ក្រុមហ៊ុន ហួយវ័ន ផេ (Huione Pay) ដែលជាកម្មសិទ្ធិរបស់លោក ហ៊ុន តូ ដែលត្រូវជាក្មួយរបស់ប្រធានព្រឹទ្ធសភាលោក ហ៊ុន សែន និងជាបងប្រុសជីដូនមួយរបស់លោកនាយករដ្ឋមន្ត្រី ហ៊ុន ម៉ាណែត បានប្រកាសបិទសេវាកម្មបណ្ដោះអាសន្ន រយៈពេលជាង ២ខែ ក្រោយពីអតិថិជនសម្រុកដកលុយចេញពីក្រុមហ៊ុន។ ការប្រកាសផ្អាកសេវាកម្មនេះ បានធ្វើឱ្យអតិថិជនរបស់ក្រុមហ៊ុន មួយនេះ កំពុងភ័យ និងរកវិធីផ្ទេរ និងដកលុយរបស់ពួកគេតាមគ្រប់មធ្យោបាយ។
អតិថិជនដែលមានលុយនៅក្នុងគណនីរបស់ក្រុមហ៊ុន ហួយវ័ន ផេ កំពុងបារម្ភអំពីរឿងថា «មានលុយហើយ ប៉ុន្តែចាយមិនកើត»បន្ទាប់ពីក្រុមហ៊ុនមួយនេះ កំពុងទទួលរងពាក្យបណ្ដឹងរបស់អន្តរជាតិ រហូតបានប្រកាសផ្អាកសេវាកម្មបណ្ដោះអាសន្ន។
អតិថិជនរបស់ក្រុមហ៊ុន ហួយវ័ន ម្នាក់ ថ្លែងក្នុងលក្ខខណ្ឌមិនបញ្ចេញឈ្មោះ ប្រាប់ទូរទស្សន៍អាស៊ីសេរី នៅថ្ងៃទី១ ខែធ្នូ ថា អាជីវកម្មរបស់កញ្ញាកំពុងជួបបញ្ហា ដោយសារមិនអាចដកលុយចេញពីធនាគាររបស់ក្រុមហ៊ុន ហួយវ័ន ផេ បាន ក្រោយក្រុមហ៊ុននេះ បានប្រកាសផ្អាកសេវាកម្មបណ្ដោះអាសន្នរបស់ខ្លួន។ កញ្ញាបន្តថា បច្ចុប្បន្នអតិថិជនរបស់ក្រុមហ៊ុន ហួយវ័ន ផេ កំពុងរកវិធីដកលុយរបស់ខ្លួន ចេញពីក្រុមហ៊ុន ដើម្បីយកមកបង្វិលការរកស៊ី ខណៈធនាគារស្ទើរតែទាំងអស់ បានបញ្ឈប់ប្រព័ន្ធប្រតិបត្តិការជាមួយក្រុមហ៊ុន ហួយវ័ន នេះទៅហើយ។
អតិថិជនក្រុមហ៊ុន ហួយវ័ន ផេ៖ «រឿងបញ្ហាតិចឬច្រើន អាស្រ័យលើអ្នកប្រើប្រាស់។ ឧទាហរណ៍ថា ពួកខ្ញុំអ្នករកស៊ី ត្រូវការប្រើលុយ ភ្ញៀវនៅពេលទិញអីវ៉ាន់ គឺតែងតែបាញ់(ផ្ទេរ)លុយហ្នឹងឱ្យពាក់ព័ន្ធនឹងសេវាកម្ម បកប្រែអីហ្នឹង គឺទទួលបានលុយពីហ្នឹងទាំងអស់។ នៅពេលមានបញ្ហាអ៊ីចឹង វាពិបាករកកន្លែងបញ្ចេញ»។
ការថ្លែងរបស់អាជីវកររូបនេះ ធ្វើឡើងបន្ទាប់ពីក្រុមហ៊ុន ហួយវ័ន ផេ ដែលមានទីតាំងនៅរាជធានីភ្នំពេញ បានប្រកាសនៅថ្ងៃទី១ ខែធ្នូ នេះអំពីការផ្អាកសេវាកម្មបណ្ដោះអាសន្ន របស់ហាង និងការិយាល័យសេវាកម្មទាំងអស់របស់ក្រុមហ៊ុន ចាប់ពីថ្ងៃទី១ ខែធ្នូ ឆ្នាំ ២០២៥ ដល់ថ្ងៃទី៥ ខែមករា ឆ្នាំ ២០២៦។ ទោះជាយ៉ាងណា ក្រុមហ៊ុនបានបញ្ជាក់ថា ដើម្បីធានាសុវត្ថិភាពប្រាក់របស់អតិថិជន បន្ទាប់ពីការវាយតម្លៃរួច ក្រុមហ៊ុននឹងសម្រេចអនុវត្តវិធានការពន្យារការដកប្រាក់ជាដំណាក់កាល។
ទោះជាបែបនេះក្ដី ការផ្អាកសេវាកម្មនេះ បានធ្វើឱ្យអតិថិជន ខ្មែរ និងបរទេសជាច្រើននាក់ បានមកប្រមូលផ្តុំគ្នា នៅពីមុខក្រុមហ៊ុន ដើម្បីដកសាច់ប្រាក់ពីក្នុងគណនី។ អតិថិជនរបស់ក្រុមហ៊ុន ហួយវ័ន ផេ ភាគច្រើន គឺជាប្រតិបត្តិការ ឬអាជីវករ រកស៊ីផ្ទេរ និងប្ដូរប្រាក់ពីរូបិយប័ណ្ណបរទេស ទៅជារូបិយប័ណ្ណ អេឡិចត្រូនិក ឬគ្រីបតូ (Crypto) និងមួយចំនួនទៀត គឺជាអ្នកបម្រើសេវាកម្មបកប្រែភាសាចិន និងសេវាកម្មផ្សេងៗ ដែលទទួលបានប្រាក់កម្រៃ ដែលគេផ្ទេរចូលទៅក្នុងប្រព័ន្ធគណនីរបស់ក្រុមហ៊ុន ហួយវ័ន ផេ។
ក៏ប៉ុន្តែ ធនាគារជាតិនៃកម្ពុជា បានដកហូតអាជ្ញាប័ណ្ណក្រុមហ៊ុន ហួយវ័ន ផេ របស់លោក ហ៊ុន តូ បន្ទាប់ពីរតនាគារសហរដ្ឋអាមេរិករកឃើញថា ក្រុមហ៊ុននេះ មានជាប់ពាក់ព័ន្ធនឹងប្រតិបត្តិការទូទាត់លាងលុយកខ្វក់រាប់សិបពាន់លានដុល្លារ ឱ្យក្រុមសង្គមងងឹត ឬក្រុមឆបោកតាមអ៊ីនធឺណិត (Cyber Scam) ដ៏ល្បីល្បាញ។
អតិថិជន របស់ក្រុមហ៊ុន ហួយវ័ន ផេ បានអះអាងថា ក្រោយការដកហូតអាជ្ញាប័ណ្ណនេះ កម្មវិធីផ្ទេរសាច់ប្រាក់របស់ក្រុមហ៊ុន នៅលើទូរស័ព្ទដៃ និងប្រព័ន្ធប្រតិបត្តិការ ភ្ជាប់ទៅកាន់ធនាគារក្នុងស្រុកផ្សេងទៀតបានឈប់ដំណើរការ។ បញ្ហានេះ បានធ្វើឱ្យអតិថិជន ដែលមានលុយរូបិយប័ណ្ណ និងគ្រីបតូ នៅក្រុមហ៊ុន ហួយវ័ន ផេ បាននាំគ្នាសម្រុកទៅដក ឬផ្ទេរចេញ រហូតក្រុមហ៊ុន បានប្រកាសផ្អាកសេវាកម្មបណ្ដោះអាសន្ន។
ទូរទស្សន៍អាស៊ីសេរី មិនអាចទាក់ទងក្រុមហ៊ុន ហួយវ័ន ផេ ដើម្បីសុំការបកស្រាយបន្ថែម ជុំវិញបញ្ហានេះបានទេ នៅថ្ងៃទី១ ខែធ្នូ។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត ជំរុញឱ្យរដ្ឋាភិបាលបើកការស៊ើបអង្កេតលើក្រុមហ៊ុន ហួយវ័ន ផេ ពាក់ព័ន្ធនឹងប្រតិបត្តិការ ក្នុង និងក្រៅស្រុក និងប្រាក់ដែលក្រុមហ៊ុនតម្កល់ទុកនៅក្នុងធនាគារជាតិ ដើម្បីធានាបានថា ក្រុមហ៊ុន ហួយវ័ន ផេ នឹងមិនបន្តដំណើរការដោយប្ដូរផ្លាកយីហោថ្មីនោះឡើយ។
លោក ម៉ែន ណាត៖ «ទោះបដិសេធយ៉ាងម៉េច បានតែលាងខ្លួនបោកប្រាស់ចិត្តខ្លួនឯង និងភូតភរពលរដ្ឋខ្លួនឯងទេ ប៉ុន្តែឯកសារ និងរបាយការណ៍អន្តរជាតិគេមានហ្នឹង គឺគេហូរហៀរ គេផ្សព្វផ្សាយហ្នឹង អត់មានខុសទេ»។
ក្រសួងរតនាគារអាមេរិកបានលើកឡើងទៀតថា ចាប់តាំងពីខែសីហា ឆ្នាំ២០២១ មក ក្រុមហ៊ុន ហួយវ័ន ផេ របស់លោក ហ៊ុន តូ និងបណ្ដាញក្រុមហ៊ុនជាបុត្រសម្ព័ន្ធ បានជួយលាងលុយកខ្វក់ចំនួន ៤ពាន់លានដុល្លារ ឱ្យក្រុមឧក្រិដ្ឋជន រួមទាំងក្រុមចោរបច្ចេកវិទ្យារបស់កូរ៉េខាងជើង (North Korea) និងក្រុមឆបោកនៅតំបន់អាស៊ីអាគ្នេយ៍។
ពាក់ព័ន្ធនឹងករណីនេះ អតិថិជនរបស់ក្រុមហ៊ុន ហួយវ័ន ផេ បានអះអាងថា ពួកគាត់មិនសូវបានដឹងពីឧក្រិដ្ឋកម្ម ដែលពាក់ព័ន្ធនឹងក្រុមហ៊ុននេះឡើយ ហើយប្រសិនបើដល់ការកំណត់ ក្រុមហ៊ុននៅតែមិនដំណើរការសេវាកម្មវិញទេនោះ ពួកគាត់នឹងដាក់ពាក្យបណ្ដឹងទៅកាន់ស្ថាប័នរដ្ឋណាមួយឱ្យជួយអន្តរាគមន៍៕
