កម្លាំងសមត្ថកិច្ចចម្រុះបានឆ្មក់ចូលបង្ក្រាបទីតាំងផ្ទះវីឡា ២កន្លែងស្ថិតនៅជាយក្រុងប៉ោយប៉ែតខេត្តបន្ទាយមានជ័យ និងបានឃាត់ខ្លួនជនបរទេសរាប់រយនាក់ពាក់ព័ន្ធនឹងអំពើឆបោកតាមអនឡាញ។ មន្ត្រីសិទ្ធិមនុស្សឱ្យដឹងថា បណ្ដាញឧក្រិដ្ឋជន និងម្ចាស់អគារដែលជួលឱ្យជនជាតិចិនធ្វើសកម្មភាពឆបោកតាមអនឡាញតែងតែបានដឹងមុនអំពីសកម្មភាពចុះបង្ក្រាបរបស់សមត្ថកិច្ច ហើយពួកគេក៏បានជម្លៀសជនបរទេសចេញពីទីតាំងមួយទៅទីតាំងមួយ។
កម្លាំងសមត្ថកិច្ចនៃអគ្គស្នងការដ្ឋាននគរបាលជាតិ និងកម្លាំងកងរាជអាវុធហត្ថនៅថ្ងៃទី៥ ខែឧសភា បានបើកប្រតិបត្តិការទ្រង់ទ្រាយធំបង្ក្រាបទៅលើទីតាំងផ្ទះវីឡាទោលចំនួន ២កន្លែងផ្សេងគ្នា ស្ថិតក្នុងភូមិទួលប្រាសាទ ក្រុងប៉ោយប៉ែត ខេត្តបន្ទាយមានជ័យ និងឃាត់ខ្លួនបានជនបរទេសជាច្រើននាក់ដែលសម្ងំបន្តធ្វើសកម្មភាពឆបោកតាមអនឡាញ។
អគ្គស្នងការដ្ឋាននគរបាលជាតិបញ្ជាក់នៅលើគេហទំព័ររបស់ខ្លួនថា ជនបរទេសទាំងនេះបានរត់គេចចេញពីការបង្ក្រាបរបស់សមត្ថកិច្ចនៅតាមទីតាំងអគារឆបោកតាមអនឡាញនានា ដើម្បីមកសម្ងំលាក់ខ្លួនបន្តធ្វើសកម្មភាពឆបោកតាមអនឡាញនៅភូមិសាស្ត្រក្រុងប៉ោយប៉ែត។ ក្នុងប្រតិបត្តិការបង្ក្រាបនេះសមត្ថកិច្ចបានឃាត់ខ្លួនជនបរទេសចម្រុះជាតិសាសន៍ដែលភាគច្រើនគឺជាជនជាតិចិន និងដកហូតបានកាំភ្លើងខ្លី រថយន្ត ព្រមទាំងសម្ភារៈប្រើប្រាស់សម្រាប់ឆបោកតាមអនឡាញមួយចំនួនធំ។
សមត្ថកិច្ចជំនាញមិនបានបង្ហាញមុខមេខ្លោង និងម្ចាស់ផ្ទះវីឡាដែលបានអនុញ្ញាតឱ្យបណ្ដាញឧក្រិដ្ឋជនបង្ខាំងជនបរទេស ដើម្បីឱ្យបន្តសកម្មភាពឆបោកតាមអនឡាញនេះនៅឡើយ ខណៈបណ្ដាញឧក្រិដ្ឋជនបានផ្លាស់ប្ដូរទម្រង់ការងារដោយប្រមូលជនរងគ្រោះ ឬបុគ្គលិកឱ្យបន្តធ្វើការនៅតាមផ្ទះជួល ឬអគារតូចៗ ដើម្បីគេចចេញពីការបង្ក្រាបរបស់សមត្ថកិច្ច។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ដើម្បីសាកសួរបន្ថែមជុំវិញរឿងនេះបានទេនៅថ្ងៃទី៥ ខែឧសភា។
ជុំវិញរឿងនេះ អ្នកគ្រប់គ្រងប្រចាំការិយាល័យអង្គការលីកាដូ (LICADHO) ខេត្តបន្ទាយមានជ័យ លោក អ៊ិន គង់ជិត ឱ្យដឹងថា យុទ្ធនាការបង្ក្រាបរបស់សមត្ថកិច្ចនៅតាមអគារអនឡាញភាគច្រើនផ្តោតតែលើជនបរទេសតូចតាច និងចាប់ខ្លួនបុគ្គលិកដែលត្រូវបានបង្ខំឱ្យធ្វើការងារ ប៉ុន្តែមេខ្លោងធំៗ និងម្ចាស់អគារជាដើមនៅតែរស់នៅក្រៅសំណាញ់ច្បាប់។
លោក អ៊ិន គង់ជិត៖ «ការបង្ក្រាបបទល្មើសទាំងនេះ យើងគិតថា មិនទាន់អស់នៅឡើយទេនៅក្រុងប៉ោយប៉ែត នៅមានតទៅទៀត។ អ៊ីចឹង យើងស្នើសុំឱ្យសមត្ថកិច្ចអគ្គស្នងការនគរបាលជាតិ មេត្តាប្រឹងប្រែងបន្តសកម្មភាពបង្ក្រាបនេះ ឱ្យដូចភ្លៀងរលឹម។ ប្រសិនបើមិនបានចាប់ជនប្រព្រឹត្តិ អ្នកពាក់ព័ន្ធ ដូចជាសហចារី មេខ្លោង ម្ចាស់ទីតាំង ម្ចាស់ទីកន្លែង និងអ្នកកាង យកមកផ្ដន្ទាទោសតាមច្បាប់ទេ ការបង្ក្រាបគ្រាន់តែដូចជាការបង្អើល ឬក៏បង្អាក់សកម្មភាពទេ ហើយនៅពេលក្រោយ សកម្មភាពស្កេមអនឡាញ (Scam Online) នេះនឹងកើតឡើងវិញដដែល គ្រាន់តែថាវា ស្ងប់ស្ងាត់មួយរយៈប៉ុណ្ណឹងឯង»។
ទីក្រុងប៉ោយប៉ែតខេត្តបន្ទាយមានជ័យបានក្លាយជាទីកន្លែងដ៏លេចធ្លោជាងគេដែលសម្បូររឿងរ៉ាវឧក្រិដ្ឋកម្មជាពិសេសជនបរទេសត្រូវគេសម្លាប់។ ក្រៅពីនេះ ជនរងគ្រោះជាច្រើនត្រូវបានបណ្ដាញឧក្រិដ្ឋជនប្រមូលមកពីទីតាំងអគារផ្សេងៗគ្នាមកបង្ខាំងនៅតាមអគារអនឡាញរបស់អ្នកមានលុយមានអំណាចនៅក្រុងប៉ោយប៉ែត ដើម្បីបង្ខំឱ្យធ្វើការងារជាអ្នកឆបោកតាមអនឡាញក្រោមការយាមកាមយ៉ាងតឹងរ៉ឹង។ ទន្ទឹមគ្នានេះ ចំណាត់ការបង្ក្រាបរបស់សមត្ថកិច្ចនៅក្រុងប៉ោយប៉ែតក៏រងការរិះគន់ថា គ្មានប្រសិទ្ធភាព និងពាក់ព័ន្ធនឹងការឃុបឃិតប្រព្រឹត្តអំពើពុករលួយជាប្រព័ន្ធ ដោយសារតែអាជ្ញាធរបានស៊ីសំណូកពីបណ្ដាញក្រុមឧក្រិដ្ឋជន និងផ្ដល់ដំណឹងឱ្យពួកគេមុនពេលចុះបង្ក្រាបនៅតាមអគារឆបោកតាមអនឡាញ៕
