សកម្មជនបរិស្ថានរកឃើញថា មន្ត្រីបរិស្ថានខេត្តព្រះវិហារជាអ្នកកាងការពារឲ្យក្រុមជនល្មើសកាប់ឈើធ្វើអាជីវកម្មនៅក្នុងតំបន់ព្រៃឡង់។ ខណៈអាជ្ញាធរពាក់ព័ន្ធជុំវិញតំបន់ព្រៃឡង់ ប្ដេជ្ញាចិត្តការពារព្រៃឡង់ឲ្យបានគង់វង្ស។
ស្របពេលដែលអាជ្ញាធរពាក់ព័ន្ធកំពុងប្ដេជ្ញាចិត្តនៅក្នុងសណ្ឋាគារថា នឹងការពារព្រៃឡង់ឲ្យបានគង់វង្ស។ សកម្មជនបរិស្ថាន ចុះល្បាតរកឃើញបទល្មើសចម្រុះនៅក្នុងដែនជម្រកសត្វព្រៃព្រៃឡង់ ខេត្តព្រះវិហារ ដោយក្រុមជនល្មើសត្រូវបង់លុយឲ្យមន្ត្រីបរិស្ថានចំនួន៣០ម៉ឺនរៀល ជាថ្នូរក្នុងការចូលទៅកាប់ឈើធ្វើអាជីវកម្ម និងជួយការពារសុវត្ថិភាពដល់ជនល្មើសទាំងនោះ។
អ្នកការពារសិទ្ធិមនុស្ស និងបរិស្ថាន លោក ម៉ា ចិត្រា ប្រាប់ទូរទស្សន៍អាស៊ីសេរី នៅថ្ងៃទី១២ ខែឧសភាថា បទល្មើសព្រៃឈើនៅតំបន់ព្រៃឡង់ខេត្តព្រះវិហារ មានចម្រុះ ដូចជាការបរបាញ់សត្វ ទន្ទ្រានដីព្រៃ និងកាប់ឈើធ្វើអាជីវកម្ម។ លោកថា ក្រុមអ្នកកាប់ឈើ បានប្រាប់ពួកលោកថា ពួកគេបានបង់លុយឲ្យទៅមន្ត្រីបរិស្ថានចំនួន៣០ម៉ឺនរៀល ជាថ្នូរដើម្បីចូលកាប់ឈើក្នុងតំបន់ការពារ និងជួយការពារ ឬជួយមើលផ្លូវមិនឲ្យនរណាប៉ះពាល់នោះទេ។
លោក ម៉ា ចិត្រា៖ «ក្នុងនាមខ្ញុំជាប្រជាពលរដ្ឋសំណូមពរទៅដល់រដ្ឋាភិបាលឬក៏អង្គភាពប្រឆាំងអំពើពុករលួយឲ្យគាត់ស៊ើបអង្កេតពាក់ព័ន្ធបញ្ហាវិនាសកម្មព្រៃឈើព្រោះមើលឃើញថា វាអាចជាកត្តាអំពើពុករលួយនេះឯងនាំឲ្យមានការកាប់បំផ្លាញព្រៃឈើពីមួយឆ្នាំទៅមួយឆ្នាំឥតឈប់ឈរ»។
កាលពីថ្ងៃទី០៧ ដល់ថ្ងៃទី១០ ខែឧសភា សកម្មជនបរិស្ថានចំនួន៦នាក់បានចុះសិក្សាស្រាវជ្រាវ និងល្បាតព្រៃក្នុងតំបន់ព្រៃឡង់រយៈពេល៣យប់ ៤ថ្ងៃ ដោយដកហូតបានអាវុធកែឆ្នៃចំនួន៦ដើម រណាយន្ដសម្រាប់អារឈើចំនួន៣គ្រឿង គោយន្ដ៦គ្រឿង និងបានជួបជនល្មើសចំនួន២០នាក់ ដែលបានកាប់ផ្ដួលដើមឈើមូលធំៗនៅក្នុងតំបន់អភិរក្សអស់ជាច្រើនដើម។
ទូរទស្សន៍អាស៊ីសេរី មិនអាចទាក់ទងប្រធានមន្ទីរបរិស្ថានខេត្តព្រះវិហារ លោក មឿន សុភេទ និងអ្នកនាំពាក្យក្រសួងបរិស្ថាន លោក ខ្វៃ អាទិត្យា ដើម្បីសុំការបកស្រាយបានទេ នៅថ្ងៃទី១២ ខែឧសភា។
ចំណែកសកម្មជនការពារព្រៃឡង់ខេត្តព្រះវិហារ លោក ខេម សុឃី ឲ្យដឹងថា ករណីអំពើពុករលួយ រវាងជនល្មើស និងមន្ត្រីបរិស្ថាន មិនមែនជារឿងថ្មីឡើយ ដោយករណីនេះកើតមានយូរណាស់មកហើយ គ្មានអាជ្ញាធរពាក់ព័ន្ធចុះបង្ក្រាប និងស្រាវជ្រាវ និងចាត់វិធានការទៅលើមន្ត្រីខិលខូចទាំងអស់នេះឡើយ។ លោកថា ប្រសិនបើបន្តឲ្យមានករណីបែបនេះទៀត ព្រៃឈើ និងធនធានធម្មជាតិផ្សេងទៀតនៅក្នុងដែនជម្រកសត្វព្រៃព្រៃឡង់ នឹងវិនាសហិនហោចជាក់ជាមិនខាន។
លោក ខេម សុឃី៖ «សម្រាប់ខ្ញុំថាមិនមែនជារឿងថ្មីទេ ការយកលុយយកកាកឬការសូកប៉ាន់ដល់អ្នកដែរពាក់ព័ន្ធក្នុងការការពារព្រៃឈើកន្លងមកក្រុមហ៊ុននៅជាប់ព្រៃទ្បង់ ក៏ដូចជា គល់អំពិលជាដើមក៏ធ្លាប់សូកប៉ាន់ដល់មន្ត្រីដែរ សម្រាប់ខ្ញុំចង់ឲ្យមន្ត្រីថ្នាក់លើកុំហាមឃាត់ដល់ប្រជាសហគមន៍ដែរចុះល្បាត ឲ្យគាត់ស្វែងយល់អំពីប្រជាសហគមន៍និងស៊ើបមើលមន្ត្រីក្រោមឱវាទរបស់គាត់នឹងថា តើគាត់បានប្រព្រឹត្តិអំពើទាំងអស់នោះអត់»។
ដែនជម្រកសត្វព្រៃព្រៃឡង់មានផ្ទៃដីជិត ៥សែន (៤៨៩.៦៦៣) ហិកតារ ជាប់ខេត្តចំនួន៤ រួមមាន ខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំ ត្រូវបានរដ្ឋាភិបាល បង្កើតជាតំបន់ដែនជម្រកសត្វព្រៃនៅក្នុងឆ្នាំ២០១៦។ ប៉ុន្តែរយៈពេលជិត ១០ឆ្នាំមកនេះ អង្គការជាតិនិងអន្តរជាតិ បានចេញរបាយការណ៍ជាបន្តបន្ទាប់ថា ដែនជម្រកសត្វព្រៃព្រៃឡង់តែងតែរងការកាប់ឈើធ្វើអាជីវកម្ម និងកាប់ទន្ទ្រានដីព្រៃយកធ្វើជាកម្មសិទ្ធិពីសំណាក់ក្រុមឈ្មួញ និងក្រុមហ៊ុនដីសម្បទានសេដ្ឋកិច្ចនៅជុំវិញតំបន់នោះយ៉ាងអនាធិបតេយ្យ។
ក្រៅពីនោះ ដែនជម្រកសត្វព្រៃព្រៃឡង់ បច្ចុប្បន្នត្រូវបានក្រុមហ៊ុនឯកជនចំនួន៥ ដែលកំពុងច្បាមយកធ្វើធនធានរ៉ែផ្សេងគ្នា ក្នុងនោះ មានដូចជា ក្រុមហ៊ុន គ្លប៊ល ហ្គ្រីន កំពុងច្បាមយករ៉ែដែក ទំហំជាង១ម៉ឺន (១៤.៨៩៤) ហិកតារ នៅភាគខាងជើងនៃតំបន់ព្រៃឡង់ នៃខេត្តព្រះវិហារ និងខេត្តស្ទឹងត្រែង ក្រុមហ៊ុន ឡេត ចេង ម៉ាញនីង កំពុងធ្វើអាជីវកម្មរ៉ែមាស នៅភាគខាងត្បូង ក្នុងខេត្តកំពង់ធំលើព្រៃដីជិត១ម៉ឺនហិកតារ និងរោងចក្រផលិតស៊ីម៉ងត៍ ខេភី ស៊ីមែន នៅភាគខាងកើត ក្នុងខេត្តក្រចេះ ហើយថ្មីៗនេះ រដ្ឋាភិបាលអនុញ្ញាតឲ្យក្រុមហ៊ុនចិនឈ្មោះខេមបូឌាន ខេ៨៨ អ៊ិនដាសស្ត្រី (Cambodian K88 Industry) ធ្វើអាជីវកម្មរ៉ែមាសថ្មីបន្ថែមទៀតនៅក្នុងភូមិសាស្ត្រតំបន់ការពារព្រៃឡង់ភាគខាងត្បូង ក្នុងខេត្តកំពង់ធំ និងខេត្តក្រចេះ៕
