កម្ពុជា និងសហរដ្ឋអាមេរិក (US) ប្ដេជ្ញាពង្រឹងកិច្ចសហប្រតិបត្តិការយោធាទ្វេភាគី និងគ្រោងរៀបចំលំហាត់ហ្វឹកហ្វឺនរួមនៅឆ្នាំ២០២៧ ដើម្បីកសាងទំនុកចិត្ត ពង្រឹងកិច្ចសហប្រតិបត្តិការរវាងកងកម្លាំងប្រដាប់អាវុធនៃប្រទេសទាំងពីរ និងរួមចំណែកដល់សន្តិសុខក្នុងតំបន់ឥណ្ឌូ-ប៉ាស៊ីហ្វិក។ អ្នកជំនាញភូមិសាស្ត្រនយោបាយលើកឡើងថា តាមរយៈការពង្រឹងទំនាក់ទំនងយោធានេះ អាមេរិកមានបំណងចម្បងក្នុងការបង្កើនវត្តមាន និងភាពជិតស្និទ្ធនៅតំបន់អាស៊ីអាគ្នេយ៍ដីគោក ដើម្បីទប់ទល់នឹងឥទ្ធិពលយោធាចិនដែលកំពុងកើនឡើង។
កម្ពុជា និងសហរដ្ឋអាមេរិកបានបង្ហាញពីការប្ដេជ្ញាចិត្ត និងស្វាគមន៍ក្នុងការបន្តលើការពង្រឹងកិច្ចសហប្រតិបត្តិការ វិស័យការពារជាតិ និងយោធា ការបណ្ដុះបណ្ដាលធនធានមនុស្ស និងពង្រឹងសមត្ថភាពកងទ័ព ប្រយុទ្ធប្រឆាំងអំពើភេរវកម្ម និងឧក្រិដ្ឋកម្មឆ្លងដែន និងគម្រោងរៀបចំធ្វើលំហាត់ហ្វឹកហ្វឺនយោធារួមឡើងវិញ។
ការប្ដេជ្ញានេះធ្វើឡើងក្នុងជំនួបរវាងអគ្គមេបញ្ជាការនៃកងយោធពលខេមរភូមិន្ទលោក វង្ស ពិសេន និងមេបញ្ជាការកងនាវាប៉ាស៊ីហ្វិករបស់សហរដ្ឋអាមេរិកលោក ស្ទីវ ខូល័រ (Steve Koehler) ក្នុងពេលមកបំពេញទស្សនកិច្ចនៅកម្ពុជានៅថ្ងៃទី៧ ខែកក្កដា។
អគ្គបញ្ជាការដ្ឋាននៃកងយោធពលខេមរភូមិន្ទប្រកាសថា ក្នុងជំនួបនេះ លោក វង្ស ពិសេន បានលើកឡើងពីការបន្តពង្រឹងកិច្ចសហប្រតិបត្តិការកម្ពុជា-អាមេរិក លើវិស័យការពារជាតិ និងសន្តិសុខ រួមមានការប្រយុទ្ធប្រឆាំងអំពើភេរវកម្ម និងឧក្រិដ្ឋកម្មឆ្លងដែន ការបណ្ដុះបណ្ដាល និងពង្រឹងសមត្ថភាពកងទ័ព ព្រមទាំងកិច្ចសហការស្វែងរកអដ្ឋិធាតុយុទ្ធជនអាមេរិកដែលបាត់ខ្លួននៅកម្ពុជា។
លោកក៏បានគូសបញ្ជាក់ពីវឌ្ឍនភាពនៃទំនាក់ទំនងកម្ពុជា-អាមេរិក និងកិច្ចសហប្រតិបត្តិការរវាងកងទ័ពជើងទឹកនៃប្រទេសទាំងពីរ តាមរយៈការផ្លាស់ប្ដូរទស្សនកិច្ច ការចូលចតនាវាចម្បាំងអាមេរិកនៅកំពង់ផែរាមកន្លងមក និងគម្រោងរៀបចំលំហាត់ហ្វឹកហ្វឺនរួមនៅឆ្នាំ២០២៧ ខាងមុខ។
ជាការឆ្លើយតប មេបញ្ជាការកងនាវាប៉ាស៊ីហ្វិករបស់សហរដ្ឋអាមេរិក លោក ស្ទីវ ខូល័រ (Steve Koehler) ថ្លែងថា សហរដ្ឋអាមេរិកនឹងបន្តពង្រឹងកិច្ចសហប្រតិបត្តិការជាមួយកងយោធពលខេមរភូមិន្ទ តាមរយៈការរៀបចំលំហាត់ហ្វឹកហ្វឺន «ការ៉ាត់» (CARAT) ឡើងវិញនៅឆ្នាំ២០២៧ កិច្ចសហប្រតិបត្តិការផ្នែកជំនួយមនុស្សធម៌ និងការសង្គ្រោះគ្រោះមហន្តរាយ ព្រមទាំងការចូលរួមក្នុងលំហាត់សហប្រតិបត្តិការនាវាចរណ៍អាស៊ីអាគ្នេយ៍ (SEACAT) ដើម្បីរួមចំណែកដល់ការរក្សាសន្តិភាព និងស្ថិរភាពក្នុងតំបន់។
ជាមួយគ្នានេះ ស្ថានទូតអាមេរិកប្រចាំកម្ពុជាឱ្យដឹងថា សហរដ្ឋអាមេរិក និងកម្ពុជាកំពុងបន្តពង្រឹងកិច្ចសហប្រតិបត្តិការការពារជាតិ និងទំនាក់ទំនងរវាងកងកម្លាំងប្រដាប់អាវុធនៃប្រទេសទាំងពីរ ដើម្បីគាំទ្រដល់សន្តិសុខរបស់ប្រទេសទាំងពីរ និងស្ថិរភាពក្នុងតំបន់។
ស្ថានទូតអាមេរិកបញ្ជាក់ថា ភារធារីស្ថានទូតសហរដ្ឋអាមេរិកប្រចាំកម្ពុជា អ្នកស្រី អាឡិចស៍ ហ្ស៊ីតថល (Aleks Zittle) ក៏មានជំនួបទ្វេភាគី ជាមួយមេបញ្ជាការកងនាវាប៉ាស៊ីហ្វិករបស់សហរដ្ឋអាមេរិក លោក ស្ទីវ ខូល័រ នៅស្ថានទូតអាមេរិកប្រចាំកម្ពុជា ដើម្បីពិភាក្សាអំពីវិធីសាស្ត្រដែលសហរដ្ឋអាមេរិកអាចជួយគាំទ្រដល់ការពង្រឹងទំនាក់ទំនងយោធាជាមួយកម្ពុជា។ ស្ថានទូតអាមេរិកក៏បានលើកឡើងថា កិច្ចសហប្រតិបត្តិការរវាងយោធាកម្ពុជា និងសហរដ្ឋអាមេរិក នឹងរួមចំណែកដល់ការពង្រឹងសន្តិសុខក្នុងតំបន់ បង្កើនកិច្ចសហប្រតិបត្តិការរវាងកងកម្លាំងប្រដាប់អាវុធ និងគាំទ្រដល់ការរក្សាតំបន់ឥណ្ឌូ-ប៉ាស៊ីហ្វិកឱ្យមានសន្តិសុខ និងវិបុលភាពកាន់តែប្រសើរ។
ជុំវិញរឿងនេះ អ្នកជំនាញភូមិសាស្ត្រនយោបាយលោក សេង វណ្ណលី យល់ថា ទស្សនកិច្ចរបស់មេបញ្ជាការកងនាវាប៉ាស៊ីហ្វិកអាមេរិកមកកាន់កម្ពុជាគឺឆ្លុះបញ្ចាំងពីការផ្លាស់ប្ដូរយុទ្ធសាស្ត្រយ៉ាងសំខាន់នៅក្នុងបរិបទភូមិសាស្ត្រនយោបាយតំបន់ឥណ្ឌូ-ប៉ាស៊ីហ្វិក។ លោកថា ទស្សនកិច្ចរបស់មេបញ្ជាការកងនាវាប៉ាស៊ីហ្វិកអាមេរិកមកកាន់កម្ពុជា បង្ហាញពីការប្រឹងប្រែងរបស់រដ្ឋាភិបាលទីក្រុងវ៉ាស៊ីនតោនក្នុងការស្ដារតុល្យភាពឡើងវិញនូវទំនាក់ទំនងផ្នែកសន្តិសុខជាមួយក្រុងភ្នំពេញ បន្ទាប់ពីមានភាពរកាំរកូសមួយរយៈពេលដោយសារបញ្ហារំលោភសិទ្ធិមនុស្ស និងគោលការណ៍ប្រជាធិបតេយ្យ មូលដ្ឋានទ័ពរាម និងការប្រកួតប្រជែងរវាងមហាអំណាចក្នុងតំបន់។
លោកបន្ថែមថា ស្ថានទូតអាមេរិកប្រចាំកម្ពុជាក៏កំពុងដើរតួនាទីជាចំណុចតភ្ជាប់រវាងផ្នែកការទូត និងផ្នែកយោធា ដើម្បីវាយតម្លៃស្ថានភាពជាក់ស្ដែង ស្វែងយល់ពីជំហរឆន្ទៈនយោបាយរបស់រដ្ឋាភិបាលកម្ពុជា និងរៀបចំទិសដៅកិច្ចសហប្រតិបត្តិការដែលមានភាពបត់បែនជាងមុន។ លោក សេង វណ្ណលី វាយតម្លៃថា តាមរយៈការពង្រឹងទំនាក់ទំនងយោធានេះ អាមេរិកមានបំណងចម្បងគឺបង្កើនវត្តមាន និងភាពជិតស្និទ្ធនៅក្នុងតំបន់អាស៊ីអាគ្នេយ៍ដីគោក ដើម្បីទប់ទល់នឹងឥទ្ធិពលយោធាចិនដែលកំពុងកើនឡើង ជាពិសេសនៅជុំវិញសមុទ្រចិនខាងត្បូង និងច្រកសមុទ្រម៉ាឡាកា។
លោក សេង វណ្ណលី៖ «ទីក្រុងវ៉ាស៊ីនតោនចង់ជំរុញឱ្យមានតម្លាភាពបន្ថែមទៀតអំពីការប្រើប្រាស់ហេដ្ឋារចនាសម្ព័ន្ធយោធានៅកម្ពុជា បង្កើតបណ្ដាញទំនាក់ទំនងផ្ទាល់ ដើម្បីកាត់បន្ថយហានិភ័យនៃការព្យាករណ៍ខុស និងខិតខំពង្រីកឥទ្ធិពលរបស់ខ្លួនឡើងវិញតាមរយៈការហ្វឹកហ្វឺន ការកសាងសមត្ថភាពយោធា ការផ្ដល់ជំនួយមនុស្សធម៌ និងការសង្គ្រោះគ្រោះមហន្តរាយ។ គោលដៅចុងក្រោយរបស់អាមេរិក គឺការពារកុំឱ្យកម្ពុជាផ្អៀងទៅរកប្លុកអំណាចតែមួយខ្លាំងពេក ដែលអាចប៉ះពាល់ដល់តុល្យភាពសន្តិសុខតំបន់ឥណ្ឌូ-ប៉ាស៊ីហ្វិកទាំងមូល»។
លោក សេង វណ្ណលី បន្ថែមថា សម្រាប់រដ្ឋាភិបាលលោក ហ៊ុន ម៉ាណែត ការពង្រឹងទំនាក់ទំនងយោធាជាមួយសហរដ្ឋអាមេរិក អាចផ្ដល់អត្ថប្រយោជន៍ទាំងផ្នែកនយោបាយការបរទេស និងសមត្ថភាពយោធា។ លោកថា ទំនាក់ទំនងនេះអាចជួយកម្ពុជារក្សាតុល្យភាពរវាងមហាអំណាច កាត់បន្ថយសម្ពាធពីខាងក្រៅ និងទទួលបានការបណ្ដុះបណ្ដាល ព្រមទាំងចំណេះដឹងផ្នែកសន្តិសុខសមុទ្រ ការប្រយុទ្ធប្រឆាំងបទល្មើសឆ្លងដែន។ បន្ថែមពីនេះលោកថា ការពង្រឹងទំនាក់ទំនងជាមួយអាមេរិក ក៏អាចជួយកែលម្អបរិយាកាសពាណិជ្ជកម្ម ការវិនិយោគ និងទំនាក់ទំនងការទូតរវាងប្រទេសទាំងពីរផងដែរ៕
