សភា​ពលរដ្ឋខ្មែរ​ក្រៅ​ប្រទេស​ស្នើ​​បារាំង​ឲ្យជួយ​ដោះស្រាយ​វិបត្តិ​នយោបាយ​នៅ​កម្ពុជា

សភាពលរដ្ឋខ្មែរក្រៅប្រទេស (KOCA) ផ្ញើ​លិខិត​ទៅ​ប្រធានាធិបតី​បារាំង លោក អេម៉ានុយអែល ម៉ាក្រុង (Emmanuel Macron) ដើម្បី​ស្នើ​ឲ្យ​បារាំង ធ្វើ​អន្តរាគមន៍​ទៅ​រដ្ឋាភិបាល​លោក ហ៊ុន ម៉ាណែត ឲ្យស្ដារប្រជាធិបតេយ្យ គោរពសិទ្ធិមនុស្ស និង​លើកកម្ពស់យុត្តិធម៌ នៅកម្ពុជា។ សំណើរសុំអន្តរាគមន៍នេះ ធ្វើឡើងមុនពេលប្រធានាធិបតីបារាំង គ្រោងទៅចូលរួមកិច្ចប្រជុំ​កំពូលហ្វ្រង់កូហ្វូនី (The Francophonie Summit) នៅភ្នំពេញ នៅថ្ងៃទី១៤ ខែវិច្ឆិកា។

នៅមុនដំណើរទស្សនកិច្ចរបស់ប្រធានាធិបតីបារាំង លោក អេម៉ានុយអែល ម៉ាក្រុង ទៅកម្ពុជា ដើម្បីចូលរួមកិច្ចប្រជុំកំពូលហ្វ្រង់កូហ្វូនី លើកទី២០ ក្នុងពាក់កណ្ដាល ខែវិច្ឆិកានេះ សភាពលរដ្ឋ​ខ្មែរក្រៅប្រទេស បានធ្វើសំណើបញ្ជូន សំណុំរឿង វិបត្តិ ជាច្រើន ដែលកម្ពុជាកំពុងប្រឈម ឲ្យ​ប្រទេស​បារាំងជួយដោះស្រាយ ជាពិសេស នៅពេលលោក ម៉ាក្រុង ជួបលោក ហ៊ុន ម៉ាណែត ដោយផ្ទាល់​នៅភ្នំពេញ។

ជារួម​សភាក្រៅប្រទេស ស្នើសុំអន្តរាគមន៍ពីបារាំង ដើម្បំជំរុញឲ្យរដ្ឋាភិបាលលោក ហ៊ុន ម៉ាណែត ស្ដារប្រជាធិបតេយ្យ គោរពសិទ្ធិមនុស្ស និង ធានាយុត្តិធម៌សង្គម។
សភាពលរដ្ឋខ្មែរក្រៅប្រទេស ដែលមានសមាជិកសភា ៤៧ រូប បានសរសេរក្នុង លិខិតរបស់ខ្លួន ប្រាប់ប្រធានាធិបតីបារាំង កាលពីថ្ងៃទី០៣ ខែវិច្ឆិកា ថា សំណើរ របស់ខ្លួន ផ្អែកលើតួនាទីជា​ប្រវត្តិសាស្ត្រ​របស់ប្រទេសបារាំង ដែលជា​សហប្រធាន នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១។ សភាក្រៅប្រទេស ជឿជាក់ថា រដ្ឋាភិបាលបារាំង​មានតួនាទីដ៏សំខាន់​ក្នុង​ការ​ផ្ដល់ជំនួយអន្តរាគមន៍ ឲ្យប្រទេសកម្ពុជា មានការផ្សះផ្សាបង្រួបបង្រួមជាតិ និង​ការកសាង​សេដ្ឋកិច្ច ដែលត្រូវប្រកាន់តាមគោលការណ៍ប្រជាធិបតេយ្យ សិទ្ធិមនុស្ស និង យុត្តិធម៌សង្គម ដូចមានចែងក្នុងកិច្ចព្រមព្រៀងសន្ដិភាពនេះ។

ប្រធានសភាពលរដ្ឋខ្មែរក្រៅប្រទេស លោក ទេព មនោរម្យ ប្រាប់ទូរទស្សន៍ អាស៊ីសេរី នៅថ្ងៃទី៥ ខែវិច្ឆិកាថា វត្តមានរបស់លោកម៉ាក្រុង​នៅភ្នំពេញ មានឥទ្ធិពលធំណាស់ ក្នុងការរំឭកលោក ហ៊ុន ម៉ាណែត ឲ្យ​ដោះស្រាយវិបត្តិកម្ពុជា​ឲ្យស្របនឹងស្មារតីកិច្ចព្រមព្រៀងសន្ដិភាព​ទីក្រុងប៉ារីស។ លោកសង្ឃឹមថា ប្រធានា​ធិបតីបារាំង លោក ម៉ាក្រុង នឹងដាស់តឿនលោក ហ៊ុន ម៉ាណែត ឲ្យ​ចាប់​ផ្ដើមដោះលែងអ្នកទោសនយោបាយ និងស្ដារប្រជាធិបតេយ្យ ពីព្រោះ នេះជាកាលៈទេសៈ​ចាំបាច់ណាស់ ខណៈការបោះឆ្នោតឆ្នាំ២០២៧ ខិតជិតមក​ដល់។

ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់ទូរទស្សន៍អាស៊ីសេរី ថ្ងៃទី៥ ខែវិច្ឆិកាថា លិខិតរបស់សភាពពលរដ្ឋខ្មែរក្រៅប្រទេស គឺជាផ្នែកមួយ ដែលមានប្រយោជន៍ សម្រាប់កម្ពុជា។ យ៉ាងណា លោកថា លោក ម៉ាក្រុង នឹងសំអាងជារួម ទៅលើរបាយការណ៍របស់​អ្នករាយការណ៍ពិសេស ផ្នែកសិទ្ធិមនុស្ស នៃអង្គការសហប្រជាជាតិ បណ្ដាអង្គទូតសម្ព័ន្ធមិត្តនៅ​កម្ពុជា សង្គមស៊ីវិលក្នុងស្រុក គណបក្សនយោបាយ និងអ្នកពាក់ព័ន្ធជាច្រើនទៀត ដើម្បីជំរុញ​ដោយលោក ហ៊ុន ម៉ាណែត ដោះស្រាយដោយការទទួលច់ខុសត្រូវ។
លោក ម៉ែន ណាត មានប្រសាសន៍ថា លោក ម៉ាក្រុង នឹងលើកឡើងពីបញ្ហា​ប្រជាធិបតេយ្យ សិទ្ធិមនុស្ស និង​យុត្តិធម៌សង្គម ដូចមានក្នុងខ្លឹមសារលិខិត របស់​សភាក្រៅប្រទេស រហូតដល់​បញ្ហាពលរដ្ឋភៀសសឹកខ្មែរ ជាង ២ម៉ឺននាក់។ លោកថា ទោះបីជាលោក ហ៊ុន ម៉ាណែត ព្យាយាមដោះសា យករួចខ្លួនមួយ គ្រាៗក៏ដោយ ក៏ប្រធានាធិបតីបារាំង នឹងរំឭកដាស់តឿន​លោក ហ៊ុន ម៉ាណែត ទាំងក្នុងកិច្ចប្រជុំរួម និង​កិច្ចប្រជុំការទូតចង្អៀត ដែលធ្វើឲ្យលោក ហ៊ុន ម៉ាណែត ពិបាកប្រកែក។

វិញ្ញសាវិបត្តិសំខាន់ៗ ដែលសភាពលរដ្ឋខ្មែរក្រៅប្រទេស បានស្នើដល់ប្រធានាធិបតីបារាំង លោក អេម៉ានុយអែល ម៉ាក្រុង ជំរុញរដ្ឋាភិបាលលោក ហ៊ុន ម៉ាណែត ឲ្យដោះស្រាយជាចាំបាច់ រួមមាន ការរកយុត្តិធម៌ជូនពលរដ្ឋខ្មែរសញ្ជាតិបារាំង ដែលជាអតីតតំណាងរាស្ត្រគណបក្ស​សង្គ្រោះជាតិ លោក លិម គិមយ៉ា ហើយនិងការបង្ក្រាបឋឧក្រិដ្ឋកម្មឆបោកតាមអនឡាញ និង ការជួញដូរមនុស្ស។

វិញ្ញាសាវិបត្តិ ដែលត្រូវតែដោះស្រាយជាបន្ទាន់ ចំនួន ២ទៀត មាន​ដូចជា ការដោះលែង​អ្នកទោស​នយោបាយ និងអ្នកទោសមនសិការជាង ១០០នាក់ ដែល​កំពុងជាប់ពន្ធនាគារ ព្រមទាំង​ការ​ធានាសុវត្ថិភាពដល់តំណាងរាស្ត្រ គណបក្សសង្គ្រោះជាតិគ្រប់រូប ឲ្យវិល​ត្រឡប់​ទៅកម្ពុជាវិញ នៅមុនការឆ្នោតឆ្នាំ២០២៧ ឬ ធ្វើសកម្មភាពនយោបាយ លើទឹកដីកម្ពុជា ដោយគ្មានការធ្វើទុក្ខបុកម្នេញ​ផ្នែក​នយោបាយ។

ទូរទស្សអាស៊ីសេរី មិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និង​អ្នកនាំពាក្យរដ្ឋសភាកម្ពុជា លោក កែវ ពិសិដ្ឋ ដើម្បីសុំការ​ឆ្លើយតបអំពីរឿងនេះបានទេ នៅថ្ងៃទី៥ ខែវិច្ឆិកា។

ទោះបីជាយ៉ាងណាក៏ដោយ តំណាងរាស្ត្រគណបក្សសង្គ្រោះជាតិ និង​ជាមន្ត្រីជាន់​ខ្ពស់នៃ​រដ្ឋាភិបាល​កម្ពុជាឯករាជ្យ ២៣តុលា លោក ម៉ែន សុថាវរិន្ទ្រ នៅតែរំពឹងថា ប្រជាធិបតេយ្យបារាំង លោក ម៉ាក្រុង នឹងអាចជួយធ្វើអន្តរាគមន៍​ឲ្យរូបលោក លោក សម រង្ស៊ី និង សហការី​នហោបាយ​ផ្សេងទៀត បានចូល​ប្រទេសកម្ពុជា និង​បំពេញតួនាទីជាអ្នកនយោបាយលើសមរភូមិប្រកួត​ប្រជែង​វិញ។

តាមគម្រោង មេដឹកនាំ និងតំណាង យ៉ាងតិច ចំនួន ៧០​ប្រទេស នឹងទៅចូលរួម​កិច្ចប្រជុំកំពូលហ្វ្រង់កូហ្វូនី ឬ​ក្រុមប្រទេសនិយាយភាសាបារាំង លើកទី២០ ដែលនឹងប្រារព្ធធ្វើនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកានេះ។

ប្រមុខរដ្ឋាភិបាលកម្ពុជាឯករាជ្យ ២៣តុលា លោក សម រង្ស៊ី ធ្លាប់បានសរសេរលិខិត ទៅក្រសួងកិច្ចការអឺរ៉ុប និង​ការបរទេសបារាំង ដោយរំឭកប្រមុខរដ្ឋបារាំង លោក អេម៉ានុយអែល ម៉ាក្រុង ថា វត្តមានរបស់លោកប្រធានាធិបតី​នៅកម្ពុជា នឹងត្រូវពួកអ្នកកាន់អំណាច​គណបក្ស​ប្រជាជនកម្ពុជា ប្រើប្រាស់យ៉ាងងាយស្រួល ដើម្បីបំភ័ន្ដថា របបឯកបក្សរបស់ពួកគេ​ទទួលស្គាល់​ពីអន្តរជាតិ ប្រសិនបើ​លោកប្រធានាធិបតី មិនអាចប្រើឥទ្ធិពលបារាំង​ឲ្យមានលទ្ធផល​ដំណោះស្រាយ វិបត្តិឧក្រិដ្ឋកម្មស្អេកស្អះ នៅ​កម្ពុជា​ទេ។

អ្នកឃ្លាំមើលលើកឡើង​ថា ពេលលោក ហ៊ុន ម៉ាណែត ពេញចិត្តវត្តមាន​របស់លោក ម៉ាក្រុង នៅកម្ពុជា ក៏គួរណាស់តែលោកនាយករដ្ឋមន្ត្រី ពេញចិត្តគោរព សំណើរបស់ប្រធានាធិបតីបារាំង ឲ្យដោះស្រាយវិបត្តិប្រជាធិបតេយ្យ និង​ការ​បំពានសិទ្ធិមនុស្សដែរ គឺកុំពេញចិត្តត្រឹមតែយករូបថត និង វីដេអូ របស់ប្រមុខរដ្ឋបារាំង ទៅបោកភ្នែកប្រជាពលរដ្ឋខ្មែរ និង​សហគមន៍អន្តរជាតិ៕