មេធាវីរបស់លោក ថាច់ សេដ្ឋា គឺលោកបណ្ឌិត សឺន ជុំជួន អះអាងថា តុលាការបានសម្រេចបដិសេធមិនដោះលែងកូនក្ដីរបស់លោកឲ្យមានសេរីភាពវិញនោះទេ ដោយតុលាការសំអាងថា ពាក្យសុំដោះលែងទណ្ឌិតឱ្យមានសេរីភាពរបស់លោក មិនមានលក្ខខណ្ឌគ្រប់គ្រាន់ដើម្បីយកមកពិនិត្យ និងសម្រេចបានឡើយ។ ចំណែកអ្នកឃ្លាំមើលសង្គមអះអាងថា ការបន្តឃុំខ្លួនលោក ថាច់ សេដ្ឋា គឺបញ្ជាក់ឲ្យឃើញយ៉ាងច្បាស់ថា បក្សកាន់អំណាចប្រើប្រាស់ប្រព័ន្ធតុលាការ ធ្វើជាឧបករណ៍នយោបាយដើម្បីគាបសង្កត់ និងបំបាក់ស្មារតី សំឡេងប្រឆាំង។
មេធាវីរបស់លោក ថាច់ សេដ្ឋា គឺលោកបណ្ឌិត សឺន ជុំជួន បានប្រាប់ទូរទស្សន៍អាស៊ីសេរីថា តុលាការបានឆ្លើយតបទៅនឹង ពាក្យសុំដោះលែងទណ្ឌិតឱ្យមានសេរីភាព របស់លោកនៅថ្ងៃនេះ ដោយតុលាការបញ្ជាក់ថា កូនក្តីរបស់លោកមានទោសចំនួនពីរសំណុំរឿង គឺទី១ ករណីមិនបំពេញកាតព្វកិច្ចចំពោះឧបករណ៍អាចជួញដូរបាន និងសំណុំរឿងទី២ ករណីញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង។ ដូច្នេះ ការស្នើសុំដោះលែងតែ ១សំណុំរឿង គឺមិនមានលក្ខខណ្ឌគ្រប់គ្រាន់ដើម្បីយកមកពិនិត្យ និងសម្រេចបានឡើយ។
លោកបណ្ឌិត សឺន ជុំជួន បានឲ្យដឹងបន្ថែមទៀតថា តុលាការបានបញ្ជាក់ប្រាប់លោកថា មូលទោសសរុបដែលត្រូវបានសម្រេចផ្ដន្ទាទោសលើកូនក្តីរបស់លោក គឺចំនួន ៤ឆ្នាំ ៦ខែ និងទោសពិន័យជាប្រាក់ចំនួន ៧,០០០,០០០(ប្រាំពីរលាន)រៀល ដែលត្រូវ អនុវត្តទោសក្នុងពន្ធនាគារចប់សព្វគ្រប់នៅថ្ងៃទី១៦ ខែកក្កដា ឆ្នាំ២០២៧។ លោកថា ការសម្រេចរបស់តុលាការគឺអយុត្តិធម៌សម្រាប់កូនក្តីរបស់លោក។
លោក សឺន ជុំជួន៖ «បើយើងនិយាយទៅតាមស្មារតីច្បាប់នេះគឺនៅពេលដែលទណ្ឌិតបានអនុវត្តទោសគ្រប់ចំនួនគឺតុលាការត្រូវតែមានដីកា ការសម្រេចដោះលែង ទៅខាងពន្ធនាគារត្រឹមត្រូវ ដើម្បីឲ្យខាងមណ្ឌលអប់រំកែប្រែឬក៏ពន្ធនាគារដោះលែង។ និយាយជារួមទៅ បើផ្អែកទៅតាមស្មារតីច្បាប់ មិនចាំបាច់ដាក់ពាក្យស្នើសុំឲ្យដោះលែងទេ គឺតុលាការមានកាតព្វកិច្ចមួយ មើលទៅលើស្មារតីច្បាប់ហ្នឹង ដើម្បីជៀសវាងកុំឲ្យមានការឃុំខ្លួនទណ្ឌិតហ្នឹងវាលើស ខុសនីតិវិធីអីជាដើម គឺជាកាតព្វកិច្ចមួយសំខាន់ណាស់មិនចាំបាច់តែមានទណ្ឌិតឬក៏មេធាវីរបស់ទណ្ឌិតហ្នឹង ដាក់ពាក្យស្នើសុំទេ»។
កាលពីថ្ងៃទី២៨ ខែមេសា មេធាវីការពារក្ដីឲ្យលោក ថាច់ សេដ្ឋា បានដាក់ពាក្យស្នើសុំតុលាការដោះលែងកូនក្ដីឲ្យមានសេរីភាព បន្ទាប់ពីលោកបានអនុវត្តទោសគ្រប់ចំនួនតាមនីតិវិធីច្បាប់តាំងពីថ្ងៃទី២០ ខែមេសា។
តុលាការគ្រប់ជាន់ថ្នាក់ បានផ្ដន្ទាទោសលោក ថាច់ សេដ្ឋា នៅក្នុងសំណុំរឿង “មិនបំពេញកាតព្វកិច្ចចំពោះឧបករណ៍ដែលអាចជួញដូរបាន” ឬ ចេញសែកស្អុយ តាមមាត្រា ២៣១ នៃច្បាប់ស្ដីពីឧបករណ៍ អាចជួញដូរបាន និងប្រតិបត្តិការទូទាត់សងប្រាក់ ឲ្យជាប់ពន្ធនាគារ១៨ខែ និងពិន័យជាប្រាក់ចំនួន ៣លានរៀល ហើយត្រូវទូទាត់បំណុលដល់ហាងបញ្ចាំឈ្មោះ រិន ឆាយ ជាង ៣ម៉ឺនដុល្លារអាមេរិក ផងដែរ។
ចំណែកសំណុំរឿងញុះញង់មួយទៀត តុលាការផ្ដន្ទាទោសឲ្យលោក ថាច់ សេដ្ឋា ជាប់ពន្ធនាគារ ៣ឆ្នាំ ទាក់ទង លោកនិយាយពីប្រវត្តិគណបក្សប្រជាជនកម្ពុជា ស្តូបមិត្តភាពកម្ពុជាវៀតណាម និងប្រវត្តិ ៧មករានៅក្នុងវេទិកាជាមួយអ្នកគាំទ្រនៅក្រៅប្រទេស កាលពីខែមករាឆ្នាំ២០២៣។ការកាត់ទោសលោក ថាច់ សេដ្ឋា ទាំងពីរសំណុំរឿងនេះ ត្រូវបានគេមើលឃើញថា ជារឿងនយោបាយសុទ្ធសាធ។
អនុប្រធានគណបក្សភ្លើងទៀនលោក ថាច់ សេដ្ឋា ដែលមានដើមកំណើតខ្មែរក្រោម ត្រូវបានអាជ្ញាធរក្រុងភ្នំពេញចាប់ខ្លួន កាលពីថ្ងៃទី១៦ ខែមករា ឆ្នាំ២០២៣ អំឡុងពេល ដែលរដ្ឋាភិបាលរបស់ត្រកូលហ៊ុន បើកយុទ្ធនាការរារាំង និងកម្ទេចគណបក្សប្រឆាំង នៅមុនការបោះឆ្នោត ដែលលោក ហ៊ុន សែន និងក្រុមមេដឹកនាំកំពូលៗ របស់បក្សប្រជាជនកម្ពុជា ត្រៀមផ្ទេរអំណាចជាប្រព័ន្ធឲ្យកូនៗរបស់ពួកគេ។
ជុំវិញរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី បានប្រាប់ទូរទស្សន៍អាស៊ីសេរី ថា ការបន្តឃុំខ្លួនលោក ថាច់ សេដ្ឋា ជាសញ្ញាណដ៏គ្រោះថ្នាក់មួយ ដែលឆ្លុះបញ្ចាំងពីការធ្លាក់ចុះដុនដាបនៃប្រព័ន្ធយុត្តិធម៌នៅកម្ពុជា ហើយវាក៏បញ្ជាក់ឲ្យឃើញយ៉ាងច្បាស់ថា បក្សកាន់អំណាចប្រើប្រាស់ប្រព័ន្ធតុលាការធ្វើជាឧបករណ៍នយោបាយ ដើម្បីគាបសង្កត់ និងបំបាក់ស្មារតី សំឡេងប្រឆាំង។
លោក សេង វណ្ណលី៖ «នៅពេលដែលច្បាប់ត្រូវបានយកមកអនុវត្តតាមទំនើងចិត្ត ឬតាមការបង្គាប់បញ្ជាពីមជ្ឈដ្ឋាននយោបាយ នោះយុត្តិធម៌សង្គម នឹងត្រូវរលាយសាបសូន្យ ហើយសិទ្ធិរស់រានរបស់ពលរដ្ឋគ្រប់រូបនិងស្ថិតក្នុងស្ថានភាពគ្រោះអាសន្ន ដូច្នេះការដោះលែងលោក ថាច់ សេដ្ឋា ជាបន្ទាន់ និងដោយគ្មានលក្ខខណ្ឌ គឺជាកិច្ចការចាំបាច់បំផុត ដើម្បីបង្ហាញអំពីការគោរពច្បាប់និងដើម្បីស្ដារមុខមាត់កម្ពុជាឡើងវិញនៅលើឆាកអន្តរជាតិ ជៀសវាងការធ្លាក់ទៅក្នុងរបបផ្ដាច់ការ ដែលប្រើប្រាស់គុកច្រវាក់ ជាមធ្យោបាយ ដោះស្រាយបញ្ហាជម្លោះនយោបាយ»។
អ្នកឃ្លាំមើលសង្គមកម្ពុជា លើកឡើងថា វិធានការរបស់រដ្ឋាភិបាលគ្រួសារត្រូលហ៊ុន ដែលធ្វើបាបសកម្មជនប្រឆាំង ឬសកម្មជនប្រជាធិបតេយ្យ ដោយមិនញញើតច្បាប់បែបនេះ គឺជាការបង្កើតវិបត្តិធ្វើឲ្យបែកបាក់ជាតិធ្ងន់ធ្ងរ ហើយបន្សល់ទុកតែការឈឺចាប់ ពិបាកផ្សះផ្សាគ្នាក្នុងសង្គមនៅថ្ងៃអនាគត ដែលធ្វើឱ្យប្រទេសជាតិកាន់តែធ្លាក់ចុះខ្សោយ ហើយបរទេសជិតខាងប្រមាថមើលងាយជាតិខ្មែរ៕
