឆេង៖ «បើនីតិវិធីច្បាប់កាន់តែយូរ គឺកាន់តែមនុស្សរងគ្រោះកាន់តែស្លាប់ ព្រោះអីបានខ្ញុំថា អ៊ីចឹង មកពីការគិតច្រើនជំពាក់បំណុលធនាគារ ជំពាក់បំណុល ផ្សេងៗមានអ្វីមកដោះស្រាយ ហើយការដោះស្រាយរបស់ច្បាប់នៅតែពន្យារពេលរហូតការដោះស្រាយអត់អី មុខរបរក៏មិនមានគ្រប់បែបយ៉ាង»។
ទូរទស្សន៍អាស៊ីសេរី មិនអាចសុំការអត្ថាធិប្បាយពី អ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ បានទេ នៅថ្ងៃទី១៩ ខែមិថុនា។
អតីតឧកញ៉ា ហ៊ី គីមហុង ត្រូវបានសមត្ថកិច្ចចាប់ខ្លួន កាលពីខែសីហាឆ្នាំ២០២៣ បន្ទាប់ពីក្រុមប្រជាពលរដ្ឋ បានដាក់ពាក្យបណ្ដឹងប្ដឹងឧកញ៉ារូបនេះ ពីបទ«ឆបោក» ប្រាក់ប្រមាណ ២០ លានដុល្លារ។ ប៉ុន្តែកាលពីដើមខែវិច្ឆិកា ឆ្នាំ២០២៣ ម្ចាស់ ក្រុមហ៊ុនពិភពដីមាសអតីត ឧកញ៉ា ហ៊ី គឹមហុង ត្រូវបានសាលាឧទ្ធរណ៍ភ្នំពេញ ដោះលែងឲ្យនៅក្រៅឃុំបណ្ដោះអាសន្ន បន្ទាប់ពីជាប់ពន្ធនាគារជាង ៣ ខែ។
ជុំវិញរឿងនេះ នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (LICADHO) លោក អំ សំអាត យល់ថា តុលាការគួរពន្លឿននីតិវិធីឲ្យបានលឿនដើម្បីផ្ដល់ដំណោះស្រាយឲ្យពលរដ្ឋបានឆាប់។
លោក អំ សំអាត៖«ពួកគាត់រង់ចាំដំណោះស្រាយយូរហើយ ហើយពួកគាត់ខ្លះបាន ស្លាប់ជាបន្តបន្ទាប់ ដោយសារតែ មានវិបត្តិផ្លូវចិត្ត មានជំងឺផ្លូវចិត្ត ជំងឺប្រចាំកាយ ហើយវិបត្តិបំណុលវ័ណ្ឌក។ អ៊ីចឹងពួកគាត់ដាក់ក្ដីសង្ឃឹមទៅលើដំណោះស្រាយនៃតុលាការអ៊ីចឹង សូមឲ្យតុលាការពន្លឿននីតិវិធីឲ្យបានលឿន ដើម្បីធ្វើការដោះស្រាយ សម្រាប់ពួកគាត់ឲ្យបានឆាប់»។
អតីតឧកញ៉ា ជា សារ៉ន អតីតឧកញ៉ា ឡេង ចាន់ណា និងអតីតឧកញ៉ា ហ៊ី គឹមហុង ត្រូវបានតុលាការចេញដីកាសម្រេចរឹបអូសយកទ្រព្យសម្បត្តិ ដើម្បីលក់សង ពលរដ្ឋរងគ្រោះ ដែលចាញ់បោកក្រុមហ៊ុន របស់អតីតឧកញ៉ាទាំងបីនាក់។ ប៉ុន្តែ ប្រជាពលរដ្ឋ អះអាងថា រយៈពេល ២ឆ្នាំហើយ ពួកគាត់នៅ មិនទាន់ទទួលបានប្រាក់សំណង ឬដំណោះស្រាយនៅឡើយទេ។
អ្នកឃ្លាំមើល លើកឡើងថា វិបត្តិឆបោករបស់ក្រុមហ៊ុនឧកញ៉ា ក្នុងសង្គមខ្មែរ ពុំមានដំណោះស្រាយយុត្តិធម៌ឡើយ បើពលរដ្ឋរងគ្រោះ មិនប្រមូលផ្ដុំគ្នាចេញតវ៉ា។ ពួកគាត់ថា ការសំងំរង់ចាំតែអង្វរតុលាការ និងរដ្ឋាភិបាលឲ្យផ្ដល់ដំណោះស្រាយ គឺជាការចាញ់បោករដ្ឋាភិបាលមួយជាន់ទៀតពីព្រោះរដ្ឋាភិបាល ព្យាយាម ពន្យារពេលឲ្យពលរដ្ឋរងគ្រោះហត់នឿយ ក្នុងការស្វែងរកយុត្តិធម៌ ប៉ុណ្ណោះ ប៉ុន្តែមិនរកដំណោះស្រាយពិតប្រាកដឲ្យពលរដ្ឋនោះទេ៕
