សាលាដំបូងរាជធានីភ្នំពេញ នៅថ្ងៃទី១៧ ខែសីហា សម្រេចឱ្យម្ចាស់ក្រុមហ៊ុនពិភពដីមាស គឺអតីតឧកញ៉ា ហ៊ី គឹមហុង និងបក្ខពួក ផ្ដល់សំណងជាង៣៣លាន ដល់ជនរងគ្រោះ ជាង១ពាន់(១១១៥)នាក់ ពាក់ព័ន្ធ បទឧក្រិដ្ឋ ឆបោកលុយពលរដ្ឋ តាមរយៈអាជីវកម្មលក់ដូរ អចលនទ្រព្យខ្យល់។ មន្ត្រីសង្គមស៊ីវិលជំរុញឱ្យតុលាការពន្លឿនការអនុវត្តសាលក្រមនេះឱ្យបានលឿន និងប្រកបដោយតម្លាភាព ដើម្បីផ្ដល់យុត្តិធម៌ ពិតប្រាកដដល់ជនរងគ្រោះ។
ជនរងគ្រោះរាប់រយនាក់ មកពីបណ្ដាខេត្តនានា បានប្រមូលម្ដុំគ្នានៅមុខសាលាដំបូងរាជធានីភ្នំពេញ ដើម្បីចាំស្ដាប់សាលក្រម របស់តុលាការ ពាក់ព័ន្ធសំណុំរឿងឆបោកលុយរាប់ម៉ឺនដុល្លារ ពីសំណាក់ក្រុមហ៊ុនពិភពដីមាស ដែលសំណុំរឿងនេះបានអូសបន្លាយ ជាង២ឆ្នាំហើយ។ ក្រោយពីរង់ចាំអស់ជាច្រើនម៉ោង តំណាងជនរងគ្រោះក៏បានឈរអានសាលក្រមតុលាការដោយរៀបរាប់ថា មេខ្លោងឆបោក និងបក្ខពួកប្រមាណ១៩នាក់ត្រូវបានតុលាការសម្រេចផ្ដន្ទាទោសឱ្យជាប់ពន្ធនាគារចន្លោះពី១ឆ្នាំ ដល់៥ឆ្នាំ និងត្រូវផ្ដល់សំណងជាង៣៣លានដុល្លារ ដល់ជនរងគ្រោះ។
ក្នុងនោះមានមេខ្លោងឆបោកចំនួន៥នាក់ រួមនឹង លោក ហ៊ី គឹមហុងផង ត្រូវបានតុលាការផ្ដន្ទាទោស ឱ្យជាប់ពន្ធនាគារចំនួន៥ឆ្នាំ និងបម្រាបមិនឱ្យធ្វើដំណើរចេញពីប្រទេសកម្ពុជា មិនឱ្យធ្វើកិច្ចការសង្គមនានា មិនឱ្យប្រើប្រាស់យានយន្តគ្រប់ប្រភេទ មិនឱ្យប្រើប្រាស់អាវុធជាតិផ្ទុះ និងចុងក្រោយ ហាមមិនឱ្យរកស៊ីផ្នែកអចលនទ្រព្យនិងការវិនិយោគទៀតនោះទេ។ ក្រៅពីនេះ ក៏មានសមាជិកដទៃទៀត ត្រូវបានតុលាការសម្រេចផ្ដន្ទាទោស ពី១ឆ្នាំ ទៅ២ឆ្នាំ និងពិន័យជាប្រាក់ ១លានទៅ២លានរៀលចូលរដ្ឋ ពាក់ព័ន្ធបទល្មើស ប្រើអំពើហិង្សា នានា។ ទោះជាបែបនេះក្ដីជនត្រូវចោទទាំងនោះ បច្ចុប្បន្នកំពុងតែរស់នៅក្រៅឃុំ ដោយគ្មានការចាប់ខ្លួនទៅឃុំនោះទេ។
តំណាងពលរដ្ឋរងគ្រោះជាង១ពាន់គ្រួសារ លោកស្រី ម៉ីន គន្ធា បានប្រាប់អ្នកសារព័ត៌មានថា ពលរដ្ឋសប្បាយចិត្តចំពោះ សាលក្រម របស់តុលាការនៅថ្ងៃនេះ ព្រោះថាលុយដែលតុលាការសម្រេច ឱ្យលោក ហ៊ី គឹមហុង និងបក្ខពួកសងជនរងគ្រោះជាង៣៣លានដុល្លារនោះ គឺឆ្លើយតបទៅនឹងការទាមទាររបស់ពលរដ្ឋ ដូចជា ប្រាក់ដើម ប្រាក់ការ និងប្រាក់សងជំងឺចិត្ត។ ទន្ទឹមគ្នានោះ លោកស្រីទទូចឱ្យតុលាការ ពន្លឿនរឹបអូសទ្រព្យសម្បត្តិទាំងអស់របស់លោក ហ៊ី គឹមហុង ដើម្បីលក់ យកលុយទាំងនោះ មកសងពលរដ្ឋឱ្យបានឆាប់បំផុត។
បន្ថែមពីលើនោះ លោកស្រីស្នើឱ្យតុលាការចេញដីកាចាប់ខ្លួន និងឃុំខ្លួន លោក ហ៊ី គឹមហុង និងបក្ខពួកឡើងវិញ ព្រោះប្រសិនបើ ទុកឱ្យពួកគេនៅមានសេរីភាពដើរហើរដូចបច្ចុប្បន្ន ពលរដ្ឋបារម្ភពីសុវត្ថិភាពព្រោះឮថា លោក ហ៊ី គឹមហុង នៅតែបន្តបោកប្រាស់ពលរដ្ឋ ហើយគំរាមកំហែង ជនរងគ្រោះដទៃទៀត មិនឱ្យប្ដឹងផ្ដល់មកលើរូបលោក។
លោកស្រី ម៉ីន គន្ធា៖ «បើសិនជាពួកគាត់នៅក្រៅឃុំ គាត់នៅតែបន្ត ក្នុងការគំរាមកំហែង យើងពិតជាភ័យខ្លាចមែនទែន បើសិនជាគាត់នៅតែបន្តផ្សព្វផ្សាយ និងធ្វើសកម្មភាពណាមួយដែលធ្វើឲ្យប៉ះពាល់ដល់ផ្លូវចិត្ត ក៏ដូចជាទ្រព្យសម្បត្តិរបស់បងប្អូនប្រជាពលរដ្ឋយើង គឺយើងអត់សុខចិត្តទេ ហើយមានតែការឃុំខ្លួនតែប៉ុណ្ណោះ ខ្ញុំជឿជាក់ថាសំណងនឹងអាចលឿនចាស ជូនមកកាន់បងប្អូនជនរងគ្រោះយើង មែនអត់?»។
ក្រុមហ៊ុន ពិភពដីមាសរបស់លោក ហ៊ី គឹមហុង បានបោកប្រាស់ពលរដ្ឋរាប់ពាន់គ្រួសារ តាមរយៈ«ការទាក់ទាញឱ្យវិនិយោគលើគម្រោងទិញលក់ដី និងផ្ទះល្វែង» ព្រមទាំងសន្យាផ្ដល់ប្រាក់ចំណេញ ឬការប្រាក់ខ្ពស់ ដែលធ្វើឱ្យពលរដ្ឋ ជឿស្លុង នាំគ្នាលក់ទ្រព្យសម្បត្តិ និងខ្ចីបុលធនាគារ មកដាក់ទុនជាមួយ ក្នុងម្នាក់ចន្លោះ ពី២ម៉ឺនដុល្លារ ទៅដល់១០ម៉ឺនដុល្លារ។ ក្រោយមក បែរជាចាញ់បោក ក្រុមហ៊ុន ហើយលុយចំណេញ ក៏មិនបាន ដីក៏អត់ ហើយបំណុលកើនឡើង ដែលធ្វើឱ្យពលរដ្ឋខ្លះ ធ្លាក់ក្នុងបំណុលវ័ណ្ឌក អស់ជាច្រើនឆ្នាំ ខណៈការរំពឹងដំណោះស្រាយពីរដ្ឋាភិបាលក៏គ្មាន រហូតអ្នកខ្លះធ្វើអត្តឃាត និងខ្លះទៀតមានវិបត្តិផ្លូវចិត្តធ្ងន់ធ្ងរ។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារ សិទ្ធិមនុស្សអាដហុក (Adhoc) លោក យិន ម៉េងលី យល់ថា បើទោះបីជា សាលាដំបូងរាជធានីភ្នំពេញបានសម្រេចសាលក្រមផ្ដន្ទាទោស និងតម្រូវឱ្យម្ចាស់ក្រុមហ៊ុនពិភពដីមាស ត្រូវសងសំណងដល់ជនរងគ្រោះក្ដី ក៏ជនរងគ្រោះ មិនអាចទទួលបានសំណងឆាប់ៗនោះដែរ ប្រសិនបើមានការប្ដឹងបន្តពីភាគីក្រុមហ៊ុន ទៅកាន់សាលាឧទ្ធរណ៍។ ទោះជាយ៉ាងណា លោកសង្ឃឹមថា តុលាការនឹងជួយពន្លឿនក្នុងការរកដំណោះស្រាយ និងដកហូតទ្រព្យសម្បត្តិទាំងអស់របស់ក្រុមហ៊ុនយកមកសងពលរដ្ឋ ព្រោះពួកគាត់ត្រូវការលុយ ទាំងនោះមកដោះស្រាយជីវភាពនិងបំណុលធនាគារ។
លោក យិន ម៉េងលី៖ «ត្រូវពន្លឿនដំណើរការកិច្ចការរឿងក្តី ដោយចាត់ទុកបញ្ហានេះជាបញ្ហាអាទិភាព។ ពីព្រោះទីមួយ ទឹកប្រាក់ធំ ទីពីរ មានជនរងគ្រោះដោយសារបញ្ហានេះច្រើន។ អញ្ចឹងពន្លឿនបញ្ហានេះ ដើម្បីបញ្ចប់នីតិវិធី ហើយដើម្បីធ្វើការលក់ឡាយឡុងទ្រព្យសម្បត្តិហ្នឹង ដើម្បីយកថវិកា ជូនពលរដ្ឋ ដើម្បីឱ្យពលរដ្ឋគាត់មានភាពជឿជាក់ទៅលើប្រព័ន្ធតុលាការ ភាពជឿជាក់នៅក្នុងការស្វែងរកយុត្តិធម៌ជូនពួកគាត់នេះ បាទ»។
អតីតឧកញ៉ា ហ៊ី គឹមហុង ត្រូវបានសមត្ថកិច្ចចាប់ខ្លួន កាលពីខែសីហា ឆ្នាំ២០២៣ ពាក់ព័ន្ធនឹងបទចោទឆបោកមានស្ថានទម្ងន់ទោស បន្ទាប់ពីក្រុមប្រជាពលរដ្ឋបានដាក់ពាក្យបណ្ដឹងប្ដឹងឧកញ៉ារូបនេះ។ ប៉ុន្តែ នៅដើមខែវិច្ឆិកាឆ្នាំ២០២៣ ម្ចាស់ក្រុមហ៊ុនពិភពដីមាសអតីតឧកញ៉ា ហ៊ី គឹមហុង ត្រូវបានសាលាឧទ្ធរណ៍ ភ្នំពេញដោះលែងឱ្យនៅក្រៅឃុំបណ្ដោះអាសន្ន បន្ទាប់ពីជាប់ពន្ធនាគារប្រមាណ ៣ខែ ក្រោមហេតុផលថា ដើម្បីឱ្យលោក ហ៊ី គឹមហុង ចូលខ្លួនដោះស្រាយសំណង ជូនជនរងគ្រោះ។ ទោះជាបែបនេះក្ដី តំណាងជនរងគ្រោះឱ្យដឹងថាចាប់តាំងពី លោក ហ៊ី គឹមហុង ត្រូវបានដោះលែងមក លោកមិនដែលចូលសវនាការ ដើម្បីតតាំងរឿងក្ដី ជាមួយពលរដ្ឋនៅតុលាការនោះទេ រហូតដល់ថ្ងៃប្រកាសសាលក្រម ក៏គ្មានវត្តមាន លោក ហ៊ី គឹមហុង នោះដែរ៕
