កូនប្រុសលោក សុខ ស៊ុនណារ៉េត គឺលោក ស៊ន សារ៉ាត់ ទទូចឱ្យក្រុមមេដឹកនាំក្រុងភ្នំពេញដោះលែងឪពុករបស់លោកឱ្យមានសេរីភាព ដោយលើកហេតុផល ថា ឪពុករបស់លោកមានវ័យចំណាស់ទៅហើយ និងបានបម្រើប្រទេសជាតិជាង ៣០ឆ្នាំ ដោយភាពស្មោះត្រង់។
ការស្នើរបស់លោក ស៊ន សារ៉ាត់ ធ្វើឡើងនៅមុនពេលសាលាឧទ្ធរណ៍ភ្នំពេញ គ្រោងបើកសវនាការបណ្ដឹងឧទ្ធរណ៍របស់លោក សុខ ស៊ុនណារ៉េត នៅថ្ងៃទី២៦ ខែវិច្ឆិកា ជំទាស់នឹងសេចក្ដីសម្រេចរបស់សាលាដំបូងខេត្តកំពង់ស្ពឺ ដែលបានកាត់ឱ្យលោក សុខ ស៊ុនណារ៉េត ជាប់ពន្ធនាគារ ៤ឆ្នាំ ក្រោមបទចោទប្រកាន់ពីការរក្សាទុកដោយខុសច្បាប់នូវសារធាតុញៀន។
លិខិតរបស់មហាអយ្យការសាលាឧទ្ធរណ៍ភ្នំពេញចុះថ្ងៃទី១៣ ខែវិច្ឆិកា ឆ្នាំ២០២៥ បញ្ជាក់ថា សវនាការសាលាឧទ្ធរណ៍នេះ នឹងជំនុំជម្រះក្រោមសមាសភាព ក្រុមប្រឹក្សា ៣រូប ដោយមានលោក អ៊ិត សុធា ជាប្រធានអមដោយចៅក្រមប្រឹក្សា លោក អិន វ៉ានវិបុល និង លោក ឌុច សុខវិសារិន។
លោក ស៊ន សារ៉ាត់ ដែលជាកូនប្រុសលោក សុខ ស៊ុនណារ៉េត ប្រាប់ទូរទស្សន៍អាស៊ីសេរីថា លោកនិងក្រុមគ្រួសារ មានសេចក្ដីសង្ឃឹមលើសាលាឧទ្ធរណ៍ ថា នឹងធ្វើការវិនិច្ឆ័យដោយផ្ដល់យុត្តិធម៌ដល់ឪពុករបស់លោក។
លោក ស៊ន សារ៉ាត់៖ «មកដល់ពេលនេះ អាយុពិតប្រាកដរបស់គាត់ មានវ័យ ៧១ឆ្នាំហើយ។ អ៊ីចឹង ខ្ញុំសូមសំណូមពរដល់ប្រមុខដឹកនាំទាំងពីរ ផ្ដល់នូវការយោគយល់និងអធ្យាស្រ័យដល់ឪពុករបស់ខ្ញុំដែលមានវ័យចំណាស់»។
លោក សុខ ស៊ុនណារ៉េត ត្រូវបានបញ្ជូនទៅឃុំឃាំងនៅពន្ធនាគារខេត្តកំពង់ស្ពឺ កាលពីថ្ងៃទី១៣ ខែវិច្ឆិកា ឆ្នាំ២០២៤ បន្ទាប់ពីសមត្ថកិច្ចអះអាងថា បានរកឃើញគ្រឿងញៀនក្នុងរថយន្តរបស់លោក ប៉ុន្តែលោកបានបដិសេធចំពោះការចោទប្រកាន់នេះ។
លោក សុខ ស៊ុនណារ៉េត គឺជាឪពុកបង្កើតរបស់លោក ស៊ន តារា ដែលជាអ្នកអត្ថាធិប្បាយនយោបាយនៅលើបណ្ដាញសង្គមពីក្រៅប្រទេសរិះគន់មិនសំចៃមាត់ទៅលើការដឹកនាំតាមបែបផ្ដាច់ការ និងរំលោភសិទ្ធិមនុស្សរបស់លោក ហ៊ុន សែន និងក្រុមគ្រួសារត្រកូលហ៊ុន។ បច្ចុប្បន្នមានវ័យ៧១ឆ្នាំលោក សុខ ស៊ុនណារ៉េត គឺ ជាអតីតមន្ត្រីទាហានសឹករងខេត្តកំពង់ស្ពឺ និងបានចូលនិវត្តន៍នៅឆ្នាំ២០២២។
លោកត្រូវបានមន្ត្រីកងរាជអាវុធហត្ថចាប់ខ្លួន ក្រោយពីលោក ហ៊ុន សែន បានព្រមានដកតំណែង និងបណ្ដេញចេញពីក្របខណ្ឌការងាររដ្ឋ ប្រសិនបើលោក ស៊ន តារា ជាកូនដែលកំពុងរស់នៅប្រទេសបារាំង បន្តរិះគន់លោក ហ៊ុន សែន និងរដ្ឋាភិបាលលោក ហ៊ុន ម៉ាណែត៕
