ប្រធានព្រឹទ្ធសភាកម្ពុជា លោក ហ៊ុន សែន លើកឡើងនៅចំពោះមុខប្រធានាធិបតីចិន លោក ស៊ី ជីនពីង (Xi Jinping) ថា ចិនគឺជា «មិត្តដ៏គួរឱ្យទុកចិត្តបំផុត» របស់កម្ពុជា និងប្ដេជ្ញាបន្តរឹតចំណងមិត្តភាពដែកថែប និងកសាងសហគមន៍ជោគវាសនារួមជាមួយចិន។ លោក ហ៊ុន សែន ក៏បានស្នើឱ្យទីក្រុងប៉េកាំងបន្តផ្ដល់ប្រាក់កម្ចី និងទុនវិនិយោគបន្ថែម ដោយអះអាងថា កម្ពុជាមិនអាចរស់ខ្វះចិនបានឡើយ ជាពិសេសក្នុងការអភិវឌ្ឍហេដ្ឋារចនាសម្ព័ន្ធ។ អ្នកឃ្លាំមើល និងមន្ត្រីបក្សប្រឆាំង យល់ថា ការបង្ហាញជំហរពឹងផ្អែកកាន់តែខ្លាំងលើចិនរបស់លោក ហ៊ុន សែន កំពុងធ្វើឱ្យកម្ពុជាប្រឈមហានិភ័យផ្នែកសេដ្ឋកិច្ច និងធ្លាក់ក្រោមឥទ្ធិពលចិនកាន់តែខ្លាំងដែលអាចទាញឱ្យកម្ពុជាធ្លាក់ចូលអន្ទាក់កាន់តែជ្រៅក្នុងការប្រកួតប្រជែងភូមិសាស្ត្រនយោបាយ។
ប្រធានព្រឹទ្ធសភាកម្ពុជា និងជាប្រធានគណបក្សកាន់អំណាច លោក ហ៊ុន សែន បានបង្ហាញភក្ដីភាពចំពោះមេដឹកនាំកំពូលចិន និងបន្តសុំឱ្យភាគីចិនធ្វើជាខ្នងបង្អែកគាំទ្រកម្ពុជាទាំងផ្នែកនយោបាយ ជំនួយហិរញ្ញវត្ថុ ការវិនិយោគ និងសន្តិសុខ។
លោក ហ៊ុន សែន លើកឡើងក្នុងទំព័រហ្វេកប៊ុករបស់លោកថា ទោះស្ថានការណ៍ពិភពលោកប្រែប្រួលយ៉ាងណាក៏ដោយមិត្តភាពដែកថែបកម្ពុជា-ចិន នឹងមិនប្រែប្រួលឡើយ និងចាត់ទុកប្រទេសចិនថា ជាមិត្តពិត និងជាទីទុកចិត្តបំផុតរបស់កម្ពុជា។ លោក ហ៊ុន សែន ក៏បានស្នើសុំឱ្យភាគីចិនជួយគាំទ្រផ្នែកសេដ្ឋកិច្ច និងការកសាងហេដ្ឋារចនាសម្ព័ន្ធ។ លោកថា សេដ្ឋកិច្ចកម្ពុជាពិតជាមិនអាចរស់ខ្វះចិនបានឡើយ ជាពិសេសជំនួយ និងកម្ចីទៅលើការកសាងហេដ្ឋារចនាសម្ព័ន្ធ។
លោក ហ៊ុន សែន លើកឡើងបែបនេះក្នុងជំនួបជាមួយប្រធានាធិបតីចិនលោក ស៊ី ជីនពីង នៅថ្ងៃទី២៦ ខែមិថុនា ក្នុងដំណើរទស្សនកិច្ចមិត្តភាពផ្លូវការ ៣ថ្ងៃក្នុងប្រទេសចិន។ ក្នុងជំនួបនោះ លោក ស៊ី ជីនពីង អះអាងថា ទំនាក់ទំនងកម្ពុជា-ចិន មានភាពរឹងមាំ «ដូចផ្ទាំងថ្ម» និងបន្តជំរុញឱ្យប្រទេសទាំងពីរកសាង «សហគមន៍ជោគវាសនារួមគ្រប់រដូវកាល»។
ក្រៅពីកិច្ចសហប្រតិបត្តិការសេដ្ឋកិច្ច មេដឹកនាំកម្ពុជា និងចិនក៏បានពិភាក្សាពង្រឹងកិច្ចសហប្រតិបត្តិការផ្នែកសន្តិសុខ ការផ្លាស់ប្ដូរព័ត៌មានសម្ងាត់ ការផ្លាស់ប្ដូរទស្សនកិច្ចរវាងមន្ត្រីជាន់ខ្ពស់ និងការសម្របសម្រួលលើបញ្ហាអន្តរជាតិ ដែលភាគីទាំងពីរអះអាងថា នឹងបន្តគាំទ្រគ្នាទៅវិញទៅមកនៅលើឆាកអន្តរជាតិ។ ជាមួយគ្នានេះ គណបក្សប្រជាជនកម្ពុជា និងគណបក្សកុម្មុយនិស្តចិន ក៏បានចុះហត្ថលេខាលើអនុស្សរណៈយោគយល់គ្នាថ្មី ស្ដីពីការពង្រឹងទំនាក់ទំនងរវាងគណបក្សទាំងពីរ រួមទាំងការបណ្ដុះបណ្ដាលយុវជនគណបក្ស និងការពង្រីកកិច្ចសន្ទនានយោបាយ។
ទន្ទឹមមេដឹកនាំកម្ពុជាបង្ហាញពីការរឹតចំណងមិត្តភាព និងស្មោះស្ម័គ្រទុកចិត្តចិននេះ លោក ហ៊ុន សែន បានប្រែក្លាយកម្ពុជាឱ្យទៅទីជម្រកឧក្រិដ្ឋកម្មឆ្លងដែន ជាពិសេសអំពើតាមអនឡាញនៅកម្ពុជាដែលដំណើរការដោយឧក្រិដ្ឋជនចិនកំពុងរីកសាយភាពពេញប្រទេស។ ភ្នាក់ងារសារព័ត៌មានចិនស៊ីនហួឱ្យដឹងថា ក្នុងជំនួបជាមួយលោក ហ៊ុន សែន លោក ស៊ី ជីនពីង ក៏បានសន្យាថា នឹងបង្កើតភាពជាដៃគូយុទ្ធសាស្ត្រផ្នែកសន្តិសុខជាមួយកម្ពុជា។
ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍នៃរដ្ឋាភិបាលកម្ពុជាឯករាជ្យ ២៣ តុលា លោក អ៊ុំ សំអាន លើកឡើងថា ដំណើរទស្សនកិច្ចរបស់លោក ហ៊ុន សែន ទៅចិន លើកនេះភាគីចិនចំណេញទាំងផលប្រយោជន៍ផ្នែកភូមិសាស្ត្រនយោបាយ និងការពង្រីកឥទ្ធិពលកាន់តែខ្លាំងនៅកម្ពុជា។ លោកថា ចំណែកឯកម្ពុជាវិញនឹងបន្តក្លាយជា «កូនជឹង» ស្ថិតក្រោមឥទ្ធិពលចិន និងប្រឈមជាប់អន្ទាក់បំណុលចិនវ័ណ្ឌកដកខ្លួនមិនរួច។
លោក អ៊ុំ សំអាន បន្ថែមថា ចិនមិនចង់ឱ្យកម្ពុជាពង្រឹងទំនាក់ទំនងជាមួយបណ្ដាប្រទេសប្រជាធិបតេយ្យ និងលោកសេរីនោះទេ។ លោកយល់ថា ទីក្រុងប៉េកាំងនឹងបន្តប្រើប្រាស់កម្ពុជាជាឈ្នាន់ ដើម្បីពង្រីកឥទ្ធិពល និងបម្រើផលប្រយោជន៍ភូមិសាស្ត្រនយោបាយរបស់ខ្លួននៅក្នុងតំបន់។ លោកសង្កត់ធ្ងន់ថា ប្រសិនបើកម្ពុជាមានលទ្ធិប្រជាធិបតេយ្យពេញលេញ និងមានមេដឹកនាំចេះគិតគូរ ផលប្រយោជន៍ជាតិ សេដ្ឋកិច្ចកម្ពុជានឹងមានភាពរឹងមាំ ហើយរដ្ឋាភិបាលក៏មិនចាំបាច់ពឹងផ្អែកលើការស្នើសុំប្រាក់កម្ចី ឬជំនួយពីចិនដែលនាំឱ្យប្រជាជាតិខ្មែរអាម៉ាស់ដូចជាពេលនេះឡើយ។
លោក អ៊ុំ សំអាន៖ «លោក ហ៊ុន សែន គាត់ទៅណា គឺគាត់ដើរតែសុំទានគេអ៊ីចឹងហើយ។ ហើយធ្វើម៉េចអត់ងាកមកផ្លូវប្រជាធិបតេយ្យ គោរពសិទ្ធិមនុស្ស បោះឆ្នោតដោយសេរីយុត្តិធម៌ ដើម្បីពង្រឹងសេដ្ឋកិច្ចកម្ពុជាឱ្យអាចរស់ដោយខ្លួនឯងបាន ដោយមិនបាច់សុំគេ។ កាលណាយើងមានប្រជាធិបតេយ្យទៅ ប្រទេសលោកខាងលិចគេជួយទៅ ហើយយើងនាំទំនិញទៅអឺរ៉ុបមិនបាច់បង់ពន្ធ មកអាមេរិកអីមិនបាច់បង់ពន្ធអី ពេលហ្នឹងយើងអាចមានសេដ្ឋកិច្ចជឿនលឿន យើងមិនបាច់ទៅសុំពីចិននូវជំនួយ ឬក៏កម្ចី ហើយឱ្យចិនប្រើឥទ្ធិពលរបស់ខ្លួនមកលើកម្ពុជានោះទេ»។
ជុំវិញរឿងនេះដែរ ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា ដាស់តឿនដល់របបក្រុងភ្នំពេញបង្កើនការប្រុងប្រយ័ត្នខ្ពស់ក្នុងទំនាក់ទំនងជាមួយចិន។ លោកក៏មិនចង់ឃើញមេដឹកនាំបច្ចុប្បន្នបម្រើផលប្រយោជន៍ចិន និងកាប់សម្លាប់ធ្វើបាបប្រជាជនខ្មែររាប់លាននាក់ដូចសម័យមុនឡើយ។ លោក ស៊ឹង សែនករុណា បន្ថែមថា ក្នុងទំនាក់ទំនងកម្ពុជា និងចិនសព្វថ្ងៃនេះបានជះឥទ្ធិពលអវិជ្ជមាន និងបានបន្សល់កេរ្តិ៍ឈ្មោះអាក្រក់ជាច្រើននៅកម្ពុជា។ ក្នុងនោះដូចជាលំហូរឧក្រិដ្ឋជនចិនដែលចូលមកបង្កើតជម្រកឧក្រិដ្ឋកម្មឆបោកអនឡាញជាដើម។
លោក ស៊ឹង សែនករុណា បន្ថែមទៀតថា ក្រោយដំណើរទស្សនកិច្ចនេះកម្ពុជានឹងទទួលរងឥទ្ធិពលនយោបាយពីចិនបន្ថែមទៀត ដែលធ្វើឱ្យប្រជាធិបតេយ្យកាន់តែដុនដាប រីឯសំឡេងអ្នករិះគន់នឹងកាន់តែរងការបង្ក្រាបតាមយាយីពីរដ្ឋាភិបាលត្រកូល ហ៊ុន កាន់តែខ្លាំងឡើង។
លោក ស៊ឹង សែនករុណា៖ «ជាការបង្ហាញយ៉ាងច្បាស់ក្រឡែត ហើយវាធ្វើឱ្យពលរដ្ឋច្បាស់ជារស់នៅក្នុងរងទុក្ខ រស់ដោយគ្មានអំណាចគ្មានសិទ្ធិសេរីភាពទេ ពីព្រោះប្រទេសកុម្មុយនិស្តគេដឹកនាំតាមបែបគ្រប់គ្រងត្រួតត្រាទៅលើពលរដ្ឋ ដកហូតនូវសិទ្ធិរបស់ប្រជាពលរដ្ឋ មិនផ្ដល់នូវសិទ្ធិប្រជាពលរដ្ឋ ជាពិសេសសិទ្ធិផ្នែកនយោបាយហ្នឹងពេញលេញទេ ទាំងអ្នកនយោបាយក៏ពិបាកក្នុងការធ្វើកិច្ចការងារដែរ។ អញ្ចឹងការទៅពាក់ព័ន្ធជាមួយមេដឹកនាំកុម្មុយនិស្តហ្នឹង ច្បាស់ណាស់អ្វីដែលជាបញ្ហាគឺពលរដ្ឋនឹងរងទុក្ខហើយ និងសិទ្ធិសេរីភាពផ្សេងៗចំពោះអ្នកនយោបាយ សកម្មជនសង្គម សារព័ត៌មានឯករាជ្យអីផ្សេងៗច្បាស់ជារងសម្ពាធមិនខានឡើយ ហើយរូបភាពបែបនេះគឺជារូបភាពមួយដែលធ្វើឲ្យខ្ញុំកាន់តែមានការព្រួយបារម្ភយ៉ាងខ្លាំងអំពីស្ថានភាពនៅក្នុងប្រទេសកម្ពុជារបស់យើង»។
អ្នកឃ្លាំមើល និងមន្ត្រីបក្សប្រឆាំងលើកឡើងថា ការពង្រឹងទំនាក់ទំនងជិតស្និទ្ធជាមួយប្រទេសចិនកុម្មុយនិស្ត មិនបាននាំមកនូវផលប្រយោជន៍សេដ្ឋកិច្ចជាដុំកំភួនសម្រាប់កម្ពុជានោះទេ។ ផ្ទុយទៅវិញ ពួកគាត់ថា កម្ពុជារងឥទ្ធិពល និងការពឹងផ្អែកផ្នែកនយោបាយ ជាប់បំណុលចិនកាន់តែច្រើន ខណៈស្ថានភាពប្រជាធិបតេយ្យ និងសិទ្ធិមនុស្សក៏បន្តមានរូបភាពកាន់តែអាក្រក់។ ពួកគាត់ចង់ឃើញរដ្ឋាភិបាលត្រកូល «ហ៊ុន» ដោះស្រាយវិបត្តិនយោបាយក្នុងប្រទេស ស្ដារលទ្ធិប្រជាធិបតេយ្យ និងនីតិរដ្ឋ ព្រមទាំងពង្រឹងទំនាក់ទំនងប្រកបដោយតុល្យភាពជាមួយបណ្ដាប្រទេសលោកសេរី ដើម្បីទាក់ទាញការវិនិយោគ បង្កើនឱកាសពាណិជ្ជកម្ម ជាងជាការផ្ដេកផ្ដួលខ្លាំង និងពឹងដង្ហើមចិនដើម្បីរស៕
